৬. সন্দকসুত্তৰণ্ণনা

২২৩. দেৰেন ৰস্সেন কতো সোব্ভো দেৰকতসোব্ভো. তেনাহ ‘‘ৰস্সো…পে… রহদো’’তি. গুহাতি পংসুগুহা পাসাণগুহা মিস্সকগুহাতি তিস্সো গুহা. তত্থ পংসুগুহা উদকমুত্তট্ঠানে অহোসি নিন্নট্ঠানং পন উদকেন অজ্ঝোত্থতং. উমঙ্গং কত্ৰাতি হেট্ঠা সুদুগ্গং কত্ৰা. অনমতগ্গিযং পচ্চৰেক্খিত্ৰাতি ‘‘ন খো সো সত্তাৰাসো সুলভরূপো, যো ইমিনা দীঘেন অদ্ধুনা অনাৰুট্ঠপুব্বো’’তিআদিনা (ম. নি. ১.১৬০) ইদঞ্চ তল়াকং মযা ৰুত্থপুব্বং ভৰিস্সতি, তম্পি ঠানং সো চ অত্তভাৰো অপঞ্ঞত্তিকভাৰং গতোতি এৰং অনমতগ্গিযং পচ্চৰেক্খিত্ৰা তাদিসং ঠানং গন্তুং ৰট্টতি. ইমিনা নযেন সমুদ্দপব্বতদস্সনাদীসুপি পচ্চৰেক্খণাৰিধি ৰেদিতব্বো.

উচ্চং নদমানাযাতি উচ্চং কত্ৰা সদ্দং করোন্তিযা কামস্সাদভৰস্সাদাদিৰত্থুন্তি ‘‘অযঞ্চ অযঞ্চ কামো ইট্ঠো কন্তো মনাপো, অসুকো ভৰো ইট্ঠো কন্তো মনাপো, এৰমযং লোকো পিযেহি পিযতরো’’তি এৰং কামস্সাদভৰস্সাদলোকস্সাদাদিসঙ্খাতং ৰত্থুং. দুগ্গতিতো সংসারতো চ নিয্যাতি এতেনাতি নিয্যানং, সগ্গমগ্গো মোক্খমগ্গো চ, তং নিয্যানং অরহতি, নিয্যানে ৰা নিযুত্তাতি নিয্যানিকা, নিয্যানং ৰা ফলং এতিস্সা অত্থীতি নিয্যানিকা, ৰচীদুচ্চরিতাদিসংকিলেসতো নিয্যাতীতি ৰা নিয্যানীযা, ঈ-কারস্স রস্সত্তং য-কারস্স চ ক-কারং কত্ৰা নিয্যানিকা, চেতনায সদ্ধিং সম্ফপ্পলাপা ৰেরমণি. তপ্পটিপক্খতো অনিয্যানিকা, তস্সা ভাৰো অনিয্যানিকত্তং, তস্মা অনিয্যানিকত্তা. তিরচ্ছানভূতাতি তিরোকরণভূতা. গেহস্সিতকথাতি কামপটিসংযুত্তকথা. কম্মট্ঠানভাৰেতি অনিচ্চতাপটিসংযুত্তচতুসচ্চকম্মট্ঠানভাৰে. সহ অত্থেনাতি সাত্থকং, হিতপটিসংযুত্তন্তি অত্থো. ৰিসিখাতি ঘরসন্নিৰেসো, ৰিসিখাগহণেন চ তন্নিৰাসিনো গহিতা ‘‘গামো আগতো’’তিআদীসু (সারত্থ. টী. ১.আচরিযপরম্পরকথাৰণ্ণনা) ৰিয. তেনেৰাহ ‘‘সূরা সমত্থা’’তি ‘‘সদ্ধা পসন্না’’তি চ. কুম্ভট্ঠানপ্পদেসেন কুম্ভদাসিযো ৰুত্তাতি আহ ‘‘কুম্ভদাসিকথা ৰা’’তি.

