২. অগ্গিৰচ্ছসুত্তৰণ্ণনা

১৮৭. লোকস্স সস্সততাপৰত্তিপটিক্খেপৰসেন পৰত্তো ৰাদো উচ্ছেদৰাদো এৰ হোতীতি সস্সতগ্গাহাভাৰে উচ্ছেদগ্গাহভাৰতো পুন পরিব্বাজকেন ‘‘অসস্সতো লোকো’’তি ৰদন্তেন উচ্ছেদগ্গাহো পুচ্ছিতো, ভগৰতাপি সো এৰ পটিক্খিত্তোতি আহ ‘‘দুতিযে নাহং উচ্ছেদদিট্ঠিকো’’তি. অন্তানন্তিকাদিৰসেনাতি এত্থ অন্তানন্তিকগ্গহণেন অন্তৰা লোকো অনন্তৰা লোকোতি ইমং ৰাদদ্ৰযমাহ. আদি-সদ্দেন ‘‘তং জীৰং তং সরীর’’ন্তিআদিৰাদচতুক্কং সঙ্গণ্হাতি, ইতরং পন দ্ৰযং সরূপেনেৰ গহিতন্তি. পটিক্খেপো ৰেদিতব্বোতি ‘‘ততিযে নাহং অন্তৰাদিট্ঠিকো, চতুত্থে নাহং অনন্তৰাদিট্ঠিকো’’তি এৰমাদিনা পটিক্খেপো ৰেদিতব্বো. ‘‘হোতি তথাগতো পরং মরণা’’তি অযম্পি সস্সতৰাদো, সো চ খো অপরন্তকপ্পিকৰসেন, ‘‘সস্সতো লোকো’’তি পন পুব্বন্তকপ্পিকৰসেনাতি অযমেতেসং ৰিসেসো. ‘‘ন হোতি তথাগতো পরং মরণা’’তি অযম্পি উচ্ছেদৰাদো, সো চ খো সত্তৰসেন, ‘‘অসস্সতো লোকো’’তি পন সত্তসঙ্খারৰসেনাতি ৰদন্তি.

১৮৯. সপ্পতিভযং উপ্পজ্জনতো সহ দুক্খেনাতি সদুক্খং. তেনাহ ‘‘কিলেসদুক্খেনা’’তিআদি. তেসংযেৰাতি কিলেসদুক্খৰিপাকদুক্খানংযেৰ. সউপঘাতকন্তি সবাধং. সউপাযাসন্তি সপরিস্সমং সউপতাপং সপীল়ং. সপরিল়াহন্তি সদরথং.

কিঞ্চি দিট্ঠিগতন্তি ইমা তাৰ অট্ঠ দিট্ঠিযো মা হোন্তু, অত্থি পন, ভো গোতম, যং কিঞ্চি দিট্ঠিগতং গহিতং. ন হি তায দিট্ঠিযা ৰিনা কঞ্চি সমযং পৰত্তেতুং যুজ্জতীতি অধিপ্পাযেন পুচ্ছতি. অপৰিদ্ধন্তি সমুচ্ছেদপ্পহানৰসেন ছড্ডিতং. পঞ্ঞায দিট্ঠন্তি ৰিপস্সনাপঞ্ঞাসহিতায মগ্গপঞ্ঞায ভগৰতা পটিৰিদ্ধং. যত্থ উপ্পজ্জন্তি, তং সত্তং মথেন্তি সম্মদ্দন্তীতি মথিতাতি আহ ‘‘মথিতানন্তি তেসংযেৰ ৰেৰচন’’ন্তি. কঞ্চি ধম্মন্তি রূপধম্মং অরূপধম্মং ৰা. অনুপাদিযিত্ৰাতি অগ্গহেত্ৰা.

