৫. অনঙ্গণসুত্তৰণ্ণনা

৫৭. আযস্মা সারিপুত্তোতি এত্থ ইতি-সদ্দো আদিঅত্থো, এৰমাদিকন্তি অত্থো. তেন ‘‘ভিক্খূ আমন্তেসী’’তিআদিকং সব্বং সুত্তং সঙ্গণ্হাতি. তেনাহ ‘‘অনঙ্গণসুত্ত’’ন্তি. তস্স কো নিক্খেপো? অত্তজ্ঝাসযো. পরেহি অনজ্ঝিট্ঠোযেৰ হি মহাথেরো ইমং দেসনং আরভি. কেচি পনাহু ‘‘একচ্চে ভিক্খূ সংকিলিট্ঠচিত্তে দিস্ৰা তেসং চিত্তসংকিলেসপ্পহানায চেৰ একচ্চানং আযতিং অনুপ্পাদনায চ অযং দেসনা আরদ্ধা’’তি. এৰং সব্বসুত্তেসূতি যথা এত্থ অনঙ্গণসুত্তে, এৰং ইতো পরেসূতি সব্বেসুপি সুত্তেসু অনুত্তানঅপুব্বপদৰণ্ণনা এৰ করীযতি. তেনাহ ‘‘তস্মা’’তিআদি. গণনপরিচ্ছেদোতি গণনেন পরিচ্ছিন্দনং. ইদঞ্হি অপ্পরজক্খমহারজক্খতাৰসেন দুৰিধে সত্তে পচ্চেকং অত্থঞ্ঞুতানত্থঞ্ঞুতাৰসেন দ্ৰিধা কত্ৰা ‘‘চত্তারো’’তি অনৰসেসপরিযাদানং. ৰজ্জীপুত্তকাদযো ৰিয পুগ্গলৰাদীতি ন গহেতব্বং লোকসমঞ্ঞানুসারেন অত্থং পটিৰিজ্ঝিতুং সমত্থানং ৰসেন দেসনায আরদ্ধত্তা, অযঞ্চ দেসনানযো সত্থু নিস্সায এৰাতি দস্সেন্তো ‘‘অযঞ্হী’’তিআদিমাহ.

সম্মুতিপরমত্থদেসনাকথাৰণ্ণনা

তত্থ (অ. নি. টী. ১.১.১৭০) সম্মুতিযা দেসনা সম্মুতিদেসনা, পরমত্থস্স দেসনা পরমত্থদেসনা. তত্থাতি সম্মুতিপরমত্থদেসনাসু, ন সম্মুতিপরমত্থেসু. তেনাহ ‘‘এৰরূপা সম্মুতিদেসনা, এৰরূপা পরমত্থদেসনা’’তি. তত্রিদং সম্মুতিপরমত্থানং লক্খণং – যস্মিং ভিন্নে, বুদ্ধিযা অৰযৰৰিনিব্ভোগে ৰা কতে ন তংসমঞ্ঞা, সা ঘটপটাদিপ্পভেদা সম্মুতি, তব্বিপরিযাযতো পরমত্থো. ন হি কক্খল়ফুসনাদিসভাৰে অযং নযো লব্ভতি, তত্থ রূপাদিধম্মং সমূহসন্তানৰসেন পৰত্তমানং উপাদায পুগ্গলৰোহারোতি আহ ‘‘পুগ্গলোতি সম্মুতিদেসনা’’তি. সেসপদেসুপি এসেৰ নযো. উপ্পাদৰযৰন্তো সভাৰধম্মা ন নিচ্চাতি আহ ‘‘অনিচ্চন্তি পরমত্থদেসনা’’তি. এস নযো সেসপদেসুপি. ননু খন্ধদেসনাপি সম্মুতিদেসনাৰ. খন্ধট্ঠো হি রাসট্ঠো, কোট্ঠাসট্ঠো ৰাতি? সচ্চমেতং, অযং পন খন্ধসমঞ্ঞা ফস্সাদীসু তজ্জাপঞ্ঞত্তি ৰিয পরমত্থসন্নিস্সযা তস্স আসন্নতরা, পুগ্গলসমঞ্ঞাদযো ৰিয ন দূরেতি পরমত্থসঙ্গহতা ৰুত্তা, খন্ধসীসেন ৰা তদুপাদানা সভাৰধম্মা এৰ গহিতা. ননু চ সভাৰধম্মা সব্বেপি সম্মুতিমুখেনেৰ দেসনং আরোহন্তি, ন সমুখেনাতি সব্বাপি দেসনা সম্মুতিদেসনাৰ সিযাতি? নযিদমেৰং দেসেতব্বধম্মৰিভাগেন দেসনাৰিভাগস্স অধিপ্পেতত্তা, ন চ সদ্দো কেনচি পৰত্তিনিমিত্তেন ৰিনা অত্থং পকাসেতীতি.

সম্মুতিৰসেন দেসনং সুত্ৰাতি ‘‘ইধেকচ্চো পুগ্গলো অত্তন্তপো হোতি অত্তপরিতাপানুযোগমনুযুত্তো’’তিআদিনা (ম. নি. ২.৪১৩; পু. প. ১০.২৫ মাতিকা) সম্মুতিমুখেন পৰত্তিতং দেসনং সুতমযঞাণুপ্পাদনৰসেন সুত্ৰা. অত্থং পটিৰিজ্ঝিত্ৰাতি তদনুসারেন চতুসচ্চসঙ্খাতং অত্থং সহ ৰিপস্সনায মগ্গেন পটিৰিজ্ঝিত্ৰা. মোহং পহাযাতি তদেকট্ঠেহি কিলেসেহি সদ্ধিং অনৰসেসং মোহং পজহিত্ৰা. ৰিসেসন্তি নিব্বানসঙ্খাতং অরহত্তসঙ্খাতঞ্চ ৰিসেসং. তেসন্তি তাদিসানং ৰিনেয্যানং. পরমত্থৰসেনাতি ‘‘পঞ্চিমানি, ভিক্খৰে, ইন্দ্রিযানী’’তিআদিনা (সং. নি. ৫.৪৭২-৪৭৪) পরমত্থধম্মৰসেন. সেসং অনন্তরনযে ৰুত্তসদিসমেৰ. তত্থাতি তস্সং সম্মুতিৰসেন পরমত্থৰসেন চ দেসনাযং. দেসভাসাকুসলোতি নানাদেসভাসাসু কুসলো. তিণ্ণং ৰেদানন্তি নিদস্সনমত্তং, তিণ্ণং ৰেদানং সিপ্পগন্থানম্পীতি অধিপ্পাযো সিপ্পুগ্গহণঞ্হি পরতো ৰক্খতি. সিপ্পানি ৰা ৰেদন্তোগধে কত্ৰা ‘‘তিণ্ণং ৰেদান’’ন্তি ৰুত্তং. কথেতব্বভাৰেন ঠিতানি, ন কত্থচি সন্নিহিতভাৰেনাতি ৰেদানম্পি কথেতব্বভাৰেনেৰ অৰট্ঠানং দীপেন্তো ‘‘গুয্হা তযী নিহিতা গয্হতী’’তি মিচ্ছাৰাদং পটিক্খিপতি. নানাৰিধা দেসভাসা এতেসন্তি নানাদেসভাসা.