২২৮. ৰোহারো ৰিয তেসং তথা ৰোহারমত্তং গহেত্ৰা ৰুত্তং ‘‘ব্রহ্মচরিযৰাসে’’তি. অকতাতি সমেন, ৰিসমেন ৰা কেনচি হেতুনা ন কতা ন ৰিহিতা. কতৰিধো করণৰিধি নত্থি এতেসন্তি অকটৰিধা. পদদ্ৰযেনপি লোকে কেনচি হেতুপচ্চযেন নেসং অনিব্বত্ততং দস্সেতি. ইদ্ধিযাপি ন নিম্মিতাতি কস্সচি ইদ্ধিমতো চেতোৰসিপ্পত্তস্স দেৰস্স, ইস্সরাদিনো ৰা ইদ্ধিযাপি ন নিম্মিতা. অনিম্মাতাতি কস্সচি অনিম্মাপিতা. রূপাদিজনকভাৰন্তি রূপসদ্দাদীনং পচ্চযভাৰং, রূপাদযোপি পথৰিযাদীহি অপ্পটিবদ্ধৰুত্তিকাতি তস্স অধিপ্পাযো. যথা পব্বতকূটং কেনচি অনিব্বত্তিতং কস্সচি চ অনিব্বত্তনকং, এৰমেতেপীতি আহ ‘‘পব্বতকূটা ৰিয ঠিতাতি কূটট্ঠা’’তি. যমিদং বীজতো অঙ্কুরাদি জাযতীতি ৰুচ্চতি, তং ৰিজ্জমানমেৰ ততো নিক্খমতি নাৰিজ্জমানং, অঞ্ঞথা অঞ্ঞতোপি অঞ্ঞস্স উপলদ্ধি সিযাতি অধিপ্পাযো. এৰং ঠিতাতি এৰং নিব্বিকারা ঠিতা. উভযেনপীতি অত্থদ্ৰযেনপীতি ৰদন্তি. ‘‘কূটট্ঠা এসিকট্ঠাযিট্ঠিতা’’তি পদদ্ৰযেনপি. তেসং সত্তন্নং কাযানং. ঠিতত্তাতি নিব্বিকারাভাৰেন ঠিতত্তা. ন চলন্তীতি ৰিকারং নাপজ্জন্তি. ৰিকারাভাৰতো হি তেসং সত্তন্নং কাযানং এসিকট্ঠাযিট্ঠিততা. অনিঞ্জনঞ্চ অত্থতো পকতিযা অৰট্ঠানমেৰাতি দস্সেতুং ‘‘ন ৰিপরিণামেন্তী’’তি ৰুত্তং. তথা অৰিপরিণামধম্মত্তা এৰ তে অঞ্ঞমঞ্ঞং ন ব্যাবাধেন্তি. সতি হি ৰিকারং আপাদেতব্বতায ব্যাবাধকতাপি সিযা, তথা অনুগ্গহেতব্বতায অনুগ্গাহকতাতি তদভাৰং দস্সেতুং পাল়িযং ‘‘নাল’’ন্তিআদি ৰুত্তং.

