৩০. ৰত্তনিদ্দেসৰণ্ণনা

২১৩. সউপাহনো…পে… চীৰরং সীসে করিত্ৰা ৰা আগন্তুকো আরামং ন পৰিসেতি সম্বন্ধো. সছত্তোতি সীসে কতছত্তেন সছত্তো. ওগুণ্ঠিতোতি সসীসং পারুপিতো. ‘‘পরিক্খিত্তস্স ৰিহারস্স পরিক্খেপো, অপরিক্খিত্তস্স পরিক্খেপারহট্ঠান’’ন্তি ৰুত্তং উপচারসীমাসমীপং পত্ৰা উপাহনাওমুঞ্চনাদিসব্বং কত্ৰা আরামো পৰিসিতব্বোতি অযমেত্থ ব্যতিরেকলদ্ধো অত্থো.

২১৪. পানীযেন পাদে ন ধোৰেয্যাতি সম্বন্ধো. পটিক্কমনং পত্ৰা একমন্তে পত্তচীৰরং নিক্খিপিত্ৰা পতিরূপে নিসজ্জ পুচ্ছিত্ৰা পানীযং পাতব্বং, পরিভোজনীযেন যথাৰুত্তং পাদা ধোৰিতব্বাতি অধিপ্পাযো. ৰুড্ঢতরে আৰাসিকেপি চ অভিৰাদেয্যাতি ইমিনা ৰস্সং পুচ্ছিত্ৰা নৰকেন আৰাসিকেন অভিৰাদাপেতব্বন্তি দীপেতি. পুচ্ছেয্য সযনাসনন্তি ‘‘কতমং সেনাসনং পাপুণাতি, অজ্ঝাৰুত্থং অনজ্ঝাৰুত্থং ৰা’’তি সেনাসনং পুচ্ছেয্য. ইদঞ্চ পুচ্ছায লক্খণৰচনং. তস্মা আৰাসিকৰত্তে ৰুত্তমজ্ঝাৰুত্থাদিকঞ্চ পুচ্ছিতব্বং. সচে ‘‘অনজ্ঝাৰুত্থ’’ন্তি ৰদন্তি, কৰাটং আকোটেত্ৰা মুহুত্তং আগমেত্ৰা ঘটিকং উগ্ঘাটেত্ৰা কৰাটং পণামেত্ৰা বহি ঠিতেন উল্লোকেত্ৰা পৰিসিত্ৰা সব্বং সেনাসনৰত্তং কাতব্বং. আগন্তুকৰত্তং.

২১৫-৬. গমিকো পক্কমেয্যাতি সম্বন্ধো. ‘‘পটিসামেত্ৰা’’তিআদীনিমস্স পুব্বকিরিযাপদানি. দারুমত্তিকভণ্ডকন্তি এত্থ মঞ্চপীঠাদিদারুভণ্ডং রজনভাজনাদিমত্তিকাভণ্ডং. পটিসামেত্ৰাতি অত্থি চে অনোৰস্সকে সণ্ঠপেত্ৰা. থকেত্ৰানাতি দ্ৰারৰাতপানেহি পিধায. সাধুকং সঙ্গোপেত্ৰানাতি চতূসু পাসাণেসু মঞ্চং পঞ্ঞপেত্ৰা মঞ্চে মঞ্চস্স, পীঠে পীঠস্স আরোপনেন সেনাসনস্স উপরূপরি পুঞ্জকরণেন সাধুকং সঙ্গোপনং কত্ৰা. ন চাতি নেৰ. গমিকৰত্তং.

২১৭-৮. আৰাসিকোতি ইদং ‘‘পঞ্ঞপেয্যা’’তিআদীনং কত্তুপদং. নৰকম্মকরণাদিভারনিত্থরণতায আৰাসো ৰিহারো অস্স অত্থীতি আৰাসিকো. যস্স পন কেৰলং ৰিহারে নিৰাসনমত্তং অত্থি, সো নেৰাসিকো. উভোপি তে ইধ আৰাসিক-সদ্দেন সঙ্গহিতা. পাদোদপ্পভুতিন্তি এত্থ পভুতি-সদ্দেন পাদপীঠপাদকথলিকানং গহণং. পচ্চুগ্গন্ত্ৰান পত্তচীৰরং গণ্হেয্যাতি যোজনা. পঞ্ঞপে সযনাসনন্তি ‘‘এতং তুম্হাকং সেনাসনং পাপুণাতী’’তি এৰং সযনাসনং পঞ্ঞপেয্য, পকাসেয্যাতি ৰুত্তং হোতি.

২১৯. অজ্ঝাৰুত্থন্তি পুব্বে ভিক্খূহি নিৰুত্থং. গোচরাগোচরং ৰদেতি ‘‘ভিক্খাচারগামো দূরো, আসন্নো’’তি ৰা, ‘‘কালস্সেৰ পিণ্ডায চরিতব্বং, দিৰা ৰা’’তি এৰং গোচরঞ্চ, ‘‘মিচ্ছাদিট্ঠিকানং ৰা গামো, পরিচ্ছিন্নভিক্খো ৰা’’তিআদিনা অগোচরঞ্চ ৰদেয্যাতি অত্থো. ৰচ্চপস্সাৰট্ঠানানীতিআদীনিপি ‘‘ৰদে’’তি ইমস্সেৰ কম্মৰচনানি. সেখসম্মুতিন্তি যস্স সদ্ধস্স কুলস্স সঙ্ঘো সেখসম্মুতিং দেতি, তং কুলঞ্চ.

