৩৯. ৰস্সূপনাযিকনিদ্দেসৰণ্ণনা

৩০৯-৩১০. পুরিমিকা পচ্ছিমিকা ইতি ৰস্সূপনাযিকা দুৰেতি সম্বন্ধো. আসাল়্হিপুণ্ণমায অনন্তরে পাটিপদদিৰসে উপগন্তব্বা পচ্ছিমিকায পুরে ভৰাতি পুরিমা, সা এৰ পুরিমিকা. ততো পচ্ছা ভৰা অপরায পুণ্ণমায অনন্তরে পাটিপদদিৰসে উপগন্তব্বা পচ্ছিমিকা. উপনযনং পাপুণনং উপগমনং উপনাযিকা, ৰস্সন্তি ৰুট্ঠি, ইধ পন ৰস্সকালং ‘‘ৰস্স’’ন্তি উপচারেন গহেত্ৰা তত্থ ৰাসো উপচারেনেৰ ‘‘ৰস্স’’ন্তি ৰুচ্চতি, ৰস্সস্স ৰস্সাৰাসস্স উপনাযিকা ৰচীভেদৰসেন ৰা আলযকরণৰসেন ৰা উপগমনং ৰস্সূপনাযিকা. তত্থ আলযপরিগ্গাহো চ ৰচীভেদো চাতি পুরিমিকা ৰস্সূপনাযিকা দুৰে, আলযপরিগ্গাহো চ ৰচীভেদো চাতি পচ্ছিমিকা ৰস্সূপনাযিকা দুৰেভি সম্বন্ধিতব্বং. তত্থাতি তাসু দ্ৰীসু. তদুভযং দস্সেতুং ‘‘এদিসো’’তিআদি ৰুত্তং. সো আলযপরিগ্গাহো চ ৰচীভেদো চ ‘‘ইমস্মিং ৰিহারে ইমং তেমাসং ৰস্সং উপেমি, ইধ ৰস্সং উপেমী’’তি এদিসো, এতাদিসোতি অত্থো. এত্থ চ কমুপ্পত্তিঅনাদরা ৰচীভেদো পঠমং ৰুত্তো. উভযথা ৰস্সং উপগন্তুং ৰট্টতি. তেনেৰ অট্ঠকথাযং (ৰি. সঙ্গ. অট্ঠ. ১৭৯; মহাৰ. অট্ঠ. ২০৭) ‘‘সচেপি ‘ইধ ৰস্সং ৰসিস্সামী’তি আলযো অত্থি, অসতিযা পন ৰস্সং ন উপেতি, গহিতসেনাসনং সুগ্গহিতং, ছিন্নৰস্সো ন হোতি, পৰারেতুং লভতিযেৰ, ৰিনাপি হি ৰচীভেদং আলযকরণমত্তেনপি ৰস্সং উপগতমেৰ হোতী’’তি ৰুত্তং. নাৰাসত্থৰজেসু পন পরিযেসিত্ৰা সেনাসনং অলভন্তেন আলযকরণমত্তেনেৰ উপগন্তব্বং. উপগচ্ছন্তেন চ ৰিহারং পটিজগ্গিত্ৰা পানীযং পরিভোজনীযং উপট্ঠাপেত্ৰা সব্বং চেতিযৰন্দনাদিসামীচিকম্মং নিট্ঠাপেত্ৰা উপগন্তব্বং. আলযপরিগ্গহে আলযং দস্সেতুং ‘‘চিত্তুপ্পাদেত্থ আলযো’’তি আহ. এত্থাতি দ্ৰীসু.

৩১১. তদহূতি তস্মিং ৰস্সূপনাযিকদিৰসে. জানন্তি ‘‘অজ্জ ৰস্সূপনাযিকা’’তি জানন্তো, অনুপগচ্ছতোতিমস্স ৰিসেসনং.

৩১২. দুতিযন্তি পচ্ছিমিকং. অনুপগতোতি কেনচি অন্তরাযেন পুরিমিকং অনুপগতো. তেমাসন্তি পুরিমং ৰা তেমাসং পচ্ছিমং ৰা তেমাসং. ৰস্সং উপগন্ত্ৰা পন অরুণং অনুট্ঠাপেত্ৰাপি তদহেৰ সত্তাহকরণীযেন পক্কমন্তস্সাপি অন্তোসত্তাহে নিৰত্তেন্তস্সাপি অনাপত্তি.

৩১৩-৫. মাতাপিতূনং পঞ্চন্নং সহধম্মিকানঞ্চ অত্থায গিলানতদুপট্ঠাকভত্তং ওসধঞ্চ এসিস্সং ৰা পুচ্ছিস্সামি ৰা উপট্ঠিস্সং ৰা গন্ত্ৰা অহং নাভিরতং ৰূপকাসেস্সং ৰা কুক্কুচ্চং ৰিনোদনঞ্চ দিট্ঠিং ৰিৰেচনঞ্চ গরুকাদিকং ৰুট্ঠানং ৰাপি উস্সুক্কং ৰাপি করিস্সং ৰাপি কারেস্সং ৰাপীতি এৰমাদিনা সত্তাহকিচ্চেন পহিতেপি ৰা অপহিতেপি ৰা গন্তুং লব্ভন্তি যোজনা.