পথৰী এৰ কাযেকদেসত্তা পথৰীকাযো. হন্তুং ৰা ঘাতেতুং ৰা সমত্থো নাম নত্থি জীৰসত্তমানং কাযানং নিচ্চতায নিব্বিকারভাৰতো, এতেনেৰ নেসমহন্তব্বতা অঘাতেতব্বতা অত্থতো ৰুত্তাযেৰাতি দট্ঠব্বা. তথা হি ৰুত্তং ‘‘সত্তন্নংত্ৰেৰ কাযান’’ন্তিআদি. সোতুং ৰা সাৰেতুং ৰা সমত্থো নাম নত্থীতি পচ্চেকং নেসং সৰনেসু অসমত্থত্তা তদেকদেসাদীসুপি অসমত্থতং দীপেতি. যদি কোচি হন্তা নত্থি, কথং সত্থপ্পহারোতি আহ ‘‘যথা মুগ্গরাসিআদীসূ’’তিআদি. কেৰলং সঞ্ঞামত্তমেৰ হোতি, হননঘাতনাদি পন পরমত্থতো নত্থেৰ কাযানং অৰিকোপনীযভাৰতোতি অধিপ্পাযো. কেৰলং তক্কমত্তেন নিরত্থকং দিট্ঠিং দীপেতীতি এতেন যস্মা তক্কিকা নিরঙ্কুসতায পরিকপ্পনস্স যং কিঞ্চি অত্তনা পরিকপ্পিতং সারতো মঞ্ঞমানা তথেৰ অভিনিৰিস্স তক্কদিট্ঠিগ্গাহং গণ্হন্তি, তস্মা ন তেসং দিট্ঠিৰত্থুস্মিং ৰিঞ্ঞূহি ৰিচারণা কত্তব্বাতি দস্সেতি. কেচীতি সারসমাসাচরিযা. পঞ্চিন্দ্রিযৰসেনাতি পঞ্চরূপিন্দ্রিযৰসেন. কম্মন্তি লদ্ধি কম্মভাৰেন সুপাকটত্তা. অৰঙ্ককথাতারণাদিকা দ্ৰাসট্ঠি পটিপদা. একস্মিং কপ্পেতি একস্মিং মহাকপ্পে.

পুরিসভূমিযোতি পধানপুগ্গলেন নিদ্দেসো, ইত্থীনম্পেতা ভূমিযো ইচ্ছন্তেৰ. ভিক্খু চ পন্নকোতিআদি তেসং পাল়িযেৰ. তত্থ পন্নকোতি ভিক্খায ৰিচরণকোতি ৰদন্তি, তেসং ৰা পটিপত্তিং পটিপন্নকো. জিনোতি জিণ্ণো, জরাৰসেন নিহীনধাতুকোতি ৰদন্তি, অত্তনো ৰা পটিপত্তিযা পটিপক্খং জিনিত্ৰা ঠিতো. সো কির তথাভূতো কস্সচিপি ধম্মং ন কথেতি, তেনাহ ‘‘ন কিঞ্চি আহা’’তি. অলাভিন্তি ‘‘সো ন কুম্ভিমুখা পটিগ্গণ্হতী’’তিআদিনা (দী. নি. ১.৩৯৪) নযেন ৰুত্তঅলাভহেতুসমাযোগেন অলাভিং. ততো এৰ জিঘচ্ছাদুব্বলপরেততায সযনপরাযণং সমণং পন্নভূমীতি ৰদতি.

আজীৰৰুত্তিসতানীতি সত্তানং আজীৰভূতানি জীৰিকাৰুত্তিসতানি. পসুগ্গহণেন এল়কজাতি গহিতা, মিগগ্গহণেন রুরুগৰযাদিসব্বমিগজাতি. বহূ দেৰাতি চাতুমহারাজিকাদিব্রহ্মকাযিকাদিৰসেন নেসং অন্তরভেদৰসেন বহূ দেৰা. তত্থ চাতুমহারাজিকানং একচ্চো অন্তরভেদো ‘‘মহাসমযসুত্তেন’’ (দী. নি. ২.৩৩১ আদযো) দীপেতব্বো. মানুসাপি অনন্তাতি দীপদেসকুলৰংসাজীৰাদিৰিভাগৰসেন মানুসাপি অনন্তভেদা. পিসাচা এৰ পেসাচা, তে অপরপেতাদযো মহন্তা ৰেদিতব্বা.

ছদ্দন্তদহমন্দাকিনিযো কুল়ীরমুচলিন্দনামেন ৰদতি. গণ্ঠিকাতি পব্বগণ্ঠিকা. পণ্ডিতোপি…পে… উদ্ধং ন গচ্ছতি, কস্মা? সত্তানং সংসরণকালস্স নিযতভাৰতো.

