৩. মহাৰচ্ছসুত্তৰণ্ণনা

১৯৩. সহ কথা এতস্স অত্থীতি সহকথী, ‘‘মযং পুচ্ছাৰসেন তুম্হে ৰিস্সজ্জনৰসেনা’’তি এৰং সহপৰত্তকথোতি অত্থো. এতস্সেৰ কথিতানি, তত্থ পঠমে ৰিজ্জাত্তযং দেসিতং, দুতিযে অগ্গিনা দস্সিতন্তি তেৰিজ্জৰচ্ছসুত্তং অগ্গিৰচ্ছসুত্তন্তি নামং ৰিসেসেত্ৰা ৰুত্তং. সীঘং লদ্ধিং ন ৰিস্সজ্জেন্তি, যস্মা সঙ্খারানং নিযতোযং ৰিনাসো অনঞ্ঞসমুপ্পাদো, হেতুসমুপ্পন্নাপি ন চিরেন নিজ্ঝানং খমন্তি, ন লহুং. তেনাহ ‘‘ৰসাতেল …পে… সুজ্ঝন্তী’’তি. পচ্ছিমগমনং ঞাণস্স পরিপাকং গতত্তা. যট্ঠিং আলম্বিত্ৰা উদকং তরিতুং ওতরন্তো পুরিসো ‘‘যট্ঠিং ওতরিত্ৰা উদকে পতমানো’’তি ৰুত্তো. কম্মপথৰসেন ৰিত্থারদেসনন্তি সংখিত্তদেসনং উপাদায ৰুত্তং. তেনাহ ‘‘মূলৰসেন চেত্থা’’তিআদি. ৰিত্থারসদিসাতি কম্মপথৰসেন ইধ দেসিতদেসনাৰ মূলৰসেন দেসিতদেসনং উপাদায ৰিত্থারসদিসা. ৰিত্থারদেসনা নাম নত্থীতি ন কেৰলং অযমেৰ, অথ খো সব্বাপি বুদ্ধানং নিপ্পরিযাযেন উজুকেন নিরৰসেসতো ৰিত্থারদেসনা নাম নত্থি দেসনাঞাণস্স মহাৰিসযতায করণসম্পত্তিযা চ তজ্জায মহানুভাৰত্তা সব্বঞ্ঞুতঞ্ঞাণস্স. সব্বঞ্ঞুতঞ্ঞাণসমঙ্গিতায হি অৰসেসপটিসম্ভিদানুভাৰিতায অপরিমিতকালসম্ভতঞাণসম্ভারসমুদাগতায কদাচিপি পরিক্খযানরহায অনঞ্ঞসাধারণায পটিভানপটিসম্ভিদায পহূতজিৰ্হাদিতদনুরূপরূপকাযসম্পত্তিসম্পদায ৰিত্থারিযমানা ভগৰতো দেসনা কথং পরিমিতা পরিচ্ছিন্না ভৰেয্য, মহাকারুণিকতায পন ভগৰা ৰেনেয্যজ্ঝাসযানুরূপং তত্থ তত্থ পরিমিতং পরিচ্ছিন্নং কত্ৰা নিট্ঠপেতি. অযঞ্চ অত্থো মহাসীহনাদসুত্তেন (ম. নি. ১.১৪৬ আদযো) দীপেতব্বো. সব্বং সংখিত্তমেৰ অত্তজ্ঝাসযৰসেন অকথেত্ৰা বোধনেয্যপুগ্গলজ্ঝাসযৰসেন দেসনায নিট্ঠাপিতত্তা. ন চেত্থ ধম্মসাসনৰিরোধো পরিযাযং অনিস্সায যথাধম্মং ধম্মানং বোধিতত্তা সব্বলহুত্তা চাতি.

১৯৪. সত্ত ধম্মা কামাৰচরা সম্পত্তসমাদানৰিরতীনং ইধাধিপ্পেতত্তা.

অনিযমেত্ৰাতি ‘‘সম্মাসম্বুদ্ধো, সাৰকো’’তি ৰা নিযমং ৰিসেসেন অকত্ৰা. অত্তানমেৰ…পে… ৰেদিতব্বং, তথা হি পরিব্বাজকো ‘‘তিট্ঠতু ভৰং গোতমো’’তি আহ.

১৯৫. সত্থাৰ অরহা হোতি পটিপত্তিযা পারিপূরিভাৰতো. তস্মিং ব্যাকতেতি তস্মিং ‘‘একভিক্খুপি সাৰকো’’তিআদিনা সুট্ঠু পঞ্হে কথিতে.

১৯৬. সম্পাদকোতি পটিপত্তিসম্পাদকো.

