১০. অকপ্পিযমংসনিদ্দেসৰণ্ণনা

১১৩-৪. মনুস্সহত্থিঅস্সানঞ্চ …পে… উরগস্স চ যং মংসঞ্চ, যং উদ্দিস্সকতমংসঞ্চ, অপ্পটিৰেক্খিতং যঞ্চ মংসং, তেসু মংসেসূতি এৰং যোজেত্ৰা অত্থো ৰেদিতব্বো. তত্থ সীসগীৰাতরঙ্গেন চরন্তা অচ্ছৰিসেসাৰ তরচ্ছা. উরগস্সাতি ইমিনা সব্বাপি দীঘজাতি সঙ্গহিতা. উদ্দিস্সকতমংসন্তি ভিক্খুং উদ্দিসিত্ৰা কতং উদ্দিস্সকতং, তঞ্চ তং মংসঞ্চ. এত্থ চ মংস-গ্গহণেন মচ্ছানম্পি গহণং ৰেদিতব্বং উপলক্খণৰসেন, চ-সদ্দেন ৰা. পঞ্চসুপি সহধম্মিকেসু যং কিঞ্চি উদ্দিস্সকতং সব্বেসম্পি ন কপ্পতি, তম্পি অদিট্ঠঅসুতঅপরিসঙ্কিততায তিকোটিপরিসুদ্ধং ৰট্টতি. অপ্পটিৰেক্খিতন্তি অনুপপরিক্খিতং, অনাপুচ্ছিতন্তি অত্থো. আপত্তিভীরুকেন হি রূপং সল্লক্খেন্তেনাপি পুচ্ছিত্ৰা পটিগ্গহেতব্বং পরিভুঞ্জিতব্বঞ্চ. মনুস্সানং মংসেসু থুল্লচ্চযন্তি যোজনা. থূলো অচ্চযো এত্থাতি রস্সে, দ্ৰিত্তে চ থুল্লচ্চযং. পারাজিকসঙ্ঘাদিসেসেহি ঠপেত্ৰা ইতো অধিকং ৰজ্জং নত্থি. সেসেসূতি অৰসেসেসু একাদসসু.

১১৫. ইদানি মনুস্সাদীনং অট্ঠিআদীনিপি অকপ্পিযানীতি দস্সেতুং ‘‘অট্ঠিপী’’তিআদিমাহ. পি-সদ্দো ‘‘লোহিত’’ন্তিআদীসুপি অনুৰত্তেতব্বো. এসন্তি মনুস্সাদীনং দসন্নং. ৰসাসু পন একা মনুস্সৰসা ন ৰট্টতি. খীরাদীসু অকপ্পিযং নাম নত্থি. উদ্দিস্সকতংযেৰ সচিত্তকন্তি যোজনা. সচিত্তকন্তি উদ্দিস্সকতভাৰজাননচিত্তেন সহ ৰত্ততীতি সচিত্তকং. ৰত্থুৰীতিক্কমৰিজাননচিত্তেন হি সচিত্তকত্তং. এত্থ চ সচিত্তকত্তং আপত্তিযা এৰ, ন চ মংসস্স, তথাপি মংসসীসেন আপত্তি এৰ ৰুত্তাতি ৰিঞ্ঞাতব্বন্তি.

অকপ্পিযমংসনিদ্দেসৰণ্ণনা নিট্ঠিতা.