৪২. দেসনানিদ্দেসৰণ্ণনা

৩৮২. ইদানি দেসনানিদস্সনব্যাসেন হেট্ঠা অৰুত্তানি কানিচি সিক্খাপদানি উপদিসিতুং ‘‘চাগো’’তিআদিমাহ. ভিক্খুভাৰস্স যো চাগো, সা পারাজিকদেসনাতি সম্বন্ধো. ভৰতি অনেনাতি ভাৰো, সদ্দপ্পৰত্তিনিমিত্তং, ভিক্খুনো ভাৰো ভিক্খু-সদ্দস্স পৰত্তিনিমিত্তং ভিক্খুকিচ্চং ভিক্খুভাৰো, তস্স. দিসী উচ্চারণে, উচ্চারণা পকাসনা দেসনা. ‘‘ছন্নমতিৰস্সতি, ৰিৰট্টং নাতিৰস্সতী’’তি (উদা. ৪৫) হি ৰুত্তং. ইধ পন ভিক্খুভাৰপরিচ্চাগোযেৰ পারাজিকায পকাসনা নাম পারাজিকায দেসনা. ‘‘যো’’তি ৰুত্তত্তা ‘‘সো’’তি ৰত্তুং যুত্তং, তথাপি সব্বাদীহি ৰুত্তস্স ৰা লিঙ্গমাদিয্যতে ৰক্খমানস্স ৰাতি ৰক্খমানদেসনাপেক্খায ‘‘সো’’তি ৰুত্তং. যথা যেন পকারেন ‘‘ছাদেতি জানমাপন্ন’’ন্তিআদিনা ৰুত্তং যথাৰুত্তং, তেন. ৰুত্তমনতিক্কম্মাতি অব্যযীভাৰৰসেন ৰা অত্থো ৰেদিতব্বো. ইধাপি গরুকাপত্তিযা ৰুট্ঠানানতিক্কমেনেৰ পকাসনা দেসনা সিযাতি ‘‘ৰুট্ঠানং গরুকাপত্তিদেসনা’’তি ৰুচ্চতি.

৩৮৩. ইদানি ৰত্তব্বং সন্ধায ‘‘এৰ’’ন্তি ৰুত্তং. একস্সাতি একস্স ভিক্খুনো.

৩৮৪. তুম্হমূলেতি তুম্হাকং মূলে সমীপে. পটিদেসেমীতি পকাসেমি. সংৰরেয্যাসীতি সংযমেয্যাসি, সংৰরে পতিট্ঠেয্যাসীতি অত্থো.

৩৮৫. নিস্সজ্জিত্ৰানাতি একবহুভাৰং সন্নিহিতাসন্নিহিতভাৰং ঞত্ৰা ‘‘ইদং মে, ভন্তে, চীৰর’’ন্তিআদিনা নিস্সজ্জিত্ৰা. তেনাতি যস্স চীৰরং নিস্সট্ঠং, তেন. ‘‘ইমং…পে… দম্মী’’তি নিস্সট্ঠচীৰরং দেয্যন্তি সম্বন্ধিতব্বং. ‘‘ইমং চীৰরং দসাহাতিক্কন্ত’’ন্তিআদিনা যোজেতব্বং.

৩৮৬. (ক) চীৰরন্তি তিচীৰরাধিট্ঠাননযেন অধিট্ঠিতেসু সঙ্ঘাটিআদীসু যং কিঞ্চি চীৰরং. ৰিপ্পৰুত্থন্তি ৰিপ্পযুত্তেন ৰুত্থং.

(খ) অকালচীৰরন্তি অনত্থতে কথিনে ৰস্সানস্স পচ্ছিমমাসং ঠপেত্ৰা সেসে একাদসমাসে, অত্থতে কথিনে তঞ্চ মাসং হেমন্তিকে চত্তারো মাসে চ ঠপেত্ৰা সেসে সত্তমাসে উপ্পন্নং, কালেপি সঙ্ঘস্স ৰা ‘‘ইদং অকালচীৰর’’ন্তি একপুগ্গলস্স ৰা ‘‘ইদং তুয্হং দম্মী’’তি উদ্দিসিত্ৰা দিন্নং. ইতরং পন কালচীৰরং. মাসাতিক্কন্তন্তি অকালচীৰরে উপ্পন্নে ঊনস্স পারিপূরিযা সঙ্ঘগণাদিতো সতিযা পচ্চাসায মাসমেকং পরিহারো লব্ভতি, তং মাসং অতিক্কন্তং.

