৪. রাজৰগ্গো

১. ঘটিকারসুত্তৰণ্ণনা

২৮২. চরিযন্তি বোধিচরিযং, বোধিসম্ভারসম্ভরণৰসেন পৰত্তিতং বোধিসত্তপটিপত্তিন্তি অত্থো. সুকারণন্তি বোধিপরিপাচনস্স একন্তিকং সুন্দরং কারণং, কস্সপস্স ভগৰতো পযিরুপাসনাদিং সন্ধায ৰদতি. তঞ্হি তেন সদ্ধিং মযা ইধ কতন্তি ৰত্তব্বতং লভতি. মন্দহসিতন্তি ঈসকং হসিতং. কুহং কুহন্তি হাস-সদ্দস্স অনুকরণমেতং. হট্ঠপহট্ঠাকারমত্তন্তি হট্ঠপহট্ঠমত্তং. যথা গহিতসঙ্কেতা ‘‘পহট্ঠো ভগৰা’’তি সঞ্জানন্তি, এৰং আকারদস্সনমত্তং.

ইদানি ইমিনা পসঙ্গেন তাসং সমুট্ঠানং ৰিভাগতো দস্সেতুং ‘‘হসিতঞ্চ নামেত’’ন্তিআদি আরদ্ধং. তত্থ অজ্ঝুপেক্খনৰসেনপি হাসো ন সম্ভৰতি, পগেৰ দোমনস্সৰসেনাতি আহ ‘‘তেরসহি সোমনস্সসহগতচিত্তেহী’’তি. ননু চ কেচি কোধৰসেনপি হসন্তীতি? ন, তেসম্পি যং তং কোধৰত্থু, তস্স মযং দানি যথাকামকারিতং আপজ্জিস্সামাতি দুৰিঞ্ঞেয্যন্তরেন সোমনস্সচিত্তেনেৰ হাসস্স উপ্পজ্জনতো. তেসূতি পঞ্চসু সোমনস্সসহগতচিত্তেসু. বলৰারম্মণেতি উল়ারআরম্মণে যমকমহাপাটিহারিযসদিসে. দুব্বলারম্মণেতি অনুল়ারে আরম্মণে. ইমস্মিং পন ঠানে…পে… উপ্পাদেসীতি ইদং পোরাণট্ঠকথাযং তথা আগতত্তা ৰুত্তং. ন অহেতুকসোমনস্সসহগতচিত্তেন ভগৰতো সিতং হোতীতি দস্সনত্থং.

অভিধম্মটীকাযং (ধ. স. মূলটী. ৫৬৮) পন ‘‘অতীতংসাদীসু অপ্পটিহতং ঞাণং ৰত্ৰা ‘ইমেহি তীহি ধম্মেহি সমন্নাগতস্স বুদ্ধস্স ভগৰতো সব্বং কাযকম্মং ঞাণপুব্বঙ্গমং ঞাণানুপরিৰত্ত’ন্তিআদিৰচনতো (মহানি. ৬৯, ১৫৬; চূল়নি. মাঘরাজমাণৰপুচ্ছানিদ্দেস ৮৫; পটি. ম. ৩.৫; নেত্তি. ১৫; দী. নি. অট্ঠ. ৩.৩০৫; ৰিভ. মূলটী. সুত্তন্তভাজনীযৰণ্ণনা; দী. নি. টী. ৩.১৪১, ৩০৫) ‘ভগৰতো ইদং চিত্তং উপ্পজ্জতী’তি ৰুত্তৰচনং ৰিচারেতব্ব’’ন্তি ৰুত্তং. তত্থ ইমিনা হসিতুপ্পাদচিত্তেন পৰত্তিযমানম্পি ভগৰতো সিতকরণং পুব্বেনিৰাস-অনাগতংস-সব্বঞ্ঞুতঞ্ঞাণানং অনুৰত্তকত্তা ঞাণানুপরিৰত্তিযেৰাতি, এৰং পন ঞাণানুপরিৰত্তিভাৰে সতি ন কোচি পাল়িঅট্ঠকথানং ৰিরোধো. তথা হি অভিধম্মট্ঠকথাযং (ধ. স. অট্ঠ. ৫৬৮) ‘‘তেসং ঞাণানং চিণ্ণপরিযন্তে ইদং চিত্তং উপ্পজ্জতী’’তি ৰুত্তং. অৰস্সঞ্চ এতং এৰং ইচ্ছিতব্বং, অঞ্ঞথা আৰজ্জনস্সপি ভগৰতো পৰত্তি তথারূপে কালে ন সংযুজ্জেয্য, তস্সপি হি ৰিঞ্ঞত্তিসমুট্ঠাপকভাৰস্স ইচ্ছিতত্তা, তথা হি ৰুত্তং – ‘‘এৰঞ্চ কত্ৰা মনোদ্ৰারাৰজ্জনস্সপি ৰিঞ্ঞত্তিসমুট্ঠাপকত্তং উপপন্নং হোতী’’তি, ন চ ৰিঞ্ঞত্তিসমুট্ঠাপকত্তে তংসমুট্ঠিতায ৰিঞ্ঞত্তিযা কাযকম্মাদিভাৰং আপজ্জনভাৰো ৰিবন্ধতীতি তমেৰ সন্ধায ৰদতি. তেনাহ ‘‘এৰং অপ্পমত্তকম্পী’’তি. সতেরিতা ৰিজ্জুলতা নাম সতেরতাৰিজ্জুলতা. সা হি ইতরৰিজ্জুলতা ৰিয খণট্ঠিতিকা সীঘনিরোধা চ ন হোতি, অপিচ খো দন্ধনিরোধা, তঞ্চ সব্বকালং চতুদীপিকমহামেঘতোৰ নিচ্ছরতি তেনাহ ‘‘চাতুদ্দীপিকমহামেঘমুখতো’’তি. অযং কির তাসং রস্মিৰট্টীনং ধম্মতা, যদিদং তিক্খত্তুং সিরৰরং পদক্খিণং কত্ৰা দাঠগ্গেসুযেৰ অন্তরধানং.

২৮৩. যদিপি চত্তারি অসঙ্খ্যেয্যানি কপ্পানং সতসহস্সঞ্চ পঞ্ঞাপারমিতা পরিভাৰিতা, তথাপি ইদানি তং বুদ্ধন্তরং তস্সা পটিপাদেতব্বত্তা ৰুত্তং ‘‘অপরিপক্কঞাণত্তা’’তি. কামঞ্চস্স ঞাণায ইদানিপি পটিপাদেতব্বতা অত্থি, এৰং সন্তেপি ননু সম্মাসম্বুদ্ধেসু পসাদেন সম্ভাৰনায ভৰিতব্বং তথা চিরকালং পরিভাৰিতত্তা, কথং তত্থ হীল়নাতি আহ ‘‘ব্রাহ্মণকুলে’’তিআদি. চিরকালপরিচিতাপি হি গুণভাৰনা অপ্পকেনপি অকল্যাণমিত্তসংসগ্গেন ৰিপরিৰত্ততি অঞ্ঞথত্তং গচ্ছতি. তেন মহাসত্তোপি জাতিসিদ্ধাযং লদ্ধিযং ঠত্ৰা জাতিসিদ্ধেন মানেন এৰমাহ – ‘‘কিং পন তেন মুণ্ডকেন সমণকেন দিট্ঠেনা’’তি. তথা হি ৰুত্তং অট্ঠকথাযং –

‘‘তস্মা অকল্যাণজনং, আসীৰিসমিৰোরগং,

আরকা পরিৰজ্জেয্য, ভূতিকামো ৰিচক্খণো’’তি. (দী. নি. অট্ঠ. ১.১৭০-১৭২);

ন্হানচুণ্ণেন সুত্তেন কতা সোত্তি, কুরুৰিন্দগুল়িকা, সা এৰ সিনাযন্তি কাযং ৰিসোধেন্তি এতাযাতি সিনানং. তেনাহ – ‘‘সোত্তি সিনানন্তি সিনানত্থায কতসোত্তি’’ন্তি.

২৮৪. অরিযপরিহারেনাতি অরিযানং পরিহারেন, অনাগামীনং ন্হানকালে অত্তনো কাযস্স পরিহারনিযামেনাতি অত্থো. অত্তনো ঞাণসম্পত্তিযা ৰিভৰসম্পত্তিযা পসন্নকারং কাতুং সক্খিস্সতি. এতদত্থন্তি ‘‘অহিতনিৰারণং, হিতে নিযোজনং ব্যসনে পরিৰজ্জন’’ন্তি যদিদং, এতদত্থং মিত্তা নাম হোন্তি. কেচি ‘‘যাৰেত্থ অহুপী’’তি পঠন্তি, তেসং যাৰ এত্থ কেসগ্গগহণং তাৰ অযং নিবন্ধো অহুপীতি অত্থো.

২৮৫. সতিপটিলাভত্থাযাতি বোধিযা মহাভিনীহারং কত্ৰা বোধিসম্ভারপটিপদায পূরণভাৰে সতিযা পটিলাভত্থায. ইদানি তস্স সতুপ্পাদনীযকথায পৰত্তিতাকারং সঙ্খেপেনেৰ দস্সেতুং ‘‘তস্স হী’’তিআদি ৰুত্তং. তত্থ ন লামকট্ঠানং ওতিণ্ণসত্তোতি ইমিনা মহাসত্তস্স পণীতাধিমুত্ততং দস্সেত্ৰা এৰং পণীতাধিমুত্তিকস্স পমাদকিরিযা ন যুত্তাতি দস্সেন্তো ‘‘তাদিসস্স নাম পমাদৰিহারো ন যুত্তো’’তি আহ. তদা বোধিসত্তস্স নেক্খম্মজ্ঝাসযো তেলপ্পদীপো ৰিয ৰিসেসতো নিব্বত্তি, তং দিস্ৰা ভগৰা তদনুরূপং ধম্মকথং করোন্তো ‘‘তাদিসস্স…পে… কথেসী’’তি. পরসমুদ্দৰাসী থেরা অঞ্ঞথা ৰদন্তি. অট্ঠকথাযং পন নাযং বুদ্ধানং ভারো, যদিদং পূরিতপারমীনং বোধিসত্তানং তথা ধম্মদেসনা তেসং মহাভিনীহারসমনন্তরম্পি বোধিসম্ভারস্স সযম্ভুঞাণেনেৰ পটিৰিদিতত্তা. তস্মা বোধিসত্তভাৰপৰেদনমেৰ তস্স ভগৰা অকাসীতি দস্সেতুং ‘‘সতিপটিলাভত্থাযা’’তিআদি ৰুত্তং. সতিপটিলাভত্থাযাতি সম্মাপটিপত্তিযা উজ্জলনে পাকটকরসতিপটিলাভায.

২৮৬. ঞাণঞ্হি কিলেসধম্মৰিদালনপদালনেহি সিঙ্গং ৰিযাতি সিঙ্গং. তঞ্হি পটিপত্তিযা উপত্থম্ভিতং উস্সিতং নাম হোতি, তদভাৰে পতিতং নাম. কেচি পন ৰীরিযং সিঙ্গন্তি ৰদন্তি. তস্মিং সম্মপ্পধানৰসেন পৰত্তে বাহিরপব্বজ্জং উপগতাপি মহাসত্তা ৰিসুদ্ধাসযা অপ্পিচ্ছতাদিগুণসমঙ্গিনো যথারহং গন্থধুরং ৰাসধুরঞ্চ পরিব্রূহযন্তা ৰিহরন্তি, পগেৰ বুদ্ধসাসনে অপ্পিচ্ছতাদীহীতি আহ ‘‘চতুপারিসুদ্ধিসীলে পনা’’তিআদি. ৰিপস্সনং ব্রূহেন্তা সিখাপ্পত্তৰিপস্সনা হোন্তীতি ৰুত্তং – ‘‘যাৰ অনুলোমঞাণং আহচ্চ তিট্ঠন্তী’’তি, অনুলোমঞাণতো ওরমেৰ ৰিপস্সনং ঠপেন্তীতি অত্থো. মগ্গফলত্থং ৰাযামং ন করোন্তি পঞ্ঞাপারমিতায সব্বঞ্ঞুতঞ্ঞাণগব্ভস্স অপরিপুণ্ণত্তা অপরিপক্কত্তা চ.

২৮৭. থেরেহীতি ৰুদ্ধতরেহি. নিৰাসে সতীতি যস্মিং ঠানে পব্বজিতো, তত্থেৰ নিৰাসে. ৰপ্পকালতোতি সস্সানং ৰপ্পকালতো. পুব্বে ৰিয ততো পরং তিখিণেন সূরিযসন্তাপেন পযোজনং নত্থীতি ৰুত্তং – ‘‘ৰপ্পকালে ৰিতানং ৰিয উপরি ৰত্থকিলঞ্জং বন্ধিত্ৰা’’তি. পুটকেতি কলাপে.

২৮৮. পচ্চযসামগ্গিহেতুকত্তা ধম্মপ্পত্তিযা পদেসতো পরিঞ্ঞাৰত্থুকাপি অরিযা উপট্ঠিতে চিত্তৰিঘাতপচ্চযে যদেতং নাতিসাৰজ্জং, তদেৰং গণ্হন্তীতি অযমেত্থ ধম্মতাতি আহ – ‘‘অলাভং আরব্ভ চিত্তঞ্ঞথত্ত’’ন্তিআদি. সোতি কিকী কাসিরাজা. ব্রাহ্মণভত্তোতি ব্রাহ্মণেসু ভত্তো. দেৰেতি ব্রাহ্মণে সন্ধাযাহ. ভূমিদেৰাতি তেসং সমঞ্ঞা, তদা ব্রাহ্মণগরুকো লোকো. তদা হি কস্সপোপি ভগৰা ব্রাহ্মণকুলে নিব্বত্তি. ধীতু অৰণ্ণং ৰত্ৰাতি, ‘‘মহারাজ, তৰ ধীতা ব্রাহ্মণসমযং পহায মুণ্ডপাসণ্ডিকসমযং গণ্হী’’তিআদিনা রাজপুত্তিযা অগুণং ৰত্ৰা. ৰরং গণ্হিংসু ঞাতকা. রজ্জং নিয্যাতেসি ‘‘মা মে ৰচনং মুসা অহোসি, অট্ঠমে দিৰসে নিগ্গণ্হিস্সামী’’তি.

