৪০. অৰেভঙ্গিযনিদ্দেসৰণ্ণনা

৩২২-৫. আরামা…পে… মত্তিকভণ্ডানীতি এতে পঞ্চ অৰিভাজিযাতি সম্বন্ধিতব্বং. পঞ্চাতি ‘‘আরামারামৰত্থূনি এক’’ন্তিআদিনা রাসিৰসেন পঞ্চ, সরূপৰসেন পনেতানি পণ্ণং তিণে পক্খিপিত্ৰা পঞ্চৰীসতিৰিধানি হোন্তি. তথা চাহ –

‘‘দ্ৰিসঙ্গহানি দ্ৰে হোন্তি, ততিযং চতুসঙ্গহং;

চতুত্থং নৰকোট্ঠাসং, পঞ্চমং অট্ঠভেদনং.

‘‘ইতি পঞ্চহি রাসীহি, পঞ্চনিম্মললোচনো;

পঞ্চৰীসৰিধং নাথো, গরুভণ্ডং পকাসযী’’তি. (চূল়ৰ. অট্ঠ. ৩২১);

তত্থ আরামো নাম পুপ্ফারামো ৰা ফলারামো ৰা. আরামৰত্থু নাম তেসংযেৰ পতিট্ঠানোকাসো, ৰিনট্ঠেসু ৰা তেসু পোরাণকভূমিভাগো. ৰিহারো নাম পাসাদাদি যং কিঞ্চি সেনাসনং. লোহকুম্ভী নাম কাল়লোহেন ৰা তম্বলোহেন ৰা কতকুম্ভী. কটাহাদীসুপি এসেৰ নযো. এত্থ ভাণকন্তি অরঞ্জরো ৰুচ্চতি. ৰারকোতি ঘটো. রাসিং অপেক্খিত্ৰা এতেতি পুল্লিঙ্গনিদ্দেসো. অৰিভাজিযাতি মূলচ্ছেজ্জৰসেন অৰেভঙ্গিযা. পরিৰত্তনৰসেন পন পরিভুঞ্জন্তস্স ৰিস্সজ্জেন্তস্স চ অনাপত্তি. অৰিস্সজ্জিযানি চাতি চ-সদ্দেন অৰেভঙ্গিযানি চাতি অৰুত্তং সম্পিণ্ডেতি.

৩২৬-৮. একন্তগরুভণ্ডত্তা আদিতো তযো রাসী ঠপেত্ৰা চতুত্থরাসিতো পট্ঠায গরুভণ্ডাগরুভণ্ডে ৰিভজিতুং ‘‘ৰল্লী’’তিআদি আরদ্ধং. অড্ঢবাহুমত্তাপি ৰল্লি চ অট্ঠঙ্গুলাযতো ৰেল়ু চ মুট্ঠিমত্তম্পি তিণাদি চ একম্পি পণ্ণঞ্চ পাকতা ৰা পঞ্চৰণ্ণা ৰা তালপক্কপ্পমাণাপি মত্তিকা চ তালপক্কপ্পমাণাপি সুধা চ তালপক্কপ্পমাণাপি কঙ্গুট্ঠআদিকা চ দিন্না ৰা তত্থজাতকা ৰা সঙ্ঘিকা রক্খিতা অভাজিযা, রজ্জুযোত্তাদি চ দিন্না সঙ্ঘিকা অভাজিযাতি যোজনা. ৰেল়ু পরিণাহতো পণ্ণসূচিদণ্ডমত্তো গহেতব্বো. তিণং মুঞ্জং পব্বজঞ্চ আদিসদ্দসঙ্গহিতং ঠপেত্ৰা অৰসেসং যং কিঞ্চি তিণং. পণ্ণো অট্ঠঙ্গুলপ্পমাণো রিত্তপোত্থকো গরুভণ্ডমেৰ. পাকতাতি পকতিযা জাতা. পঞ্চৰণ্ণাতি রত্তসেতাদিপঞ্চৰণ্ণা. সুধাকঙ্গুট্ঠাদযো মত্তিকগ্গহণেন গহিতা. কঙ্গুট্ঠআদিকাতি আদি-সদ্দেন সজ্জুরসজাতিহিঙ্গুলকাদীনং গহণং. দিন্নাতি সঙ্ঘস্স দিন্না. তত্থজাতাতি সঙ্ঘিকভূমিযং জাতা. রজ্জুযোত্তাদীতি সুত্তমকচিৰাকনাল়িকেরহীরচম্মমযা রজ্জু চ যোত্তাদি চ. আদি-সদ্দেন মকচিৰাকাদিকে ৰট্টেত্ৰা কতা একৰট্টা গহিতা. ব্যতিরেকৰসেন পনেত্থ চতুত্থরাসিম্হি ইতরে ভাজিযাতি ৰেদিতব্বা. সঙ্ঘিকে কম্মে, চেতিযস্স ৰা কম্মে নিট্ঠিতে ভাজিযাতি যোজনীযং.