(গ) পুরাণচীৰরন্তি যং অন্তমসো উস্সীসকং কত্ৰা নিপন্নো. চীৰরং নাম ছন্নং অঞ্ঞতরং ৰিকপ্পনূপগং. এসেৰ নযো সব্বেসু ৰক্খমানচীৰরপ্পটিসংযুত্তসিক্খাপদেসু.

(ঘ) অঞ্ঞত্র পারিৰত্তকাতি অন্তমসো হরীতকীখণ্ডেনপি পারিৰত্তকং ৰিনা.

(ঙ) গহপতিকন্তি ভিক্খূসু অপব্বজিতকং. অঞ্ঞত্র সমযাতি অচ্ছিন্নচীৰরনট্ঠচীৰরসমযং ৰিনা, অচ্ছিন্নচীৰরেহি পন সাখাপলাসং অত্তনা ভঞ্জিত্ৰাপি ৰাকাদীনি গণ্হিত্ৰাপি নিৰাসেতুং ৰট্টতি, পগেৰ ৰিঞ্ঞত্তি. চীৰরং ৰিঞ্ঞাপিতন্তি সম্বন্ধো. কন্তি আহ ‘‘অঞ্ঞাতক’’ন্তিআদি.

(চ) তদুত্তরীতি ততো ৰুত্তপ্পমাণতো উত্তরি, অচ্ছিন্নচীৰরেন ভিক্খুনা কাযেন ৰা ৰাচায ৰা অভিহরিত্ৰা পৰারিতচীৰরতো তীসু নট্ঠেসু দ্ৰে সাদিতব্বানি, দ্ৰীসু নট্ঠেসু একং সাদিতব্বং. পকতিযা সন্তরুত্তরেন চরন্তেন দ্ৰীসু নট্ঠেসু দ্ৰেযেৰ সাদিতব্বানি, একস্মিং নট্ঠে একংযেৰ সাদিতব্বং. যস্স একংযেৰ হোতি, তস্মিং নট্ঠে দ্ৰে সাদিতব্বানি.

(ছ) অপ্পৰারিতোতি গহপতিনা ৰা গহপতানিযা ৰা. ৰিকপ্পন্তি পঠমঅধিপ্পেততো মূলং ৰড্ঢাপেন্তো সুন্দরকামতায ‘‘আযতং ৰা’’তিআদিনা ৰিসিট্ঠকপ্পং অধিকৰিধানং.

(জ) অঞ্ঞাতকে গহপতিকেতি বহূনং ৰসেন ৰুত্তমত্তমেৰ পুরিমতো ৰিসেসো.

(ঝ) চোদনাযাতি ‘‘অত্থো মে, আৰুসো, চীৰরেনা’’তি চোদনায. ঠানেনাতি কাযচোদনমাহ. রাজাদীহি পেসিতেন হি দূতেন ৰেয্যাৰচ্চকরস্স হত্থে চীৰরচেতাপন্নে নিক্খিত্তে তিস্সো চোদনা অনুঞ্ঞাতা, চোদনায দিগুণং ঠানং, তস্মা সচে চোদেতিযেৰ, ন তিট্ঠতি, ছ চোদনা লব্ভন্তি. সচে তিট্ঠতিযেৰ, ন চোদেতি, দ্ৰাদস ঠানানি লব্ভন্তি. সচে উভযং করোতি, একায চোদনায দ্ৰে ঠানানি হাপেতব্বানি.

(ট) সুদ্ধানি চ তানি কাল়কানি চ জাতিযা রজনেন ৰা.

