৯. পটিগ্গাহনিদ্দেসৰণ্ণনা

১০৬. দাতুং কামেতীতি দাতুকামো, তস্স অভিহারো ঈসকম্পি ওণমনাদিনাভিহরণন্তি তপ্পুরিসো, হত্থস্স পাসো হত্থপাসো. রুল়্হীৰসেন তু অড্ঢতেয্যহত্থো হত্থপাসো নাম. সো চ সচে ভিক্খু নিসিন্নো হোতি, আসনস্স পচ্ছিমন্ততো পট্ঠায, সচে ঠিতো, পণ্হিঅন্ততো পট্ঠায, সচে নিপন্নো, যেন পস্সেন নিপন্নো, তস্স পারিমন্ততো পট্ঠায দাযকস্স নিসিন্নস্স ঠিতস্স ৰা ঠপেত্ৰা পসারিতহত্থং যং আসন্নতরং অঙ্গং, তস্স ওরিমন্তেন পরিচ্ছিন্দিত্ৰা ৰেদিতব্বো. এরণক্খমন্তি থামমজ্ঝিমেন পুরিসেন এরণস্স উক্খিপনস্স খমং যোগ্গং. ৰত্থুসদ্দাপেক্খং নপুংসকত্তং. তিধা দেন্তেতি কাযকাযপ্পটিবদ্ধনিস্সগ্গিযানং ৰসেন তীহি পকারেহি দাযকে দদমানে. তত্থ যেন কেনচি সরীরাৰযৰেন অন্তমসো পাদঙ্গুলিযাপি দীযমানং কাযেন দিন্নং নাম হোতি, কটচ্ছুআদীসু যেন কেনচি দীযমানং কাযপ্পটিবদ্ধেন, কাযতো পন কাযপ্পটিবদ্ধতো ৰা মোচেত্ৰা হত্থপাসে ঠিতস্স কাযেন ৰা কাযপ্পটিবদ্ধেন ৰা পাতিযমানং নিস্সগ্গিযেন পযোগেন দিন্নং নাম. দ্ৰিধা গাহোতি কাযকাযপ্পটিবদ্ধানং ৰসেন দ্ৰীহি পকারেহি যেহি কেহিচি দীযমানস্স গহণং. এৰং পটিগ্গহো পঞ্চঙ্গোতি যোজনা. পঞ্চঙ্গোতি পঞ্চ অঙ্গানি যস্সাতি বহুব্বীহি.

১০৭. ইদানি অনেরণক্খমে চ কিস্মিঞ্চি কাযপ্পটিবদ্ধে চ পটিগ্গহণারোহনং দস্সেতুং ‘‘অসংহারিযে’’তিআদিমাহ. তত্থ অসংহারিযেতি আনেতুমসক্কুণেয্যে ফলকপাসাণাদিম্হি. তত্থজাতেতি তেসুযেৰ রুক্খাদীসু জাতে কিংসুকপদুমিনিপণ্ণাদিকে. চিঞ্চআদীনং সুখুমে পণ্ণেতি সম্বন্ধো. তানি হি সন্ধারেতুং ন সক্কোন্তি. তেসং পন সাখাসু ৰট্টতি. আদি-সদ্দেন ‘‘অঙ্গ’’ন্তিআদিকং সঙ্গণ্হাতি. ৰা-সদ্দো সমুচ্চযে. অসয্হভারেতি থামমজ্ঝিমপুরিসেন সহিতুং সন্ধারেতুং অসক্কুণেয্যে ভারে. সব্বেসং পটিগ্গহো ‘‘ন রূহতী’’তি ইমিনা সম্বন্ধো.

১০৮. ইদানি পটিগ্গহণৰিজহনং দস্সেতি ‘‘সিক্খা’’তিআদিনা. তত্থ সিক্খামরণলিঙ্গেহীতি সিক্খাপচ্চক্খানেন চ মরণেন চ লিঙ্গপরিৰত্তনেন চ. অনপেক্খৰিসগ্গতোতি নত্থি অপেক্খো এতস্সাতি অনপেক্খো, সোৰ ৰিসগ্গো, ততো চ. অচ্ছেদাতি চোরাদীহি অচ্ছিন্দিত্ৰা গহণেন. অনুপসম্পন্নদানাতি অনুপসম্পন্নস্স দানেন. চ-সদ্দো সব্বত্থ আনেতব্বো. গাহোতি পটিগ্গহণং. উপসম্মতীতি ৰিজহতি.

১০৯-১০. ইদানি অপ্পটিগ্গহিতং পরিভোগে দোসং দস্সেতুং ‘‘অপ্পটিগ্গহিত’’ন্তিআদিমাহ. তত্থ সব্বন্তি চতুকালিকপরিযাপন্নং সকলম্পি. ইদানি অপ্পটিগ্গহেত্ৰা পরিভুঞ্জিতব্বং দস্সেতুং ‘‘সুদ্ধ’’ন্তিআদিমাহ. তত্থ সুদ্ধং নাতিবহলং উদকঞ্চ তথা অঙ্গলগ্গং অৰিচ্ছিন্নং দন্ত…পে… গূথকঞ্চ লোণ…পে… করীসকঞ্চ কপ্পতেতি সম্বন্ধো. তত্থ সুদ্ধন্তি রজরেণূহি অঞ্ঞরসেন চ অসম্মিস্সতায পরিসুদ্ধং. নাতিবহলন্তি যং কসিতট্ঠানে বহলমুদকং ৰিয মুখে ৰা হত্থে ৰা ন লগ্গং, তং. অৰিচ্ছিন্নন্তি অঙ্গতো ৰিচ্ছিন্দিত্ৰা ন গতং. দন্তানি চ অক্খীনি চ কণ্ণঞ্চ দন্তক্খিকণ্ণং পাণ্যঙ্গত্তা, তস্স গূথকন্তি তপ্পুরিসো. লোণং সরীরুট্ঠিতং. সিঙ্ঘাণীতি সিঙ্ঘাণিকা. ৰিচ্ছিন্নং ন পটিগ্গহেতব্বং.