৩২৯. লোহভণ্ডেসু ভিক্খুসারুপ্পং পত্তাদি ৰা তথা ৰিপ্পকতাকতং লোহভণ্ডং তথা পাদগণ্হকং ৰারকং ভাজিযন্তি যোজনা. পত্তাদীতি অযোপত্তো অযথালকং তম্বলোহথালকং অঞ্জনিসলাকা কণ্ণমলহরণী সূচি পণ্ণসূচি খুদ্দকো পিপ্ফলকো খুদ্দকং আরকণ্ডকং কুঞ্চিকা তাল়াদি. ৰিপ্পকতন্তি অপরিনিট্ঠিতং. অকতন্তি সব্বসো অকতং. পাদগণ্হকন্তি সীহল়দীপে পাদগণ্হনকং. পাদো নাম চতুত্থংসো, মগধনাল়িযা পঞ্চনাল়িমত্তা. মগধনাল়ি চ নামেসা ঊনপঞ্চপসতা ৰেদিতব্বা. তথা ঘটকো তেলভাজনঞ্চ. যায ৰাসিযা ঠপেত্ৰা দন্তকট্ঠচ্ছেদনং ৰা উচ্ছুতচ্ছনং ৰা অঞ্ঞং মহাকম্মং কাতুং ন সক্কা, অযং ভাজিযা. সম্মুঞ্জনিদণ্ডখণনকং পন অদণ্ডকং ফলমত্তমেৰ, যং সক্কা সিপাটিকায পক্খিপিত্ৰা পরিহরিতুং, অযং ভাজনীযা. তিপুকোট্টকউপকরণেসু তিপুচ্ছেদনকসত্থকং সুৰণ্ণকারূপকরণেসু সুৰণ্ণচ্ছেদনকসত্থকং চম্মকারউপকরণেসু চম্মছিন্দনকং খুদ্দকসত্থং নহাপিততুণ্ণকারউপকরণেসু ঠপেত্ৰা মহাকত্তরিং মহাসণ্ডাসঞ্চ মহাপিপ্ফলকঞ্চ সব্বানি ভাজনীযভণ্ডানি. তথা কুঞ্চিকা. ৰুত্তৰিপল্লাসেন পন লোহভণ্ডে অভাজিযাতি ৰেদিতব্বা.

৩৩০. ‘‘ৰেল়ুম্হী’’তিআদিনা দারুভণ্ডানি দস্সেতি. দারুভণ্ডেন পন সঙ্গহেত্ৰা সব্বাপি দারুৰেল়ুচম্মুপাহনাদিৰিকতি ৰেদিতব্বা. ছত্তদণ্ডো চ সলাকা চাতি দ্ৰন্দো. উপাহনায দণ্ডকো উপাহনদণ্ডকো.

৩৩১. অনুঞ্ঞাতৰাসিদণ্ডোতি অনুঞ্ঞাতৰাসিযা দণ্ডো. অরণঞ্জনিসিঙ্গাদীতি আদি-সদ্দেন অঞ্জনিসলাকা ছত্তং মুট্ঠিপণ্ণং উপাহনা ধম্মকরণো পাদগণ্হনকতো অনতিরিত্তং আমলকতুম্বং আমলকঘটো লাবুকতুম্বং লাবুকঘটো ৰিসাণতুম্বন্তি ইদং সঙ্গণ্হাতি.

৩৩২. যথাৰুত্ততো অঞ্ঞং দারুভণ্ডেসু গরুভণ্ডং. মত্তিকামযো পাদঘটকো ভাজিযোতি যোজনা. পাদঘটকোতি পাদস্স পহোনকো ঘটকো. ইমিনা মত্তিকাভণ্ডং উপলক্খেতি, তস্মা পত্তো থালকং কুণ্ডিকাতি ইমানি ভাজনীযানি, ৰুত্তাৰসেসা অভাজিযা.

৩৩৩-৪. গরুনা গরুভণ্ডঞ্চ থাৰরঞ্চ পরিৰত্তেয্য, থাৰরেন চ থাৰরম্পি পরিৰত্তেয্যাতি যোজেতব্বং. গরুনা মঞ্চপীঠাদিনা. থাৰরন্তি আরামাদি পঠমরাসিদ্ৰযং. তথা কত্ৰা চ ভুঞ্জিতুন্তি এৰঞ্চ পরিৰত্তেত্ৰা ততো আভতং কপ্পিযভণ্ডং পরিভুঞ্জেয্যাতি অত্থো, ৰিধিম্হি অযং তুংপচ্চযো. ফাতিকম্মেন ৰল্লাদিং গণ্হেতি সম্বন্ধনীযং. ফাতিকম্মং নাম সমকং ৰা অতিরেকং ৰা তদগ্ঘনকং ৰা ৰড্ঢিকম্মং. সেসন্তি পঠমরাসিত্তিকন্তি.

অৰেভঙ্গিযনিদ্দেসৰণ্ণনা নিট্ঠিতা.