২২০. পৰেসনিক্খমে কালন্তি ‘‘কেসুচি ঠানেসু ৰাল়মিগা ৰা অমনুস্সা ৰা হোন্তি, ইমং কালং পৰিসিতব্বং নিক্খমিতব্বঞ্চা’’তি এৰং পৰেসনিক্খমে চ কালং. এতং পন আসনপঞ্ঞপনাদিকং সব্বং ৰত্তং ৰুড্ঢতরে আগতে চীৰরকম্মাদিং ৰা নাতিগিলানস্স ভেসজ্জং ৰা ঠপেত্ৰাপি কাতব্বং. মহাগিলানস্স পন ভেসজ্জমেৰ কাতব্বং. চেতিযঙ্গণৰত্তং করোন্তেনাপি তস্স ৰত্তং কাতুং আরভিতব্বং. পণ্ডিতো হি আগন্তুকো ‘‘করোহি তাৰ ভেসজ্জং, চেতিযঙ্গণং সম্মজ্জাহী’’তি চ ৰদেয্য. অপিচ বীজনেন বীজিতব্বো, পাদাপিস্স ধোৰিতব্বা, তেলেন মক্খিতব্বা. পিট্ঠি চে আগিলাযতি, সম্বাধেতব্বা. নৰকস্স পন আগন্তুকস্স ‘‘ইদমাসনং, এত্থ নিসীদা’’তিআদিনা আচিক্খিতব্বন্তি দস্সেন্তো ‘‘নিসিন্নোযেৰা’’তিআদিমাহ. নিসিন্নোযেৰাতি ইমিনা ‘‘ঠিতোযেৰা’’তিআদিং উপলক্খেতি. সমুদ্দিসেতি আদরেন ৰদেয্য. আৰাসিকৰত্তং.

‘‘ৰত্ত’’ন্তি পন সামঞ্ঞেন নিদ্দিট্ঠত্তা ন থেরে ভিক্খূ অতিঅল্লীযিত্ৰা নিসীদিতব্বং, মহাথেরস্স নিসিন্নাসনতো একং দ্ৰে আসনানি ঠপেত্ৰা ‘‘নিসীদা’’তি ৰুত্তে নিসীদিতব্বং, ন নৰাপি ভিক্খূ আসনেন পটিবাহিতব্বা, ন সঙ্ঘাটিং ওত্থরিত্ৰা নিসীদিতব্বং, সদ্দং অকত্ৰা উদককিচ্চং কাতব্বং, যথা সূপস্স ওকাসো হোতি, এৰমত্তায ওদনো গণ্হিতব্বো, থেরেন ভিক্খুনা ‘‘ঠপেত্ৰা অপ্পকং ওদনাদিকং সব্বং সব্বেসং সমকং সম্পাদেহী’’তি ৰত্তব্বং, ন তাৰ থেরেন ভুঞ্জিতব্বং, ভুত্তাৰিনা ন তাৰ উদকং পটিগ্গহেতব্বং, ভত্তগ্গতো নিৰত্তন্তেহি যথানুরূপং নিক্খমিত্ৰা ৰিরল়ায পাল়িযা গন্তব্বন্তি এৰমাদিকঞ্চ তদনুরূপং সেখিযৰত্তঞ্চ সম্পাদেতব্বন্তি ইদং ভত্তগ্গৰত্তঞ্চ সাধুকং অতরমানেন গামো পৰিসিতব্বো, ‘‘ইমিনা পৰিসিস্সামি, ইমিনা নিক্খমিস্সামী’’তি নিৰেসনং পৰিসন্তেন সল্লক্খেতব্বং, নাতিসহসা পৰিসিতব্বং, নাতিসহসা নিক্খমিতব্বং, নাতিদূরে নচ্চাসন্নে ঠাতব্বং, নাতিচিরং ঠাতব্বং, নাতিলহুকং নিৰত্তিতব্বং, দাতুকামতাকারং ঞত্ৰা ঠাতব্বং, যো পঠমং গামতো পটিক্কমতি, তেন আসনপঞ্ঞপনাদি সব্বং কাতব্বং, যো পচ্ছা, তেন আসনুদ্ধরণাদি সব্বং কাতব্বন্তি এৰমাদিকঞ্চ তদনুরূপং সেখিযৰত্তঞ্চ সম্পাদেতব্বন্তি ইদং পিণ্ডচারিকৰত্তঞ্চ কাতব্বং.

সেনাসনট্ঠানে সব্বং ৰত্তঞ্চ সম্পাদেত্ৰা ততো নিক্খমিত্ৰা সাধুকং নিৰাসেত্ৰা পারুপিত্ৰা চ অতরমানেন গামো পৰিসিতব্বোতিআদি সব্বং পিণ্ডচারিকৰত্তং কাতব্বং. পানীযপরিভোজনীযঅগ্গিঅরণিসহিতকত্তরদণ্ডা উপট্ঠপেতব্বা, নক্খত্তপদানি সকলানি ৰা একদেসানি ৰা উগ্গহেতব্বানি, দিসাকুসলেন ভৰিতব্বন্তি ইদং আরঞ্ঞিকৰত্তঞ্চ উদ্দিট্ঠংযেৰ হোতীতি অৰগন্তব্বন্তি.

ৰত্তনিদ্দেসৰণ্ণনা নিট্ঠিতা.