এত্থ পন লব্ভমানকৰসেন যোজেত্ৰা ৰক্খমাননযেন অত্থো ৰেদিতব্বো. মাতাদিসুতিযা তেযেৰ গিলান-সদ্দেন গয্হন্তি, তেসং উপট্ঠাকা তদুপট্ঠাকা, গিলানা চ তদুপট্ঠাকা চ, তেসং ভত্তন্তি সমাসো. ওসধন্তি তেসংযেৰ গিলানানং ভেসজ্জং. এসিস্সন্তি পরিযেসিস্সামি. পুচ্ছিস্সামীতি তেযেৰ সত্তজনে গিলানে পুচ্ছিস্সং. উপট্ঠিস্সন্তি তেযেৰ গিলানে উপট্ঠহিস্সামি. অভিরমতীতি অভিরতো, ৰিসভাগরূপাদিদস্সনেন সাসনে ন অভিরতো নাভিরতো. অভিরমণং ৰা অভিরতং, নত্থি অভিরতমস্সাতি নাভিরতো, তং. সহধম্মিকেসু যো নাভিরতো, তং ৰূপকাসেস্সং ৰিক্খেপহরণত্থং অঞ্ঞত্থ নযিস্সামি. কুক্কুচ্চন্তি পঞ্চন্নংযেৰ উপ্পন্নং ৰিনযকুক্কুচ্চং. কিতকযোগে ৰিকপ্পেন দুতিযা. দিট্ঠিন্তি তেসংযেৰ মিচ্ছাদিট্ঠিযা. গরুকমাদিকন্তি গরুকং আদি যস্সাতি ৰিগ্গহো. আদি-সদ্দেন সামণেরানং ৰস্সপুচ্ছনং, সিক্খাসমাদযিতুকামতা, তজ্জনীযাদিকম্মকরণং সঙ্গহিতং. ৰুট্ঠানন্তি ভিক্খুনো গরুকাপত্তিযা পরিৰাসমানত্তদানাদীহি ৰুট্ঠানং. উস্সুক্কন্তি ৰস্সপুচ্ছনাদিউস্সুক্কং. এৰমাদিনাতি এত্থ আদি-সদ্দেন দিট্ঠিগতাদীনং ধম্মকথাকরণাদিং সঙ্গণ্হাতি. গন্তুং লব্ভন্তি এত্থ গচ্ছন্তেন অন্তোউপচারসীমাযং ঠিতেনেৰ ‘‘অন্তোসত্তাহে আগচ্ছিস্সামী’’তি আভোগং কত্ৰা গন্তব্বং. সচে আভোগং অকত্ৰা উপচারসীমং অতিক্কমতি, ছিন্নৰস্সো হোতীতি ৰদন্তি. সত্তাহকিচ্চেনাতি সত্তাহস্স লব্ভমানকং ৰুত্তং ৰক্খমানঞ্চ সঙ্ঘকম্মাদি কিচ্চং সত্তাহকিচ্চং. সত্তমঅরুণমত্তস্সেৰ ৰিহারে উট্ঠাপনীযত্তা সত্তাহস্স সাকল্লেন গহণং.

৩১৬. সঙ্ঘকম্মে ৰজেতি সঙ্ঘস্স কিচ্চে উপোসথাগারাদীসু সেনাসনেসু ৰা চেতিযছত্তৰেদিকাদীসু ৰা অন্তমসো পুগ্গলিকসেনাসনেসু ৰাপি কত্তব্বনিমিত্তে ৰজেয্যাতি অত্থো. ধম্মসৰনত্থং নিমন্তিতো ৰাপি ৰজে, গরূহি পেসিতো ৰাপি ৰজে, গরূনং পস্সিতুং ৰাপি ৰজেতি যোজেতব্বং. নিমন্তিতোতি এত্থ সচে পঠমংযেৰ কতিকা কতা হোতি, ‘‘অসুকদিৰসং নাম সন্নিপতিতব্ব’’ন্তি নিমন্তিতোযেৰ নাম হোতি. গরূহীতি আচরিযুপজ্ঝাযেহি. পহিতোতি ভণ্ডধোৰনাদিঅত্থায পেসিতো. পস্সিতুন্তি অগিলানেপি.

৩১৭. ভণ্ড…পে… দস্সনে ন ৰজেতি যোজনীযং. এত্থাপি নিমিত্তত্থে সত্তমী. ভণ্ডং নাম চীৰরং. ঞাতী মাতাপিতূহি অঞ্ঞে. উপট্ঠাকা উপাসকা. ‘‘অজ্জেৰ আগমিস্স’’ন্তি অদূরগো ন পাপুণেয্য, লব্ভন্তি সম্বন্ধো. লব্ভন্তি ইমস্স অপাপুণনং ৰুত্তকম্মং. অজ্জেৰাগমিস্সন্তি সামন্তৰিহারং গন্ত্ৰা পুন আগচ্ছন্তস্স অন্তরামগ্গে সচে অরুণুগ্গমনং হোতি, ৰস্সচ্ছেদোপি ন হোতি, রত্তিচ্ছেদদুক্কটঞ্চ নত্থীতি ৰদন্তি.

