৪৬. সংৰরনিদ্দেসৰণ্ণনা

৪৫৩. চক্খুসোতাদিভেদেহীতি (দী. নি. ১.২১৩, ৪৫৪; ম. নি. ১.৪১১; অ. নি. ৪.১৯৮; ধ. স. ১৩৫২-১৩৫৪; মহানি. ১৯৬) চক্খুসোতঘানজিৰ্হাকাযমনসঙ্খাতেহি ছহি ইন্দ্রিযেহীতি অত্থো. রূপসদ্দাদিগোচরেতি রূপসদ্দগন্ধরসফোট্ঠব্বধম্মসঙ্খাতেসু ছসু গোচরেসূতি অত্থো. এত্থ পন হত্থপাদহসিতকথিতৰিলোকিতাদিভেদং সুভাকারং গহেত্ৰা অযোনিসো মনসি করোন্তস্স অভিজ্ঝা উপ্পজ্জতি. ‘‘অনত্থং মে অচরি, চরতি, চরিস্সতী’’তিআদিনা (পরি. অট্ঠ. ৩২৯) নযেন পটিঘনিমিত্তং গহেত্ৰা অযোনিসো মনসি করোন্তস্স ব্যাপাদো উপ্পজ্জতি. এত্থ পন ইত্থিপুরিসনিমিত্তং ৰা সুভনিমিত্তাদিকং কিলেসৰত্থুভূতং নিমিত্তং অগ্গণ্হিত্ৰা দিট্ঠে দিট্ঠমত্তাদিনা পটিপজ্জিত্ৰা অসুভনিমিত্তে যোনিসো মনসিকারং বহুলীকরোন্তস্স অভিজ্ঝায পহানং হোতি. ‘‘অনত্থং মে অচরি, তং কুতেত্থ লব্ভা’’তিআদিনা ৰা মেত্তাভাৰনাদিৰসেন ৰা যোনিসো মনসি করোন্তস্স ব্যাপাদপ্পহানং হোতি. এৰমিদং সঙ্খেপতো রূপাদীসু কিলেসানুবন্ধনিমিত্তাদিগ্গাহপরিৰজ্জনলক্খণং ইন্দ্রিযসংৰরসীলন্তি ৰেদিতব্বং.

৪৫৪. নিগ্গণ্হেয্যাতি নিৰারেয্য;

‘‘যানি সোতানি লোকস্মিং; (অজিতাতি ভগৰা,)

সতি তেসং নিৰারণং;

সোতানং সংৰরং ব্রূমি;

পঞ্ঞাযেতে পিধিয্যরে’’তি –. (সু. নি. ১০৪১);

ৰুত্তত্তা ‘‘সতিমা সম্পজানো ৰা’’তি ৰুত্তং. এত্থ পন চতুব্বিধং সম্পজঞ্ঞং সাত্থকসপ্পাযগোচরঅসম্মোহৰসেন. সংৰরৰিনিচ্ছযো.

সংৰরনিদ্দেসৰণ্ণনা নিট্ঠিতা.