পাৰনঅস্মনযনৰসেন সম্মা পাৰীকতত্তা পরিসুদ্ধতণ্ডুলানি. পাল়িযং তণ্ডুলপটিভস্তানীতি তণ্ডুলখণ্ডানি. মুগ্গপটিভস্তকল়াযপটিভস্তেসুপি এসেৰ নযো.

২৮৯. কো নু খোতি ভুম্মত্থে পচ্চত্তৰচনন্তি আহ – ‘‘কুহিং নু খো’’তি পারিপূরিং যোজীযন্তি ব্যঞ্জনভোজনানি এত্থাতি পরিযোগো, ততো পরিযোগা. তেনাহ ‘‘সূপভাজনতো’’তি. সঞ্ঞং দত্ৰাতি ৰুত্তং সব্বং আচিক্খিত্ৰা তুম্হাকং অত্থায সম্পাদেত্ৰা নিক্খিত্তো উপট্ঠাকোতি ভগৰতো আরোচেথাতি সঞ্ঞং দত্ৰা. অতিৰিস্সত্থোতি অতিৰিয ৰিস্সত্থো. পঞ্চৰণ্ণাতি খুদ্দিকাদিৰসেন পঞ্চপ্পকারা.

২৯০. কিন্তি নিস্সক্কে পচ্চত্তৰচনং, কস্মাতি অত্থো? ধম্মিকোতি ইমিনা আগমনসুদ্ধিং দস্সেতি. ভিক্খূনং পত্তে ভত্তসদিসোতি ইমিনা উপাসকেন সত্থু পরিচ্চত্তভাৰং তত্থ সত্থুনো চ অপরিসঙ্কতং দস্সেতি. সিক্খাপদৰেলা নাম নত্থীতি ধম্মস্সামিভাৰতো সিক্খাপদমরিযাদা নাম নত্থি পণ্ণত্তিৰজ্জে, পকতিৰজ্জে পন সেতুঘাতো এৰ.

২৯১. ছদনট্ঠানে যদাকাসং, তদেৰ তস্স গেহস্স ছদনন্তি আকাসচ্ছদনং. পকতিযা উতুফরণমেৰাতি ছাদিতে যাদিসং উতু, ছদনে উত্তিণভাৰেপি তম্হি গেহে তাদিসমেৰ উতুফরণং অহোসি. তেসংযেৰাতি তেসং ঘটিকারস্স মাতাপিতূনং এৰ.

২৯২. ‘‘চতস্সো মুট্ঠিযো একো কুডুৰো, চত্তারো কুডুৰা একো পত্থো, চত্তারো পত্থা একো আল়্হকো, চত্তারো আল়্হকা একং দোণং, চত্তারি দোণানি একা মানিকা, চতস্সো মানিকা একা খারী, ৰীসতি খারিকা একো ৰাহোতি তদেৰ একসকট’’ন্তি সুত্তনিপাতট্ঠকথাদীসু (সু. নি. অট্ঠ. ২.৬৬২) ৰুত্তং, ইধ পন ‘‘দ্ৰে সকটানি একো ৰাহো’’তি ৰুত্তং. তেলফাণিতাদিন্তি আদি-সদ্দেন সপ্পিআদিং মরিচাদিকটুকভণ্ডঞ্চ সঙ্গণ্হাতি. নাহং রঞ্ঞা দিট্ঠপুব্বো, কুতো পরিপ্ফস্সোতি অধিপ্পাযো. নচ্চিত্ৰাতি নচ্চং দত্ৰা.

ঘটিকারসুত্তৰণ্ণনায লীনত্থপ্পকাসনা সমত্তা.

২. রট্ঠপালসুত্তৰণ্ণনা

২৯৩. থূলমেৰ থুল্লং, থুল্লা ৰিপুলা মহন্তা কোট্ঠা জাতা ইমস্সাতি থুল্লকোট্ঠিকন্তি ওদনপূপপহূতৰসেন লদ্ধনামো নিগমো. অট্ঠকথাযং পন থুল্লকোট্ঠন্তি অত্থো ৰুত্তো. তেন পাল়িযং ইক-সদ্দেন পদৰড্ঢনং কতন্তি দস্সেতি.

২৯৪. রট্ঠপালোতি ইদং তস্স কুলপুত্তস্স নামং. পৰেণিৰসেন আগতকুলৰংসানুগতন্তি সমুদাগমতো পট্ঠায দস্সেতুং ‘‘কস্মা রট্ঠপালো’’তিআদি ৰুত্তং. সন্ধারেতুন্তি ৰিনাসনতো পুব্বে যাদিসং, তথেৰ সম্মদেৰ ধারেতুং সমত্থো. সদ্ধাতি কম্মফলসদ্ধায সম্পন্না. সামণেরং দিস্ৰাতি সিক্খাকামতায এতদগ্গে ঠপিযমানং দিস্ৰা.

সহ রঞ্ঞাতি সরাজিকং, রঞ্ঞা সদ্ধিং রাজপরিসং. চাতুৰণ্ণন্তি ব্রাহ্মণাদিচতুৰণ্ণসমুদাযং. পোসেতুন্তি ৰদ্ধেতুং দানাদীহি সঙ্গহৰত্থূহি সঙ্গণ্হিতুং. যং কুলং. পহোস্সতীতি সক্খিস্সতি.

তেন তেন মে উপপরিক্খতোতি ‘‘কামা নামেতে অনিচ্চা দুক্খা ৰিপরিণামধম্মা, অট্ঠিকঙ্কলূপমা’’তি (ম. নি. ১.২৩৪; পাচি. ৪১৭; মহানি. ৩, ৬) চ আদিনা যেন যেন আকারেন কামেসু আদীনৰং ওকারং সংকিলেসং, তব্বিপরিযাযতো নেক্খম্মে আনিসংসং গুণং পকাসেন্তং ভগৰতা ধম্মং দেসিতং আজানামি, তেন তেন পকারেন উপপরিক্খতো ৰীমংসন্তস্স ময্হং এৰং হোতি এৰং উপট্ঠাতি. সিক্খত্তযব্রহ্মচরিযন্তি অধিসীলাদিসিক্খত্তযসঙ্গহং সেট্ঠচরিযং. অখণ্ডাদিভাৰাপাদনেন অখণ্ডং লক্খণৰচনঞ্হেতং. কঞ্চিপি সিক্খেকদেসং অসেসেত্ৰা একন্তেনেৰ পরিপূরেতব্বতায একন্তপরিপুণ্ণং. চিত্তুপ্পাদমত্তম্পি সংকিলেসমলং অনুপ্পাদেত্ৰা অচ্চন্তমেৰ ৰিসুদ্ধং কত্ৰা পরিহরিতব্বতায একন্তপরিসুদ্ধং. ততো এৰ সঙ্খং ৰিয লিখিতন্তি সঙ্খলিখিতং. তেনাহ ‘‘লিখিতসঙ্খসদিস’’ন্তি. দাঠিকাপি মস্সুগ্গহণেনেৰ গহেত্ৰা ‘‘মস্সু’’ত্ৰেৰ ৰুত্তং, উত্তরাধরমস্সুন্তি অত্থো. কসাযেন রত্তানি কাসাযানি. অননুঞ্ঞাতং পুত্তং ন পব্বাজেতি ‘‘মাতাপিতূনং লোকিযমহাজনস্স চিত্তঞ্ঞথত্তং মা হোতূ’’তি. তথা হি সুদ্ধোদনমহারাজস্স তথা ৰরো দিন্নো.

২৯৫. পিযাযিতব্বতো পিযোতি আহ ‘‘পীতিজনকো’’তি. মনস্স অপ্পাযনতো মনাপোতি আহ ‘‘মনৰড্ঢনকো’’তি. সুখেধিতো তরুণদারককালে. ততো পরঞ্চ সপ্পিখীরাদিসাদুরসমনুঞ্ঞভোজনাদিআহারসম্পত্তিযা সুখপরিভতো. অথ ৰা দল়্হভত্তিকধাতিজনাদিপরিজনসম্পত্তিযা চেৰ পরিচ্ছদসম্পত্তিযা চ উল়ারপণীতসুখপচ্চযূপহারেহি চ সুখেধিতো, অকিচ্ছেনেৰ দুক্খপ্পচ্চযৰিনোদনেন সুখপরিভতো. অজ্ঝত্তিকঙ্গসম্পত্তিযা ৰা সুখেধিতো, বাহিরঙ্গসম্পত্তিযা সুখপরিভতো. কস্সচীতি উপযোগত্থে সামিৰচনং, কিঞ্চীতি ৰুত্তং হোতি, অযমেৰ ৰা পাঠো. তথা হি ‘‘অপ্পমত্তকম্পি কলভাগং দুক্খস্স ন জানাসী’’তি অত্থো ৰুত্তো. এৰং সন্তেতি ননু মযং রট্ঠপাল মরণাদীসু কেনচি উপাযেন অপ্পতীকারেন মরণেনপি তযা অকামকাপি ৰিনা ভৰিস্সাম, এৰং সতি. যেনাতি যেন কারণেন. কিং পনাতি এত্থ কিন্তি কারণত্থে পচ্চত্তৰচনন্তি দস্সেন্তো আহ ‘‘কেন পন কারণেনা’’তি.

২৯৬. পরিচারেহীতি পরিতো তত্থ তত্থ যথাসকং ৰিসযেসু চারেহি. তেনাহ ‘‘ইতো চিতো চ উপনেহী’’তি. পরিচারেহীতি ৰা সুখূপকরণেহি অত্তানং পরিচারেহি, অত্তনো পরিচরণং কারেহি. তথাভূতো চ যস্মা লল়ন্তো কীল়ন্তো নাম হোতি, তস্মা ‘‘লল়া’’তিআদি ৰুত্তং. নিচ্চদানং দানং নাম, উপোসথদিৰসাদীসু দাতব্বং অতিরেকদানং পদানং নাম. পৰেণীরক্খণৰসেন ৰা দীযমানং দানং নাম, অত্তনাৰ পট্ঠপেত্ৰা দীযমানং পদানং নাম. পচুরজনসাধারণং ৰা নাতিউল়ারং দানং নাম, অনঞ্ঞসাধারণং অতিউল়ারং পদানং নাম. উদ্দস্সেতব্বাতি উদ্ধং দস্সেতব্বা. কুতো উদ্ধং তে দস্সেতব্বা? পব্বজিততো উদ্ধং অত্তানং মাতাপিতরো দস্সেতব্বা, তেনাহ ‘‘যথা’’তিআদি.

২৯৯. বলং গহেত্ৰাতি এত্থ বলগ্গহণং নাম কাযবলস্স উপ্পাদনমেৰাতি আহ ‘‘কাযবলং জনেত্ৰা’’তি. এৰং ৰিহরন্তোতি যথা পাল়িযং ৰুত্তং এৰং একো ৰূপকট্ঠো অপ্পমত্তো ৰিহরন্তো. তস্মাতি যস্মা নেয্যো, ন উগ্ঘটিতঞ্ঞূ, ন চ ৰিপঞ্চিতঞ্ঞূ, তস্মা. চিরেন পব্বজিতো দ্ৰাদসমে ৰস্সে অরহত্তং পাপুণি. যং পন ৰুত্তং পাল়িযং ‘‘ন চিরস্সেৰা’’তি, তং সট্ঠি ৰস্সানি ততো অধিকম্পি ৰিপস্সনাপরিৰাসং ৰসন্তে উপাদায ৰুত্তং.

সত্তদ্ৰারকোট্ঠকস্সাতি সত্তগব্ভন্তরদ্ৰারকোট্ঠকসীসেন গব্ভন্তরানি ৰদতি. পহরাপেতীতি ৰযোৰুড্ঢানুরূপং কপ্পাপনাদিনা অলঙ্কারাপেতি. অন্তোজাততায ঞাতিসদিসী দাসী ঞাতিদাসী. পূতিভাৰেনেৰ লক্খিতব্বো দোসো ৰা অভিদোসো, সোৰ আভিদোসিকো, অভিদোসং ৰা পচ্চূসকালং গতো পত্তো অতিক্কন্তোতি আভিদোসিকো. তেনাহ ‘‘একরত্তাতিক্কন্তস্সা’’তিআদি. অপরিভোগারহো পূতিভূতভাৰেন. অরিযৰোহারেনাতি অরিযসমুদাচারেন. অরিযা হি মাতুগামং ভগিনিৰাদেন সমুদাচরন্তি. নিস্সট্ঠপরিগ্গহন্তি পরিচ্চত্তালযং. ৰত্তুং ৰট্টতীতি নিরপেক্খভাৰতো ৰুত্তং, ইধ পন ৰিসেসতো অপরিভোগারহত্তাৰ ৰত্থুনো. নিমীযতি সঞ্ঞাযতীতি নিমিত্তং, তথাসল্লক্খিতো আকারোতি আহ ‘‘আকারং অগ্গহেসী’’তি.

৩০০. ঘরং পৰিসিত্ৰাতি গেহসামিনিযা নিসীদিতব্বট্ঠানভূতং অন্তোগেহং পৰিসিত্ৰা. আলপনেতি দাসিজনস্স আলপনে. বহি নিক্খমন্তাতি যথাৰুত্তঅন্তোগেহতো বহি নিক্খমন্তিযো. ঘরেসু সালা হোন্তীতি ঘরেসু একমন্তে ভোজনসালা হোন্তি পাকারপরিক্খিত্তা সুসংৰিহিতদ্ৰারবন্ধা সুসম্মট্ঠৰালিকঙ্গণা.

অনোকপ্পনং অসদ্দহনং. অমরিসনং অসহনং. অনাগতৰচনং অনাগতসদ্দপ্পযোগো, অত্থো পন ৰত্তমানকালিকোৰ. তেনাহ ‘‘পচ্চক্খম্পী’’তি. অরিযিদ্ধিযন্তি ‘‘পটিকূলে অপটিকূলসঞ্ঞী ৰিহরতী’’তি (অ. নি. ৫.১৪৪) এৰং ৰুত্তঅরিযিদ্ধিযং.