১১১. ইদানি ‘‘গূথা’’তিআদিনা কালোদিস্সং দস্সেতি. তথাৰিধেতি সপ্পদট্ঠক্খণাদিকে তথাৰিধে কালে. তথা তাদিসো ৰিধো কালো এতস্সাতি বহুব্বীহি. সেৰেয্যাতি সেৰনং করেয্য, পরিভুঞ্জেয্যাতি ৰুত্তং হোতি. অসন্তে কপ্পকারকেতি এত্থ দুব্বচোপি অসমত্থোপি কপ্পিযকারকো অসন্তপক্খেযেৰ তিট্ঠতীতি ৰেদিতব্বো. কালোদিস্সত্তা পন ছারিকায অসতি অল্লদারুং রুক্খতো ছিন্দিত্ৰা কাতুং, মত্তিকায অসতি ভূমিং খণিত্ৰাপি মত্তিকং গহেতুং ৰট্টতি.

১১২. দুরূপচিণ্ণেতি দুট্ঠুং উপচিণ্ণং আমট্ঠং দুরূপচিণ্ণং. সচে ভিক্খু অপ্পটিগ্গহিতং সামিসং ভাজনং ঠিতট্ঠানতো অপনেত্ৰা আমসতি, পিধানং আমসতি, উপরি ঠিতকচৰরাদিং ছড্ডেতি, তত্থজাতকফলিনিযা সাখায ৰা ৰল্লিযা ৰা গহেত্ৰা ৰা চালেতি, দুরূপচিণ্ণং নাম হোতি. তস্মিং দুক্কটন্তি সম্বন্ধো. ফলরুক্খং পন অপস্সযিতুং ৰা তত্থ কণ্টকং ৰা বন্ধিতুং ৰট্টতি. অরঞ্ঞে পতিতঅম্বফলাদিং ‘‘সামণেরস্স দস্সামী’’তি আহরিত্ৰা দাতুং ৰট্টতি. রজোকিণ্ণেতি রজসা ওকিণ্ণে, তস্মিং পত্তাদিকে যং কিঞ্চি পটিগ্গণ্হতো ৰিনযদুক্কটং হোতীতি অত্থো. সচে পিণ্ডায চরন্তস্স পত্তে রজং পততি, পটিগ্গহেত্ৰা ভিক্খা গণ্হিতব্বা. ‘‘পটিগ্গহেত্ৰা দেথা’’তি ৰুত্তেপি আকিরন্তি, হত্থতো অমোচেন্তেনেৰ পটিগ্গাহাপকস্স সন্তিকং নেত্ৰা পটিগ্গহেতব্বং. সচে মহাৰাতো ততো ততো রজং পাতেতি, ন সক্কা হোতি ভিক্খং গহেতুং, ‘‘অনুপসম্পন্নস্স দস্সামী’’তি সুদ্ধচিত্তেন আভোগং কত্ৰা গণ্হিতুং ৰট্টতি. তং পন তেন দিন্নং ৰা ৰিস্সাসেন ৰা পটিগ্গহেত্ৰা পরিভুঞ্জিতুং ৰট্টতি.

অথাতি ৰক্খমানারম্ভে. উগ্গহপ্পটিগ্গহেতি উগ্গহিত্থাতি উগ্গহো, উগ্গহিতং, তস্স পটিগ্গহো, তস্মিং. অপ্পটিগ্গহিতভাৰং জানতো অত্তনা এৰ উগ্গহেত্ৰা গহণেতি অধিপ্পাযো. মাতাপিতূনং অত্থায পন অপ্পটিগ্গহেত্ৰা তেলাদীনি, ছাযত্থায সাখাদীনি ৰা গহেত্ৰা পচ্ছতো ভুঞ্জিতুকামতায পটিগ্গহেত্ৰা পরিভুঞ্জিতুং ৰট্টতি. উচ্ছুআদীসু ফালিতেসু মলং ন পঞ্ঞাযতি, মূলভেসজ্জাদীনি পিসন্তানং ৰা কোট্টেন্তানং ৰা নিসদনিসদপোতকউদুক্খলমুসলানি খীযন্তি, দন্তন্তরে লগ্গং সুখুমআমিসং হোতি, রসো ন পঞ্ঞাযতি, অব্বোহারিকং. অন্তোৰুত্থেতি অকপ্পিযকুটিযা ছদনব্ভন্তরে ৰুত্থেতি অত্থো. সযংপক্কেতি অত্তনা যত্থ কত্থচি পক্কে. সচে ৰাসিআদিং তাপেত্ৰা তক্কাদীসু পক্খিপতি, এত্তাৰতাপি সামপাকতো ন মুচ্চতি. পুরিমকালিকদ্ৰযে পুনপাকঞ্হি ঠপেত্ৰা যং কিঞ্চি আমিসং ভিক্খুনো পচিতুং ন ৰট্টতি. সচেপিস্স উণ্হযাগুযা সুলসিপণ্ণাদীনি ৰা সিঙ্গিৰেরং ৰা পক্খিপন্তি, চালেতুং ন ৰট্টতি. উত্তণ্ডুলং ভত্তং লভিত্ৰা পিদহিতুং ন ৰট্টতি. অন্তোপক্কেতি অকপ্পিযকুটিযা অন্তো পক্কে. সব্বত্থ দুক্কটন্তি সম্বন্ধো.

পটিগ্গাহনিদ্দেসৰণ্ণনা নিট্ঠিতা.