৪৭. সুদ্ধিনিদ্দেসৰণ্ণনা

৪৫৫. দেসনা সংৰরো এট্ঠি, পচ্চৰেক্খণ ভেদতোতি (পারা. অট্ঠ. ২.৫৮৫; ৰিসুদ্ধি. ১.১৯) দেসনাসুদ্ধি সংৰরসুদ্ধি পরিযেট্ঠিসুদ্ধি পচ্চৰেক্খণসুদ্ধীতি এৰং চতুব্বিধা সুদ্ধীতি অত্থো. ইদানি তাহি সুদ্ধীহি ৰিসুজ্ঝনকে দস্সেতুং ‘‘পাতিমোক্খসংৰরসম্মত’’ন্তিআদিমাহ.

৪৫৬. ‘‘পুন এৰং ন করিস্স’’ন্তি চিত্তাধিট্ঠানসংৰরা যস্মা সুজ্ঝতি ইন্দ্রিযসংৰরো, তস্মা ইন্দ্রিযসংৰরো ‘‘সংৰরসুদ্ধী’’তি ৰুত্তোতি সম্বন্ধো.

৪৫৭. পহাযানেসনন্তি অনেসনং পহায ধম্মেন উপ্পাদেন্তস্স পচ্চযেতি পাঠসেসো.

৪৫৮. ‘‘পটিসঙ্খা যোনিসো চীৰরং পটিসেৰামি…পে… উপ্পন্নানং ৰেয্যাবাধিকানং…পে… পরমতাযা’’তি (ম. নি. ১.২৩; অ. নি. ৬.৫৮) চ এৰং চতূসুপি পচ্চযেসু যথাৰুত্তপচ্চৰেক্খণসুজ্ঝনাতি অত্থো. এত্থ পন দুৰিধং পচ্চৰেক্খণং পটিলাভকালে চ পরিভোগকালে চ. পটিলাভকালে হি ধাতুৰসেন ৰা পটিক্কূলৰসেন ৰা পচ্চৰেক্খিত্ৰা ঠপিতচীৰরাদীনি ততো উত্তরি পরিভুঞ্জন্তস্স অনৰজ্জোৰ পরিভোগো, পরিভোগকালেপি. সুদ্ধিৰিনিচ্ছযো.

সুদ্ধিনিদ্দেসৰণ্ণনা নিট্ঠিতা.