৯. মহাসারোপমসুত্তৰণ্ণনা

৩০৭. নচিরপক্কন্তেতি ন চিরং পক্কন্তে, পক্কন্তস্স সতো ন চিরস্সেৰ. সলিঙ্গেনেৰাতি মুণ্ডিযকাসাযগ্গহণাদিনা অত্তনো পুরিমলিঙ্গেনেৰ. পাটিযেক্কে জাতেতি ৰিপন্নাচারদিট্ঠিতায পকাসনীযকম্মকরণতো পরং অঞ্ঞতিত্থিযসদিসে ৰিসুং ভূতে. কুলপুত্তোতি জাতিমত্তেন কুলপুত্তো. অসম্ভিন্নাযাতি সম্ভেদরহিতায, জাতিসঙ্করৰিরহিতাযাতি অত্তো. জাতিসীসেন ইধ জাতিৰত্থুকং দুক্খং ৰুত্তন্তি আহ ‘‘ওতিণ্ণোতি যস্স জাতি অন্তো অনুপৰিট্ঠা’’তি. জাতো হি সত্তো জাতকালতো পট্ঠায জাতিনিমিত্তেন দুক্খেন অন্তো অনুপৰিট্ঠো ৰিয ৰিবাধীযতি. জরাযাতিআদীসুপি এসেৰ নযো. চত্তারো পচ্চযা লব্ভন্তীতি লাভা, চতুন্নং পচ্চযানং লব্ভমানানং সুকতভাৰো সুট্ঠু অভিসঙ্খতভাৰো. ৰণ্ণভণনন্তি গুণকিত্তনং. অপঞ্ঞাতাতি সম্ভাৰনাৰসেন ন পঞ্ঞাতা. লাভাদিনিব্বত্তিযাভাৰদস্সনঞ্হেতং. তেনাহ ‘‘ঘাসচ্ছাদনমত্তম্পি ন লভন্তী’’তি. অপ্পেসক্খাতি অপ্পানুভাৰা. সা পন অপ্পেসক্খতা অধিপতেয্যসম্পত্তিযা চ পরিৰারসম্পত্তিযা চ অভাৰেন পাকটা হোতি. তত্থ পরিৰারসম্পত্তিযা অভাৰং দস্সেন্তো ‘‘অপ্পপরিৰারা’’তি আহ.

সারেনপি কেচি অজাননেন অঞ্ঞালাভেন ৰা অসারভূতম্পি কত্তব্বং করোন্তীতি ততো ৰিসেসনত্থং ‘‘সারেন সারকরণীয’’ন্তি ৰুত্তন্তি তং দস্সেন্তো ‘‘অক্খচক্কযুগনঙ্গলাদিক’’ন্তি আহ. ব্রহ্মচরিযস্সাতি সিক্খাত্তযসঙ্গহস্স সাসনব্রহ্মচরিযস্স. মহারুক্খস্স মগ্গফলসারস্স ঞাণদস্সনফেগ্গুকস্স সমাধিতচস্স সীলপপটিকস্স চঞ্চলসভাৰা সংসপ্পচারীতি চ চত্তারো পচ্চযা সাখাপলাসং নাম. তেনেৰাতি লাভসক্কারসিলোকনিব্বত্তনেনেৰ. সারো মে পত্তোতি ইমস্মিং সাসনে অধিগন্তব্বসারো নাম ইমিনা লাভাদিনিব্বত্তনেন অনুপ্পত্তোতি ৰোসানং নিট্ঠিতকিচ্চং আপন্নো.

৩১০. ঞাণদস্সনন্তি ঞাণভূতং দস্সনং ৰিসযস্স সচ্ছিকরণৰসেন পৰত্তং অভিঞ্ঞাঞাণং. সুখুমং রূপন্তি দেৰাদীনং, অঞ্ঞম্পি ৰা সুখুমসভাৰং রূপং. তেনাহ ‘‘অন্তমসো…পে… ৰিহরন্তী’’তি, দিব্বচক্খু হি ইধ উক্কট্ঠনিদ্দেসেন ‘‘ঞাণদস্সন’’ন্তি গহিতং.

৩১১. অসমযৰিমোক্খং আরাধেতীতি এত্থ অধিপ্পেতং অসমযৰিমোক্খং পাল়িযা এৰ দস্সেতুং ‘‘কতমো অসমযৰিমোক্খো’’তিআদি ৰুত্তং. অট্ঠন্নঞ্হি সমাপজ্জনসমযোপি অত্থি অসমযোপি, মগ্গৰিমোক্খেন পন ৰিমুচ্চনস্স সমযো ৰা অসমযো ৰা নত্থি. যস্স সদ্ধা বলৰতী, ৰিপস্সনা চ আরদ্ধা, তস্স গচ্ছন্তস্স তিট্ঠন্তস্স নিসীদন্তস্স ভুঞ্জন্তস্স চ মগ্গফলপটিৰেধো নাম ন হোতীতি ন ৰত্তব্বং, ইতি মগ্গৰিমোক্খেন ৰিমুচ্চন্তস্স সমযো ৰা অসমযো ৰা নত্থীতি সো অসমযৰিমোক্খো. তেনাহ ‘‘লোকিযসমাপত্তিযো হী’’তিআদি.

ন কুপ্পতি, ন নস্সতীতি অকুপ্পা, কদাচিপি অপরিহানসভাৰা. সব্বসংকিলেসেহি পটিপ্পস্সদ্ধিৰসেন চেতসো ৰিমুত্তীতি চেতোৰিমুত্তি. তেনাহ ‘‘অরহত্তফলৰিমুত্তী’’তি. অযমত্থো পযোজনং এতস্সাতি এতদত্থং, সাসনব্রহ্মচরিযং, তস্স এসা পরমকোটি. যথারদ্ধস্স সারোপমেন ফলেন দেসনা নিট্ঠাপিতাতি আহ ‘‘যথানুসন্ধিনাৰ দেসনং নিট্ঠপেসী’’তি. যং পনেত্থ অত্থতো অৰিভত্তং, তং সুৰিঞ্ঞেয্যমেৰ.

মহাসারোপমসুত্তৰণ্ণনায লীনত্থপ্পকাসনা সমত্তা.