পরমো উত্তমো অত্থো পরমত্থো, ধম্মানং যথাভূতসভাৰো. লোকসঙ্কেতমত্তসিদ্ধা সম্মুতি. যদি এৰং কথং সম্মুতিকথায সচ্চতাতিআহ ‘‘লোকসম্মুতিকারণা’’তি, লোকসমঞ্ঞং নিস্সায পৰত্তনতো. লোকসমঞ্ঞায হি অভিনিৰেসেন ৰিনা ঞাপনা একচ্চস্স সুতস্স সাৰনা ৰিয ন মুসা অনতিধাৰিতব্বতো তস্সা. তেনাহ ভগৰা ‘‘জনপদনিরুত্তিং নাভিনিৰেসেয্য, সমঞ্ঞং নাতিধাৰেয্যা’’তি (ম. নি. ৩.৩৩২). ধম্মানন্তি সভাৰধম্মানং. ভূতকারণাতি যথাভূতসভাৰং নিস্সায পৰত্তনতো. সম্মুতিং ৰোহরন্তস্সাতি ‘‘পুগ্গলো সত্তো’’তিআদিনা লোকসমঞ্ঞং কথেন্তস্স.

হিরোত্তপ্পদীপনত্থন্তি লোকপালনকিচ্চে হিরোত্তপ্পধম্মে কিচ্চতো পকাসেতুং. তেসঞ্হি কিচ্চং সত্তসন্তানেযেৰ পাকটং হোতীতি পুগ্গলাধিট্ঠানায কথায তং ৰত্তব্বং. এস নযো সেসেসুপি. যস্মিঞ্হি চিত্তুপ্পাদে কম্মং উপ্পন্নং, তংসন্তানে এৰ তস্স ফলস্স উপ্পত্তি কম্মস্সকতা. এৰঞ্হি কতৰিঞ্ঞাণনাসো অকতাগমো ৰা নত্থীতি সা পুগ্গলাধিট্ঠানায এৰ কথায দীপেতব্বা. তেহি সত্তেহি কাতব্বা পুঞ্ঞাদিকিরিযা পচ্চত্তপুরিসকারোপি সন্তানৰসেন নিপ্ফাদেতব্বতো পুগ্গলাধিট্ঠানায এৰ কথায দীপেতব্বো.

আনন্তরিযদীপনত্থন্তি চুতিঅনন্তরং ফলং অনন্তরং নাম, তস্মিং অনন্তরে নিযুত্তানি, তন্নিব্বত্তনেন অনন্তরকরণসীলানি, অনন্তরপযোজনানি ৰাতি আনন্তরিযানি, মাতুঘাতাদীনি, তেসং দীপনত্থং. তানিপি হি সন্তানৰসেন নিপ্ফাদেতব্বতো ‘‘মাতরং জীৰিতা ৰোরোপেতী’’তিআদিনা (পট্ঠা. ১.১.৪২৩) পুগ্গলাধিট্ঠানায এৰ কথায দীপেতব্বানি, তথা ‘‘সো মেত্তাসহগতেন চেতসা একং দিসং ফরিত্ৰা ৰিহরতী’’তিআদিনা (দী. নি. ১.৫৫৬; ৩.৩০৮; ম. নি. ১.৭৭; ২.৩০৯; ৩.২৩০; ৰিভ. ৬৪২, ৬৪৩) ‘‘সো অনেকৰিহিতং পুব্বেনিৰাসং অনুস্সরতি একম্পি জাতি’’ন্তিআদিনা (দী. নি. ১.২৪৪, ২৪৫; ম. নি. ১.১৪৮, ৩৮৪, ৪৩১; পারা. ১২) ‘‘অত্থি দক্খিণা দাযকতো ৰিসুজ্ঝতি, নো পটিগ্গাহকতো’’তিআদিনা (ম. নি. ৩.৩৮১) চ পৰত্তা ব্রহ্মৰিহারপুব্বেনিৰাসদক্খিণাৰিসুদ্ধিকথা পুগ্গলাধিট্ঠানায এৰ কথায দীপেতব্বা সত্তসন্তানৰিসযত্তা. ‘‘অট্ঠ পুরিসপুগ্গলা (সং. নি. ১.২৪৯), ন সমযৰিমুত্তো পুগ্গলো’’তিআদিনা (পু. প. ১) চ পরমত্থং কথেন্তোপি লোকসম্মুতিযা অপ্পহানত্থং পুগ্গলকথং কথেসি. এতেন ৰুত্তাৰসেসায কথায পুগ্গলাধিট্ঠানভাৰে পযোজনং সামঞ্ঞৰসেন সঙ্গহিতন্তি দট্ঠব্বং. কামঞ্চেতং সব্বং অপরিঞ্ঞাতৰত্থুকানং ৰসেন ৰুত্তং, পরিঞ্ঞাতৰত্থুকানম্পি পন এৰং দেসনা সুখাৰহা হোতি.

মহাজনোতি লোকিযমহাজনো. ন জানাতি ঘনৰিনিব্ভোগাভাৰেন ধম্মকিচ্চস্স অসল্লক্খণেন. তত্থ ‘‘কিং নামেতং, কথং নামেত’’ন্তি সংসযপক্খন্দতায সম্মোহং আপজ্জতি. ৰিরুদ্ধাভিনিৰেসিতায পটিসত্তু হোতি. জানাতি চিরপরিচিতত্থা ৰোহারকথায. ততো এৰ ন সম্মোহমাপজ্জতি, ন পটিসত্তু হোতি.

নপ্পজহন্তি ৰোহারমুখেন পরমত্থস্স দীপনতো. সমঞ্ঞাগহণৰসেন লোকেন ঞাযতি সমঞ্ঞাযতি ৰোহরীযতীতি লোকসমঞ্ঞা, তায লোকসমঞ্ঞায. তস্স তস্স অত্থস্স ৰিভাৰনে লোকেন নিচ্ছিতং, নিযতং ৰা ৰুচ্চতি ৰোহরীযতীতি লোকনিরুত্তি, তস্সং লোকনিরুত্তিযং. তথা লোকেন অভিলপীযতীতি লোকসমঞ্ঞতায লোকাভিলাপো, তস্মিং লোকাভিলাপে ঠিতাযেৰ অপ্পহানতো. পুগ্গলৰাদিনো ৰিয পরমত্থৰসেন অগ্গহেত্ৰা.