অপরিপক্কং সংসরণনিমিত্তং সীলাদিনা পরিপাচেতি নাম সীঘংযেৰ ৰিসুদ্ধিপ্পত্তিযা. পরিপক্কং ফুস্স ফুস্স পত্ৰা পত্ৰা পরিপক্কভাৰাপাদনেন ব্যন্তিং করোতি নাম. সুত্তগুল়েতি সুত্তৰট্টিযং. নিব্বেঠিযমানমেৰ পলেতীতি উপমায সত্তানং সংসারো অনুক্কমেন খীযতেৰ, ন তস্স ৰদ্ধীতি দস্সেতি পরিচ্ছিন্নরূপত্তা.

২২৯. নিযতিৰাদে পক্খিপন্তোতি সব্বঞ্ঞুতং পটিজানিত্ৰাপি পদেসঞ্ঞুতায অসম্পাযমানো তত্থ অত্তনো অঞ্ঞাণকিরিযং পরিহরিতুং অসক্কোন্তো চ ‘‘এৰমেসা নিযতী’’তি নিযতিৰাদে পক্খিপন্তো.

২৩০. ধম্মকথায অপস্সযভূতো অনুস্সৰো এতস্স অত্থীতি অনুস্সৰী, তেনেৰস্স অপস্সযৰাদং দস্সেতুং ‘‘অনুস্সৰনিস্সিতো’’তি আহ. সৰনং সচ্চতোতি যং কিঞ্চি অনুস্সৰং, তং সৰনং সচ্চন্তি গহেত্ৰা ঠিতো. পিটকসম্পদাযাতি গন্থসম্পাদনেন, তাদিসং গন্থং পগুণং ৰাচুগ্গতং কত্ৰা তং নিস্সায ধম্মং কথেতি. তেনাহ ‘‘ৰগ্গপণ্ণাসকাযা’’তিআদি.

২৩২. মন্দপঞ্ঞোতি পরিত্তপঞ্ঞো. মোমূহোতি সম্মুয্হকো. ‘‘এৰন্তিপি মে নো’’তিআদিনা ৰিৰিধো নানপ্পকারো খেপো ৰাচায পরৰাদানং খীপনং ৰাচাৰিক্খেপো, তং ৰাচাৰিক্খেপং, ন মরতি ন পচ্ছিজ্জতি যথাৰুত্তো ৰাদৰিক্খেপো এতাযাতি অমরা, তত্থ পৰত্তা দিট্ঠি অমরাৰিক্খেপো, তং অমরাৰিক্খেপং. অপরিযন্তৰিক্খেপন্তি ‘‘এৰম্পি মে নো’’তিআদিনা পুচ্ছিতস্স অপরিযোসাপনৰসেন ৰিক্খেপং. ইতো চিতো চ সন্ধাৰতি একস্মিং সভাৰে অনৰট্ঠানতো. গাহং ন উপগচ্ছতীতি মিচ্ছাগাহতায উত্তরৰিধানায পুরিমপক্খং ঠপেত্ৰা গাহং ন উপগচ্ছতি. অমরাসদিসায অমরায ৰিক্খেপোতি অমরাৰিক্খেপো.

ইদং কুসলন্তি এত্থ ইতি-সদ্দো পকারত্থো, ইমিনা পকারেনাতি অত্থো. অমরাৰিক্খেপিকো যথা কুসলে, এৰং অঞ্ঞস্মিং যং কিঞ্চি কেনচি পুচ্ছিতং অত্থং অত্তনো অরুচ্চনতায ‘‘এৰন্তিপি মে নো’’তিআদিনা তত্থ তত্থ ৰিক্খেপঞ্ঞেৰ আপজ্জতি, তস্মা ‘‘এৰন্তিপি মে নো’’তিআদি তত্থ তত্থ পুচ্ছিতাকারপটিসেধনৰসেন ৰিক্খিপনাকারদস্সনং. ননু চেত্থ ৰিক্খেপৰাদিনো ৰিক্খেপপক্খস্স অননুজাননং ৰিক্খেপপক্খে অৰট্ঠানং যুত্তন্তি? ন, তত্থাপি তস্স সম্মূল়্হস্স পটিক্খেপৰসেনেৰ ৰিক্খেপৰাদস্স পৰত্তনতো. তেন ৰুত্তং ‘‘নো’’তি. তথা হি সঞ্চযো বেলট্ঠপুত্তো রঞ্ঞা অজাতসত্তুনা সন্দিট্ঠিকং সামঞ্ঞফলং পুট্ঠো পরলোকত্তিকাদীনং পটিসেধনমুখেন ৰিক্খেপং ব্যাকাসি.