পূতিকুম্মাসো ছড্ডনীযধম্মো তস্স গেহতো লদ্ধোপি ন দাতব্বযুত্তকো দাসিজনেন দিন্নোতি আহ ‘‘দেয্যধম্মৰসেন নেৰ দানং অলত্থম্হা’’তি. ‘‘ইমেহি মুণ্ডকেহী’’তিআদিনা নিত্থুননৰচনেন পচ্চক্খানং অত্থতো লদ্ধমেৰ, তস্স পন উজুকফাসুসমাচারৰসেন অলদ্ধত্তা ৰুত্তং ‘‘ন পচ্চক্খান’’ন্তি. তেনাহ – ‘‘পটিসন্থারৰসেন পচ্চক্খানম্পি ন অলত্থম্হা’’তি. ‘‘নেৰ দান’’ন্তিআদি পচ্চাসীসায অক্খন্তিযা চ ৰুত্তং ৰিয পচুরজনো মঞ্ঞেয্যাতি তন্নিৰত্তনত্থং অধিপ্পাযমস্স ৰিৰরিতুং ‘‘কস্মা পনা’’তিআদি ৰুত্তং. সুত্তিকাপটিচ্ছন্নন্তি সিপ্পিকাছদাহি ছন্নং.

উক্কট্ঠএকাসনিকতাযাতি ইদং ভূতকথনমত্তং থেরস্স তথাভাৰদীপনতো. মুদুকস্সপি হি একাসনিকস্স যায নিসজ্জায কিঞ্চিমত্তং ভোজনং ভুত্তং, ৰত্তসীসেনপি ততো ৰুট্ঠিতস্স পুন ভুঞ্জিতুং ন ৰট্টতি. তেনাহ তিপিটকচূল়াভযত্থেরো ‘‘আসনং ৰা রক্খেয্য ভোজনং ৰা’’তি. উক্কট্ঠসপদানচারিকোতি পুরতো পচ্ছতো চ আহটভিক্খম্পি অগ্গহেত্ৰা বহিদ্ৰারে ঠত্ৰা পত্তৰিস্সজ্জনমেৰ করোতি. এতেনেৰ থেরস্স উক্কট্ঠপিণ্ডপাতিকভাৰো দীপিতো. তেনাহ – ‘‘স্ৰাতনায ভিক্খং নাম নাধিৰাসেতী’’তি. অথ কস্মা অধিৰাসেসীতি আহ ‘‘মাতু অনুগ্গহেনা’’তিআদি. পণ্ডিতা হি মাতাপিতূনং আচরিযুপজ্ঝাযানং ৰা কাতব্বং অনুগ্গহং অজ্ঝুপেক্খিত্ৰা ধুতঙ্গসুদ্ধিকা ন ভৰন্তি.

৩০১. পযুত্তন্তি ৰদ্ধিৰসেন পযোজিতং, তদ্ধিতলোপং কত্ৰা ৰুত্তন্তি ৰেদিতব্বং যথা অঞ্ঞত্থাপি ‘‘পিতামহং ধনং লদ্ধা, সুখং জীৰতি সঞ্চযো’’তি. জেট্ঠকিত্থিযোতি পধানিত্থিযো. ইতোতি ইমস্মিং কুলে অনুভৰিতব্বৰিভৰসম্পত্তিতো. অঞ্ঞতোতি ইমস্স দিন্নত্তা অঞ্ঞস্মিং কুলে অনুভৰিতব্বসম্পত্তিতো.

৩০২. চিত্তৰিচিত্তন্তি কপ্পনায চেৰ অরহরূপেন অলঙ্কারাদিনা চ চিত্তিতঞ্চেৰ ৰিচিত্তিতঞ্চ. ৰণকাযন্তি ৰণভূতং কাযং. সমন্ততো উস্সিতন্তি হেট্ঠিমকাযৰসেন হেট্ঠা উপরি চ সন্নিস্সিতং. নিচ্চাতুরন্তি অভিণ্হপ্পটিপীল়িতং, সদা দুক্খিতং ৰা. বহুসঙ্কপ্পন্তি রাগৰত্থুভাৰেন অভিজনেহি হাৰভাৰৰিলাসৰসেন, আমিসৰসেন চ সোণসিঙ্গালাদীহি বহূহি সঙ্কপ্পেতব্বং. ঠিতীতি অৰট্ঠানং অৰিপরিণামো নত্থি. তেনাহ – ‘‘ভিজ্জনধম্মতাৰ নিযতা’’তি, পরিস্সৰভাৰাপত্তি চেৰ ৰিনাসপত্তি চ একন্তিকাতি অত্থো.

চিত্তকতম্পীতি গন্ধাদীহি চিত্তকতম্পি. রূপন্তি সরীরং.

অলত্তককতাতি পিণ্ডিঅলত্তকেন সুৰণ্ণকতা. তেনাহ ‘‘অলত্তকেন রঞ্জিতা’’তি. চুণ্ণকমক্খিতন্তি দোসনীহরণেহি তাপদহনাদীহি কতাভিসঙ্খারমুখং গোরোচনাদীহি ওভাসনকচুণ্ণেহি মক্খিতং, তেনাহ ‘‘সাসপকক্কেনা’’তিআদি.

রসোদকেনাতি সরলনিয্যাসরসমিস্সেন উদকেন. আৰত্তনপরিৰত্তে কত্ৰাতি আৰত্তনপরিৰত্তনৰসেন নতে কত্ৰা. অট্ঠপদকরচনাযাতি ভিত্তিকূটদ্ধচন্দাদিৰিভাগায অট্ঠপদকরচনায.

ৰিরৰমানেতি ‘‘অযং পলাযতি, গণ্হ গণ্হা’’তি ৰিরৰমানে. হিরঞ্ঞসুৰণ্ণওরোধেতি ৰত্তব্বং.

৩০৩. উস্সিতায উস্সিতাযাতি কুলৰিভৰবাহুসচ্চপঞ্ঞাসম্পত্তিযা উগ্গতায উগ্গতায. অভিলক্খিতো উল়ারভাৰেন.

৩০৪. পরিজুঞ্ঞানীতি পরিহানানি. যে ব্যাধিনা অভিভূতা সত্তা জিণ্ণকপ্পা ৰযোহানিসত্তা ৰিয হোন্তি, ততো নিৰত্তেন্তো ‘‘জরাজিণ্ণো’’তি আহ. ৰযোৰুড্ঢো, ন সীলাদিৰুড্ঢো. মহত্তং লাতি গণ্হাতীতি মহল্লকো, জাতিযা মহল্লকো, ন ৰিভৰাদিনাতি জাতিমহল্লকো. দ্ৰত্তিরাজপরিৰত্তসঙ্খাতং অদ্ধানং কালং গতো ৰীতিৰত্তোতি অদ্ধগতো. তথা চ পঠমৰযং মজ্ঝিমৰযঞ্চ অতীতো হোতীতি আহ ‘‘অদ্ধানং অতিক্কন্তো’’তি. জিণ্ণাদিপদেহি পঠমৰযমজ্ঝিমৰযস্স বোধিতত্তা অনুপ্পত্ততাৰিসিট্ঠো ৰয-সদ্দো ওসানৰযৰিসযোতি আহ ‘‘পচ্ছিমৰযং অনুপ্পত্তো’’তি.

‘‘অপ্পিচ্ছো, অপ্পডংসমকসৰাতাতপসরীসপসম্ফস্সো’’তি (অ. নি. ১০.১১) এৰমাদীসু ৰিয অপ্প-সদ্দো অভাৰত্থোতি অধিপ্পাযেনাহ ‘‘অপ্পাবাধোতি অরোগো, অপ্পাতঙ্কোতি নিদ্দুক্খো’’তি. অপ্পত্থো ৰা ইধ, তত্থাপি অপ্প-সদ্দো দট্ঠব্বো. এৰঞ্হি ‘‘যো হি, গহপতি, ইমং পূতিকাযং পরিহরন্তো মুহুত্তম্পি আরোগ্যং পটিজানেয্য কিমঞ্ঞত্র বাল্যা’’তি (সং. নি. ৩.১) সুত্তপদং সমত্থিতং হোতি. ৰিপচ্চনং ৰিপাকো, সো এৰ ৰেপাকো. সমো ৰেপাকো এতিস্সা অত্থীতি সমৰেপাকিনী, তায. তেনেৰ সমৰেপাকিনিভাৰেন সব্বম্পি সম্মদেৰ গণ্হাতি ধারেতীতি গহণী. গহণিসম্পত্তিযা হি যথাভুত্তআহারো সম্মদেৰ জীরন্তো সরীরে তিট্ঠতি, নো অঞ্ঞথা ভুত্তভুত্তো আহারো জীরতি গহণিযা তিক্খভাৰেন. তথেৰ তিট্ঠতীতি ভুত্তাকারেনেৰ তিট্ঠতি গহণিযা মন্দভাৰতো. ভত্তচ্ছন্দো উপ্পজ্জতেৰ ভুত্তআহারস্স সম্মা পরিণামং গতত্তা. তেনেৰাতি সমৰেপাকিনিভাৰেনেৰ. পত্তানং ভোগানং পরিক্খিযমানং ন সহসা একজ্ঝংযেৰ পরিক্খযং গচ্ছন্তি, অথ খো অনুক্কমেন, তথা ঞাতযোপীতি আহ ‘‘অনুপুব্বেনা’’তি. ছাতকভযাদিনাতি আদি-সদ্দেন ব্যাধিভযাদিং সঙ্গণ্হাতি.

৩০৫. উদ্দেসসীসেন নিদ্দেসো গহিতোতি আহ ‘‘ধম্মনিদ্দেসা উদ্দিট্ঠা’’তি. যস্মা ৰা যে ধম্মা উদ্দিসিতব্বট্ঠেন ‘‘উদ্দেসা’’তি ৰুচ্চন্তি. তেৰ ধম্মা নিদ্দিসিতব্বট্ঠেন নিদ্দেসাতি ‘‘ধম্মনিদ্দেসা উদ্দিট্ঠা’’তি অত্থো ৰুত্তো. অথ ৰা যে ধম্মা অনিচ্চতাদিৰিভাৰনৰসেন উদ্ধং উদ্ধং দেসেস্সন্তি, তে ধম্মা তথেৰ নিস্সেসতো দেসেস্সন্তীতি এৰং উদ্দেসনিদ্দেসপদানং অনত্থন্তরতা ৰেদিতব্বা. তত্থাতি জরামরণসন্তিকে. অদ্ধুৰোতি নিদ্ধুৰো ন থিরো, অনিচ্চোতি অত্থো. তেনাহ ‘‘ধুৰট্ঠানৰিরহিতো’’তি, অজাতাভূতাসঙ্খতধুৰভাৰকারণৰিৰিত্তোতি অত্থো. উপনীয্যতীতি ৰা জরামরণেন লোকো সম্মা নীযতি, তস্মা অদ্ধুৰোতি এৰমেত্থ অত্থো দট্ঠব্বো. তাযিতুন্তি জাতিআদিব্যসনতো রক্খিতুং সমত্থেন ইস্সরেন অত্তনা ৰিরহিতোতি. ‘‘ইমং লোকং ইতো ৰট্টদুক্খতো মোচেস্সামি, জরাব্যাধিমরণানং তং অধিভৰিতুং ন দস্সামী’’তি এৰং অভিসরতীতি অভিস্সরণং, লোকস্স সুখস্স দাতা হিতস্স ৰিধাতা কোচি ইস্সরো, তদভাৰতো আহ ‘‘অনভিস্সরোতি অসরণো’’তি. নিস্সকো মমাযিতব্বৰত্থুঅভাৰতো, তেনাহ ‘‘সকভণ্ডৰিরহিতো’’তিআদি. তণ্হায ৰসে জাতো তণ্হায ৰিজিতোতি কত্ৰা ‘‘তণ্হায দাসো’’তি ৰুত্তং.

৩০৬. হত্থিৰিসযত্তা হত্থিসন্নিস্সিতত্তা ৰা হত্থিসিপ্পং ‘‘হত্থী’’তি গহিতন্তি আহ – ‘‘হত্থিস্মিন্তি হত্থিসিপ্পে’’তি, সেসপদেসুপি এসেৰ নযো. সাতিসযং ঊরুবলং এতস্স অত্থীতি ঊরুবলীতি আহ – ‘‘ঊরুবলসম্পন্নো’’তি, তমেৰত্থং পাকটং কত্ৰা দস্সেতুং ‘‘যস্স হী’’তিআদি ৰুত্তং. অভিন্নং পরসেনং ভিন্দতো ভিন্নং সকসেনং সন্ধারযতো উপত্থম্ভযতো. বাহুবলীতি এত্থাপি ‘‘যস্স হি ফলকঞ্চ আৰুধঞ্চ গহেত্ৰা’’তিআদিনা অত্থো ৰত্তব্বো, ইধ পন পরহত্থগতং রজ্জং আহরিতুং বাহুবলন্তি যোজনা. যথা হি ‘‘ঊরুবলী’’তি এত্থাপি বাহুবলং অনামসিত্ৰা অত্থো, এৰং ‘‘বাহুবলী’’তি এত্থ ঊরুবলং অনামসিত্ৰা অত্থো ৰেদিতব্বো, আহিতো অহংমানো এত্থাতি অত্তা, অত্তভাৰো. অলং সমত্থো অত্তা এতস্সাতি অলমত্থোতি আহ ‘‘সমত্থঅত্তভাৰো’’তি.

পরিযোধাযাতি ৰা পরিতো আরক্খং ওদহিত্ৰা. ‘‘সংৰিজ্জন্তে খো, ভো রট্ঠপাল, ইমস্মিং রাজকুলে হত্থিকাযাপি…পে… ৰত্তিস্সন্তী’’তি ইদম্পি সো রাজা উপরি ধম্মুদ্দেসস্স কারণং আহরন্তো আহ.

ৰুত্তস্সেৰ অনু পচ্ছা গাযনৰসেন কথনং অনুগীতি. তা পন গাথা ধম্মুদ্দেসানং দেসনানুপুব্বিং অনাদিযিত্ৰাপি যথারহং সঙ্গণ্হনৰসেন অনুগীতাতি আহ ‘‘চতুন্নং ধম্মুদ্দেসানং অনুগীতি’’ন্তি.

৩০৭. একন্তি একজাতিযং. ৰত্থুকামকিলেসকামা ৰিসযভেদেন ভিন্দিত্ৰা তথা ৰুত্তাতি দট্ঠব্বো.

সাগরন্তেনাতি সাগরপরিযন্তেন.

অহো ৰতাতি সোচনে নিপাতো, ‘‘অহো ৰত পাপং কতং মযা’’তিআদীসু ৰিয. অমরাতিআদীসু আহূতি কথেন্তি. মতং উদ্দিস্স ‘‘অম্হ’’ন্তি ৰত্তব্বে সোকৰসেন ‘‘অমর’’ন্তি ৰুচ্চতি.