সন্তোতি এত্থ সন্তসদ্দো ‘‘দীঘং সন্তস্স যোজন’’ন্তিআদীসু (ধ. প. ৭০) কিলন্তভাৰে আগতো, ‘‘অযঞ্চ ৰিতক্কো অযঞ্চ ৰিচারো সন্তা হোন্তি সমিতা’’তিআদীসু (ৰিভ. ৫৭৬) নিরুদ্ধভাৰে আগতো, ‘‘অধিগতো খো ম্যাযং ধম্মো গম্ভীরো দুদ্দসো দুরনুবোধো সন্তো পণীতো’’তিআদীসু (দী. নি. ২.৬৭; ম. নি. ১.২৮১; ২.৩৩৭; সং. নি. ২.১৭২; মহাৰ. ৭) সন্তঞাণগোচরতায, ‘‘উপসন্তস্স সদা সতিমতো’’তিআদীসু (উদা. ২৭) কিলেসৰূপসমে, ‘‘সন্তো হৰে সব্ভি পৰেদযন্তী’’তিআদীসু (ধ. প. ১৫) সাধূসু, ‘‘পঞ্চিমে, ভিক্খৰে, মহাচোরা সন্তো সংৰিজ্জমানা’’তিআদীসু (পারা. ১৯৫) অত্থিভাৰে, ইধাপি অত্থিভাৰেযেৰ. সো চ পুগ্গলসম্বন্ধেন ৰুত্তত্তা লোকসমঞ্ঞাৰসেনাতি দস্সেন্তো ‘‘লোকসঙ্কেতৰসেন অত্থী’’তি আহ. অত্থীতি চেতং নিপাতপদং দট্ঠব্বং ‘‘অত্থি ইমস্মিং কাযে কেসা’’তিআদীসু (দী. নি. ২.৩৭৩-৩৭৪; ম. নি. ১.১১০; ৩.১৫৪; অ. নি. ৬.২৯; ১০.৬০) ৰিয. সংৰিজ্জমানাতি পদস্স অত্থং দস্সেন্তো ‘‘উপলব্ভমানা’’তি আহ. যঞ্হি সংৰিজ্জতি, তং উপলব্ভতীতি. অঙ্গন্তি এতেহি তংসমঙ্গিপুগ্গলা নিহীনভাৰং গচ্ছন্তীতি অঙ্গণানি, রাগাদযো. অঞ্জতি মক্খেতীতি অঙ্গণং, মলাদি. অঞ্জেতি তত্থ ঠিতং অহুন্দরতায অভিব্যঞ্জেতীতি অঙ্গণং, ৰিৰটো ভূমিপদেসো. দোসাদীনং পৰত্তিআকারৰিসেসতায নানপ্পকারা বহুলপ্পৰত্তিযা তিব্বকিলেসা. পাপকানন্তি লামকানং. অকুসলানন্তি অকোসল্লসম্ভূতানং. ইচ্ছাৰচরানন্তি ইচ্ছাৰসেন পৰত্তানং. সহ অঙ্গণেনাতি অঙ্গণন্তি লদ্ধনামেন যথাৰুত্তকিলেসেন সহ ৰত্ততি.

অত্থীতিপি ন জানাতি তাদিসস্স যোনিসোমনসিকারস্স অভাৰা. যেসং কিলেসানং অত্থিতা, তেসং সপ্পটিভযতা ৰিসেসতো জানিতব্বাতি দস্সেতুং ‘‘ইমে কিলেসা নামা’’তিআদি ৰুত্তং. তত্থ কক্খল়াতি ফরুসা. ৰাল়াতি কুরুরা. ন গহিতব্বাতি ন উপ্পাদেতব্বা. যাথাৰসরসতোতি যথাভূতসভাৰতো. এৰঞ্চাতি ‘‘ইমে কিলেসা নামা’’তিআদিনা ৰুত্তপ্পকারেন. যেন ৰা তেন ৰাতি নৰকম্মেসু ৰা পরিযত্তিধুতঙ্গাদীসু ৰা যেন ৰা তেন ৰা. তত্রাতি নিদ্ধারণে ভুম্মং. তং পন নিদ্ধারণং সঙ্গণানঙ্গণসমুদাযতোতি দস্সেন্তো ‘‘চতূসু পুগ্গলেসূ’’তি ৰত্ৰা পুন তদেকদেসতো দস্সেন্তো ‘‘তেসু ৰা দ্ৰীসু সাঙ্গণেসূ’’তি আহ. তঞ্হি দ্ৰযং পঠমং হীনসেট্ঠভাৰেন নিদ্ধারীযতি পঠমং উদ্দিট্ঠত্তা. নিদ্ধারণঞ্হি ক্ৰচি কুতোচি কেনচি হোতীতি.

৫৮. কিঞ্চাপি অঞ্ঞত্থ ‘‘জনকো হেতু, পরিগ্গাহতো পচ্চযো, অসাধারণো হেতু, সাধারণো পচ্চযো, সভাগো হেতু, অসভাগো পচ্চযো, পুব্বকালিকো হেতু, সহপ্পৰত্তো পচ্চযো’’তিআদিনা হেতুপচ্চযা ৰিভজ্জ ৰুচ্চন্তি, ইধ পন ‘‘চত্তারো খো, ভিক্খৰে, মহাভূতা হেতূ, চত্তারো মহাভূতা পচ্চযা রূপক্খন্ধস্স পঞ্ঞাপনাযা’’তিআদীসু (ম. নি. ৩.৮৫) ৰিয হেতুপচ্চযসদ্দা সমানত্থাতি দস্সেতুং ‘‘উভযেনপি কারণমেৰ পুচ্ছতী’’তি ৰুত্তং. তত্থ উভযেনাতি হেতুপচ্চযৰচনদ্ৰযেন. পুচ্ছতি আযস্মা মহামোগ্গল্লানো দেসনং ৰড্ঢেতুকামো. কিঞ্চাপীতি অনুজাননসম্ভাৰনত্থে নিপাতো. কিং অনুজানাতি? সমানেপি দ্ৰিন্নং সাঙ্গণভাৰে তস্সা পজাননাপ্পজাননহেতুকতং তেসং সেট্ঠহীনতং. কিং সম্ভাৰেতি? থেরস্স ৰিচিত্তপটিভানতায নানাহেতূপমাহি অলঙ্কত্ৰা যথাপুচ্ছিতস্স অত্থস্স পাকটকরণং. তেনাহ ‘‘নপ্পজানাতী’’তিআদি. হেতু চেৰ পচ্চযো চ সেট্ঠহীনভাৰে. তথাঅক্খাতব্বতাপি হি তেসং তন্নিমিত্তা এৰাতি.

