৩৬. ভেসজ্জনিদ্দেসৰণ্ণনা

২৭৪-৫. সহধম্মিনং লব্ভং ভেসজ্জকরণন্তি সম্বন্ধো. ন কেৰলং পঞ্চন্নং সহধম্মিকানংযেৰ ভিক্খাচরিযৰিঞ্ঞত্তিসকেহি ভেসজ্জকরণং লব্ভতি, অথ খো অপরেসম্পি পঞ্চন্নং লব্ভতি, তে দস্সেন্তো ‘‘পিতূন’’ন্তিআদিমাহ. পিতূনন্তি মাতাপিতূনন্তি অত্থো. যে মাতাপিতরো জগ্গন্তি উপট্ঠহন্তি, তে তদুপট্ঠাকা নাম. ভিক্খুং এৰ নিস্সায জীৰন্তো ভিক্খুনিস্সিতকো নাম. পব্বজ্জাপেক্খো ‘‘ভণ্ডূ’’তি ৰুচ্চতি.

২৭৬. অপরেসম্পি দসন্নং কাতুং ৰট্টতি, তে দস্সেতুং ‘‘মহাচূল়পিতা’’তিআদিমাহ. এত্থ (পারা. অট্ঠ. ২.১৮৫-১৮৭) পন মহাপিতা চূল়পিতা মহামাতা চূল়মাতা মহাভাতা চূল়ভাতা মহাভগিনী চূল়ভগিনীতি ইমেহি অট্ঠহি আদি-সদ্দেন পিতুভগিনিঞ্চ মাতুভাতিকঞ্চ গহেত্ৰা দস. এতেসং পন সকেন ভেসজ্জেন কাতব্বং. অত্তনিযে চ অসতীতি পাঠসেসো.

২৭৭. ন কেৰলঞ্চ এতেসং দসন্নং, ইমেহি সম্বন্ধানং পুত্তনত্তাদীনং যাৰসত্তমা কুলপরিৰট্টা কাতুং ৰট্টতীতি দস্সনত্থং ‘‘কুলদূসনা’’তিআদিমাহ. অঞ্ঞোপি (পারা. অট্ঠ. ২.২৮৫-২৮৭) যো আগন্তুকো ৰা চোরো ৰা যুদ্ধপরাজিতো ৰা ইস্সরো ঞাতকেহি পরিচ্চত্তো ৰা গমিযমনুস্সো ৰা গিলানো হুত্ৰা ৰিহারং পৰিসতি, সব্বেসম্পি অপচ্চাসীসন্তেন ভেসজ্জং কাতব্বং.

২৭৮. মাতা (পারা. অট্ঠ. ২.১৮৫-১৮৭) পিতা তদুপট্ঠাকো ভিক্খুনিস্সিতকো পণ্ডুপলাসো ৰেয্যাৰচ্চকরোতি ইমেসং ছন্নং অনামট্ঠপিণ্ডপাতো অৰারিতোতি অত্থো. কিঞ্চ ভিয্যো – দামরিকচোরস্স চ ইস্সরিযস্স চ দাতুমৰারিতোতি অত্থো.

২৭৯. তেসন্তি (পারা. অট্ঠ. ২.১৮৫-১৮৭) গহট্ঠানং. সাসনোগধন্তি রতনপরিত্তআটানাটিযপরিত্তাদিপরিত্তং ভণিতব্বন্তি অত্থো.

২৮০. ‘‘আগন্ত্ৰা (পারা. অট্ঠ. ২.১৮৫-১৮৭) সীলং দেতু, ধম্মঞ্চ পরিত্তঞ্চ ভাসতূ’’তি কেনচি পেসিতোতি সম্বন্ধো. দাতুং ৰত্তুন্তি সীলং দাতুং, ধম্মঞ্চ পরিত্তঞ্চ ৰত্তুং লব্ভতীতি অত্থো. ভেসজ্জৰিনিচ্ছযো.

ভেসজ্জনিদ্দেসৰণ্ণনা নিট্ঠিতা.