ৰোসানন্তি নিট্ঠং, পরিযোসানন্তি অত্থো. সাৰাতি পঞ্ঞা এৰ. ধনতোতি সব্বধনতো. উত্তমতরা সেট্ঠা, তেনেৰাহ ‘‘পঞ্ঞাজীৰিং জীৰিতমাহু সেট্ঠ’’ন্তি (সং. নি. ১.২৪৬; সু. নি. ১৮৪).

তেসু পাপং করোন্তেসু সত্তেসু, নিদ্ধারণে চেতং ভুম্মৰচনং. পরম্পরাযাতি অত্তভাৰপরম্পরায. সংসারং আপজ্জিত্ৰাতি ভৰাদীসু সংসারস্স আপজ্জনহেতুং আপজ্জন্তো পরলোকং উপেতি, পরলোকং উপেন্তোৰ বহুৰিধদুক্খসঙ্খাতং গব্ভঞ্চ উপেতি. তাদিসস্সাতি তথারূপস্স গব্ভৰাসদুক্খাদীনং অধিট্ঠানভূতস্স অপ্পপঞ্ঞস্স অঞ্ঞো অপ্পপঞ্ঞো চ অভিসদ্দহন্তো হিতসুখাৰহন্তি পত্তিযাযন্তো.

‘‘পাপধম্মো’’তি ৰুত্তত্তা তাদিসস্স পরলোকো নাম দুগ্গতি এৰাতি আহ ‘‘পরম্হি অপাযলোকে’’তি.

ৰিৰিধরূপেনাতি রূপসদ্দাদিৰসেন তত্থপি পণীততরাদিৰসেন বহুৰিধরূপেন.

সামঞ্ঞমেৰাতি সমণভাৰো এৰ সেয্যো. এত্থ চ আদিতো দ্ৰীহি গাথাহি চতুত্থো ধম্মুদ্দেসো অনুগীতো. চতুত্থগাথায ততিযো. পঞ্চমগাথায দুতিযো. ছট্ঠগাথায দুতিযততিযা. সত্তমগাথায পঠমো ধম্মুদ্দেসো অনুগীতো, অট্ঠমাদীহি পৰত্তিনিৰত্তীসু কামেসু নেক্খম্মে চ যথারহং আদীনৰানিসংসং ৰিভাৰেত্ৰা অত্তনো পব্বজ্জকারণং পরমতো দস্সেন্তো যথাৰুত্তধম্মুদ্দেসং নিগমেতি, তেন ৰুত্তং ‘‘তা পন গাথা ধম্মুদ্দেসানং দেসনানুপুব্বিং অনাদিযিত্ৰাপি যথারহং সঙ্গণ্হনৰসেন অনুগীতা’’তি. সেসং সুৰিঞ্ঞেয্যমেৰ.

রট্ঠপালসুত্তৰণ্ণনায লীনত্থপ্পকাসনা সমত্তা.

৩. মঘদেৰসুত্তৰণ্ণনা

৩০৮. পুব্বে মঘদেৰো নাম রাজাতি অতীতকালে ইমস্মিংযেৰ কপ্পে অনেকৰস্সসহস্সাযুকেসু মনুস্সেসু পটিপাটিযা উপ্পন্নানং চতুরাসীতিসহস্সানং চক্কৰত্তিরাজূনং আদিপুরিসো মঘদেৰোতি এৰংনামো রাজা.

ধম্মোতি রাজধম্মোতি লোকিকা ৰদন্তি. মহাবোধিনিধানপারমিতাসঙ্খাতো পন ধম্মো অত্থীতি ধম্মিকো. ধম্মেনাতি ঞাযেন. তদা ব্রহ্মৰিহারাদিভাৰনাধম্মস্স রঞ্ঞো অনধিগতত্তা তস্সপি ৰা অনভিজ্ঝাদীহি সমানযোগক্খমত্তা ৰুত্তং ‘‘দসকুসলকম্মপথে ঠিতো’’তি. ধম্মন্তি ধম্মতো অনপেতং. তথা হি চ সো পক্খপাতাভাৰতো ‘‘সমো’’তি ৰুচ্চতীতি আহ ‘‘সমং চরতী’’তি. পকতিনিযামেনেৰাতি পৰেণিযা আগতনিযামেনেৰ. যস্মা নিগমজনপদেসু যেভুয্যেন গহপতীনং সঙ্গহো, তস্মা অট্ঠকথাযং ‘‘গহপতিকান’’ন্ত্ৰেৰ ৰুত্তং. পাল়িযং পন অঞ্ঞমেৰ নাগরচারিত্তং, অঞ্ঞং নেগমজনপদচারিত্তন্তি তে ৰিসুং গহিতা ‘‘নেগমেসু চেৰ জনপদেসু চা’’তি. পচ্চুগ্গমননিগ্গমনৰসেন উপোসথস্স পটিহরণং পাটিহারিযো, সো এৰ পাটিহারিকো, পক্খো. ইমে দিৰসাতি ইমে চত্তারো দিৰসা.

৩০৯. দেৰোতি মচ্চু অভিভৰনট্ঠেন. যথা হি দেৰো পকতিসত্তে অভিভৰতি, এৰং মচ্চু সত্তে অভিভৰতি. ‘‘অহং অসুকং মদ্দিতুং আগমিস্সামি, ত্ৰং তস্স কেসে গহেত্ৰা মা ৰিস্সজ্জেহী’’তি মচ্চুদেৰস্স আণাকরা দূতা ৰিযাতি দূতাতি ৰুচ্চন্তি. অলঙ্কতপটিযত্তাযাতি ইদং অত্তনো দিব্বানুভাৰং আৰিকত্ৰা ঠিতাযাতি দস্সেতুং ৰুত্তং. দেৰতাব্যাকরণসদিসমেৰ হোতি ন চিরেনেৰ মরণসম্ভৰতো. ৰিসুদ্ধিদেৰানন্তি খীণাসৰব্রহ্মানং. তে হি চরিমভৰে বোধিসত্তানং জিণ্ণাদিকে দস্সেন্তি.

দুখিতঞ্চ ব্যাধিতন্তি ব্যাধিভাৰেন সঞ্জাতদুক্খন্তি অত্থো. অন্তিমভৰিকবোধিসত্তানং ৰিসুদ্ধিদেৰেহি উপট্ঠাপিতভাৰং উপাদায তদঞ্ঞেসং তেহি অনুপট্ঠাপিতানম্পি পণ্ডিতানং তথা ৰোহরিতব্বতা পরিযাযসিদ্ধাতি আহ ‘‘ইমিনা পরিযাযেনা’’তি.

দিসম্পতীতি ৰিভত্তিঅলোপেন নিদ্দেসো, দিসাসীসেন দেসা ৰুত্তাতি দেসানং অধিপতিরাজাতি অত্থো. উত্তমঙ্গে সিরসি রুহন্তীতি উত্তমঙ্গরুহা, কেসা. তে পনেত্থ যস্মা পলিতত্তা অৰিসেসতো সব্বপচ্ছিমৰযসন্দস্সকা হোন্তি, তস্মা ‘‘ৰযোহরা’’তি ৰুত্তা.

পুরিসযুগো যস্মা তস্মিং ৰংসে সঞ্জাতপুরিসট্ঠিতিযা পরিচ্ছিন্নো, তস্মা আহ ‘‘ৰংসসম্ভৰে পুরিসে’’তি. রাজগেহতো আহটভিক্খায যাপেন্তোতি ইমিনা কুমারকপব্বজ্জায উপগতভাৰং দস্সেতি.

পরিহরিযমানোৰাতি অঞ্ঞেন অঞ্ঞেন পরিহরিযমানো ৰিয ৰেলায ৰেলায তেন মহতা পরিজনেন উপট্ঠিযমানো কুমারকীল়ং কীল়ীতি অত্থো. কেচি পন ‘‘পরিহরিযমানো এৰা’’তি অৰধারণৰসেন অত্থং ৰদন্তি, তথা সতি চতুরাসীতিৰস্সসহস্সানি থঞ্ঞপাযী তরুণদারকো অহোসীতি আপজ্জতীতি তদযুত্তং. কুমারকালং ৰত্ৰা তদনন্তরং ওপরজ্জৰচনতো ৰিরুদ্ধঞ্চেতং. (পঞ্চমঙ্গলৰচনেন উন্নঙ্গলমঙ্গলউক্কন্তনমঙ্গলকম্মহাযমঙ্গলদুস্সমঙ্গলানি সমুপগতানি এৰ অহেসুন্তি দট্ঠব্বং).

৩১১. সৰংসৰসেন আগতা পুত্তনত্তুআদযো পুত্তা চ পপুত্তা চ এতিস্সাতি পুত্তপপুত্তকা পরম্পরা. নিহতন্তি নিহিতং ঠপিতং, পৰত্তিতন্তি অত্থো. নিহতন্তি ৰা সততং পতিট্ঠিতভাৰেন ৰল়ঞ্জিতন্তি অত্থো. তেনাহ ‘‘কল্যাণৰত্ত’’ন্তি. অতিরেকতরা দ্ৰে গুণাতি মহাসত্তস্স মঘদেৰকালতো অতিরেকতরা দ্ৰে গুণা ইতররাজূহি পন অতিরেকতরা অনেকসতসহস্সপ্পভেদা এৰ গুণা অহেসুন্তি.

৩১২. তেত্তিংস সহপুঞ্ঞকারিনো এত্থ নিব্বত্তাতি তংসহচরিতট্ঠানং তেত্তিংসং, তদেৰ তাৰতিংসং, তংনিৰাসো এতেসন্তি তাৰতিংসা. নিৰাসভাৰো চ তেসং তত্থ নিব্বত্তনপুব্বকোতি আহ – ‘‘দেৰানং তাৰতিংসানন্তি তাৰতিংসভৰনে নিব্বত্তদেৰান’’ন্তি. রঞ্ঞোতি নিমিমহারাজস্স. ওৰাদে ঠত্ৰাতি ‘‘সীলং অরক্খন্তো মম সন্তিকং মা আগচ্ছতূ’’তি নিগ্গণ্হনৰসেনপি, ‘‘একন্ততো মম ৰিজিতে ৰসন্তেন সীলং রক্খিতব্ব’’ন্তি এৰং পৰত্তিতওৰাদৰসেনপি ওৰাদে ঠত্ৰা.

অথ নন্তি মহাজুতিকং মহাৰিপ্ফারং মহানুভাৰং নিমিরাজানং. ‘‘সক্কোহমস্মি দেৰিন্দো, তৰ সন্তিকমাগতো’’তি অত্তনো সক্কভাৰং পৰেদেত্ৰা ‘‘কঙ্খং তে পটিৰিনোদেস্সামী’’তি আহ. তেনাহ ‘‘সব্বভূতানমিস্সরা’’তিআদি.

সীলং উপাদায ওমকতায ‘‘কি’’ন্তি হীল়েন্তো ৰদতি. গুণৰিসিট্ঠতাযাতি লাভযসাদীনঞ্চেৰ পিযমনাপতাদীনঞ্চ আসৰক্খযপরিযোসানানং নিমিত্তভাৰেন উত্তমগুণতায. তদা সক্কো অনুরুদ্ধত্থেরো, সো অত্তনো পুরিমজাতিযং পচ্চক্খসিদ্ধংৰ দানতো সীলং মহন্তং ৰিভাৰেন্তো ‘‘অহঞ্হী’’তিআদিমাহ. তত্থ অত্তনা ৰসিযমানং কামাৰচরদেৰলোকং সন্ধায ‘‘পেত্তিৰিসযতো’’তি ৰুত্তং. তস্স হি কপ্পসতসহস্সং ৰিৰট্টজ্ঝাসযস্স পূরিতপারমিস্স দেৰলোকো পেতলোকো ৰিয উপট্ঠাসি. তেনেৰাহ ‘‘অচ্ছরাগণসঙ্ঘুট্ঠং, পিসাচগণসেৰিত’’ন্তি (সং. নি. ১.৪৬).

খত্তিযেতি খত্তিযজাতিযং. ৰিসুজ্ঝতীতি ব্রহ্মলোকূপপত্তিং সন্ধায ৰদতি কামসংকিলেসৰিসুজ্ঝনতো. কাযাতি চ ব্রহ্মকাযমাহ.

ইমস্স মম অদিট্ঠপুব্বরূপং দিস্ৰা ‘‘অহুদেৰ ভয’’ন্তি চিন্তেত্ৰা আহ ‘‘অৰিকম্পমানো’’তি. ভাযন্তো হি চিত্তস্স অঞ্ঞথত্তেন কাযস্স চ ছম্ভিতত্তেন ৰিকম্পতি নাম. তেনাহ ‘‘অভাযমানো’’তি. সুখং কথেতুং হোতীতি পুঞ্ঞফলং কথেতুং সুখং হোতি.

৩১৩. মনং আগম্ম যুত্তাযেৰ হোন্তীতি মাতলিস্স সক্কস্সেৰ চিত্তং জানিত্ৰা যুত্তা ৰিয হোন্তি, রথে যুত্তআজানীযকিচ্চং করোন্তি দেৰপুত্তা. এৰং তাদিসে কালে তথা পটিপজ্জন্তি, যথা এরাৰণো দেৰপুত্তো হত্থিকিচ্চং. নদ্ধিতো পট্ঠাযাতি রথপঞ্জরপরিযন্তেন অক্খস্স সম্বন্ধট্ঠানং নদ্ধী, ততো পট্ঠায. অক্খো বজ্ঝতি এত্থাতি অক্খবদ্ধো, অক্খেন রথস্স বদ্ধট্ঠানং. যথা দেৰলোকতো যাৰ চন্দমণ্ডলস্স গমনৰীথি, তাৰ অত্তনো আনুভাৰেন হেট্ঠামুখমেৰ রথং পেসেসি, এৰং চন্দমণ্ডলস্স গমনৰীথিতো যাৰ রঞ্ঞো পাসাদো, তাৰ তথেৰ পেসেসি. দ্ৰে মগ্গে দস্সেত্ৰাতি পতোদলট্ঠিযা আকাসং ৰিলিখন্তো ৰিয অত্তনো আনুভাৰেন নিরযগামী দেৰলোকগামী চাতি দ্ৰে মগ্গে দস্সেত্ৰা. কতমেনাতিআদি দেসনামত্তং, যথা তেন রথেন গচ্ছন্তস্স নিরযো দেৰলোকো চ পাকটা হোন্তি, তথা করণং অধিপ্পেতং.