১৯০. ন উপেতীতি সঙ্খং ন গচ্ছতীতি অত্থোতি আহ ‘‘ন যুজ্জতী’’তি. অনুজানিতব্বং সিযা অনুপাদাৰিমুত্তস্স কঞ্চিপি উপ্পত্তিযা অভাৰতো. ‘‘এৰং ৰিমুত্তচিত্তো ন উপপজ্জতী’’তি কামঞ্চেতং সভাৰপৰেদনং পরিনিব্বানং, একে পন উচ্ছেদৰাদিনো ‘‘মযম্পি ‘সত্তো আযতিং ন উপপজ্জতী’তি ৰদাম, সমণো গোতমোপি তথা ৰদতী’’তি উচ্ছেদভাৰেযেৰ পতিট্ঠহিস্সন্তি, তস্মা ভগৰা ‘‘ন উপপজ্জতীতি খো ৰচ্ছ ন উপেতী’’তি আহ. ‘‘উপপজ্জতী’’তি পন ৰুত্তে সস্সতমেৰ গণ্হেয্যাতি যোজনা. সেসদ্ৰযেপি এসেৰ নযো. অপ্পতিট্ঠোতি উচ্ছেদৰাদাদিৰসেন পতিট্ঠারহিতো. অনালম্বোতি তেসংযেৰ ৰাদানং ওলম্বারম্মণস্স অভাৰেন অনালম্বো. সুখপৰেসনট্ঠানন্তি তেসঞ্ঞেৰ ৰাদানং সুখপৰেসনোকাসং মা লভতূতি. অননুঞ্ঞায ঠত্ৰাতি ‘‘ন উপপজ্জতী’’তিআদিনা অনুজানিতব্বায পটিঞ্ঞায ঠানহেতু. অনুঞ্ঞম্পীতি অনুজানিতব্বম্পি দুতিযপঞ্হং পটিক্খিপি. পরিযত্তো পন ধম্মো অত্থতো পচ্চযাকারো এৰাতি আহ ‘‘ধম্মোতি পচ্চযাকারধম্মো’’তি. অঞ্ঞত্থ পযোগেনাতি ইমম্হা নিয্যানিকসাসনা অঞ্ঞস্মিং মিচ্ছাসমযে পৰত্তপ্পযোগেন, অনিয্যানিকং ৰিৰিধং মিচ্ছাপটিপত্তিং পটিপজ্জন্তেনাতি অত্থো. ‘‘অঞ্ঞৰাদিযকেনা’’তিপি পাঠো, পচ্চযাকারতো অঞ্ঞাকারদীপকআচরিযৰাদং পগ্গয্হ তিট্ঠন্তেনাতি অত্থো.

১৯১. অপ্পচ্চযোতি অনুপাদানো, নিরিন্ধনোতি অত্থো.

১৯২. যেন রূপেনাতি যেন ভূতুপাদাদিভেদেন রূপধম্মেন. তং রূপং তপ্পটিবদ্ধসংযোজনপ্পহানেন খীণাসৰ-তথাগতস্স পহীনং অনুপ্পত্তিধম্মতং আপন্নং. তেন ৰুত্তং পাল়িযং ‘‘অনুপ্পাদধম্ম’’ন্তিআদি. অঞ্ঞেসং জাননায অভাৰগুণতায গুণগম্ভীরো. ‘‘এত্তকা গুণা’’তি পমাণং গণ্হিতুং ন সক্কুণেয্যো. ‘‘ঈদিসা এতস্স গুণা’’তি পরিযোগাহিতুং অসক্কুণেয্যতায দুপ্পরিযোগাল়্হোতি. দুজ্জানোতি অগাধতায গম্ভীরো ‘‘এত্তকানি উদকল়্হকসতানী’’তিআদিনা পমেতুং ন সক্কাতি অপ্পমেয্যো, ততো এৰ দুজ্জানো. এৰমেৰান্তি যথা মহাসমুদ্দো গম্ভীরো অপ্পমেয্যো দুজ্জানো, এৰমেৰ খীণাসৰোপি গুণৰসেন, তস্মা অযং রূপাদিং গহেত্ৰা রূপীতিআদিৰোহারো ভৰেয্য, পরিনিব্বুতস্স পন তদভাৰা তথা পঞ্ঞাপেতুং ন সক্কা, ততো তং আরব্ভ উপপজ্জতীতিআদি ন যুজ্জেয্য. যথা পন ৰিজ্জমানো এৰ জাতৰেদো ব্যত্তেন পুরিসেন নীযমানো পুরত্থিমাদিদিসং গতোতি ৰুচ্চেয্য, ন নিব্বুতো, এৰং খীণাসৰোপীতি দস্সেন্তো ‘‘এৰমেৰা’’তিআদিমাহ.

অনিচ্চতাতি এত্থ অনিচ্চতাগহণং অসারনিদস্সনং. তেন যথা সো সালরুক্খো সাখাপলাসাদিঅসারাপগমেন সুদ্ধো সারে পতিট্ঠিতো, এৰমযং ধম্মৰিনযো সাসৰসঙ্খাতঅসারৰিগমেন লোকুত্তরধম্মসারে পতিট্ঠিতোতি দস্সেতি. সেসং সুৰিঞ্ঞেয্যমেৰ.

অগ্গিৰচ্ছসুত্তৰণ্ণনায লীনত্থপ্পকাসনা সমত্তা.