২৫. অকপ্পিযসযননিদ্দেসৰণ্ণনা

১৮৭-৯. ‘‘উচ্চকো আসন্দিকো উপ্পন্নো হোতি, অনুজানামি ভিক্খৰে উচ্চকম্পি আসন্দিক’’ন্তি (চূল়ৰ. ২৯৭) ৰচনতো মঞ্চস্স উপড্ঢভাগপ্পমাণেন একতোভাগেন দীঘম্পি সুগতঙ্গুলেন অতিরেকট্ঠঙ্গুলপাদকং ইধ আসন্দীতি অধিপ্পেতং, চতুরংসাসন্দিকো পন পমাণাতিক্কন্তকোপি ৰট্টতি. তূলীতি পকতিতূলিকা. পল্লঙ্কোনাম আহরিমেহি ৰাল়েহি কতোতি ৰুত্তো. তত্থেৰ ‘‘সীহরূপাদিং দস্সেত্ৰা কতো পন ৰট্টতী’’তি ৰদন্তি. পটিকন্তি সেতত্থরণং. গোনচিত্তকন্তি এত্থ চতুরঙ্গুলাধিকলোমো কোজৰো ‘‘গোনকো’’তি ৰুচ্চতি. ‘‘অনুজানামি, ভিক্খৰে, কোজৰ’’ন্তি (মহাৰ. ৩৩৭) চীৰরক্খন্ধকে ৰুত্তত্তা চতুরঙ্গুললোমকং পকতিকোজৰং ৰট্টতি. রতনচিত্তং চিত্তকং ন ৰট্টতি. পটলীতি ঘনপুপ্ফরত্তঅত্থরণং. ৰিকতীতি সীহব্যগ্ঘাদিরূপৰিচিত্তো উণ্ণামযত্থরণকো. উদ্দলোমীতি একতোউগ্গতপুপ্ফং. একন্তলোমিকাতি উভতোউগ্গতপুপ্ফং.

কুত্তন্তি সোল়সন্নং নাটকিত্থীনং ঠত্ৰা নচ্চনযোগ্গং উণ্ণামযত্থরণং. কোসেয্যন্তি রতনপরিসিব্বিতং কোসেয্যসুত্তমযং পচ্চত্থরণং. কট্টিস্সন্তি রতনপরিসিব্বিতং কোসেয্যকট্টিস্সমযং পচ্চত্থরণং. কোসেয্যঞ্চ কট্টিস্সঞ্চ রতনপরিসিব্বিতানেৰ ন ৰট্টন্তি, সুদ্ধানি ৰট্টন্তি. হত্থিঅস্সরথত্থরা তেসং উপরি অত্থরণকঅত্থরণাৰ. অজিনপ্পৰেণীতি অজিনচম্মেহি মঞ্চপ্পমাণেন সিব্বিত্ৰা কতা পৰেণী, তেন চ কদলীমিগচম্মং সেতৰত্থস্স উপরি পত্থরিত্ৰা সিব্বিত্ৰা কতং পৰরপ্পচ্চত্থরণং কদলীমিগপ্পৰরপ্পচ্চত্থরণং, তেন চ অত্থতং অজিনপ্পৰেণীকদলীমিগপ্পৰরপ্পচ্চত্থরণত্থতং.

সেতৰিতানম্পি হেট্ঠা অকপ্পিযপ্পচ্চত্থরণে সতি ন ৰট্টতি, কপ্পিযপ্পচ্চত্থরণে সতি ৰট্টতি, রত্তৰিতানস্স হেট্ঠা কপ্পিযপ্পচ্চত্থরণে সতিপি ন ৰট্টতি এৰ. সীসূপধানং পাদূপধানন্তি মঞ্চস্স উভতোলোহিতকং উপধানং ন ৰট্টতি. যং পন একমেৰ উপধানং হোতি, উভোসু অন্তেসু রত্তং ৰা পদুমৰণ্ণং ৰা চিত্তং ৰা, সচে পমাণযুত্তং, ৰট্টতি, মহাউপধানং পন পটিক্খিত্তং.

১৯০. আসন্দাদিত্তযাতি আসন্দী তূলী পল্লঙ্কোতি ইদং তযং নামং. ‘‘অনুজানামি, ভিক্খৰে, ঠপেত্ৰা তীণি আসন্দিং পল্লঙ্কং তূলিকং সেসকং গিহিৰিকটং অভিনিসীদিতুং, ন ত্ৰেৰ অভিনিপজ্জিতু’’ন্তি (চূল়ৰ. ৩১৪) হি ৰুত্তং. সেসে গিহিসন্তকে নিসীদিতুং লব্ভতীতি অত্থো. যদি ধম্মাসনে সঙ্ঘিকম্পি গোনকাদিং ভিক্খূহি অনাণত্তা আরামিকাদযো সযমেৰ পঞ্ঞপেন্তি চেৰ নীহরন্তি চ, এতং গিহিৰিকটনীহারং নাম, ইমিনা গিহিৰিকটনীহারেন ৰট্টতি. ভত্তগ্গং নাম ৰিহারে এৰ দানট্ঠানং.

