২৬. সমানাসনিকনিদ্দেসৰণ্ণনা

১৯৫. তিণ্ণং ৰস্সানং অন্তরং তিৰস্সন্তরং. ‘‘অনুজানামি, ভিক্খৰে, তিৰস্সন্তরেন সহ নিসীদিতু’’ন্তি (চূল়ৰ. ৩২০) হি ৰুত্তং. যো দ্ৰীহি ৰস্সেহি (চূল়ৰ. অট্ঠ. ৩২০) ৰুড্ঢো ৰা নৰো ৰা, সো তিৰস্সন্তরো নাম.

১৯৬. মুনীতি বুদ্ধমুনি. সব্বেহেৰাতি অনুপসম্পন্নেহিপি.

১৯৭. অন্তন্তি পচ্ছিমং. ‘‘অনুজানামি, ভিক্খৰে, যং তিণ্ণং পহোতি, এত্তকং পচ্ছিমং দীঘাসন’’ন্তি (চূল়ৰ. ৩২০) ৰুত্তত্তা যং তিণ্ণং পহোতি, এতং সংহারিমং ৰা হোতু অসংহারিমং ৰা, তথারূপেসু ফলকখণ্ডেসুপি নিসীদিতুং ৰট্টতি. দ্ৰিন্নন্তি দ্ৰিন্নং সমানাসনিকানং. ‘‘অনুজানামি, ভিক্খৰে, দুৰগ্গস্স মঞ্চং দুৰগ্গস্স পীঠ’’ন্তি (চুল়ৰ. ৩২০) ৰুত্তত্তা দ্ৰে সমানাসনিকা সহ নিসীদিতুং লভন্তি. অঞ্ঞেহি অসমানাসনিকেহি, অনুপসম্পন্নাদীহি ৰা দ্ৰে হুত্ৰাপি নিসীদিতুং ন লভন্তি. সমানাসনিকৰিনিচ্ছযো.

সমানাসনিকনিদ্দেসৰণ্ণনা নিট্ঠিতা.