ৰুত্তকারণমেৰ সন্ধাযাহ মহাসত্তো ‘‘উভযেনেৰ মং মাতলি নেহী’’তি. দুগ্গন্তি দুগ্গমং. ৰেত্তরণিন্তি এৰংনামকং নিরযং. কুথিতন্তি পক্কুথিতং নিপক্কতেলসদিসজালং. খারসংযুত্তন্তি খারোদকসদিসং.

রথং নিৰত্তেত্ৰাতি নিরযাভিমুখতো নিৰত্তেত্ৰা. বীরণীদেৰধীতাযাতি ‘‘বীরণী’’তি এৰংনামিকায অচ্ছরায. সোণদিন্নদেৰপুত্তস্সাতি ‘‘সোণদিন্নো’’তি এৰংনামকস্স দেৰপুত্তস্স. গণদেৰপুত্তানন্তি গণৰসেন পুঞ্ঞং কত্ৰা গণৰসেনেৰ নিব্বত্তদেৰপুত্তানং.

পত্তকালেতি উপকট্ঠায ৰেলায. অতিথিন্তি পচ্চেকসম্বুদ্ধং. কস্সপস্স ভগৰতো সাসনে একং খীণাসৰত্থেরন্তিপি ৰদন্তি. মাতাৰ পুত্তং সকিমাভিনন্দীতি যথা পৰাসতো আগতং পুত্তং মাতা সকিং একৰারং আগতকালে অভিনন্দতি, তথা নিচ্চকালে অভিনন্দি সক্কচ্চং পরিৰিসি. সংযমা সংৰিভাগাতি সীলসংযমা সংৰিভাগসীলা. জাতকেতি নিমিজাতকে.

চিত্তকূটন্তি দেৰনগরস্স দক্খিণদিসায দ্ৰারকোট্ঠকং. সক্কো চিত্তং সন্ধারেতুং অসক্কোন্তোতি মহাসত্তে পৰত্তং দেৰতানং সক্কারসম্মানং পটিচ্চ উপ্পন্নং অত্তনো উসূযচিত্তং বহি অনাৰিকত্ৰা অব্ভন্তরেযেৰ চ নং ঠপেতুং অসক্কোন্তো. অঞ্ঞেসং পুঞ্ঞেন ৰসাহীতি সক্কস্স মহাসত্তং রোসেতুকামতায আরাধনং নিদস্সেতি. পুরাণসক্কো দীঘাযুকো, তং উপাদায জরাজিণ্ণং ৰিয কত্ৰা ‘‘জরসক্কো’’তি ৰুত্তং.

৩১৫. সেসং সব্বন্তি পব্বজ্জুপগমনা সেসং অত্তনো ৰংসে পোরাণরাজূনং রাজচারিত্তং. পাকতিকন্তি পুন সভাৰত্তমেৰ গতো অহোসি, অপব্বজিতভাৰৰচনেনেৰস্স ব্রহ্মৰিহারভাৰনাদীনং পব্বজ্জাগুণানং অভাৰো দীপিতো হোতি.

৩১৬. ৰীরিযং অকরোন্তো সমুচ্ছিন্দতি, ন তাৰ সমুচ্ছিন্নং, কল্যাণমিত্তসংসগ্গাদিপচ্চযসমৰাযে সতি সীলৰতং কল্যাণৰত্তং পৰত্তেতুং সক্কোতি. দুস্সীলেন সমুচ্ছিন্নং নাম হোতি তস্স তত্থ নিরাসভাৰেন পটিপত্তিযা এৰ অসম্ভৰতো. সত্ত সেখা পৰত্তেন্তি কল্যাণৰত্তস্স অপরিনিট্ঠিতকিচ্চত্তা. খীণাসৰেন পৰত্তিতং নাম পরিনিট্ঠিতকিচ্চত্তা. সেসং সুৰিঞ্ঞেয্যমেৰ.

মঘদেৰসুত্তৰণ্ণনায লীনত্থপ্পকাসনা সমত্তা.

৪. মধুরসুত্তৰণ্ণনা

৩১৭. মধুরাযন্তি উত্তরমধুরাযং. গুন্দাৰনেতি কাল়সিপ্পলিৰনে. অতিমুত্তকৰনেতি চ ৰদন্তি. চতূসু ৰণ্ণেসু ব্রাহ্মণোৰ সেট্ঠো ৰণ্ণো. পণ্ডরোতি পরিসুদ্ধো. কাল়কোতি অপরিসুদ্ধো. জাতিগোত্তাদিপঞ্ঞাপনট্ঠানেসূতি জাতিগোত্তাদিৰসেন সুদ্ধচিন্তাযং ব্রাহ্মণা এৰ সুদ্ধজাতিকা, ন ইতরেতি অধিপ্পাযো. সংসারতো ৰা সুদ্ধচিন্তাযং ব্রাহ্মণাৰ সুজ্ঝন্তি ৰেদৰিহিতস্স সুদ্ধৰিধিনো অঞ্ঞেসং অৰিসযত্তাতি অধিপ্পাযো. তং পনেতং তেসং ৰিরুজ্ঝতি খত্তিযৰেস্সানম্পি মন্তজ্ঝেনস্স অনুঞ্ঞাতত্তা, মন্তজ্ঝেনৰিধিনা চ সংসারসুদ্ধিযাভাৰতো. পুত্তা নাম অনোরসাপি হোন্তি, ন তথা ইমেতি আহ ‘‘ওরসা’’তি. উরে সংৰড্ঢিতপুত্তোপি ‘‘ওরস’’ন্তি ৰুচ্চতি. ইমে পন মুখতো নিগ্গতো হুত্ৰা উরে সংৰড্ঢাতি দস্সেতুং ‘‘ওরসা মুখতো জাতা’’তি ৰুত্তং. ততো এৰ ব্রহ্মতো জাতাতি ব্রহ্মজা, ব্রহ্মসম্ভূতাপি ‘‘ব্রহ্মজা’’তি ৰুচ্চন্তি, ন তথা ইমে. ইমে পন পচ্চক্খতো ব্রহ্মুনা নিম্মিতাতি ব্রহ্মনিম্মিতা, ততো এৰ ব্রহ্মতো লদ্ধব্বৰিজ্জাদিদাযজ্জদাযাদাতি ব্রহ্মদাযাদাতি সব্বমেতং ব্রাহ্মণানং কত্থনাপলাপসদিসং ৰিঞ্ঞূনং অপ্পমাণং অৰিমদ্দক্খমং ৰাচাৰত্থুমত্তং ব্রহ্মকুত্তস্সেৰ অভাৰতো. যং পনেত্থ ৰত্তব্বং, তং ৰিসুদ্ধিমগ্গৰণ্ণনাযং ৰুত্তমেৰ. তেনাহ ‘‘ঘোসোযেৰা’’তিআদি. ৰোহারমত্তমেৰেতন্তি এতং ‘‘ব্রাহ্মণোৰ সেট্ঠো ৰণ্ণো’’তিআদি ৰচনমত্তমেৰ, ন তস্স অত্থো তেহি অধিপ্পেতপ্পকারো অত্থি.

৩১৮. সমিজ্ঝেয্যাতি দিট্ঠিদীপনৰসেন অত্তনো অজ্ঝাসযো নিপ্ফজ্জেয্য. তেনাহ ‘‘মনোরথো পূরেয্যা’’তি. খত্তিযোপীতি পরখত্তিযোপি. অস্সাতি সমিদ্ধধনাদিং পত্তস্স. তেনাহ – ‘‘ইস্সরিযসম্পত্তস্সা’’তি নেসন্তি এতেসং চতুন্নং ৰণ্ণানং এত্থ পুব্বুট্ঠাযিভাৰাদিনা ইতরেহি উপচরিতব্বতায ন কিঞ্চি নানাকরণন্তি যোজনা.

৩২২. অহং চীৰরাদীহি উপট্ঠাকো, তুম্হাকং ইচ্ছিতচ্ছিতক্খণে ৰদেয্যাথ যেনত্থোতি যোজনা. চোরাদিউপদ্দৰনিসেধনেন রক্খাগুত্তি, দানাদিনিমিত্তউপদ্দৰনিসেধনেন আৰরণগুত্তি. পচ্চুপ্পন্নানত্থনিসেধনেন ৰা রক্খাগুত্তি, আগামিঅনত্থনিসেধনেন আৰরণগুত্তি. এত্থ চ খত্তিযাদীসু যো যো ইস্সরো, তস্স ইতরেন অনুৰত্তেতব্বভাৰে, কুসলাকুসলকরণেন নেসং ৰসেন লদ্ধব্বঅভিসম্পরাযে, পব্বজিতেহি লদ্ধব্বসামীচিকিরিযায চ অণুমত্তোপি ৰিসেসো নত্থি, তস্মা সো ৰিসেসাভাৰো পাল়িযং তত্থ তত্থ ৰারে ‘‘এৰং সন্তে’’তিআদিনা ৰিভাৰিতো. সেসং সুৰিঞ্ঞেয্যমেৰ.

মধুরসুত্তৰণ্ণনায লীনত্থপ্পকাসনা সমত্তা.

৫. বোধিরাজকুমারসুত্তৰণ্ণনা

৩২৪. ওলোকনকপদুমন্তি লীলাঅরৰিন্দং. তস্মাতি কোকনদসণ্ঠানত্তা কোকনদোতি সঙ্খং লভি.

৩২৫. যাৰ পচ্ছিম…পে… ফলকং ৰুত্তং তস্স সব্বপচ্ছা সন্থতত্তা. উপরিমফলগতঞ্হি সোপানমত্থকং. ওলোকনত্থংযেৰাতি ন কেৰলং ভগৰতো আগমনঞ্ঞেৰ ওলোকনত্থং, অথ খো অত্তনো পত্থনায সন্থরাপিতায চেলপটিকায অক্কমনস্সপি.

সকুণপোতকেতি কাদম্বটিট্টিভপুত্তকে. অঞ্ঞোৰ ভৰেয্যাতি তস্মিং অত্তভাৰে মাতুগামতো অঞ্ঞো ইদানি ভরিযাভূতো মাতুগামো ভৰেয্য. পুত্তং লভেয্যাতি অত্তনো কম্মৰসেন পুত্তং, নো তস্স. উভোহীতি ইমেহি এৰ উভোহি. ইমেহি কারণেহীতি তস্স রাজকুমারস্স বুদ্ধং পটিচ্চ মিচ্ছাগহণং, তিত্থিযানং উজ্ঝাযনং, অনাগতে মনুস্সানং ভিক্খূনং উদ্দিস্স ৰিপ্পটিসারোতি ইমেহি তীহি কারণেহি. পঞ্ঞত্তন্তি সন্থতং চেলপটিকং. মঙ্গলং ইচ্ছন্তীতি মঙ্গলিকা.

৩২৬. ততিযং কারণন্তি ইমিনা ভিক্খূসু ৰিপ্পটিসারানুপ্পাদনমাহ. যং কিঞ্চি পরিভুঞ্জন-সুখং কামসুখল্লিকানুযোগোতি অধিপ্পাযেন কামসুখল্লিকানুযোগসঞ্ঞী হুত্ৰা…পে… মঞ্ঞমানো এৰমাহ.

৩২৭. অথ নং ভগৰা ততো মিচ্ছাভিনিৰেসতো ৰিৰেচেতুকামো ‘‘সো খো অহ’’ন্তিআদিনা অত্তনো দুক্করচরিযং দস্সেতুং আরভি. মহাসচ্চকে(ম. নি. ১.৩৬৪ আদযো) ৰুত্তনযেনেৰ ৰেদিতব্বং ‘‘সো খো অহ’’ন্তিআদিপাঠস্স তত্থ আগতনিযামেনেৰ আগতত্তা. পাসরাসিসুত্তে (ম. নি. ১.২৭২ আদযো) ৰুত্তনযেনাতি এত্থাপি এসেৰ নযো.

৩৪৩. অঙ্কুসং গণ্হন্তি এতেন তস্স গহণে ছেকো হোতীতি অঙ্কুসগহণসিপ্পং. মেঘউতুন্তি মেঘং পটিচ্চ উপ্পন্নসীতউতুং. পব্বতউতুন্তি পব্বতং পটিচ্চ উণ্হউতুং. উভযৰসেন চ তস্স তথা সীতুণ্হউতুতো এনো আগতোতি ত-কারস্স দ-কারং কত্ৰা উদেনোতি নামং অকাসি.

তাপসো ওগাল়্হঞাণৰসেন রঞ্ঞো মতভাৰং ঞত্ৰা. আদিতো পট্ঠাযাতি কোসম্বিনগরে পরন্তপরঞ্ঞো অগ্গমহেসিভাৰতো পট্ঠায. পুব্বেতি সীলৰন্তকালে. হত্থিগন্থন্তি হত্থীনং অত্তনো ৰসে ৰত্তাপনসত্থং. তেনেৰস্স তং সিক্খাপেতি, কিচ্চঞ্চ ইজ্ঝতি.

৩৪৪. পদহনভাৰোতি ভাৰনানুযোগো. পধানে ৰা নিযুত্তো পধানিযো, পধানিযস্স ভিক্খুনো, তস্সেৰ পধানিযভাৰস্স অঙ্গানি কারণানি পধানিযঙ্গানি. সদ্ধা এতস্স অত্থীতি সদ্ধো. কিঞ্চাপি পচ্চেকবোধিসত্তানম্পি অভিনীহারতো পট্ঠায আগতা আগমনসদ্ধা এৰ, মহাবোধিসত্তানং পন সদ্ধা গরুতরাতি সা এৰ গহিতা. অচলভাৰেন ওকপ্পনং ‘‘সম্মাসম্বুদ্ধো ভগৰা, স্ৰাখ্যাতো ধম্মো, সুপ্পটিপন্নো সঙ্ঘো’’তি কেনচি অকম্পিযভাৰেন রতনত্তযগুণে ওগাহিত্ৰা কপ্পনং. পসাদুপ্পত্তি রতনত্তযে পসীদনমেৰ. বোধিন্তি চতুমগ্গঞাণন্তি ৰুত্তং তংনিমিত্তত্তা সব্বঞ্ঞুতঞ্ঞাণস্স, বোধীতি ৰা সম্মাসম্বোধি. সব্বঞ্ঞুতঞ্ঞাণপদট্ঠানঞ্হি মগ্গঞাণং, মগ্গঞাণপদট্ঠানঞ্চ সব্বঞ্ঞুতঞ্ঞাণং ‘‘সম্মাসম্বোধী’’তি ৰুচ্চতি. নিচ্ছিতসুবুদ্ধতায ধম্মস্স সুধম্মতা সঙ্ঘস্স সুপ্পটিপত্তি ৰিনিচ্ছিতা এৰ হোতীতি আহ ‘‘দেসনাসীসমেৰ চেত’’ন্তিআদি. তস্স পধানং ৰীরিযং ইজ্ঝতি রতনত্তযসদ্ধায ‘‘ইমায পটিপদায জরামরণতো মুচ্চিস্সামী’’তি পধানানুযোগে অৰংমুখসম্ভৰতো.