৫৯. তন্তি তেসং দ্ৰিন্নং পুগ্গলানং হীনসেট্ঠতায কারণং. ওপম্মেহি পাকটতরং কত্ৰা দস্সেতুং. এতন্তি সুত্তে অনন্তরং ৰুচ্চমানং ৰীরিযারম্ভাভাৰেন অঙ্গণস্স অপ্পহানং. তেনাহ ‘‘ন ছন্দং…পে… সন্ধাযাহা’’তি. কত্তুকম্যতাছন্ধন্তি কত্তুকম্যতাসঙ্খাতং অঙ্গণস্স পহাতুকম্যতাৰসেন উপ্পজ্জনককুসলধম্মচ্ছন্দং. ন জনেস্সতীতি ন উপ্পাদেস্সতি. কুসলো ৰাযামো নাম ছন্দতো বলৰাতি আহ ‘‘ততো বলৰতরং ৰাযামং ন করিস্সতী’’তি, ছন্দম্পি অনুপ্পাদেন্তো কথং তজ্জং ৰাযামং করিস্সতীতি অধিপ্পাযো. থামগতৰীরিযং উস্সোল়্হীভাৰপ্পত্তং দল়্হং ৰীরিযং. সাঙ্গণগ্গহণেনেৰ অঙ্গণানং কিলেসৰত্থুতায চিত্তস্স সংকিলিট্ঠতায সদ্ধায পুন সংকিলিট্ঠগ্গহণং সৰিসেসং কিলিট্ঠভাৰৰিভাৰনন্তি আহ ‘‘সুট্ঠুতরং কিলিট্ঠচিত্তো’’তি. মলিনচিত্তোতিআদীসুপি ‘‘তেহিযেৰা’’তি আনেত্ৰা সম্বন্ধিতব্বং. উক্খলিপুচ্ছনচোল়কস্স ৰিয ৰসাপীতপিলোতিকা ৰিয চ দুম্মোচনীযভাৰেন মলগ্গহণং মলীনতা, পীল়নং হিংসনং অৰিপ্ফারিকতাকরণং ৰিবাধনং দরথপরিল়াহুপ্পাদনেন পরিদহনং উপতাপনং, কালন্তি কালনং, যথাগহিতস্স অত্তভাৰস্স খেপনং আযুক্খযন্তি অত্থো. করিস্সতীতি পৰত্তেস্সতি, পাপুণিস্সতীতি ৰুত্তং হোতি. তথাভূতো চ পাণং চজিস্সতি নামাতি আহ ‘‘মরিস্সতী’’তি.

সেয্যথাপীতি উপমানিদস্সনে নিপাতো. তদত্থং দস্সেন্তো ‘‘যথা নামা’’তি আহ. পংসুআদিনাতি আদি-সদ্দেন জল্লাদীনং সঙ্গহো, ঘংসনাদীহীতি আদি-সদ্দেন ছারিকাপরিমজ্জনাদীনং সঙ্গহোতি. ‘‘অভিরূপায কঞ্ঞা দাতব্বা’’তিআদীসু ৰিয অন্তরেনপি অতিসযত্থবোধকসদ্দেন অতিসযত্থো ঞাযতীতি আহ ‘‘মলগ্গহিততরাতি ৰুত্তং হোতী’’তি. পটিপুচ্ছাৰচনন্তি অনুমতিপুচ্ছাৰিসেসো. এৰং করিযমানাতি অপরিভোগ-অপরিযোদপনরজোপথনিক্খিপনেহি কিলিট্ঠভাৰং আপাদিযমানা. ওপম্মং সম্পটিপাদেন্তোতি যথূপনীতং উপমং উপমেয্যত্থেন সমং কত্ৰা পটিপাদেন্তো, সংসন্দেন্তোতি অত্থো. সাঙ্গণো পুগ্গলোতি সাঙ্গণো তস্মিং অত্তভাৰে অসুজ্ঝনকপুগ্গলো. আপণাদিতো কুলঘরং আনীতস্স মলগ্গহিতকংসভাজনস্স তত্থ লদ্ধব্বায ৰিসুদ্ধিযা অলাভতো যথা অনুক্কমেন সংকিলিট্ঠতরভাৰো, এৰং ঘরতো নিক্খন্তস্স পুগ্গলস্স পব্বজ্জায লদ্ধব্বায ৰিসুদ্ধিযা অলাভতো অনুক্কমেন সংকিলিট্ঠতরভাৰোতি দস্সেন্তো ‘‘সংকিলিট্ঠকংসপাতিযা’’তিআদিমাহ. সংকিলিট্ঠতরভাৰো চ নাম পব্বজিতস্স আজীৰৰিপত্তিৰসেন ৰা সিযা আচারদিট্ঠিসীলৰিপত্তীসু অঞ্ঞতরৰসেন ৰাতি তং সব্বং সঙ্গহেত্ৰা দস্সেতুং ‘‘তস্স পুগ্গলস্সা’’তিআদি ৰুত্তং. পাচিত্তিযৰীতিক্কমনগ্গহণেন হি একচ্চদিট্ঠিৰিপত্তিযাপি সঙ্গহো হোতীতি. এত্থ ঠিতস্সাতি এতিস্সং আজীৰৰিপত্তিযং ঠিতস্স. ইমিনা নযেন সেসেসুপি যথারহং ৰত্তব্বং. সব্বপরিসসাধারণা মহাথেরস্স দেসনা, তস্মা গহপতিৰসেনপি যোজেতব্বং. তত্থ উক্কংসগতসংকিলিট্ঠতরভাৰং দস্সেন্তো ‘‘মাতুঘাতাদিআনন্তরিযকরণ’’ন্তি আহ. অৰিসোধেত্ৰাতি যথা অত্তনো সীলে ৰা দিট্ঠিযা ৰা ৰিসুদ্ধি হোতি, এৰং কিলেসমলিনচিত্তসন্তানং অৰিসোধেত্ৰা.

ভব্বপুগ্গলোতি উপনিস্সযাদিসম্পত্তিযা তস্মিং অত্তভাৰে ৰিসুদ্ধপুগ্গলো. আদিং কত্ৰাতি ইমিনা ধোৰনঘংসনাদীহি পরিযোদপনং আদিমন্তং কত্ৰা ৰদতি. সুদ্ধট্ঠানং যত্থ ৰা ন রজেন ওকিরীযতি. দণ্ডকম্মং কত্ৰাতি ‘‘এত্তকা উদকা, ৰালুকা ৰা আনেতব্বা’’তি দণ্ডকম্মং কত্ৰা. এত্থ ঠিতস্সাতি পরিসুদ্ধে সীলে ঠিতস্স. সম্মাৰত্তপটিপত্তিসীলেহি সীলৰিসুদ্ধি দস্সিতা. ৰত্তপটিপত্তিযাপি হি অঙ্গণানং ৰিক্খম্ভনং সিযা. তথা হিস্সা সংকিলিট্ঠকংসপাতিযা পরিসুদ্ধপরিযোদাতভাৰো উপমাভাৰেন ৰুত্তো. পন্তসেনাসনৰাসো কিলেসৰিক্খম্ভনং কিলেসানং তদঙ্গনিৰারণং. সোতাপত্তিফলাধিগমো…পে… অরহত্তসচ্ছিকিরিযাতি সত্তসুপি ঠানেসু ‘‘পরিসুদ্ধপরিযোদাতভাৰো ৰিযা’’তি পদং আনেত্ৰা সম্বন্ধিতব্বং. পব্বজিতস্স হি ৰিসুদ্ধি নাম হেট্ঠিমন্তেন সীলৰিসুদ্ধিযা ৰা সিযা কম্মট্ঠানানুযোগৰসেন ৰিৰেকৰাসেন ঝানস্সাধিগমেন ৰা ৰিপস্সনাভাৰনায ৰা সামঞ্ঞফলাধিগমেন ৰাতি.