(ঠ) তুলন্তি চতূহি তুলাহি কারেতুকামতং সন্ধায ৰুত্তং. অত্থতো পন যত্তকেহি এল়কলোমেহি কাতুকামো হোতি, তেসু দ্ৰে কোট্ঠাসা কাল়কানং, একো ওদাতানং, একো গোচরিযানং গহেতব্বো. তুলা নাম পলসতং. গোচরিযা নাম কপিলৰণ্ণা. ইদং মে সন্থতং কারাপিতন্তি যোজনা.

(ণ) তিযোজনপরমন্তি গহিতট্ঠানতো তীণি যোজনানি পরমো অস্স অতিক্কমনস্সাতি ভাৰনপুংসকৰসেন অত্থো ৰেদিতব্বো. অতিক্কামিতানীতি অন্তমসো সুত্তকেনপি ভণ্ডকতভণ্ডহরণং ৰিনা অন্তমসো ৰাতাবাধপ্পটিকারত্থং কণ্ণচ্ছিদ্দে পক্খিত্তানি অতিক্কামিতানি.

৩৮৭-৯. নিস্সজ্জিত্ৰানাতি ৰুত্তনযেন ৰত্থূনি নিস্সজ্জিত্ৰা. অথাতি দেসিতানন্তরং. ‘‘ইমং জানাহী’’তি গিহিং ৰদেতি যোজনা. সোতি আরামিকাদিকো গিহী. ‘‘ইমিনা কিং আহরামী’’তি ৰদেয্যাতি সম্বন্ধো. ৰদেয্যাতি যদি ৰদতি. ইমন্তি অৰত্ৰাতি ‘‘ইমং আহরা’’তি অৰত্ৰা ভিক্খূনং কপ্পিযং তেলাদিন্তি ৰদেতি সম্বন্ধো. আদিন্তি সন্ধিৰসেন নিগ্গহিতং. তেন পরিৰত্তেত্ৰান সো যং কপ্পিযং আহরতীতি যোজনা. তেনাতি নিস্সগ্গিযৰত্থুনা. দ্ৰেপেতে ঠপেত্ৰাতি এতে রূপিযপ্পটিগ্গাহকরূপিযসংৰোহারকে দ্ৰে ঠপেত্ৰা সেসেহি পরিভুঞ্জিতুং লব্ভন্তি সম্বন্ধো. পরিভুঞ্জিতুন্তি তং ভুঞ্জিতুং. ততোতি পরিৰত্তিতকপ্পিযতো. অঞ্ঞেনাতি অন্তমসো আরামিকেনাপি. তেসন্তি ৰুত্তানং দ্ৰিন্নং.

৩৯০. অন্তমসো তন্নিব্বত্তা রুক্খচ্ছাযাপীতি সম্বন্ধো. তন্নিব্বত্তাতি নিস্সট্ঠৰত্থুনা কিণিত্ৰা গহিতআরামে রুক্খচ্ছাযা তন্নিব্বত্তা হোতীতি ততো নিব্বত্তাতি সমাসো. আদিতো সন্থতত্তযন্তি আদিম্হি কোসিযসুদ্ধকাল়কদ্ৰেভাগসন্থতত্তযং.

৩৯১. এৰং চে নো লভেথাতি এৰং পরিৰত্তেত্ৰা কপ্পিযকারকো নো চে লভেয্য, সো গিহী ‘‘ইমং ছড্ডেহী’’তি সংসিযো ৰত্তব্বো, এৰং রূপিযছড্ডকো গিহী নো চে লভেয্য, সম্মতো ভিক্খু ছড্ডেয্যাতি সম্বন্ধো. সম্মতোতি ‘‘যো ছন্দাগতিং ন গচ্ছেয্যা’’তিআদিনা (পারা. ৫৮৪) ৰুত্তপঞ্চঙ্গসমন্নাগতো রূপিযছড্ডকসম্মুতিযা সম্মতো ভিক্খু.

৩৯২. এতানীতি পটিগ্গহিতরূপিযানি. দুতিযং পত্তন্তি ঊনপঞ্চবন্ধনে সতি ৰিঞ্ঞাপিতপত্তং সঙ্ঘে ৰত্তুং লব্ভরেতি পদসম্বন্ধো. ৰত্তুন্তি ‘‘অহং ভন্তে রূপিযং পটিগ্গহেসি’’ন্তিআদিনা ৰত্তুং. সেসানি অৰসেসনিস্সগ্গিযৰত্থূনি সঙ্ঘে একস্মিং গণে চ ৰত্তুং লব্ভরেতি যোজনা. ভাসন্তরেনপি ৰত্তুং লব্ভন্তি ন কেৰলং পাল়িভাসাযমেৰ, সীহল়াদিভাসাযপি নিস্সজ্জিতুং লব্ভতীতি অত্থো.