অপ্পাবাধোতিআদি হেট্ঠা ৰুত্তমেৰ. অগুণং পকাসেতা আযতিং সংৰরং আপজ্জিতা সম্মাপটিপত্তিযা ৰিসোধনত্থং. উদযঞ্চ অত্থঞ্চ গন্তুন্তি ‘‘অৰিজ্জাসমুদযা’’তিআদিনা পঞ্চন্নং উপাদানক্খন্ধানং উদযঞ্চ ৰযঞ্চ জানিতুং. তেনাহ ‘‘এতেনা’’তিআদি. পরিসুদ্ধায উপক্কিলেসৰিনিমুত্তায. নিব্বিজ্ঝিতুন্তি তদঙ্গৰসেন পজহিতুং সমুচ্ছেদপ্পহানস্স পচ্চযো ভৰিতুং. যং দুক্খং খীযতীতি কিলেসেসু অপ্পহীনেসু তেন তদুপনিস্সযকম্মং পটিচ্চ যং দুক্খং উপ্পজ্জেয্য, তং সন্ধায ৰুত্তং.

৩৪৫. সেসদিৰসেতি সত্তদিৰসতো পট্ঠায যাৰ দ্ৰে রত্তিন্দিৰা.

৩৪৬. কুচ্ছিসন্নিস্সিতো গব্ভো নিস্সযৰোহারেন ‘‘কুচ্ছী’’তি ৰুচ্চতি, সো এতিস্সা অত্থীতি কুচ্ছিমতী. তেনাহ ‘‘আপন্নসত্তা’’তি. আরক্খো পনস্স পচ্চুপট্ঠিতো হোতীতি মাতরা গহিতসরণং গব্ভৰুট্ঠিতস্স তস্স সরণগমনং পৰেদযিতস্স কুসলং সরণং নাম, মাতু কতরক্খো পুত্তস্সপি পচ্চুপট্ঠিতোতি. মহল্লককালেতি ৰচনত্থং জাননকালে. সারেন্তীতি যথাদিট্ঠং যথাবলং রতনত্তযগুণপতিট্ঠাপনৰসেন অস্স সারেন্তি. সল্লক্খেত্ৰাতি ৰুত্তমত্থং উপধারেত্ৰা. সরণং গহিতং নাম হোতি রতনত্তযস্স সরণভাৰসল্লক্খণপুব্বকতন্নিন্নচিত্তভাৰতোৰ. সেসং সুৰিঞ্ঞেয্যমেৰ.

বোধিরাজকুমারসুত্তৰণ্ণনায লীনত্থপ্পকাসনা সমত্তা.

৬. অঙ্গুলিমালসুত্তৰণ্ণনা

৩৪৭. অঙ্গুলীনং মালং ধারেতীতি ইমিনা অন্ৰত্থা তস্স সমঞ্ঞাতি দস্সেতি. তত্রাতি তস্মিং আচরিযৰচনেন অঙ্গুলিমালস্স ধারণে. করীসসহস্সখেত্তে একসালিসীসং ৰিয অপঞ্ঞাযমানসককিচ্চো হোতীতি অধিপ্পাযো. তক্কসীলং পেসযিংসু ‘‘তাদিসস্স আচরিযস্স সন্তিকে সিপ্পুগ্গহসম্মাপযোগেন দিট্ঠধম্মিকে সম্পরাযিকে চ অত্থে জানন্তো ভারিযং ন করেয্যা’’তি. বাহিরকা অহেসুং অহিংসকস্স ৰত্তসম্পত্তিযা আচরিযস্স চিত্তসভাৰতো নিব্বত্তনতিভাৰেন. সিনেহেনেৰ ৰদন্তেতি সিনেহেন ৰিয ৰদন্তে.

গণনম্পি ন উগ্গণ্হাতীতি গণনৰিধিম্পি ন সল্লক্খেতি. তত্থ কারণমাহ ‘‘পকতিযা’’তিআদিনা. ঠপিতট্ঠানেতি রুক্খগচ্ছন্তরাদিকে ঠপিতট্ঠানে সকুন্তসিঙ্গালানং ৰসেন অঙ্গুলিযো ৰিনস্সন্তি. ভগ্গৰোতি কোসলরঞ্ঞো পুরোহিতং গোত্তেন ৰদতি. চোরো অৰিস্সাসনীযো সাহসিকভাৰতো. পুরাণসন্থতা সাখা অৰিস্সাসনীযা ৰিচ্ছিকাদীনং পৰেসনযোগ্যত্তা. রাজা অৰিস্সাসনীযো ইস্সরিযমদেন ধনলোভেন চ কদাচি জীৰিতে সঙ্কাভাৰতো. ইত্থী অৰিস্সাসনীযা লোলসীলচিত্তভাৰতো. অনুদ্ধরণীযো ভৰিস্সতি সংসারপঙ্কতো.

৩৪৮. সঙ্করিত্ৰাতি ‘‘মযং একজ্ঝং সন্নিপতিত্ৰা চোরং মারেত্ৰা ৰা পলাপেত্ৰা গমিস্সামা’’তি সঙ্করং কত্ৰা. ইদ্ধাভিসঙ্খারন্তি অভিসঙ্খরণং অধিট্ঠানং. অভিসঙ্খাসীতি অধিট্ঠহি. সংহরিত্ৰাতি সংখিপিত্ৰা. ওরভাগেতি চোরস্স ওরভাগে.

৩৪৯. দণ্ডোতি পহরণহত্থচ্ছেদনাদিকো দণ্ডনসঙ্খাতো দণ্ডো. পৰত্তযিতব্বোতি আনেতব্বো. অপনেত্ৰাতি অত্তনো সন্তানতো সমুচ্ছেদৰসেন পহায. পটিসঙ্খাযাতি পটিসঙ্খানেন. অৰিহিংসাযাতি করুণায. সারণীযধম্মেসূতি ছসুপি সারণীযধম্মেসু, ঠিতো অট্ঠিতানং পাপধম্মানং বোধিমূলে এৰ সমুচ্ছিন্নত্তা. যথা অতীতে অপরিমিতং কালং সন্ধাৰিতং, এৰং ইমায পটিপত্তিযা অনাগতেপি সন্ধাৰিস্সতীতি দস্সেন্তো ‘‘ইদানী’’তিআদিমাহ.

ইত্ৰেৰাতি ইতি এৰ, ইতি-সদ্দো নিদস্সনত্থো. তেনাহ ‘‘এৰং ৰত্ৰা যেৰা’’তি. অকিরীতি আকিরি, পঞ্চপি আৰুধানি ৰিকিরি. তেন ৰুত্তং ‘‘খিপি ছড্ডেসী’’তি.

৩৫০. এত্তোৰাতি অতো এৰ আগতমগ্গেনেৰ সাৰত্থিং গতা. অধিৰাসেস্সতীতি ‘‘চোরং পটিসেধেতুং গমিস্সামী’’তি ৰুত্তে তুণ্হী ভৰিস্সতি. দারুণকম্মেন উপ্পন্ননামন্তি ‘‘অঙ্গুলিমালো’’তি ইমং নামং সন্ধায ৰদতি.

৩৫১. হত্থী অরঞ্ঞহত্থী হোন্তি মনুস্সানং তত্থ গন্তুং অসক্কুণেয্যত্তা, এৰং অস্সাপি. কূটসহস্সানং ভিজ্জনকারণং হোতি থেরস্স আগমনভযেন ঘটে ছড্ডেত্ৰা পলাযনেন. গব্ভমূল়্হাযাতি ব্যাকুলগব্ভায. পব্বজ্জাবলেনাতি ৰুত্তং, সত্থু দেসনানুভাৰেনাতি পন ৰত্তব্বং. সো হি তস্সাপি কারণন্তি. অরিযা নাম জাতি পব্বজ্জা অরিযভাৰত্থায জাতীতি কত্ৰা.

মহাপরিত্তং নামেতন্তি মহানুভাৰং পরিত্তং নামেতং. তথা হি নং থেরো সব্বভাৰেন অরিযায জাতো সচ্চাধিট্ঠানেন অকাসি. তেনাহ ‘‘সচ্চকিরিযকতট্ঠানে’’তি. গব্ভমূল়্হন্তি মূল়্হগব্ভং. গব্ভো হি পরিপক্কো সম্পজ্জমানো ৰিজাযনকালে কম্মজৰাতেহি সঞ্চালেত্ৰা পরিৰত্তিতো উদ্ধংপাদো অধোসীসো হুত্ৰা যোনিমুখাভিমুখো হোতি, এৰং সো কস্সচি অলগ্গো সোত্থিনা বহি নিক্খমতি, ৰিপজ্জমানো পন ৰিপরিৰত্তনৰসেন যোনিমগ্গং পিদহিত্ৰা তিরিযং নিপজ্জতি, তথা যস্সা যোনিমগ্গো পিদহতি, সা তত্থ কম্মজৰাতেহি অপরাপরং পরিৰত্তমানা ব্যাকুলা মূল়্হগব্ভাতি ৰুচ্চতি, তং সন্ধায ৰুত্তং ‘‘গব্ভমূল়্হ’’ন্তি.

সচ্চকিরিযা নাম বুদ্ধাসযং অত্তনো সীলং পচ্চৰেক্খিত্ৰা কতা, তস্মা সচ্চকিরিযা ৰেজ্জকম্মং ন হোতীতি দট্ঠব্বং. থেরস্সপি চাতিআদিনা উপসঙ্কমিতব্বকারণং ৰদতি. ইমে দ্ৰে হেতূ পটিচ্চ ভগৰা থেরং সচ্চকিরিযং কারেসি. জাতিন্তি মূলজাতিং.

৩৫২. পরিযাদায আহচ্চ ভিন্নেন সীসেন. সভাগদিট্ঠধম্মৰেদনীযকম্মন্তি নিরযে নিব্বত্তনসককম্মসভাগভূতং দিট্ঠধম্মৰেদনীযকম্মং. সভাগতা চ সমানৰত্থুকতা সমানারম্মণতাএকৰীথিপরিযাপন্নতাদিৰসেন সব্বথা সরিক্খতা, সদিসম্পি চ নাম তদেৰাহরীযতি যথা ‘‘তস্সেৰ কম্মস্স ৰিপাকো’’তি চ ‘‘সা এৰ তিত্তিরী তানেৰ ওসধানী’’তি চ. ইদানি তমেৰ সভাগতং দস্সেতুং ‘‘কম্মং হী’’তিআদি আরদ্ধং. করিযমানমেৰাতি পচ্চযসমৰাযেন পটিপাটিযা নিব্বত্তিযমানমেৰ. তযো কোট্ঠাসে পূরেতি, দিট্ঠধম্মৰেদনীযঅপরাপরিযাযৰেদনীযউপপজ্জৰেদনীযসঙ্খাতে তযো ভাগে পূরেতি, তেসং তিণ্ণং ভাগানং ৰসেন পৰত্ততি.

দিট্ঠধম্মো ৰুচ্চতি পচ্চক্খভূতো পচ্চুপ্পন্নো অত্তভাৰো, তত্থ ৰেদিতব্বফলং কম্মং দিট্ঠধম্মৰেদনীযং. পচ্চুপ্পন্নভৰতো অনন্তরং ৰেদিতব্বফলং কম্মং উপপজ্জৰেদনীযং. দিট্ঠধম্মানন্তরভৰতো অঞ্ঞস্মিং অত্তভাৰপরিযাযে অত্তভাৰপরিৰত্তে ৰেদিতব্বফলং কম্মং অপরাপরিযাযৰেদনীযং. পটিপক্খেহি অনভিভূততায, পচ্চযৰিসেসেন পটিলদ্ধৰিসেসতায চ বলৰভাৰপ্পত্তা তাদিসস্স পুব্বাভিসঙ্খারস্স ৰসেন সাতিসযা হুত্ৰা পৰত্তা পঠমজৰনচেতনা তস্মিংযেৰ অত্তভাৰে ফলদাযিনী দিট্ঠধম্মৰেদনীযা নাম. সা হি ৰুত্তাকারেন বলৰতি জৰনসন্তানে গুণৰিসেসযুত্তেসু উপকারানুপকারৰসপ্পৰত্তিযা আসেৰনালাভেন অপ্পৰিপাকতায চ ইতরদ্ৰযং ৰিয পৰত্তসন্তানুপরমাপেক্খং ওকাসলাভাপেক্খঞ্চ কম্মং ন হোতীতি ইধেৰ পুপ্ফমত্তং ৰিয পৰত্তিৰিপাকমত্তং ফলং দেতি.

তথা অসক্কোন্তন্তি কম্মস্স ফলদানং নাম উপধিপযোগাদিপচ্চযন্তরসমৰাযেনেৰ হোতীতি তদভাৰতো তস্মিংযেৰ অত্তভাৰে ৰিপাকং দাতুং অসক্কোন্তং. অহোসিকম্মন্তি কম্মংযেৰ অহোসি, ন তস্স ৰিপাকো অহোসি, অত্থি ভৰিস্সতি ৰাতি এৰং ৰত্তব্বং কম্মং. অত্থসাধিকাতি দানাদিপাণাতিপাতাদিঅত্থস্স নিপ্ফাদিকা. কা পন সাতি আহ ‘‘সত্তমজৰনচেতনা’’তি. সা হি সন্নিট্ঠাপকচেতনা ৰুত্তনযেন পটিলদ্ধৰিসেসা পুরিমজৰনচেতনাহি লদ্ধাসেৰনা চ সমানা অনন্তরে অত্তভাৰে ৰিপাকদাযিনী উপপজ্জৰেদনীযকম্মং নাম. তেনাহ ‘‘অনন্তরে অত্তভাৰে ৰিপাকং দেতী’’তি. সতি সংসারপ্পৰত্তিযাতি ইমিনা অসতি সংসারপ্পৰত্তিযা অহোসিকম্মপক্খে তিট্ঠতি ৰিপচ্চনোকাসস্স অভাৰতোতি.