১৯১. চতুন্নং পাদানং, তীসু পস্সেসু অপস্সযানঞ্চ ৰসেন সত্তঙ্গো. একপস্সেন যুত্তো পঞ্চঙ্গো. ইমে পন সত্তঙ্গপঞ্চঙ্গা ‘‘অনুজানামি, ভিক্খৰে, উচ্চকম্পি সত্তঙ্গ’’ন্তি (চূল়ৰ. ২৯৪) ৰুত্তত্তা পমাণাতিক্কন্তাপি ৰট্টন্তি. তেন ৰুত্তং ‘‘উচ্চপাদকা’’তি. তূলোনদ্ধা মঞ্চপীঠা ঘরেযেৰ নিসীদিতুং কপ্পন্তীতি সম্বন্ধো.

১৯২. চীৰরচ্ছৰিযোতি ছন্নং চীৰরানং, ছন্নং অনুলোমচীৰরানঞ্চ অঞ্ঞতরচীৰরচ্ছৰিযোতি অত্থো. সব্বত্থাতি মঞ্চেপি পীঠেপি ভত্তগ্গেপি অন্তরঘরেপীতি অত্থো. ইমাসং পন ভিসীনং পমাণপরিচ্ছেদোপি নত্থি, মঞ্চপীঠাদীনং ৰসেন অনুরূপং সল্লক্খেত্ৰা পমাণং কাতব্বং.

১৯৩. ‘‘তূলিকা উপ্পন্না হোতি. অনুজানামি, ভিক্খৰে, ৰিজটেত্ৰা বিম্বোহনং কাতুং, তীণি তূলানি রুক্খতূলং লতাতূলং পোটকিতূল’’ন্তি (চূল়ৰ. ২৯৭) ৰুত্তত্তা তূলত্তযঞ্চ (চূল়ৰ. অট্ঠ. ২৯৭; কঙ্খা. অট্ঠ. তূলোনন্দসিক্খাপদৰণ্ণনা) বিম্বোহনে ৰট্টতি. ইমেহি তীহি তূলেহি সব্বেসং রুক্খলতাতিণানং তূলং অনুঞ্ঞাতন্তি ৰেদিতব্বং. ভিসিযং পন কিঞ্চি তূলং ন ৰট্টতিযেৰ. ভিসিগব্ভোতি ভিসিযা ৰুত্তং চোল়াদিপঞ্চকং বিম্বোহনে অনুঞ্ঞাতন্তি সম্বন্ধো. মিগপক্খিনন্তি সীহাদীনং সব্বচতুপ্পদানং হংসমোরাদীনং সব্বপক্খীনং লোমানি কপ্পন্তি. মসূরকে অনুঞ্ঞাতন্তি সম্বন্ধো.

১৯৪. ইদানি ভিসিযং কপ্পিযাকপ্পিযং দস্সেতুং ‘‘মনুস্সলোম’’ন্তিআদিমাহ. উণ্ণাযন্তি (চূল়ৰ. ২৯৭; চূল়ৰ. অট্ঠ. ২৯৭) উণ্ণাভিসিযং মনুস্সলোমং ন লব্ভতীতি অত্থো. উণ্ণাভিসিযম্পি মনুস্সলোমং ঠপেত্ৰা যেসং কেসঞ্চি পক্খিচতুপ্পদানং লোমং ৰট্টতীতি অত্থো. পণ্ণেতি পণ্ণভিসিযঞ্চ পুপ্ফঞ্চ সুদ্ধং তমালপত্তঞ্চ ন লব্ভং, অৰসেসং যং কিঞ্চি পণ্ণং লব্ভতীতি অত্থো. তমালপত্তকম্পি অঞ্ঞেহি মিস্সং ৰট্টতীতি. চোল়ৰাকতিণেসু অকপ্পিযং নাম নত্থি. আসনঞ্চেৰ অপ্পটিৰেক্খিতং ন লব্ভন্তি আসনসামঞ্ঞতো পসঙ্গেন ৰুত্তং. অকপ্পিযসযনৰিনিচ্ছযো.

অকপ্পিযসযননিদ্দেসৰণ্ণনা নিট্ঠিতা.