রাগট্ঠানিযন্তি রাগুপ্পত্তিহেতুভূতং. ৰিসভাগারম্মণং সন্ধায ৰদতি ‘‘ইট্ঠারম্মণ’’ন্তি. তস্মিন্তি ইট্ঠারম্মণে. ৰিপন্নস্সতীতি মুট্ঠস্সতি. তং নিমিত্তন্তি সুভনিমিত্তং. আৰজ্জিস্সতীতি অযোনিসো আৰজ্জিস্সতি. সযমেৰ অঞ্ঞেন অৰোমিস্সো. কুসলৰারপচ্ছিন্দনমেৰ চেত্থ অনুদ্ধংসনং দট্ঠব্বং. সেসন্তি ‘‘সাঙ্গণো সংকিলিট্ঠচিত্তো’’তিআদি. ৰুত্তনযানুসারেনাতি পঠমৰারে ৰুত্তনযানুসারেন. সব্বন্তি মাতুঘাতাদিআনন্তরিযকরণপরিযোসানং সব্বং উপমাসংসন্দনৰচনং.

অতিৰিরহাভাৰতোতি সতিসম্মোসাভাৰতো, উপট্ঠিতস্সতি ভাৰতোতি অত্থো. সেসন্তি ‘‘সো অরাগো’’তিআদি. ‘‘ধোৰনঘংসনসণ্হছারিকাপরিমজ্জনাদীহী’’তিআদিনা দুতিযৰারানুসারেন. ‘‘কো নু খো’’তিআদি পুচ্ছাৰসেন আগতং, ইদং নিগমনৰসেনাতি অযমেৰ ৰিসেসো.

৬০. অঙ্গণন্তি তত্থ তত্থ নামতো এৰ ৰিভাৰিতং, ন পন সভাৰতো, পভেদতো ৰাতি সভাৰাদিতো ৰিভাৰনং সন্ধাযাহ ‘‘নানপ্পকারতো পাকটং কারাপেতুকামেনা’’তি. ইচ্ছায অৰচরানন্তি ইচ্ছাৰসেন অৰচরণানং. ওতিণ্ণানন্তি চিত্তসন্তানং অনুপৰিট্ঠানং. তে পন তত্থ পচ্চযৰসেন নিব্বত্তত্তা পৰত্তা নাম হোন্তীতি আহ ‘‘পৰত্তান’’ন্তি. নানপ্পকারানন্তি ৰিসযভেদেন পৰত্তিআকারভেদেন চ নানাৰিধানং. যেনকারণেন. ন কেৰলং লাভত্থিকতা এৰ, অথ খো পুঞ্ঞৰন্ততা সক্কতগরুকতা চ এত্থ কারণভাৰেন গহেতব্বাতি দস্সেন্তো ‘‘পকতিযাপি চা’’তিআদিমাহ. তেন লাভত্থিকোপি ন যো কোচি এৰং চিত্তং উপ্পাদেতি পুঞ্ঞৰা সম্ভাৰনীযোতি দস্সেতি. থেরা অৰজ্জপটিচ্ছাদনভযেন মজ্ঝিমানং আরোচেন্তি, তথা মজ্ঝিমা নৰকানং, নৰকা পন অত্তনো নৰকভাৰেন ৰিঘাসাদাদীনং আরোচেন্তি ‘‘পস্সথ তুম্হাকং থেরস্স কম্ম’’ন্তি. ৰিঘাসাদাদযো নাম ‘‘ঈদিসস্স সন্তিকে ওৰাদত্থং তুম্হে আগতা’’তি ভিক্খুনীনং আরোচেন্তি. ন চ মং ভিক্খূ জানেয্যুন্তি ন চ ৰত মং ভিক্খূ জানেয্যুং, অহো ৰত মং ভিক্খূ ন জানেয্যুন্তি যোজনা. ঠানং খো পনেতন্তি এত্থ খো-সদ্দো অৰধারণত্থো, পন-সদ্দো ৰচনালঙ্কারোতি আহ ‘‘অত্থিযেৰা’’তি. পুব্বে ইচ্ছুপ্পাদৰারৰণ্ণনায ৰুত্তনযেন. ইতি-সদ্দো ইধ আসন্নকারণত্থোতি তং দস্সেন্তো ‘‘ইমিনা কারণেনা’’তি আহ. ইদঞ্চ কোপঅপ্পচ্চযানমেৰ গহণং. তাদিসানন্তি কোপঅপ্পচ্চযাধিভূতানন্তি অধিপ্পাযো.

অনুরহোতি অনুরূপে রহসি. এৰমেৰ হি অত্থং দস্সেতুং ‘‘ৰিহারপচ্চন্তে’’তিআদি ৰুত্তং. পুরিমসদিসমেৰাতি ‘‘লাভত্থিকো হী’’তিআদিনা ৰুত্তেন পুরিমেন যোজনানযেন সদিসমেৰ.

চোদনায পটিপুগ্গলভাৰো, চোদনা চ আপত্তিযাতি চুদিতকেন চোদকস্স সমানভাৰো আপত্তিআপন্নতাযাতি আহ ‘‘সমানোতি সাপত্তিকো’’তি. সপ্পটিপুগ্গলেনেৰস্স চোদনিচ্ছায কারণং ৰিভাৰেতুং ‘‘অয’’ন্তিআদি ৰুত্তং. ন চাযং সাপত্তিকতায এৰ সমানতং ইচ্ছতি, অথ খো অঞ্ঞথাপীতি দস্সেন্তো ‘‘অপিচা’’তিআদিমাহ. অঞ্ঞেন ৰা পটিপুগ্গলেন সপ্পটিপুগ্গলো. অযঞ্হি ‘‘সপ্পটিপুগ্গলোৰ মং চোদেয্যা’’তি ইচ্ছতি ‘‘এৰাহং তস্স পটিপুগ্গলেহি সদ্ধিং একজ্ঝাসযো হুত্ৰা তস্স উপরি কিঞ্চি ৰত্তুং কাতুং ৰা লভিস্সামী’’তি মঞ্ঞমানো. ইমস্মিং পন পক্খে নো অপ্পটিপুগ্গলোতি নত্থি এতস্স পটিপুগ্গলোতি অপ্পটিপুগ্গলোতি এৰমত্থো ৰেদিতব্বো.

‘‘অহো ৰতা’’তি ইদং পদং দিস্সতীতি সম্বন্ধো, ইমস্স পুগ্গলস্স ইচ্ছাচারে ঠিতত্তা ভিক্খূনং ধম্মং দেসেয্যাতি ৰচনতো ‘‘তঞ্চ খো অনুমতিপুচ্ছাযা’’তি ৰুত্তং. ন হেস ‘‘সচ্চং কির ত্ৰং ভিক্খূ’’তিআদিনা কিঞ্চি ৰীতিক্কমং উদ্দিস্স ভগৰতা পুচ্ছিতব্বতং ইচ্ছতি. নো মগ্গং ৰা ফলং ৰা ৰিপস্সনং ৰা অন্তরং কত্ৰাতি মগ্গভাৰনং ৰা ফলসচ্ছিকিরিযং ৰা সিখাপ্পত্তৰিপস্সনানুযোগং ৰা নিরোধসমাপজ্জনং ৰা ঝানসমাপজ্জনমেৰ ৰা অন্তরং কারণং কত্ৰা ভগৰতা অত্তানং পটিপুচ্ছিতব্বং নো ইচ্ছতি. নিচ্চং অনিচ্চন্তিআদিনা অনুমতিগ্গহণৰসেন পুচ্ছিতব্বং ইচ্ছতি, উত্তানমেৰ কত্ৰা পুচ্ছিতব্বং ইচ্ছতীতি অত্থো. উপহরন্তে পস্সতীতি সম্বন্ধো. অভব্বট্ঠানভিক্খুতায নিহরিস্সন্তি সাসনতো.