সমুগ্ঘাটিতানি ৰিপচ্চনোকাসস্স অনুপ্পত্তিধম্মতাপাদনেন. দিট্ঠধম্মৰেদনীযং অত্থি ৰিপাকারহাভাৰস্স অনিব্বত্তিতত্তা ৰিপচ্চনোকাসস্স অনুপচ্ছিন্নত্তা. কতূপচিতঞ্হি কম্মং সতি ৰিপচ্চনোকাসে যাৰ ন ফলং দেতি, তাৰ অত্থেৰ নাম ৰিপাকারহভাৰতো. ‘‘যস্স খো’’তি ইদং অনিযমাকারৰচনং ভগৰতা কম্মসরিক্খতাৰসেন সাধারণতো ৰুত্তন্তি আহ ‘‘যাদিসস্স খো’’তি.

পমাদকিলেসৰিমুত্তোতি পমাদহেতুকেহি সব্বেহি কিলেসেহি ৰিমুত্তো.

পাপস্স পিধানং নাম অৰিপাকধম্মতাপাদনন্তি আহ ‘‘অপ্পটিসন্ধিকং করীযতী’’তি. বুদ্ধসাসনেতি সিক্খাত্তযসঙ্গহে বুদ্ধস্স ভগৰতো সাসনে. যুত্তপ্পযুত্তো ৰিহরতীতি অকত্তব্বস্স অকরণৰসেন, কত্তব্বস্স চ পরিপূরণৰসেন পৰত্ততি.

দিস্সন্তি কুজ্ঝন্তীতি দিসা, পটিপক্খাতি আহ ‘‘সপত্তা’’তি. তপ্পসংসপকারন্তি মেত্তানিসংসকিত্তনাকারং. কালেনাতি আমেডিতলোপেন নিদ্দেসোতি আহ ‘‘খণে খণে’’তি. অনুকরোন্তূতি যেসং কল্যাণমিত্তানং সন্তিকে সুণন্তি, যথাসুতং ধম্মং তেসং অনুকরোন্তু দিট্ঠানুগতিকরণং আপজ্জন্তু, অত্তনো ৰেরিপুগ্গলানম্পি ভগৰতো সন্তিকে ধম্মস্সৰনং সম্মাপটিপত্তিঞ্চ পচ্চাসীসতি.

তসন্তি গতিং পত্থযন্তীতি তসা ভৰন্তরাদীসু সংসরণভাৰতো. তেনাহ ‘‘তসা ৰুচ্চন্তি সতণ্হা’’তি.

নেতব্বট্ঠানং উদকং নযন্তীতি নেত্তিকা. বন্ধিত্ৰাতি দল়্হং বন্ধিত্ৰা. তেলকঞ্জিকেনাতি তেলমিস্সিতেন কঞ্জিকেন.

যাদিসোৰ অনিট্ঠে, তাদিসোৰ ইট্ঠেতি ইট্ঠানিট্ঠে নিব্বিকারেন তাদী. যেসং পন কামামিসাদীনং ৰন্তত্তা রাগাদীনং চত্তত্তা কামোঘাদীনং তিণ্ণত্তা তাদিভাৰো ভৰেয্য, তেসং ভগৰতা সব্বসো ৰন্তা চত্তা তিণ্ণা, তস্মা ভগৰা ৰন্তাৰীতি তাদী, চত্তাৰীতি তাদী, তিণ্ণাৰীতি তাদী, যেহি অনঞ্ঞসাধারণেহি সীলাদিগুণেহি সমন্নাগতত্তা ভগৰা তাদিভাৰেন উক্কংসপারমিপ্পত্তো তংনিদ্দেসো, তেহি গুণেহি যাথাৰতো নিদ্দিসিতব্বতোপি তাদী. যথা যন্তরজ্জুযা যন্তং নীযতি, এৰং যায তণ্হায ভৰো নীযতি, সা ‘‘ভৰনেত্তি ভৰরজ্জূ’’তি ৰুত্তা. তেনাহ ‘‘তায হী’’তিআদি, কম্মানি কুসলাদীনি ৰিপচ্চযন্তি অপচ্চযন্তি এতাযাতি কম্মৰিপাকো. অপচ্চযভাৰো নাম অরিযমগ্গচেতনাযাতি আহ ‘‘মগ্গচেতনাযা’’তি. যাৰ ন কিলেসা পহীযন্তি, তাৰ ইমে সত্তা সইণা এৰ অসেরিৰিহারভাৰতোতি আহ ‘‘অণণো নিক্কিলেসো জাতো’’তি.

থেয্যপরিভোগো (ৰিসুদ্ধি. টী. ১.৯১) নাম সামিপরিভোগাভাৰতো. ভগৰতাপি হি অত্তনো সাসনে সীলৰতো পচ্চযা অনুঞ্ঞাতা, ন দুস্সীলস্স, দাযকানং সীলৰতোযেৰ পরিচ্চাগো, ন দুস্সীলস্স অত্তনো কারানং মহপ্ফলভাৰস্স পচ্চাসীসনতো. ইতি সত্থারা অননুঞ্ঞাতত্তা দাযকেহি চ অপরিচ্চত্তত্তা ‘‘দুস্সীলস্স পরিভোগো থেয্যপরিভোগো নামা’’তি ৰুত্তং. ইণৰসেন পরিভোগো ইণপরিভোগো. পটিগ্গাহকতো দক্খিণাৰিসুদ্ধিযা অভাৰতো ইণং গহেত্ৰা পরিভোগো ৰিযাতি অত্থো. যস্মা সেক্খা ভগৰতো ওরসপুত্তা, তস্মা তে পিতুসন্তকানং পচ্চযানং দাযাদা হুত্ৰা তে পচ্চযে পরিভুঞ্জন্তীতি তেসং পরিভোগো দাযজ্জপরিভোগো নাম. কিং পন তে ভগৰতো পচ্চযে পরিভুঞ্জন্তি, উদাহু গিহীহি দিন্নন্তি? গিহীহি দিন্নাপি তে ভগৰতা অনুঞ্ঞাতত্তা ভগৰতো সন্তকা হোন্তি অননুঞ্ঞাতেসু সব্বেন সব্বং পরিভোগাভাৰতো অনুঞ্ঞাতেসুযেৰ পরিভোগসম্ভৰতো. ধম্মদাযাদসুত্তঞ্চেত্থ (ম. নি. ১.২৯ আদযো) সাধকং.

অৰীতরাগানং তণ্হাপরৰসতায পচ্চযপরিভোগে সামিভাৰো নত্থি, তদভাৰেন ৰীতরাগানং তত্থ সামিভাৰো যথারুচি পরিভোগসম্ভৰতো. তথা হি তে পটিকূলম্পি অপ্পটিকূলাকারেন, অপ্পটিকূলম্পি পটিকূলাকারেন তদুভযং ৰিৰজ্জেত্ৰা উপেক্খাকারেন চ পচ্চযে পরিভুঞ্জন্তি, দাযকানঞ্চ মনোরথং পরিপূরেন্তি. সেসমেত্থ যং ৰত্তব্বং, তং ৰিসুদ্ধিমগ্গে, তংসংৰণ্ণনাসু চ ৰুত্তনযেনেৰ ৰেদিতব্বং. কিলেসইণানং অভাৰং সন্ধায ‘‘অণণো’’তি ৰুত্তং, ন পচ্চৰেক্খিতপরিভোগমত্তং. তেনাহ আযস্মা চ বাকুলো – ‘‘সত্তাহমেৰ খো অহং, আৰুসো, সরণো রট্ঠপিণ্ডং ভুঞ্জি’’ন্তি (ম. নি. ৩.২১১).

ৰত্থুকামকিলেসকামেহি তণ্হায পৰত্তিআকারং পটিচ্চ অত্থি রমণৰোহারোতি আহ – ‘‘দুৰিধেসুপি কামেসু তণ্হারতিসন্থৰ’’ন্তি. মন্তিতন্তি কথিতং. উপ্পন্নেহি সত্থুপটিঞ্ঞেহি. সংৰিভত্তাতি কুসলাদিৰসেন খন্ধাদীহি আকারেহি ৰিভত্তা. সুন্দরং আগমনন্তি স্ৰাগতং. ততো এৰ ন কুচ্ছিতং আগতং. সোল়সৰিধকিচ্চস্স পরিযোসিতত্তা আহ ‘‘তং সব্বং মযা কত’’ন্তি. মগ্গপঞ্ঞাযমেৰ ততিযৰিজ্জাসমঞ্ঞাতি আহ – ‘‘তীহি ৰিজ্জাহি নৰহি চ লোকুত্তরধম্মেহী’’তি.

অঙ্গুলিমালসুত্তৰণ্ণনায লীনত্থপ্পকাসনা সমত্তা.

৭. পিযজাতিকসুত্তৰণ্ণনা

৩৫৩. পকতিনিযামেনাতি যথা সোকুপ্পত্তিতো পুব্বে ইতি কত্তব্বেসু অসম্মোহৰসেন চিত্তং পক্খন্দতি, তানি চস্স উপট্ঠহন্তি, ন এৰং সোকস্স চিত্তসঙ্কোচসভাৰতো. তেন ৰুত্তং ‘‘পকতিনিযামেন পন ন পটিভন্তী’’তি. কেচি পন ‘‘সামন্তা কতিপযে ন কুটুম্বং সন্ধারেতি. তেনাহ ‘ন সব্বেন সব্বং পটিভন্তী’তি’’ ৰদন্তি. এত্থাতি দুতিযপদে. অনেকত্থত্তা ধাতূনং ‘‘ন পটিভাতী’’তি পদস্স ‘‘ন রুচ্চতী’’তি অত্থমাহ. ন পটিভাতীতি ৰা ভুঞ্জিতুকামতাচিত্তং ন উপট্ঠিতন্তি অত্থো. পতিট্ঠিতোকাসন্তি ইন্দ্রিযাৰিট্ঠট্ঠানং ৰদতি. পিযাযিতব্বতো পিযো জাতি উপ্পত্তিট্ঠানং এতেসন্তি পিযজাতিকা. পিযো পভুতি এতেসন্তি পিযপ্পভুতিকাতি ৰত্তব্বে, উ-কারস্স ৰ-কারং, ত-কারস্স চ লোপং কত্ৰা ‘‘পিযপ্পভাৰিকা’’তি ৰুত্তং. তেনাহ ‘‘পিযতো পভৰন্তী’’তি.

৩৫৫. পর-সদ্দেন সমানত্থং অজ্ঝত্তিকভাৰনিসেধনত্থং ‘‘পিরে’’তি পদন্তি আহ ‘‘অম্হাকং পরে’’তি. পিরেতি ৰা ‘‘পরতো’’তি ইমিনা সমানত্থং নিপাতপদন্তি আহ ‘‘চর পিরেতি পরতো গচ্ছা’’তি.

৩৫৬. দ্ৰিধা ছেত্ৰাতি এত্থ যদি ইত্থী তস্স পুরিসস্স পিযা, কথং দ্ৰিধা ছিন্দতীতি আহ ‘‘যদি হী’’তিআদি.

৩৫৭. কথং কথেয্যন্তি যথা ভগৰা এতস্স ব্রাহ্মণস্স কথেসি, সো চ মে কথেসি, তথা চাহং কথেয্যং. মরণৰসেন ৰিপরিণামো অত্তভাৰস্স পরিৰত্তত্তা. পলাযিত্ৰা গমনৰসেন অঞ্ঞথাভাৰো মিত্তসন্থৰস্স সমাগমস্স চ অঞ্ঞথাভূতত্তা.

ছড্ডিতভাৰেনাতি পরিৰত্তিতভাৰেন. হত্থগমনৰসেন অঞ্ঞথাভাৰো পুব্বে সৰসে ৰত্তিতানং ইদানি ৰসে অৰত্তনভাৰেন.

আচমেহীতি আচমনং মুখৰিক্খালনং কারেহি. যস্মা মুখং ৰিক্খালেন্তা হি হত্থপাদে ধোৰিত্ৰা ৰিক্খালেন্তি, তস্মা ‘‘আচমিত্ৰা’’তি ৰত্ৰা পচ্ছাপি তস্স অত্থং দস্সেন্তো ‘‘মুখং ৰিক্খালেত্ৰা’’তি আহ. সেসং সুৰিঞ্ঞেয্যমেৰ.

পিযজাতিকসুত্তৰণ্ণনায লীনত্থপ্পকাসনা সমত্তা.

৮. বাহিতিকসুত্তৰণ্ণনা

৩৫৯. সাৰজ্জতায উপারম্ভং অরহতীতি ওপারম্ভো. তেনাহ ‘‘দোসং আরোপনারহো’’তি. বালা উপারম্ভৰত্থুমঞ্ঞং অমূলকম্পি নং আরোপেন্তা উগ্ঘোসেন্তি, তস্মা তে অনামসিত্ৰা ‘‘ৰিঞ্ঞূহী’’তি ইদং পদং গহেত্ৰা পঞ্হেন ঞাতুং ইচ্ছিতেন অত্থেন উপারম্ভাদীনং উপরি উত্তরং পরিপূরেতুং নাসক্খিম্হা. তং কারণন্তি তং উপ্পত্তিকারণং. যদি হি মযা ‘‘ৰিঞ্ঞূহী’’তি পদং পক্খিপিত্ৰা ৰুত্তং ভৰেয্য, পঞ্হা মে পরিপুণ্ণা ভৰেয্য, ন পন ৰুত্তা. ইদানি পন তং কারণং উত্তরং আযস্মতা আনন্দেন ‘‘ৰিঞ্ঞূহী’’তি এৰং ৰদন্তেন পরিপূরিতং.

৩৬০. কোসল্লপটিপক্খতো অকোসল্লং ৰুচ্চতি অৰিজ্জা, তংসমুট্ঠানতো অকোসল্লসম্ভূতো. অৰজ্জং ৰুচ্চতি গরহিতব্বং, সহ অৰজ্জেহীতি সাৰজ্জো, গারয্হো. রাগাদিদোসেহি সদোসো. তেহি এৰ সব্যাবজ্ঝো, ততো এৰ সম্পতি আযতিঞ্চ সদুক্খো. সব্যাবজ্ঝাদিকো নিস্সন্দৰিপাকো.

