১০. চূল়সারোপমসুত্তৰণ্ণনা

৩১২. পিঙ্গলধাতুকোতি পিঙ্গলসভাৰো পিঙ্গলচ্ছৰিকো, পিঙ্গলক্খোতি ৰা অত্থো. পব্বজিতসমূহসঙ্খাতো সঙ্ঘো, ন সীলাদিগুণেহি সঙ্গহিতব্বভাৰেন. সঙ্ঘো এতেসং অত্থি পরিৰারভূতোতি সঙ্ঘিনো. স্ৰেৰাতি সো এৰ পব্বজিতসমূহসঙ্খাতো. আচারসিক্খাপনৰসেনাতি অত্তনা পরিকপ্পিতঅচেলৰতাদিআচারসিক্খাপনৰসেন. পঞ্ঞাতাতি যথাসকং সমাদিন্নৰতৰসেন চেৰ ৰিঞ্ঞাতলদ্ধিৰসেন চ পঞ্ঞাতা. লদ্ধিকরাতি তস্সা মিচ্ছাদিট্ঠিযা উপ্পাদকা. বহুজনস্সাতি পুথুজনস্স. তস্স পন আগমসম্পদাপি নাম নত্থি, কুতো অধিগমোতি একংসতো অন্ধপুথুজ্জনো এৰাতি আহ ‘‘অস্সুতৰতো অন্ধবালপুথুজ্জনস্সা’’তি. ন হি ৰিঞ্ঞূ অপ্পসাদনীযে পসীদন্তি. মঙ্গলেসু কাতব্বদাসকিচ্চকরো দাসো মঙ্গলদাসো.

তন্তাৰুতানন্তি তন্তে পসারেত্ৰা ৰীতানং. গণ্ঠনকিলেসোতি সংসারে বন্ধনকিলেসো. এৰং ৰাদিতাযাতি এৰং পটিঞ্ঞতায, এৰং দিট্ঠিতায ৰা. নিয্যানিকাতি নিয্যানগতিসপ্পাটিহীরকা অনুপারম্ভভূতত্তাতি অধিপ্পাযো. নো চে নিয্যানিকাতি আনেত্ৰা যোজনা. তেসং সব্বঞ্ঞুপটিঞ্ঞায অভূতত্তা তস্সা অভূতভাৰকথনেন তস্স ব্রাহ্মণস্স ন কাচি অত্থসিদ্ধীতি আহ ‘‘নেসং অনিয্যানিকভাৰকথনেন অত্থাভাৰতো’’তি.

৩১৮. নিহীনলোকামিসে লীনো অজ্ঝাসযো এতস্স, ন পন নিব্বানেতি. লীনজ্ঝাসযো. সাসনং সিথিলং কত্ৰা গণ্হাতি সিক্খায ন তিব্বগারৰত্তা.

৩২৩. হেট্ঠাতি অনন্তরাতীতসুত্তে মহাসারোপমে. পঠমজ্ঝানাদিধম্মা ৰিপস্সনাপাদকাতি ৰিপস্সনায পদট্ঠানভূতা. ইধাতি ইমস্মিং চূল়সারোপমে আগতা. নিরোধপাদকাতি অনাগামিনো, অরহন্তো ৰা নিরোধসমাপত্তিং সমাপজ্জিতুং সমত্থা. তস্মাতি নিরোধপাদকত্তা. পঠমজ্ঝানাদিধম্মা ঞাণদস্সনতো উত্তরিতরাতি ৰেদিতব্বা.

চূল়সারোপমসুত্তৰণ্ণনায লীনত্থপ্পকাসনা সমত্তা.

নিট্ঠিতা চ ওপম্মৰগ্গৰণ্ণনা.