৩৭. উগ্গহনিদ্দেসৰণ্ণনা

২৮১. দসভেদম্পীতি সচে কেনচি হেট্ঠা দস্সিতং দসৰিধং রতনং আনেত্ৰা ‘‘ইদং সঙ্ঘস্স ৰা চেতিযস্স ৰা নৰকম্মস্স ৰা অঞ্ঞপুগ্গলস্স ৰা সুত্তন্তিকগণস্স ৰা দম্মী’’তি ৰুত্তে ‘‘সাধূ’’তি সম্পটিচ্ছন্তস্স দুক্কটং হোতীতি অত্থো.

২৮২-৩. তেসু দসৰিধেসু রতনেসূতি অত্থো. দ্ৰীসূতি রজতজাতরূপেসু. গণসঙ্ঘপুগ্গলে (পারা. অট্ঠ. ২.৫৩৮-৫৩৯) অনামসিত্ৰা ‘‘ইদং হিরঞ্ঞসুৰণ্ণং চেতিযস্স দম্মি, নৰকম্মস্স দম্মী’’তি ৰুত্তে ন পটিক্খিপেতি অত্থো. কিং কাতব্বন্তি চে? তং দস্সেতুং ‘‘ৰদে’’তিআদি ৰুত্তং. ‘‘ইমে এৰং ৰদন্তী’’তি কপ্পিযকারানং আচিক্খিতব্বন্তি অত্থো.

২৮৪. ন কেৰলং হিরঞ্ঞসুৰণ্ণাদিকমেৰ, অঞ্ঞম্পি খেত্তৰত্থাদিকং অকপ্পিযং ন সম্পটিচ্ছিতব্বন্তি তং দস্সেতুং ‘‘খেত্তং ৰত্থু’’ন্তিআদিমাহ. দাসপসুআদিকং দাসপস্ৰাদিকং. সচে হি কোচি ‘‘ময্হং সস্সসম্পাদকং মহাতল়াকং অত্থি, তং সঙ্ঘস্স দম্মী’’তি ৰদতি, তঞ্চে সঙ্ঘো সম্পটিচ্ছতি. পটিগ্গহণেপি পরিভোগেপি আপত্তিযেৰ. এৰং সেসেসুপি.

কপ্পিযেন কমেন গণ্হেয্যাতি সম্বন্ধো. ‘‘খেত্তং দম্মী’’তি ৰুত্তে ‘‘ন ৰট্টতী’’তি পটিক্খিপিত্ৰা ‘‘ইতো চত্তারো পচ্চযে পরিভুঞ্জথা’’তি ৰা ‘‘চতুপচ্চযপরিভোগত্থায দম্মী’’তি ৰা ৰদতি চে, গহেতব্বং. ৰত্থুম্হিপি এসেৰ নযো. ‘‘তল়াকং দম্মী’’তি ৰুত্তে পটিক্খিপিত্ৰা ‘‘চত্তারো পচ্চযে পরিভুঞ্জথা’’তি ৰা ‘‘সঙ্ঘো উদকং পরিভুঞ্জিস্সতি, ভণ্ডকং ধোৰিস্সতী’’তি ৰা আদিনা নযেন ৰুত্তে সম্পটিচ্ছিতব্বং. ‘‘দাসং দম্মী’’তি ৰুত্তে পটিক্খিপিত্ৰা ‘‘আরামিকং, ৰেয্যাৰচ্চকরং, কপ্পিযকারকং দম্মী’’তি ৰুত্তে সম্পটিচ্ছিতব্বং. ‘‘গোমহিংসঅজেল়কাদযো দম্মী’’তি ৰুত্তে পটিক্খিপিত্ৰা ‘‘পঞ্চগোরসপরিভোগত্থাযা’’তি ৰুত্তে সম্পটিচ্ছিতব্বং. এদিসং গহণং সন্ধায ‘‘পটিক্খিপিত্ৰা গণ্হেয্যা’’তি ৰুত্তং.

২৮৫-৬. নৰমাতিককেদারতল়াককিরিযা (পারা. অট্ঠ. ২.২৩৮-২৩৯) চ অনৰে পুব্বে কপ্পিযৰোহারেন পটিক্খিপিত্ৰা গহিততল়াকে মত্তিকুদ্ধরণঞ্চ ভিন্নট্ঠানে পাল়িবন্ধো চ দুব্বলট্ঠানে আল়িযা থিরকারো চ অনৰে কেদারে পুরাণভাগতো অতিরেকভাগগ্গহণঞ্চ নৰে কেদারে অপরিচ্ছিন্নভাগে ‘‘সস্সে দেথ এত্তকে’’তি কহাপণুট্ঠাপনঞ্চাপীতি ইদং সব্বং ভিক্খুস্স কাতুং ন ৰট্টতি. সচে করোতি, এৰমাদিকং সব্বেসম্পি অকপ্পিযন্তি অত্থো.