তথা অত্থো ৰুত্তো ভৰেয্যাতি পুচ্ছাসভাগেনপি অত্থো ৰুত্তো ভৰেয্য, পুচ্ছন্তস্স পন ন তাৰ চিত্তারাধনং. তেনাহ – ‘‘এৰং ব্যাকরণং পন ন ভারিয’’ন্তি, গরুকরণং ন হোতি ৰিসারজ্জং ন সিযাতি অধিপ্পাযো. তেনাহ – ‘‘অপ্পহীনঅকুসলোপি হি পহানং ৰণ্ণেয্যা’’তি. এৰরূপো পন যথাকারী তথাৰাদী ন হোতি, ন এৰং ভগৰাতি আহ ‘‘ভগৰা’’তিআদি. এৰং ব্যাকাসীতি ‘‘সব্বাকুসলধম্মপহীনো খো, মহারাজ, তথাগতো’’তি এৰং ব্যাকাসি. সুক্কপক্খেপি এসেৰ নযোতি ইমিনা ‘‘সব্বেসংযেৰ কুসলানং ধম্মানং উপসম্পদং ৰণ্ণেতী’’তি ৰুত্তে যথা পুচ্ছা, তথা অত্থো ৰুত্তো ভৰেয্য, এৰং ব্যাকরণং পন ন ভারিযং, অসম্পাদিতকুসলধম্মোপি উপসম্পদং ৰণ্ণেয্য. ভগৰা পন সম্মদেৰ সম্পাদিতকুসলত্তা যথাকারী তথাৰাদীতি দস্সেতুং ‘‘এৰং ব্যাকাসী’’তি ইমমত্থং দস্সেতি. সেসং সুৰিঞ্ঞেয্যমেৰ.

বাহিতিকসুত্তৰণ্ণনায লীনত্থপ্পকাসনা সমত্তা.

৯. ধম্মচেতিযসুত্তৰণ্ণনা

৩৬৪. মেদৰণ্ণা উল়ুপৰণ্ণা চ তত্থ তত্থ পাসাণা উস্সন্না অহেসুন্তি মেদাল়ুপন্তি গামস্স সমঞ্ঞা জাতা. উল়ুপৰণ্ণাতি চন্দসমানৰণ্ণতায মেদপাসাণা ৰুত্তাতি কেচি. অট্ঠকথাযং পন ‘‘মেদৰণ্ণা পাসাণা কিরেত্থ উস্সন্না অহেসু’’ন্তি ইদং ৰুত্তং. অস্সাতি সেনাপতিস্স. কথাসমুট্ঠাপনত্থন্তি মল্লিকায সোকৰিনোদনধম্মকথাসমুট্ঠাপনত্থং.

রঞ্ঞাতি পসেনদীকোসলরঞ্ঞা. মহচ্চাতি মহতিযা. পদৰিপল্লাসেন চেতং ৰুত্তং. পসাদমরহন্তীতি পাসাদিকানি. তেনাহ ‘‘সহ রঞ্জনকানী’’তি. যানি পন পাসাদিকানি, তানি পস্সিতুং যুত্তানি. পাসাদিকানীতি ৰা সদ্দহনসহিতানি. তেনাহ ‘‘পসাদজনকানী’’তি. ‘‘অপ্পাবাধ’’ন্তি আদীসু ৰিয অপ্পসদ্দো অভাৰত্থোতি আহ ‘‘নিস্সদ্দানী’’তি. অনিযমত্থৰাচী য-সদ্দো অনিযমাকারৰাচকোপি হোতীতি ‘‘যত্থা’’তি পদস্স ‘‘যাদিসেসূ’’তিআদিমাহ. তথা হি অঙ্গুলিমালসুত্তে (ম. নি. অট্ঠ. ২.৩৪৭ আদযো) ‘‘যস্স খো’’তি পদস্স ‘‘যাদিসস্স খো’’তি অত্থো ৰুত্তো.

৩৬৬. পটিচ্ছদন্তি পটিচ্ছাদকং. রাজককুধভণ্ডানীতি রাজভণ্ডভূতানি. রহাযতীতি রহো করোতি, মং অজ্ঝেসতীতি অত্থো.

৩৬৭. যথাসভাৰতো ঞেয্যং ধারেতি অৰধারেতীতি ধম্মো, ঞাণন্তি আহ ‘‘পচ্চক্খঞাণসঙ্খাতস্স ধম্মস্সা’’তি. অনুনযোতি অনুগচ্ছনকো. দিট্ঠেন হি অদিট্ঠস্স অনুমানং. তেনাহ ‘‘অনুমানং অনুবুদ্ধী’’তি. আপাণকোটিকন্তি যাৰ পাণকোটি, তাৰ জীৰিতপরিযোসানং. এতন্তি ধম্মন্ৰযসঙ্খাতং অনুমানং. এৰন্তি ‘‘ইধ পনাহ’’ন্তি ৰুত্তপ্পকারেন.

৩৬৯. চক্খুং অবন্ধন্তে ৰিযাতি অপাসাদিকতায পস্সন্তানং চক্খুং অত্তনি অবন্ধন্তে ৰিয. কুলসন্তানানুবন্ধো রোগো কুলরোগো. উল়ারন্তি সানুভাৰং. যো হি আনুভাৰসম্পন্নো, তং ‘‘মহেসক্খ’’ন্তি ৰদন্তি. অরহত্তং গণ্হন্তোতি উক্কট্ঠনিদ্দেসোযং, হেট্ঠিমফলানি গণ্হন্তোপি.

৩৭৩. জীৰিকা জীৰিতৰুত্তি.

৩৭৪. ধম্মং চেতেতি সংৰেদেতি এতেহীতি ধম্মচেতিযানি, ধম্মস্স পূজাৰচনানি. ননু চেতানি বুদ্ধসঙ্ঘগুণদীপনানিপি সন্তি? কথং ‘‘ধম্মচেতিযানীতি ধম্মস্স চিত্তীকারৰচনানী’’তি ৰুত্তন্তি আহ ‘‘তীসু হী’’তিআদি. তত্থ যস্মা বুদ্ধরতনমূলকানি সেসরতনানি তস্স ৰসেন লদ্ধব্বতো. কোসলরঞ্ঞা চেত্থ বুদ্ধগারৰেন ধম্মসঙ্ঘগারৰং পৰেদিতং, তস্মা ‘‘ভগৰতি চিত্তীকারে কতে ধম্মোপি কতোৰ হোতী’’তি ৰুত্তং. যস্মা চ রতনত্তযপসাদপুব্বিকা সাসনে সম্মাপটিপত্তি, তস্মা ৰুত্তং – ‘‘আদিব্রহ্মচরিযকানীতি মগ্গব্রহ্মচরিযস্স আদিভূতানী’’তি. সেসং সুৰিঞ্ঞেয্যমেৰ.

ধম্মচেতিযসুত্তৰণ্ণনায লীনত্থপ্পকাসনা সমত্তা.

১০. কণ্ণকত্থলসুত্তৰণ্ণনা

৩৭৫. অনন্তরসুত্তে ৰুত্তকরণীযেনেৰাতি ‘‘পাসাদে ৰা নাটকেসু ৰা চিত্তস্সাদং অলভমানো তত্থ তত্থ ৰিচরিতুং আরদ্ধো’’তি ৰুত্তকরণীযেন. অপ্পদুট্ঠপদোসীনঞ্হি এৰং হোতীতি.

৩৭৬. পুচ্ছিতোতি ‘‘অঞ্ঞং দূতং নালত্থু’’ন্তি পুচ্ছিতো. সোতি রাজা. তাসং ৰন্দনা সচে উত্তরকালং, অত্তনো আগমনকারণং কথেস্সতি.

৩৭৮. একাৰজ্জনেনাতি একৰীথিজৰনেন. তেন একচিত্তং তাৰ তিট্ঠতু, একচিত্তৰীথিযাপি সব্বং জানিতুং ন সক্কাতি দস্সেতি. ‘‘ইদং নাম অতীতং জানিস্সামী’’তি অনিযমেত্ৰা আৰজ্জতো যং কিঞ্চি অতীতং জানাতি, নিযমিতে পন নিযমিতমেৰাতি আহ – ‘‘একেন হি…পে… একদেসমেৰ জানাতী’’তি. তেন চিত্তেনাতি ‘‘অতীতং সব্বং জানিস্সামী’’তি এৰং পৰত্তচিত্তেন. ইতরেসূতি অনাগতপচ্চুপ্পন্নেসু. কারণজাতিকন্তি যুত্তিসভাৰং, যুত্তিযা যুত্তন্তি অত্থো. সম্পরাযগুণন্তি সম্পরাযে কতকম্মস্স ৰিসেসং.

৩৭৯. লোকুত্তরমিস্সকানি কথিতানি বোধিরাজকুমারসুত্তে ৰিয লোকিযা চেৰ লোকুত্তরা চ. যথালাভৰসেন চেত্থ পধানিযঙ্গানং লোকুত্তরগ্গহণং ৰেদিতব্বং. পচ্চেকং এৰ নেসঞ্চ পধানিযঙ্গতা দট্ঠব্বা যথা ‘‘অট্ঠৰিমোক্খা সন্দিস্সন্তি লোকুত্তরমিস্সকা’’তি. লোকুত্তরানেৰাতি চেত্থ যং ৰত্তব্বং, তং পরতো আৰি ভৰিস্সতি. পধাননানত্তন্তি পদহননানত্তং, ভাৰনানুযোগৰিসেসন্তি অত্থো. সঙ্খারে পরিমদ্দিত্ৰা পটিপক্খধম্মে একদেসতো পজহিত্ৰা ঠিতস্স ভাৰনানুযোগো সব্বেন সব্বং অপরিমদ্দিতসঙ্খারস্স অপ্পহীনপটিপক্খস্স ভাৰনানুযোগতো সুখুমো ৰিসদোৰ হোতি, সচ্চাভিসমযেন সন্তানস্স আহিতৰিসেসত্তাতি আহ – ‘‘অঞ্ঞাদিসমেৰ হি পুথুজ্জনস্স পধানং, অঞ্ঞাদিসং সোতাপন্নস্সা’’তিআদি. অযঞ্চ ৰিসেসো ন কেৰলং অনরিযঅরিযপুগ্গলতো এৰ, অথ খো অরিযেসুপি সেক্খাদিৰিসেসতোপি লব্ভতি অভিসঙ্খারৰিসেসতো অভিনীহারতো চ ইজ্ঝনতোতি দস্সেন্তো ‘‘অঞ্ঞাদিসং সকদাগামিনো’’তিআদিমাহ. ন পাপুণাতীতি যস্মা পুথুজ্জনো সব্বথাৰ পধানং পদহন্তো সোতাপত্তিমগ্গং অধিগচ্ছতি, সোতাপন্নো চ সকদাগামিমগ্গন্তি হেট্ঠিমং উপরিমতো ওল়ারিকং, উপরিমঞ্চ ইতরতো সুখুমং তেন পহাতুং অসক্কুণেয্যস্স পজহনতো, ইতি অধিগন্তব্বৰিসেসেন চ অধিগমপটিপদায সণ্হসুখুমতা তিক্খৰিসদতা চ ৰিঞ্ঞাযতীতি আহ – ‘‘পুথুজ্জনস্স পধানং সোতাপন্নস্স পধানং ন পাপুণাতী’’তিআদি.

অকূটকরণন্তি অৰঞ্চনকিরিযং. অনৰচ্ছিন্দনন্তি অতিযানং. অৰিঞ্ছনং ন আকড্ঢনং, নিযুত্ততং ৰিনিৰেঠেত্ৰা সমন্তা ৰিপরিৰত্তিত্ৰা সমধারায ছড্ডনং ৰা. তস্স কারণং তংকারণং, তং কারণন্তি ৰা তং কিরিযং তং অধিকারং. দন্তেহি গন্তব্বভূমিন্তি দন্তেহি পত্তব্বট্ঠানং, পত্তব্বৰত্থুং ৰা. চত্তারোপি অস্সদ্ধা নাম উপরিমউপরিমসদ্ধায অভাৰতো. যেন হি যং অপ্পত্তং, তস্স তং নত্থি. অরিযসাৰকস্স…পে… নত্থি পঠমমগ্গেনেৰ মাযাসাঠেয্যানং পহাতব্বত্তা. তেনেৰাতি সম্মদেৰ ৰিরুদ্ধপক্খানং সদ্ধাদীনং ইধাধিপ্পেতত্তা. যদি এৰং কথং মিস্সককথাতি আহ ‘‘অস্সখল়ুঙ্কসুত্তন্তে পনা’’তিআদি. চত্তারোৰ হোন্তি পুথুজ্জনাদিৰসেন.

ওপম্মসংসন্দনে অদন্তহত্থিআদযো ৰিযাতিআদিনা কণ্হপক্খে, যথা পন দন্তহত্থিআদযোতিআদিনা সুক্কপক্খে চ সাধারণতো একজ্ঝং কত্ৰা ৰুত্তং, অসাধারণতো ভিন্দিত্ৰা দস্সেতুং ‘‘ইদং ৰুত্তং হোতী’’তিআদি ৰুত্তং.

৩৮০. সম্মপ্পধানা নিব্বিসিট্ঠৰীরিযা. তেনাহ – ‘‘ন কিঞ্চি নানাকরণং ৰদামি, যদিদং ৰিমুত্তিযা ৰিমুত্তি’’ন্তি. ন হি সুক্খৰিপস্সকতেৰিজ্জছল়ভিঞ্ঞানং ৰিমুত্তিযা নানাকরণং অত্থি. তেন ৰুত্তং ‘‘যং একস্সা’’তিআদি. কিং ত্ৰং ন জানাসীতি সম্বন্ধো. আগচ্ছন্তীতি উপ্পজ্জনৰসেন আগচ্ছন্তি. নাগচ্ছন্তীতি এত্থাপি এসেৰ নযো. ইদং পুচ্ছন্তোতি ইদং পুচ্ছামীতি দস্সেন্তো. অপ্পহীনচেতসিকদুক্খা অনধিগতঅনাগামিতা. তেনাহ ‘‘উপপত্তিৰসেন আগন্তারো’’তি. সমুচ্ছিন্নদুক্খাতি সমুগ্ঘাটিতচেতসিকদুক্খা.

৩৮১. তম্হা ঠানাতি ততো যথাধিগতইস্সরিযট্ঠানতো. পুন তম্হা ঠানাতি ততো দুগ্গতা. সম্পন্নকামগুণন্তি উল়ারকামগুণসমন্নাগতং.