৩৯৩. (ক) নানপ্পকারন্তি চীৰরাদীনং কপ্পিযভণ্ডানং ৰসেন অনেকৰিধং. কযো গহণং, ৰিক্কযো দানং. কযো চ ৰিক্কযো চ কযৰিক্কযং.

(গ) ঊনপঞ্চবন্ধনেনাতি ঊনানি পঞ্চ বন্ধনানি যস্স, তেন, ইত্থম্ভূতলক্খণে করণৰচনং. যথাকথঞ্চি পন পঞ্চবন্ধনো পত্তো, পঞ্চবন্ধনোকাসো ৰা, সো অপত্তো, অঞ্ঞং ৰিঞ্ঞাপেতুং ৰট্টতি.

৩৯৪. সম্মন্নিত্ৰানাতি পদভাজনীযে ৰুত্তঞত্তিদুতিযকম্মেন সম্মন্নিত্ৰা. সঙ্ঘস্স পত্তন্তন্তি অন্ত-সদ্দেন পত্তানং অন্তে ভৰো লামকো পত্তোযেৰ গহিতো, নিস্সট্ঠপত্তস্স ৰিজ্জমানগুণং ৰত্ৰা থেরং, থেরস্স পত্তং দুতিযত্থেরং গাহাপেত্ৰা এতেনেৰ উপাযেন যাৰসঙ্ঘনৰকং গাহাপেত্ৰা যো তত্থ সন্নিপতিতসঙ্ঘস্স পত্তেসু পরিযন্তো পত্তো, তং পত্তন্তি. তস্সাতি কতনিস্সজ্জনস্স ভিক্খুনো. দাপযেতি সম্মতেন পত্তগাহাপকেন দাপেয্য.

৩৯৫. (ক) ভেসজ্জন্তি ভেসজ্জকিচ্চং করোতু ৰা, মা ৰা, এৰং লদ্ধৰোহারং সপ্পিআদিকং সত্তাহকালিকং.

(খ) গিম্হানস্স পচ্ছিমমাসে পুরিমো অদ্ধমাসো পরিযেসনকরণানং খেত্তং, পচ্ছিমদ্ধমাসো পরিযেসনকরণনিৰাসনানং খেত্তং, ৰস্সিকমাসা চত্তারোপি অধিট্ঠানেন সহ চতুন্নম্পি খেত্তং, ইমেযেৰ পঞ্চমাসা কুচ্ছিসমযো, ইতরসত্তমাসা পিট্ঠিসমযো. পিট্ঠিসমযে পরিযেসন্তস্স নিস্সগ্গিযং পাচিত্তিযং, কুচ্ছিসমযে চ অতিরেকদ্ধমাসে কত্ৰা পরিদহতো নিস্সগ্গিযং পাচিত্তিযং. তেন ৰুত্তং ‘‘অতিরেকমাসে সেসে’’তি.

(গ) সামং দত্ৰাতি ৰেয্যাৰচ্চাদীনি পচ্চাসীসমানো সযমেৰ দত্ৰা. অচ্ছিন্নন্তি তং অকরোন্তং দিস্ৰা সকসঞ্ঞায অচ্ছিন্নং. ভিক্খুনোপি চীৰরং ঠপেত্ৰা অঞ্ঞং পরিক্খারং, অনুপসম্পন্নস্স চ যং কিঞ্চি পরিক্খারং অচ্ছিন্দতো দুক্কটং. পরিচ্চজিত্ৰা দিন্নং সকসঞ্ঞং ৰিনা অচ্ছিন্দন্তো ভণ্ডগ্ঘেন কারেতব্বো.

(ঙ) ৰিকপ্পন্তি ‘‘আযতঞ্চ করোহি ৰিত্থতঞ্চা’’তিআদিকং অধিকৰিধানং.

