৩১. ৰিকপ্পনানিদ্দেসৰণ্ণনা

২২১. সম্মুখা পরম্মুখাতি সস্স মুখং, পরস্স মুখন্তি ৰিগ্গহো, সম্মুখেন পরম্মুখেনাতি অত্থো. সম্মুখাৰিকপ্পনা পরম্মুখাৰিকপ্পনাতি ভেদা দুৰে ৰিকপ্পনা ৰুত্তাতি যোজনা. ভেদাতি ৰিসেসতো. অথ ৰা সস্স মুখং মুখসম্বন্ধিৰচনং অস্সা ৰিকপ্পনাযাতি সমাসো. তথা পরম্মুখা. সম্মুখা চ পরম্মুখা চ, তস্সা ভেদো, ততো. সম্মুখায সম্মুখৰিকপ্পনায. ব্যত্তস্সাতি ৰিকপ্পনৰিধানং পচ্চুদ্ধারৰিধানঞ্চ জানন্তস্স.

২২২. তেনাতি যস্স সন্তিকে ৰিকপ্পেতি, তেন ভিক্খুনা. পরিভোগাদিকন্তি পরিভোগং ৰিস্সজ্জনং অধিট্ঠানঞ্চ.

২২৪-৫. অপরা সম্মুখাৰেকাতি এত্থ ৰা-সদ্দো পক্খন্তরে, অথ ৰাতি অত্থো, অপি-সদ্দত্থো ৰা ৰা-সদ্দো, সো অপরা-সদ্দতো পরং দট্ঠব্বো, অপরাপি একা সম্মুখাৰিকপ্পনা অত্থীতি অত্থো. কথন্তি আহ ‘‘ভিক্খুস্সা’’তিআদি. ‘‘পঞ্চন্নং সহধম্মীন’’ন্তি ৰুত্তত্তা ‘‘তিস্সস্স ভিক্খুনো’’তিআদীসু তিস্সায ভিক্খুনিযা তিস্সায সিক্খমানায তিস্সায সামণেরিযা তিস্সস্স সামণেরস্সাতিপি ৰিঞ্ঞাতব্বং.

২২৬. পরম্মুখাৰিকপ্পনাতি পরম্মুখেন ৰিকপ্পনেন, পরম্মুখাৰিকপ্পনাতি ৰা গহেতব্বং, পরম্মুখাৰিকপ্পনা কথন্তি অত্থো.

২২৭. মিত্তোতি দল়্হমিত্তো. সন্দিট্ঠোতি দিট্ঠমত্তমিত্তো. এত্থ পন দ্ৰিন্নং ৰিকপ্পনানং কিং নানাকরণন্তি? সম্মুখাৰিকপ্পনায তাৰ সযং ৰিকপ্পেত্ৰা পরেন পচ্চুদ্ধরাপেতি, তেনেৰ সা সম্মুখাৰিকপ্পনা নাম জাতা. পরম্মুখাৰিকপ্পনায পরেনেৰ ৰিকপ্পাপেত্ৰা পরেনেৰ পচ্চুদ্ধরাপেতি, তেনেৰ সা পরম্মুখাৰিকপ্পনা নাম জাতাতি ইদমেত্থ নানাকরণন্তি.

২২৮. দূরসন্তিকত্তেকত্তন্তি এত্থ আসন্নদূরভাৰো অধিট্ঠানে ৰুত্তনযেনেৰ ৰেদিতব্বো.

২২৯. দসাহং…পে… পচ্চাসায সতি মাসকং নাধিট্ঠিতৰিকপ্পিতং নিস্সগ্গিং নুপ্পাদযতীতি সম্বন্ধো. দস অহানি সমাহটানি দসাহং. সব্বত্থ অচ্চন্তসংযোগে দুতিযা. তত্থ যং দিৰসং চীৰরং উপ্পন্নং, তস্স যো অরুণো, সো উপ্পন্নদিৰসনিস্সিতো, তস্মা চীৰরুপ্পাদদিৰসেন সদ্ধিং একাদসে অরুণুগ্গমনে নিস্সগ্গিযং হোতীতি আহ ‘‘দসাহ’’ন্তি. মাসমেকং ৰাতি ‘‘অনত্থতে কথিনে একং পচ্ছিমকত্তিকমাস’’ন্তি (পারা. ৬৪৯ অত্থতো সমানং) ৰুত্তত্তা কথিনত্থতে পঞ্চ মাসেতি লব্ভতি. কথিনং অত্থতং যস্মিং ৰিহারেতি সমাসো. পারিপূরত্থন্তি পারিপূরি অত্থো যস্সাতি ৰিগ্গহো. কিরিযাৰিসেসনং, পারিপূরিপ্পযোজনং কত্ৰাতি অত্থো. ঊনস্সাতি যত্তকেন কযিরমানং অধিট্ঠানং চীৰরং পহোতি, তত্তকতাভাৰতো ঊনস্স একাদসমাসসত্তমাসসঙ্খাতে পিট্ঠিসমযে উপ্পন্নস্স মূলচীৰরস্স. পচ্চাসা সতীতি ‘‘সঙ্ঘাদিতো যতো কুতোচি লচ্ছামী’’তি এৰং সতিযা পচ্চাসাযাতি অত্থো. উভযম্পি য-কারলোপেন নিদ্দিট্ঠং. সতীতি ৰা নিপাতো, লিঙ্গৰিপল্লাসেন ৰাহ. এত্থ পন ব্যতিরেকৰসেন দসাহাতিক্কমনাদীসু নিস্সগ্গিযং পাচিত্তিযং ৰেদিতব্বন্তি.

ৰিকপ্পনানিদ্দেসৰণ্ণনা নিট্ঠিতা.