১০. ৰেখনসসুত্তৰণ্ণনা

২৮০. সহ ৰত্থুকামেন কিলেসকামো গরু গরুকাতব্বো এতস্সাতি কামগরু. তেস্ৰেৰ কামেসু নিন্নপোণপব্ভারজ্ঝাসযোতি কামাধিমুত্তো. পব্বজ্জাপঠমজ্ঝানাদিকং নেক্খম্মং গরু গরুকাতব্বং এতস্সাতি নেক্খম্মগরু. তত্থ নিন্নপোণপব্ভারজ্ঝাসযো নেক্খম্মাধিমুত্তো স্ৰাযমত্থো যথা একচ্চে গহট্ঠে লব্ভতি, এৰং একচ্চে অনগারেপীতি আহ ‘‘পব্বজিতোপী’’তিআদি. অযং পন ৰেখনসো পরিব্বাজকো. সো হি ৰেখনসতাপসপব্বজ্জং উপগন্ত্ৰা ৰেখনসেন ইমিনা দিট্ঠিমাদায সমাদিযিত্ৰা ঠিতত্তা ‘‘ৰেখনসো’’তি ৰুচ্চতি. যথা লোকো সযং একাদসহি অগ্গীহি আদিত্তোপি সমানো পচ্চক্খতো অনুভৰিযমানং সালাকিকং অগ্গিসন্তাপং ৰিয অনাদিকালানুগতসম্মাকৰচরসন্তাপং আদিত্ততায ন সল্লক্খেতি, সম্মাসম্বুদ্ধেন পন মহাকরুণাসমুস্সাহিতমানসেন ‘‘সব্বং, ভিক্খৰে, আদিত্ত’’ন্তি আদিত্তপরিযাযে (সং. নি. ৪.২৮; মহাৰ. ৫৪) দেসিযমানে সল্লক্খেতি, এৰং অযম্পি অনাদিকালপরিভাৰিতং অত্তঅজ্ঝাসযে অৰট্ঠিতং কামাধিমুত্তং সরসেন অনুপধারেন্তো সত্থারা – ‘‘পঞ্চ খো ইমে, কচ্চান, কামগুণা’’তিআদিনা কামগুণেসু কামসুখে ভাসিযমানে ‘‘কামাধিমুত্তং ৰত পব্বজিতস্স চিত্ত’’ন্তি উপধারেস্সতীতি আহ – ‘‘ইমায কথায কথিযমানায অত্তনো কামাধিমুত্ততং সল্লক্খেস্সতী’’তি. কামগ্গসুখন্তি কামেতব্বৰত্থূহি অগ্গভূতং সুখং. সব্বে হি তেভূমকধম্মা কামনীযট্ঠেন কামা, তে পটিচ্চ উপ্পজ্জনসুখতো নিব্বানসুখমেৰ অগ্গভূতং সুখং. যথাহ – ‘‘যাৰতা, ভিক্খৰে, ধম্মা সঙ্খতা ৰা অসঙ্খতা ৰা, ৰিরাগো তেসং অগ্গমক্খাযতী’’তি (ইতিৰু. ৯০; অ. নি. ৪.৩৪) – ‘‘নিব্বানং পরমং সুখ’’ন্তি (ম. নি. ২.২১৫, ২১৭; ধ. প. ২০৩) চ. তেন ৰুত্তং ‘‘নিব্বানং অধিপ্পেত’’ন্তি.

২৮১. পুব্বেনিৰাসঞাণলাভিনো পুব্বন্তং আরব্ভ ৰুচ্চমানকথা অনুচ্ছৰিকা তদত্থস্স পচ্চক্খভাৰতো, তদভাৰতো ৰেখনসস্স অননুচ্ছৰিকাতি আহ ‘‘যস্মা…পে… নত্থী’’তি. অনাগতকথায…পে… নত্থীতি এত্থাপি এসেৰ নযো. আরক্খত্থাযাতি দেৰতাহি মন্তপদেহি সহ ঠিতা তত্থ আরক্খত্থায. অৰিজ্জাযাতি ইদং লক্খণৰচনং, তংমূলকত্তা ৰা সব্বকিলেসধম্মানং অৰিজ্জাৰ গহিতা. জাননং পহীনকিলেসপচ্চৰেক্খণঞাণেন. সেসং সুৰিঞ্ঞেয্যমেৰ.

ৰেখনসসুত্তৰণ্ণনায লীনত্থপ্পকাসনা সমত্তা.

নিট্ঠিতা চ পরিব্বাজকৰগ্গৰণ্ণনা.