৩১৮. সেসঞাতীহীতি মাতাপিতূহি অৰসেসঞাতীহি. নিদ্দিসিত্ৰাৰাতি দানধম্মসৰনাদীনি. ‘‘পহিতে পেসিতে’’তি চেত্থ ‘‘লব্ভ’’ন্তি অনুৰত্তনীযং.

৩১৯. অত্তনো অন্তরাযে সতীতি চোরসরীসপৰাল়জীৰিতব্রহ্মচরিযন্তরাযে, অন্তমসো ভেসজ্জালাভপতিরূপউপট্ঠাকালাভেপি. ‘‘ৰস্সচ্ছেদকারণম্পি সত্তাহকরণীযং সিযা’’তি কেচি পোরাণা ৰদন্তি, তং যুত্তং ৰিয দিস্সতি, সব্বথা ৰস্সচ্ছেদেন বহি ৰাসায অনুঞ্ঞাতকারণং সত্তাহমত্তং বহি ৰীতিনামেত্ৰা অন্তোৰিহারেযেৰ ৰাসেন ৰস্সচ্ছেদাকারণং কথং নাম ন সিযাতি. ছিন্নৰস্সো নো পৰারযেতি সম্বন্ধো.

৩২০. ‘‘অসেনাসনিকেনা’’তি ইমিনাৰ ৰিঞ্ঞাযমানত্থত্তেপি ‘‘অজ্ঝোকাসে চা’’তি ৰচনং ‘‘অহং অব্ভোকাসিকো, কিং মে সেনাসনেনা’’তি ৰাসানিৰত্তনত্থং ৰুত্তং. রুক্খস্স সুসিরেতি সুদ্ধে রুক্খসুসিরে. মহন্তস্স পন সুসিরস্স অন্তো পদরচ্ছদনকুটিকং কত্ৰা পৰিসনদ্ৰারং যোজেত্ৰা উপগন্তুং ৰট্টতি. ‘‘ৰিটপেপি অট্টকং বন্ধিত্ৰা’’তিআদি ৰুত্তনযমেৰ. তথা ছত্তচাটীসুপি তদনুরূপেন ৰেদিতব্বং. ছৰকুটি নাম টঙ্কিতমঞ্চাদিভেদা কুটি. তত্থ টঙ্কিতমঞ্চো নাম দীঘে মঞ্চপাদে মজ্ঝে ৰিজ্ঝিত্ৰা অটনিযো পৰেসেত্ৰা কতো, চতুন্নং পাসাণানং উপরি পাসাণং অত্থরিত্ৰা কতম্পি টঙ্কিতমঞ্চো.

৩২১. অসেনাসনিকেনাতি যস্স তিণপণ্ণইট্ঠকসিলাসুধাসঙ্খাতানং পঞ্চন্নং ছদনানং অঞ্ঞতরেন ছন্নং যোজিতদ্ৰারবন্ধনং সেনাসনং নত্থি, তেন. ইদং পন ৰচীভেদং কত্ৰা অধিট্ঠানং সন্ধায ৰুত্তন্তি ৰদন্তি, তদযুত্তং, তথা চ সতি নাৰাদীসু ৰিয ৰিসুং ৰিধানেন ভৰিতব্বন্তি. নাৰাসত্থৰজূপগোতি ইমিনা অসেনাসনিকেন নাৰাদীসু ৰস্সং উপগন্তুং ৰট্টতীতি দীপেতি. তত্থ চ কুটিকং পরিযেসিত্ৰা লভন্তেন তত্থ পৰিসিত্ৰা ৰিহারাভাৰতো ‘‘ৰিহারে’’তি অৰত্ৰা ‘‘ইধ ৰস্সং উপেমী’’তি তিক্খত্তুং ৰত্তব্বং, অলভন্তেন আলযো কাতব্বো. পৰারেতুঞ্চাতি চ-সদ্দেন ৰস্সচ্ছেদনিমিত্তায আপত্তিযা অভাৰং সম্পিণ্ডেতি. ‘‘ৰজে সত্থে নাৰাযন্তি তীসু ঠানেসু নত্থি ৰস্সচ্ছেদে আপত্তি, পৰারেতুঞ্চ লব্ভতী’’তি (মহাৰ. অট্ঠ. ২০৩) অট্ঠকথাযং ৰুত্তং. ৰস্সচ্ছেদেতি চ ‘‘অনুজানামি, ভিক্খৰে, যেন ৰজো তেন গন্তু’’ন্তি (মহাৰ. ২০৩) ৰুত্তত্তা, সত্থস্স নাৰায চ গমনসভাৰেনেৰ ঠিতত্তা চ ৰস্সূপগতট্ঠানে অৰসিত্ৰা অঞ্ঞত্থ গমনমত্তং সন্ধায ৰুত্তন্তি ৰেদিতব্বং.

ৰস্সূপনাযিকনিদ্দেসৰণ্ণনা নিট্ঠিতা.