১৪. ভূমিনিদ্দেসৰণ্ণনা

১৩৬. যাসু ৰুত্থং পক্কঞ্চ কপ্পতি, তা কপ্পিযা ভূমিযো সম্মুতি চ সম্মুতিকুটি চ…পে… গহপতি চ গহপতিকুটি চাতি ইমা চতস্সো হোন্তীতি যোজেত্ৰা অত্থো ৰেদিতব্বো. তত্থ ভেসজ্জক্খন্ধকে (মহাৰ. ২৯৫) ৰুত্তায উত্তিদুতিযকম্মৰাচায, অপলোকনকম্মৰসেন ৰা সাৰেত্ৰা সম্মা উত্তিসম্পন্নং করীযতীতি সম্মুতি, থম্ভানং ভিত্তিপাদানং ৰা উগ্গমনং উদ্ধং কত্ৰা ঠপনং, ‘‘কপ্পিযকুটিং করোমা’’তি ৰাচায সাৰনঞ্চ অন্তং যস্সা সা উস্সাৰনন্তা. তথা চ ৰুত্তং ‘‘থম্ভপ্পতিট্ঠানঞ্চ ৰচনপরিযোসানঞ্চ সমকালং ৰট্টতী’’তি (মহাৰ. অট্ঠ. ২৯৫). নিসাদনং পৰিসনং সন্নিৰেসনং নিসাদো, গুন্নং ৰিয নিসাদো এতিস্সাতি গোনিসাদি. ভিক্খুং ঠপেত্ৰা সেসসহধম্মিকা সব্বে চ দেৰমনুস্সা ইধ গহপতীতি সামঞ্ঞেন অধিপ্পেতা. এত্থ পন গহপতিসম্বন্ধিনী কুটি দীঘেন গহপতী.

‘‘যং পন অকপ্পিযভূমিযং সহসেয্যপ্পহোনকে গেহে ৰুত্থ’’ন্তি (মহাৰ. অট্ঠ. ২৯৫) অট্ঠকথাৰচনতো যং সঙ্ঘো আকঙ্খতি ৰিহারং ৰা অড্ঢযোগং ৰা পাসাদং ৰা হম্মিযং ৰা গুহং ৰা লেণাদিং ৰা, তেসম্পি সামঞ্ঞৰচনং ৰিঞ্ঞাযতীতি তংতংলক্খণপ্পত্তা সহসেয্যপ্পহোনকা লেণাদযো চতূস্ৰেৰ কুটীসু অন্তোগধাতি ৰেদিতব্বং. ইমাসু চতূসু সহসেয্যপ্পহোনকে পদেসে যং সঙ্ঘিকং পুগ্গলিকং ৰা ভিক্খুসন্তকং একরত্তম্পি অন্তোৰুত্থং অনুপসম্পন্নেন পক্কঞ্চ যাৰকালিকং যামকালিকঞ্চ অন্তোৰুত্থঅন্তোপক্কসঙ্খং ন গচ্ছতি, কো পন ৰাদো ইতরদ্ৰযে. তং পন অকপ্পিযভূমিযম্পি ৰুত্থং পক্কঞ্চ ৰট্টতি. তেন ৰুত্তং ‘‘যাসু ৰুত্থং পক্কঞ্চ কপ্পতী’’তি.

১৩৭. ৰাসত্থায কতে সঙ্ঘিকে ৰা একসন্তকে ৰা সহসেয্যপ্পহোনকে গেহে কপ্পিযাকুটি লদ্ধব্বাতি সম্বন্ধো. তত্থ ৰাসত্থাযাতি ইমিনা অৰাসত্থায কতং নিৰত্তেতি. একসন্তকেতি একস্স ভিক্খুনো সন্তকে. কপ্পিযাকুটীতি ভাৰপ্পধানোযং নিদ্দেসো, ন হি গেহে গেহং লদ্ধুং যুজ্জতীতি কপ্পিযকুটিতাতি অত্থো. দীঘো পন গাথাৰসেন, কপ্পিযা কুটিতাতি ৰা ৰিসেসনৰসেন দট্ঠব্বং. সহসেয্যপ্পহোনকেতি এত্থ সহসেয্যপ্পহোনকং ৰাসাগারলক্খণে ৰুত্তলক্খণং সেনাসনং.

১৩৮. ইদানি তা কুটিযো কমেন দস্সেত্ৰা তত্থ পটিপজ্জিতব্বৰিধিং, তাসং সব্বথাপগমঞ্চ দস্সেতুং ‘‘গেহে’’তিআদিমাহ. তত্থ ‘‘কপ্পিযকুটিং করোম, কপ্পিযকুটিং করোমা’’তি এৰমীরযন্তি সম্বন্ধো. ইট্ঠকা চ থম্ভা চ ‘‘ইট্ঠকাথম্ভা’’তি ৰত্তব্বে রস্সো. ইট্ঠকথম্ভা আদি যস্স ভিত্তিপাসাদস্সাতি বহুব্বীহি. পচ্ছা পঠমসদ্দেন কম্মধারযো. ‘‘ঠপেয্য চে, সা উস্সাৰনন্তিকা’’তি এৰং চে-সা-সদ্দে যোজেত্ৰা অত্থো ৰেদিতব্বো.

১৩৯. সকলো অপরিক্খিত্তো আরামোপি ৰাতি সম্বন্ধো. সেনাসনং পরিক্খিত্তং ৰা হোতু, অপরিক্খিত্তং ৰা, ন তং পমাণং.

১৪০. অঞ্ঞেহি কপ্পিযকুটিযা অত্থায দিন্নো ৰা তেসং সন্তকো ৰাতি যোজনা.

১৪১. অৰিরোধভাৰেন কপ্পনীযা কপ্পা, কপ্প সামত্থিযমিচ্চেতস্মা ইত্থিযং আপচ্চযে রূপং, ন কপ্পা অকপ্পা, অকপ্পা চ সা কুটি চেতি অকপ্পকুটি, তায. সপ্পিআদীতি ইমিনা সত্তাহকালিকং যাৰজীৰিকঞ্চ গহিতং.

১৪২. তেহেৰাতি অকপ্পকুটিযং ৰুত্থসপ্পিআদীহি এৰ সদ্ধিং সত্তাহকালিকসংসট্ঠতায ‘‘সত্তাহং কপ্পতে’’তি ৰুত্তং. সামিসেতি আমিসসঙ্খাতেন পুরিমদ্ৰযেন সহিতে. সামপাকতাতি সামং অত্তনা পাকো এতস্সাতি সামপাকং, সত্তাহকালিকেন সহ পক্কং সামিসং যাৰজীৰিকং, তস্স ভাৰো সামপাকতা. সযং পক্কং তং অত্তনা সংসট্ঠতায তম্পি আমিসং সামপাকগতিকং করোতীতি তস্স সামপাকতা হোতীতি অধিপ্পাযো.

১৪৩. অধিট্ঠিতাতি পতিট্ঠিতা. এৰ-সদ্দো তিট্ঠতিসদ্দস্স অন্তে দট্ঠব্বো.

১৪৪. সব্বেসূতি থম্ভাদীসু সকলেসু. জহিতং ৰত্থু কুটিভূমি যস্সা জহিতৰত্থুকা. পরিক্খিত্তে জহিতৰত্থুকাতি সম্বন্ধো. সেসাতি ইতরা দ্ৰে কুটিযো. ছদনৰিব্ভমাতি ছদনস্স ৰিনাসা. এত্থাপি ‘‘জহিতৰত্থুকা’’তি আনেতব্বন্তি.

ভূমিনিদ্দেসৰণ্ণনা নিট্ঠিতা.