(চ) অচ্চেকচীৰরন্তি গমিকগিলানগব্ভিনিঅভিনৰুপ্পন্নসদ্ধানং অঞ্ঞতরেন পৰারণমাসস্স জুণ্হপক্খপঞ্চমিতো পট্ঠায ‘‘ৰস্সাৰাসিকং দস্সামী’’তি দিন্নং অচ্চাযিকচীৰরং. অচ্চেকচীৰরস্স অনত্থতে কথিনে একাদসদিৰসাধিকো মাসো, অত্থতে কথিনে একাদসদিৰসাধিকা পঞ্চ মাসা চীৰরকালসমযো, তং অতিক্কামেন্তস্স নিস্সগ্গিযং পাচিত্তিযং. তেন ৰুত্তং ‘‘চীৰরকালসমযং অতিক্কামিত’’ন্তি. কালো চ সো সমযো চ চীৰরস্স কালসমযো, তং.

(ছ) সপ্পটিভযে আরঞ্ঞকসেনাসনে ৰস্সং উপগন্ত্ৰা ৰিহরন্তেন ভিক্খুনা তিণ্ণং চীৰরানং অঞ্ঞতরং চীৰরং পুরিমিকায উপগন্ত্ৰা মহাপৰারণায পৰারিততা, কত্তিকমাসতা, পঞ্চধনুসতিকপচ্ছি মপ্পমাণযুত্তসেনাসনতা, সাসঙ্কসপ্পটিভযতাতি এৰং ৰুত্তচতুরঙ্গসম্পত্তিযাঅন্তরঘরে নিক্খিপিত্ৰা সতি পচ্চযে ছারত্তপরমং তেন চীৰরেন ৰিপ্পৰসিতব্বং. ততো চে উত্তরি ৰিপ্পৰসেয্য, নিস্সগ্গিযং পাচিত্তিযং. তেন ৰুত্তং ‘‘অতিরেকছারত্ত’’ন্তিআদি.

(জ) জানন্তি জানন্তো.

৩৯৬. আদিম্হি ৰিযাতি পঠমনিস্সগ্গিযে ৰিয.

৩৯৭. (খ) অন্তরঘরং পৰিট্ঠায ভিক্খুনিযা হত্থতো খাদনীযাদিপ্পটিগ্গহণে চ ভিক্খূসু কুলেসু ভুঞ্জন্তেসু ‘‘ইধ পূৰং, সূপং দেথা’’তিআদিনা নযেন ৰোসাসমানায ভিক্খুনিযা অনপসাদনেন চ সেখসম্মতেসু কুলেসু পুব্বে অনিমন্তিতস্স খাদনীযাদীনং পটিগ্গহণে চ সপ্পটিভযে আরঞ্ঞকসেনাসনে ৰিহরন্তস্স পুব্বে অপ্পটিসংৰিদিতখাদনীযাদিপ্পটিগ্গহণে চ পাটিদেসনীযং নাম আপত্তিনিকাযো ৰুত্তো. তেন ৰুত্তং ‘‘গারয্হ’’ন্তিআদি.

৩৯৮. ‘‘অদেসনাগামিনিয’’ন্তিআদি ‘‘ন দেসযে’’তি এত্থ কম্মং. পারাজিকা সঙ্ঘাদিসেসা চ অদেসনাগামিনিযো নাম. ন আপত্তি অনাপত্তি, তং. কতদেসনং দেসিতং. নানাসংৰাসনিস্সীমট্ঠিতানং ন দেসযেতি সম্বন্ধো. এৰং চতুপঞ্চহি ন দেসযে, মনসা ন দেসযে, অপকতত্তানং ন দেসযে, নানা ‘‘একা’’তি ন দেসযেতি. মনসাতি কেৰলং চিত্তেনেৰ. নানাতি সম্বহুলা আপত্তিযো ‘‘একা’’তি ৰত্ৰা. একং পন আপত্তিং ‘‘সম্বহুলা’’তি দেসেতুং ৰট্টতীতি.

দেসনানিদ্দেসৰণ্ণনা নিট্ঠিতা.