তং সম্পত্তিন্তি পরিৰারসম্পত্তিঞ্চেৰ ভিক্খূহি করিযমানং সক্কারগরুকারসম্পত্তিঞ্চ. গহেত্ৰা পরিভুঞ্জন্তি মযা সংৰিভাগে করিযমানে. সযমেৰ পঞ্ঞাযতীতি সযমেৰ গন্ত্ৰা ভিক্খূনং পুরতো অত্তানং দস্সেতি, পুরতো ৰসন্তং পন ভিক্খু পুরক্খত্ৰা গচ্ছন্তিযেৰাতি অধিপ্পাযো.

দক্খিণোদকন্তি অগ্গতো উপনীযমানং দক্খিণোদকং. যতো এৰ-কারো, ততো অঞ্ঞত্থ নিযমো ইচ্ছিতো. অৰধারণত্থং ৰা এৰ-কারগ্গহণন্তি কত্ৰা অহমেৰ লভেয্যন্তি অহং লভেয্যমেৰাতি এৰমেতং অৰধারণং দট্ঠব্বন্তি অধিপ্পাযেনাহ ‘‘অহমেৰ লভেয্যন্তি ইচ্ছা নাতিমহাসাৰজ্জা’’তি, অঞ্ঞথা যথারুতৰসেন অৰধারণে গয্হমানে ‘‘ন অঞ্ঞে লভেয্যু’’ন্তি অযমেৰেত্থ অত্থো সিযাতি. পাসাদিকো হোতীতি ইদং তস্স অগ্গাসনাদিপচ্চাসীসনায কারণদস্সনং.

অনুমোদনন্তি মঙ্গলামঙ্গলেসু অনুমোদনাৰসেন পৰত্তেতব্বধম্মকথং. খণ্ডানুমোদনন্তি অনুমোদনেকদেসং. ‘‘পুব্বে অনুমোদিতপুব্বো অনুমোদতূ’’তি অৰত্ৰা থেরেন ৰুত্তমত্তেযেৰ.

তাদিসেসু ঠানেসূতি তাদিসেসু পেসলানং বহুস্সুতানং ৰসনট্ঠানেসু. সব্বম্পি রতিং পৰত্তনতো সব্বরত্তিকানি. ৰিনিচ্ছযকুসলানন্তি অনেকৰিহিতেসু কঙ্খট্ঠানিযেসু কঙ্খাৰিনযনায তং তং পঞ্হানং ৰিনিচ্ছযে কুসলানং ছেকানং. তেসু তেসু ধম্মকথিকেসু অজ্ঝিট্ঠেসু ৰারেন ধম্মং কথেন্তেসু ‘‘অযং ব্যত্তো’’তি ধম্মজ্ঝেসকেন অজ্ঝিট্ঠত্তা ওকাসং অলভমানো.

সক্কচ্চঞ্চ করেয্যুন্তি ভিক্খূ যং মম অভিৰাদনপচ্চুট্ঠানঞ্জলিকম্মসামীচিকম্মাদিং করোন্তি. তং আদরেনেৰ করেয্যুং, যঞ্চ মে পরিক্খারজাতং পটিযাদেন্তি, তম্পি সুন্দরং সম্মদেৰ অভিসঙ্খতং করেয্যুন্তি অত্থো. ভারিযন্তি পাসাণচ্ছত্তং ৰিয গরুকাতব্বং. এতং ৰিধিন্তি এতং ‘‘সক্করেয্যু’’ন্তিআদিনা ৰুত্তসক্কারাদিৰিধিং. তেনাতি তেন কারণেন, বাহুসচ্চাদিগুণৰিসেসৰতো এৰ সক্কারাদীনং অরহত্তাতি অত্থো. এৰরূপন্তি ঈদিসং ‘‘পিযো গরূ’’তিআদিনা (অ. নি. ৭.৩৭) ৰুত্তপ্পকারং. এৰং করেয্যুন্তি এৰং ‘‘সক্করেয্যু’’ন্তিআদিনা ৰুত্তপ্পকারং সক্কারাদিং করেয্যুং. এস নযোতি যোযং ভিক্খুৰারে ৰুত্তৰিধি, এসেৰ নযো. ইতো পরেসু ভিক্খুনীৰারাদীসু ৰারেসু.

অহমেৰ লাভী অস্সন্তি এত্থাপি হেট্ঠা ৰুত্তনযেনেৰ অৰধারণং গহেতব্বং. পিণ্ডপাতস্স পণীততা উপসেচনাদিৰসেনাতি আহ ‘‘সপ্পিতেলমধুসক্খরাদিপূরিতান’’ন্তি. মঞ্চপীঠাদীনন্তি নিদস্সনমত্তং উতুসপ্পাযানং নিৰাতানং ফস্সিততলানং পিহিতদ্ৰারকৰাল়ৰাতপানাদীনম্পি পণীতসেনাসনভাৰতো. আদি-সদ্দেন ৰা তেসম্পি গহণং দট্ঠব্বং. সব্বত্থাপীতি সব্বেসু তেসু চতূসুপি পচ্চযৰারেসু.

৬১. কাযকম্মং দিস্ৰাতি ইদং ন কাযকম্মং চক্খুৰিঞ্ঞেয্যং, কাযকম্মুনা পন সহ পৰত্তং ওট্ঠপরিপ্ফন্দনং ভাকুটিকরণং কাযঙ্গাদিদস্সনং কাযকম্মদস্সনং ৰিয হোতীতি কত্ৰা ৰুত্তং. ৰচীকম্মং সুত্ৰাতি এত্থাপি এসেৰ নযো, তস্মা কাযৰিকারজনকা ধম্মা ‘‘দিস্সন্তী’’তি ৰুত্তা, ৰচীৰিকারজনকা ‘‘সূযন্তী’’তি. ততো এৰ চ তে পচ্চক্খকালে সম্মুখকালে দিস্সন্তি নাম. তিরোক্খকালে অসম্মুখকালে সূযন্তি নাম. অনুরূপতো গহণং অনুগ্গহো. আরঞ্ঞিকত্তন্তি তস্স ভিক্খুনো ধুতগুণত্তানুরূপতো গণ্হাতি. তেনাহ ‘‘আরঞ্ঞিকত্তং অনুগ্গণ্হাতী’’তি. অরঞ্ঞে নিৰাসো অস্সাতি আরঞ্ঞিকো. পন্তং পরিযন্তং দূরতরং সেনাসনং অস্সাতি পন্তসেনাসনো. তং পন অত্থমত্তেন দস্সেন্তেন ‘‘পন্তসেনাসনে ৰসতী’’তি ৰুত্তং. ভিক্খাসঙ্খাতানং পিণ্ডানং পাতো পিণ্ডাপাতো, তং পিণ্ডপাতং উঞ্ছতি গৰেসতীতি পিণ্ডপাতিকো. পিণ্ডায পতিতুং চরিতুং ৰতমেতস্সাতি ৰা পিণ্ডপাতি, সো এৰ পিণ্ডপাতিকো. দানতো অৰখণ্ডনতো অপেতং অপদানং, সহ অপদানেন সপদানং, অনৰখণ্ডনং. অনুঘরং চরণসীলো সপদানচারী. উন্নতভাৰেন পংসুকূলং ৰিয পংসুকূলং, পংসু ৰিয ৰা কুচ্ছিতভাৰং উলতি গচ্ছতীতি পংসুকূলং, তস্স ধারণং ইধ পংসুকূলং, তং সীলমস্সাতি পংসুকূলিকো.