এত্থাহ – ‘‘ননু চাযং সব্বোপি অমরাৰিক্খেপিকো কুসলাদযো ধম্মে পরলোকত্তিকাদীনি চ যথাভূতং অনৰবুজ্ঝমানো তত্থ তত্থ পঞ্হং পুট্ঠো সমানো পুচ্ছায ৰিক্খেপমত্তং আপজ্জতি, তস্স কথং দিট্ঠিগতভাৰো. ন হি অৰত্তুকামস্স ৰিয পুচ্ছিতমত্থং অজানন্তস্স ৰিক্খেপকরণমত্তেন তস্স দিট্ঠিগতিকতা যুত্তা’’তি? ৰুচ্চতে – ন হেৰ খো পুচ্ছায ৰিক্খেপকরণমত্তেন তস্স দিট্ঠিগতিকতা, অথ খো মিচ্ছাভিনিৰেসৰসেন. সস্সতাভিনিৰেসেন মিচ্ছাভিনিৰিট্ঠোযেৰ হি পুগ্গলো মন্দবুদ্ধিতায কুসলাদিধম্মে পরলোকত্তিকাদীনি চ যাথাৰতো অপ্পটিপজ্জমানো অত্তনা অৰিঞ্ঞাতস্স অত্থস্স পরং ৰিঞ্ঞাপেতুং অসক্কুণেয্যতায মুসাৰাদভযেন চ ৰিক্খেপং আপজ্জতীতি. অথ ৰা পুঞ্ঞপাপানং তব্বিপাকানঞ্চ অনৰবোধেন অসদ্দহনেন চ তব্বিসযায পুচ্ছায ৰিক্খেপকরণংযেৰ সুন্দরন্তি খন্তিং রুচিং উপ্পাদেত্ৰা অভিনিৰিসন্তস্স উপ্পন্না ৰিসুংযেৰ সা একা দিট্ঠি সত্তভঙ্গদিট্ঠি ৰিযাতি দট্ঠব্বা, ইন্দ্রিযবদ্ধতো চ ততিযট্ঠানভাৰে দস্সিতো.

২৩৪. সন্নিধিকারকং কামেতি এত্থ অনিন্দ্রিযবদ্ধানি অধিপ্পেতানীতি তিলতণ্ডুলাদিগ্গহণং, তস্স লোকস্স অপ্পসাদপরিহারত্থং কদাচি তণ্ডুলনাল়িআদিসঙ্গহণকরণং সন্ধায ৰুত্তং ‘‘তিলতণ্ডুলাদযো পঞ্ঞাযন্তী’’তি.

২৩৬. আজীৰকা মতা নামাতি ইমে আজীৰকা সব্বসো সম্মাপটিপত্তিরহিতা মিচ্ছা এৰ চ পটিপজ্জমানা অধিসীলসঙ্খাতস্স সীলজীৰিতস্স অভাৰেন মতা নাম. পুত্তমতাতি মতপুত্তা. সমণে গোতমে ব্রহ্মচরিযৰাসো অত্থীতি সমণং এৰ গোতমং পরিসুদ্ধো সুপরিপুণ্ণো তক্করস্স সম্মা দুক্খক্খযাৰহো ব্রহ্মচরিযৰাসো অত্থি. এতেনেত্থ ধম্মসুধম্মতাদিদীপনেন বুদ্ধসুবুদ্ধতঞ্চ দীপেতি, অঞ্ঞত্থ নত্থীতি ইমিনা বাহিরকেসু তস্স অভাৰং. সেসং সুৰিঞ্ঞেয্যমেৰ.

সন্দকসুত্তৰণ্ণনায লীনত্থপ্পকাসনা সমত্তা.