২৮৭-৯. ইদানি তংযেৰ অকপ্পিযং দস্সেতুং ‘‘অৰত্ৰা’’তিআদি ৰুত্তং. তস্সত্থো (পারা. অট্ঠ. ২.২৩৮-২৩৯) – যো পন ‘‘কস, ৰপ্প’’ ইচ্চাদিকং অৰত্ৰা ‘‘এত্তিকায ভূমিযা এত্তকো ভাগো দেয্যো’’তি ভূমিং ৰা পতিট্ঠাপেতি, ‘‘এত্তকে ভূমিভাগে সস্সং কতং, এত্তকং গণ্হথা’’তি কস্সকে ৰদন্তে পমাণগণ্হনত্থং দণ্ডরজ্জুভি মিনতি, খলে ঠত্ৰা রক্খণাদীনি করোতি, তস্সেৰ অকপ্পিযন্তি.

২৯০. ভণ্ডাগারিকসীসেন পিতুসন্তকম্পি সচে পটিসামেয্য, পাচিত্তিযন্তি অত্থো.

২৯১-২. পিতূনন্তি মাতাপিতূনং. সাটকাদিকপ্পিযং ৰত্থুং. ‘‘পটিসামেত্ৰা দেহী’’তি ৰুত্তেতি সম্বন্ধো. পাতেত্ৰান গতে যস্মা অজ্ঝারামসিক্খাপদৰসেন (পাচি. ৫০৫-৫০৬) পলিবোধো, তস্মা গোপিতুং লব্ভন্তি অত্থো.

২৯৩-৪. সকং ৰাসিআদিপরিক্খারন্তি অত্থো. ইদং ঠানং গুত্তন্তি দস্সেতব্বং. ‘‘এত্থ ঠপেথা’’তি পন ন ৰত্তব্বং.

২৯৫. এত্থ ‘‘অঞ্ঞো কোচি ন পৰিসতি, ভিক্খূহি ৰা সামণেরেহি ৰা গহিতং ভৰিস্সতী’’তি সঙ্কন্তীতি অত্থো. ৰত্থুম্হীতি অলঙ্কারাদিৰত্থুম্হীতি অত্থো. তাদিসেতি যাদিসে ৰত্থুম্হি নট্ঠে আসঙ্কা হোতি, তাদিসে ৰত্থুম্হি নট্ঠেতি সম্বন্ধো.

২৯৬. ইদানি অসঙ্কিতব্বট্ঠানং দস্সেতুং ‘‘ৰিহারাৰসথস্সন্তো’’তিআদিমাহ. ৰিহারস্স চ ঘরস্স চাতি অত্থো. রতনন্তি দসৰিধং রতনং. রত্নসম্মতন্তি সাটকৰেঠনাদিকং. গহেত্ৰানাতি কপ্পিযকারকে অসতি অত্তনাপি গহেত্ৰান নিক্খিপেয্যাতি অত্থো. মগ্গেরঞ্ঞেপীতি মগ্গেপি অরঞ্ঞেপি. তাদিসেতি ‘‘ভিক্খূহি গহিতং ভৰিস্সতী’’তি আসঙ্কিতব্বট্ঠানে. পতিরূপং করীযতীতি মগ্গে ৰা অরঞ্ঞে ৰা তাদিসং ভণ্ডং পস্সিত্ৰা মগ্গা ওক্কম্ম নিসীদিতব্বং, সামিকেসু আগতেসু তং ঠানং আচিক্খিতব্বং. সচে সামিকে ন পস্সতি, রতনসম্মতং পংসুকূলং গহেতব্বং. রতনঞ্চে হোতি, তুণ্হীভূতেন গন্তব্বন্তি অত্থো. অযং মগ্গারঞ্ঞকেসু পটিপত্তি. ৰিহারাৰসথানং পন অন্তো তাদিসং দিস্ৰা ভণ্ডকং মুঞ্চিত্ৰা ‘‘এত্থ এত্তকা কহাপণা’’তিআদিনা নযেন রূপেন ৰা লঞ্ছনায ৰা পিলোতিকায ৰা সঞ্ঞাণং কত্ৰা নিক্খিপিতব্বং, ততো পক্কমন্তেন পতিরূপানং ভিক্খূনং আচিক্খিতব্বং. উগ্গহৰিনিচ্ছযো.

উগ্গহনিদ্দেসৰণ্ণনা নিট্ঠিতা.