তীহি কারণেহি লূখং ৰেদিতব্বং অগ্ঘফস্সৰণ্ণপরিহানিতো অপংসুকূলম্পি, কো পন ৰাদো পংসুকূলন্তি অধিপ্পাযো. থূলদীঘসুত্তকেনাতি থূলেন ওলম্বমানেন দীঘসুত্তকেন. ৰণ্ণেনাতি এত্থ ফস্সেনপি পরিহাযতীতি ৰত্তব্বং. তঞ্হি তত্থ খরফস্সম্পি হোতিযেৰাতি. কস্মা পন পাল়িযং আরঞ্ঞিকাদিগ্গহণেন চত্তারোৰ ধুতগুণা ৰুত্তাতি? পধানত্তা, তগ্গহণেনেৰ চ ইতো পরেসম্পি সুখপরিভোগতায গহণসম্ভৰতো. যো হি আরঞ্ঞিকো পন্তসেনাসনো, তস্স অব্ভোকাসিক-রুক্খমূলিক-নেসজ্জিক-যথাসন্থতিক-সোসানিকঙ্গানি সুপরিপূরানি. যো চ পিণ্ডপাতিকো সপদানচারী চ, তস্স পত্তপিণ্ডিকখলুপচ্ছাভত্তিকএকাসনিকঙ্গানি. যো পন পংসুকূলিকো, তস্স তেচীৰরিকঙ্গং সুপরিহরমেৰাতি. পধানত্তা হি ভগৰতাপি ‘‘কদাহং নন্দং পস্সেয্যং, আরঞ্ঞং পংসুকূলিক’’ন্তিআদিনা (সং. নি. ২.২৪২; নেত্তি. ১০০) তত্থ তত্থ আরঞ্ঞিকাদযো এৰ গয্হন্তি. এত্তকাতি পাল়িযং আগতানং পরিচ্ছিজ্জ গহণমেতং, ন এত্তকা সব্বেপি একস্স একংসতো সম্ভৰন্তি, নাপি এত্তকাযেৰ পাপধম্মা পহাতব্বা. ন হি মক্খপল়াসাদীনং অপ্পহীনভাৰেপি সব্রহ্মচারী নেৰ সক্করোন্তি…পে… ন পূজেন্তীতি.

তমত্থন্তি ‘‘যস্স কস্সচী’’তিআদিনা ৰুত্তমত্থং. উপমায পাকটং করোন্তোতি অন্ৰযতো ব্যতিরেকতো চ উদাহরণেন ৰিভাৰেন্তো. অহিকুণপাদীনং অতিপটিকূলজিগুচ্ছনীযতা অতিৰিয দুগ্গন্ধতায. সা চ অহীনং তিখিণকোপতায, কুক্কুরমনুস্সানং ওদনকুম্মাসূপচযতায সরীরস্স হোতীতি ৰদন্তি. ইমেসন্তি অহিআদীনং. ৰড্ঢেত্ৰাতি উপরূপরি খিপনেন রচিতং কত্ৰা. তং পন ৰড্ঢিতং তেন চ ভাজনং পূরিতং হোতীতি আহ ‘‘ৰড্ঢেত্ৰা পরিপূরেত্ৰা’’তি. জনস্স দস্সনযোগ্যং দস্সনীযং জঞ্ঞং, তং পরমপরিসুদ্ধং মনোহরঞ্চ হোতীতি আহ ‘‘চোক্খচোক্খ’’ন্তি. অভিনৰনিৰিট্ঠা মহামাতা ৰধুকা. সা পন পুত্তলাভযোগ্যতং উপাদায মঙ্গলৰচনেন ‘‘জনী’’তি ৰুচ্চতি, তস্সা নিয্যমানং পণ্ণাকারং জনিযা হরতীতি জঞ্ঞং. উভযত্থাতি অত্থদ্ৰযে. পুনরুত্তন্তি আমেডিতৰচনমাহ. ন মনাপং এতস্সাতি অমনাপো, তস্স ভাৰো অমনাপতা, তথাপৰত্তো চিত্তুপ্পাদোতি আহ ‘‘অমনাপং ইদন্তি…পে… অধিৰচন’’ন্তি. বুদ্ধৰেসত্তা লিঙ্গস্স পরিসুদ্ধকংসপাতিসদিসকা. কুণপরচনং ৰিয ইচ্ছাৰচরেহি সন্তানস্স ভরিতভাৰো. সো পন তেসং অপ্পহীনতাযাতি আহ ‘‘ইচ্ছাৰচরানং অপ্পহান’’ন্তি.

৬২. ‘‘তেন গামন্তৰিহারং অনুগ্গণ্হাতী’’তি ৰত্তব্বে ‘‘আরঞ্ঞিকত্ত’’ন্তি পন পোত্থকে লিখিতং. ন হি সুক্কপক্খে পাল়িযং আরঞ্ঞিকগ্গহণং অত্থি, সতি চ ইচ্ছাৰচরপ্পহানে গামন্তৰিহারো একন্তেন ন পটিক্খিপিতব্বো, ইচ্ছিতব্বোৰ তাদিসানং উত্তরিমনুস্সধম্মপটিচ্ছাদনতো. তথা হি ৰক্খতি ‘‘অপ্পিচ্ছতাসমুট্ঠানেহী’’তিআদি. সালিৰরভত্তরচনং ৰিয ইচ্ছাৰচরপ্পহানং মনুঞ্ঞভাৰতো তিত্তিহেতুতো চ.

৬৩. মং তন্তি চ উপযোগৰচনং পটি-সদ্দযোগেন, অত্থো পন সম্পদানমেৰাতি আহ ‘‘ময্হং তুয্হ’’ন্তি চ. ‘‘সমযে’’তি ভুম্মত্থে ‘‘সময’’ন্তি উপযোগৰচনং. গিজ্ঝকূটপণ্ডৰইসিগিলিৰেভারৰেপুল্লপব্বতানং ৰসেন সমন্ততো গিরিপরিক্খেপেন. রাজগহেতি সমীপত্থে ভুম্মৰচনন্তি আহ ‘‘তং নিস্সায ৰিহরামী’’তি.