১৯৭. সেখায ৰিজ্জাযাতি সেখলক্খণপ্পত্তায মগ্গপঞ্ঞায সাতিসযং কত্ৰা করণৰসেন ৰুত্তা, ফলপঞ্ঞা পন তায পত্তব্বত্তা কম্মভাৰেন ৰুত্তা. তেনাহ ‘‘হেট্ঠিমফলত্তযং পত্তব্ব’’ন্তি. ইমং পনেত্থ অৰিপরীতমত্থং পাল়িতো এৰ ৰিঞ্ঞাযমানং অপ্পটিৰিজ্ঝনতো ৰিতণ্ডৰাদী ‘‘যাৰতকং সেখেন পত্তব্বং, অনুপ্পত্তং তং মযা’’তি ৰচনলেসং গহেত্ৰা ‘‘অরহত্তমগ্গোপি অনেন পত্তোযেৰা’’তি ৰদতি. এৰন্তি ইদানি ৰুচ্চমানায গাথায.

কিলেসানি পহায পঞ্চাতি পঞ্চোরম্ভাগিযসংযোজনসঙ্খাতে সংকিলেসে পহায পজহিত্ৰা, পহানহেতু ৰা. পরিপুণ্ণসেখোতি সব্বসো ৰড্ঢিতসেখধম্মো. অপরিহানধম্মোতি অপরিহানসভাৰো. ন হি যস্স ফাতিগতেহি সীলাদিধম্মেহি পরিহানি অত্থি, সমাধিম্হি পরিপূরকারিতায চেতোৰসিপ্পত্তো. তেনাহ ‘‘সমাহিতিন্দ্রিযো’’তি. অপরিহানধম্মত্তাৰ ঠিতত্তো.

অনাগামিনা হি অসেখভাৰাৰহা ধম্মা পরিপূরেতব্বা, ন সেখভাৰাৰহাতি সো একন্তপরিপুণ্ণে সেখো ৰুত্তো. এতং ন বুদ্ধৰচনন্তি ‘‘মগ্গো বহুচিত্তক্খণিকো’’তি এতং ৰচনং ন বুদ্ধৰচনং অনন্তরেকন্তৰিপাকদানতো, বহুক্খত্তুং পৰত্তনে পযোজনাভাৰতো চ লোকুত্তরকুসলস্স, ‘‘সমাধিমানন্তরিকঞ্ঞমাহু (খু. পা. ৬.৫; সু. নি. ২২৮), ন পারং দিগুণং যন্তী’’তি (সু. নি. ৭১৯) এৰমাদীনি সুত্তপদানি এতস্সত্থসাধকানি. ওরম্ভাগিযসংযোজনপ্পহানেন সেক্খধম্মপরিপূরিভাৰস্স ৰুত্ততায অত্থো তৰ ৰচনেন ৰিরুজ্ঝতীতি. অস্স আযস্মতো ৰচ্ছস্স.

১৯৮. অভিঞ্ঞা ৰা কারণন্তি যঞ্হি তং তত্র তত্র সক্খিভব্বতাসঙ্খাতং ইদ্ধিৰিধপচ্চনুভৰনাদি, তস্স অভিঞ্ঞা কারণং. অথ ইদ্ধিৰিধপচ্চনুভৰনাদি অভিঞ্ঞা, এৰং সতি অভিঞ্ঞাপাদকজ্ঝানং কারণং. অৰসানে ছট্ঠাভিঞ্ঞায পন অরহত্তং. এত্থ চ যস্মা পঠমসুত্তে আসৰক্খযো অধিপ্পেতো, আসৰা খীণা এৰ, ন পুন খেপেতব্বা, তস্মা তত্থ ‘‘যাৰদেৰা’’তি ন ৰুত্তং. ইধ ফলসমাপত্তি অধিপ্পেতা, সা চ পুনপ্পুনং সমাপজ্জীযতি, তস্মা ‘‘যাৰদেৰা’’তি ৰুত্তং. ততো এৰ হি ‘‘অরহত্তং ৰা কারণ’’ন্তি ৰুত্তং. তঞ্হি ‘‘কুদাস্সু নামাহং তদাযতনং উপসম্পজ্জ ৰিহরিস্সামি, যদরিযা এতরহি উপসম্পজ্জ ৰিহরন্তী’’তি (ম. নি. ১.৪৬৫; ৩.৩০৭) অনুত্তরেসু ৰিমোক্খেসু পিহং উপট্ঠপেত্ৰা অভিঞ্ঞা নিব্বত্তেন্তস্স কারণং, তযিদং সব্বসাধারণং ন হোতীতি সাধারণৰসেন নং দস্সেন্তো ‘‘অরহত্তস্স ৰিপস্সনা ৰা’’তি আহ.

২০০. পরিচরন্তি নাম ৰিপ্পকতব্রহ্মচরিযৰাসত্তা. পরিচিণ্ণো হোতি সাৰকেন নাম সত্থু ধম্মে কত্তব্বা পরিচরিযা সম্মদেৰ নিট্ঠাপিতত্তা. তেনাহ ‘‘ইতি…পে… থেরো এৰমাহা’’তি. তেসং গুণানন্তি তেসং অসেক্খগুণানং. সেসং সুৰিঞ্ঞেয্যমেৰ.

মহাৰচ্ছসুত্তৰণ্ণনায লীনত্থপ্পকাসনা সমত্তা.