পুরাণযানকারপুত্তোতি পুরাণে পব্বজিততো পুব্বে যানকারপুত্তো তথাপঞ্ঞাতো. জিম্হন্তি গোমুত্তকুটিলং. তেনাহ ‘‘সপ্পগতমগ্গসদিস’’ন্তি. সোতি পণ্ডুপুত্তো. ইতরোতি সমিতি. চিন্তিতট্ঠানমেৰাতি চিন্তিতচিন্তিতট্ঠানমেৰ তচ্ছতি, তঞ্চ খো ন তস্স চিত্তানুসারেন, অথ খো অত্তনো সুত্তানুসারেন তচ্ছন্তো যানকারপুত্তো. চিত্তন্তি অত্তনো চিত্তেন মম চিত্তং জানিত্ৰা ৰিয.

‘‘ন সদ্ধায পব্বজিতো’’তি ইমিনাৰ কম্মফলসদ্ধায অভাৰো নেসং পকাসিতোতি আহ ‘‘অস্সদ্ধাতি বুদ্ধধম্মসঙ্ঘেসু সদ্ধাৰিরহিতা’’তি. পব্বজিতানং জীৰিকা অত্থো এতেসন্তি জীৰিকত্থা. তেনাহ ‘‘ইণভযাদীহী’’তিআদি. কেরাটিকং ৰুচ্চতি সাঠেয্যং. সঠানং গুণৰাণিজকানং কম্মং সাঠেয্যন্তি আহ ‘‘সাঠেয্যঞ্হী’’তিআদি. তুচ্ছসভাৰেন মানো নল়ো ৰিযাতি নল়ো, মানসঙ্খাতো উগ্গতো নল়ো এতেসন্তি উন্নল়া. তেনাহ ‘‘উট্ঠিততুচ্ছমানা’’তি. লহুকতায ৰা চপলা. ফরুসৰচনতায খরৰচনা. তিরচ্ছানকথাবহুলতায নিরত্থকৰচনপলাপিনো. অসংৰুতকম্মদ্ৰারাতি ইদং কম্মদ্ৰারাদীনং অসংৰুতভাৰো উপ্পত্তিদ্ৰারানং অসংৰুততায এৰ হোতীতি কত্ৰা ৰুত্তং. অথ ৰা ছসু ইন্দ্রিযেসূতি নিমিত্তে ভুম্মং, ছসু ইন্দ্রিযেসু নিমিত্তভূতেসু অসংৰুতকম্মদ্ৰারাতি অত্থো. যা মত্তাতি ভোজনে অযুত্তপরিযেসন-অযুত্তপটিগ্গহণ-অযুত্তপরিভোগে ৰজ্জেত্ৰা যুত্তপরিযেসন-যুত্তপটিগ্গহণ-যুত্তপরিভোগসঙ্খাতা যা মত্তা অপ্পমত্তেহি জানিতব্বা. তেনাহ ‘‘যুত্ততা’’তি. জাগরেতি রত্তিন্দিৰং আৰরণিযেহি ধম্মেহি চিত্তপরিসোধনসঙ্খাতে জাগরে. তেসং জাগরিতায অধিসীলসিক্খায গারৰরহিতানং ইতরসিক্খাসু পতিট্ঠা এৰ নত্থীতি দস্সেন্তো ‘‘সিক্খাপদেসু বহুলগারৰা ন হোন্তী’’তি ৰত্ৰা তমেৰ গারৰাভাৰং সরূপেন ৰিভাৰেন্তো ‘‘আপত্তিৰীতিক্কমবহুলা’’তি আহ.

পকতিযাপি সিদ্ধায রতনত্তযসদ্ধায কম্মফলসদ্ধায চ সদ্ধা. পিৰন্তি মঞ্ঞে যথা তং দ্রৰভূতং অমতং লদ্ধা. ঘসন্তি মঞ্ঞে যথা তং বহলপিণ্ডিকসুধাভোজনং লদ্ধা. অত্তমনৰাচং নিচ্ছারেন্তা ‘‘সাধু সাধূ’’তি. তমেৰ পন সাধুকারং হদযে ঠপেত্ৰা অব্ভনুমোদন্তা. এত্থ চ অত্তমনৰাচানিচ্ছারণং পিৰনসদিসং কত্ৰা ৰুত্তং বহিদ্ধাভাৰতো, মনসা অব্ভনুমোদনং পন অব্ভন্তরভাৰতো ঘসনসদিসং ৰুত্তং. সঙ্খাদনজ্ঝোহরণঞ্হি ঘসনন্তি. রস্সঞ্চ একৰচনং হোতীতি আহ ‘‘রস্সে সতি সারিপুত্তস্স উপরি হোতী’’তি. দীঘঞ্চ বহুৰচনং হোতীতি আহ ‘‘দীঘে সতি সব্রহ্মচারীন’’ন্তি. ‘‘উপরি হোতী’’তি আনেত্ৰা সম্বন্ধো. আলসিযব্যসনাদীহীতি আলসিযেন ৰা ঞাতিব্যসনাদীহি ৰা. ‘‘মহানাগাতি ৰুচ্চন্তী’’তি ৰত্ৰা তত্থ কারণং ৰিভাৰেন্তো ‘‘তত্রা’’তিআদিমাহ. তত্থ ‘‘ন গচ্ছন্তীতি নাগা, ন আগচ্ছন্তীতি নাগা, ন আগুং করোন্তীতি নাগা’’তি যো ৰিৰিধো ৰচনত্থো ইচ্ছিতো, তং ৰিচারেত্ৰা দস্সেতুং ‘‘ছন্দাদীহী’’তিআদি ৰুত্তং, তং পন ঞেয্যাৰবোধায ৰচনতো অপ্পমত্তকারণং.

সযমেৰ আগুং ন করোতি সব্বথা মগ্গেন পহীনআগুত্তা. সো কামযোগাদিকে সব্বসংযোগে দসৰিধসংযোজনপ্পভেদানি চ সব্ববন্ধনানি ৰিসজ্জ জহিত্ৰা সব্বত্থ যক্খাদীসু, সব্বেসু ৰা ভৰেসু কেনচি সঙ্গেন ন সজ্জতি তীহি চ ৰিমুত্তীহি ৰিমুত্তো, ততো এৰ ইট্ঠাদীসু তাদিভাৰপ্পত্তিযা তাদি, সো ৰুত্তলক্খণেন তথত্তা তংসভাৰত্তা নাগো পৰুচ্চতেতি অত্থো ৰেদিতব্বো. তেনাহ ‘‘এৰমেত্থ অত্থো ৰেদিতব্বো’’তি. অঞ্ঞেহি খীণাসৰনাগেহি অগ্গসাৰকত্তা গুণৰিসেসযোগতো পুজ্জতরা চ পাসংসতরা চ. সমং অনুমোদিসুন্তি অঞ্ঞমঞ্ঞস্স সুভাসিততো সম্পটিচ্ছনেন সমপ্পৰত্তমোদতায সমং সদিসং অব্ভনুমোদিংসু. তং পন সমনুমোদনং ‘‘তত্থা’’তিআদিনা পাল়িৰসেনেৰ দস্সেতি.

সম্মুতিপরমত্থদেসনাকথাৰণ্ণনা নিট্ঠিতা.

অনঙ্গণসুত্তৰণ্ণনায লীনত্থপ্পকাসনা সমত্তা.