১২. পাচিত্তিযনিদ্দেসৰণ্ণনা

১২১. ইদানি পাচিত্তিযানি দস্সেতুং ‘‘পাচিত্তী’’তি মাতিকাপদং উদ্ধরিত্ৰা ‘‘মুসাৰাদোমসাৰাদে, পেসুঞ্ঞহরণে’’তিআদি ৰুত্তং. তত্থ মুসাৰাদে চ ওমসৰাদে চ পেসুঞ্ঞহরণে চ পাচিত্তি ৰুত্তাতি সম্বন্ধো. এৰং সেসেসুপি. এত্থ পন ‘‘অদিট্ঠং, অসুতং, অমুতং, অৰিঞ্ঞাতং, দিট্ঠং, সুতং, মুতং, ৰিঞ্ঞাত’’ন্তি (পাচি. ৩; পাচি. অট্ঠ. ৩) পুব্বেপি ‘‘মুসা ভণিস্সামী’’তি চেতেত্ৰা ৰচনক্খণেৰ ‘‘মুসা ভণামী’’তি জানিত্ৰা জানন্তস্সেৰ মুসাভণনে পাচিত্তি নাম আপত্তি হোতীতি অত্থো. যস্স ভণতি, সো তং ন সুণাতি, আপত্তি ন হোতি (কঙ্খা. অট্ঠ. মুসাৰাদসিক্খাপদৰণ্ণনা).

‘‘ওমসৰাদো নাম দসহি আকারেহি ওমসতি জাতিযাপি নামেনপি গোত্তেনপি কম্মেনপি সিপ্পেনপি আবাধেনপি লিঙ্গেনপি কিলেসেনপি আপত্তিযাপি অক্কোসেনপী’’তি (পাচি. ১৫) এৰং ৰুত্তেহি দসহি আকারেহি উপসম্পন্নং যো খুংসেতি ৰম্ভেতি, অযং ওমসতি নাম, তস্স পাচিত্তীতি অত্থো. পরম্মুখা ভণন্তস্স দুক্কটং, তথা পাল়িযং অনাগতেহি ‘‘চোরো’’তি ৰা ‘‘গণ্ঠিভেদকো’’তি ৰা আদীহি ভণন্তস্স. ‘‘সন্তি ইধেকচ্চে খত্তিযা ব্রাহ্মণা চণ্ডালা’’তিআদিনা পরিযাযেন ভণন্তস্স চ অনুপসম্পন্নং ভণন্তস্স চ সব্বত্থপি দুক্কটমেৰ.

পিযকম্যতায ৰা ভেদাধিপ্পাযেন ৰা উপসম্পন্নং জাতিআদীহি ওমসন্তস্স উপসম্পন্নস্স ৰচনং সুত্ৰা তস্স উপসংহরণং পেসুঞ্ঞহরণং নাম. এত্থাপি পরিযাযৰচনেন চ অনুপসম্পন্নস্স উপসংহরণেন চ দুক্কটমেৰ.

পদসোধম্মোতি এত্থ ‘‘ধম্মো নাম বুদ্ধভাসিতো সাৰকভাসিতো ইসিভাসিতো দেৰতাভাসিতো অত্থূপসংহিতো ধম্মূপসংহিতো’’তি (পাচি. ৪৬) এৰং ৰুত্তং সঙ্গীতিত্তযমারুল়্হং তিপিটকধম্মং পদঅনুপদঅন্ৰক্খরঅনুব্যঞ্জনৰসেন ভিক্খুঞ্চ ভিক্খুনিঞ্চ ঠপেত্ৰা অনুপসম্পন্নং একতো ৰাচেন্তস্স পাচিত্তি হোতীতি অত্থো.

সাগারেতি যং পন সব্বন্তিমেন পরিযাযেন দিযড্ঢহত্থুব্বেধেন পাকারাদিনা পরিক্খিত্তত্তা সব্বপরিচ্ছিন্নঞ্চ যেন কেনচি ৰিতানাদিনা অন্তমসো ৰত্থেনপি ছন্নত্তা সব্বচ্ছন্নঞ্চ সেনাসনং, তথারূপে সেনাসনে একূপচারট্ঠানে অনুপসম্পন্নেন সহ ৰসন্তস্স চতুত্থদিৰসতো পট্ঠায নিপজ্জনগণনায চ অনুপসম্পন্নগণনায চ দেৰসিকং পাচিত্তি হোতীতি অত্থো.

উজ্ঝাপনকখিয্যনেতি এত্থ যো উপসম্পন্নং সঙ্ঘেন সম্মতং সেনাসনপঞ্ঞাপকং ৰা ভত্তুদ্দেসকং ৰা যাগুভাজকং ৰা ফলভাজকং ৰা খজ্জভাজকং ৰা অপ্পমত্তকৰিস্সজ্জকং ৰা মঙ্কুকত্তুকামো ছন্দেন ‘‘ইত্থন্নামো সেনাসনং পঞ্ঞাপেতি, ভত্তানি চ উদ্দিসতী’’তি ৰা ৰদন্তো অঞ্ঞং উপসম্পন্নং উজ্ঝাপেতি তেন অৰজানাপেতি, যো পন তথেৰ ৰদন্তো উপসম্পন্নস্স সন্তিকে তস্স অযসং পকাসেন্তো খীযতি, তস্মিং উজ্ঝাপনকে চ খীযনকে চ পাচিত্তিদ্ৰযন্তি ৰেদিতব্বং.

১২২. তলসত্তিঅনাদর-কুক্কুচ্চুপ্পাদনেসু চাতি এত্থ যো ভিক্খু উপসম্পন্নস্স পহরণাকারং দস্সেন্তো কাযং ৰা কাযপ্পটিবদ্ধং ৰা উচ্চারেতি, তস্স পাচিত্তিযং. সচে ৰিরদ্ধো পহারং দেতি, অপ্পহরিতুকামতায দুক্কটং, তথা অনুপসম্পন্নেসুপি দুক্কটমেৰ.

উপসম্পন্নেন পঞ্ঞত্তেন ৰুচ্চমানো তং অসিক্খিতুকামতায ৰা তস্স ৰচনং অসোতুকামতায ৰা যো অনাদরিযং করোতি, তস্স অনাদরকরণে পাচিত্তিযন্তি অত্থো. অপঞ্ঞত্তেন ৰুচ্চমানস্স চ অনুপসম্পন্নেন পঞ্ঞত্তেন ৰা অপঞ্ঞত্তেন ৰা ৰুচ্চমানস্স দুক্কটং.

উপসম্পন্নস্স ‘‘ঊনৰীসতিৰস্সো মঞ্ঞে ত্ৰং উপসম্পন্নো, ৰিকালে মঞ্ঞে তযা ভুত্ত’’ন্তিআদিনা নযেন সঞ্চিচ্চ কুক্কুচ্চং উপ্পাদেন্তস্স পাচিত্তিযং. অনুপসম্পন্নস্স উপ্পাদনে দুক্কটং.

গামপ্পৰেসনাপুচ্ছাতি এত্থ পন মজ্ঝন্হিকাতিক্কমনতো পট্ঠায যাৰ অরুণুগ্গমনা ৰিকালো নাম, এত্থন্তরে সচে সম্বহুলা কেনচি কম্মেন গামং পৰিসন্তি, ‘‘ৰিকালে গামপ্পৰেসনং আপুচ্ছামা’’তি সব্বেহিপি অঞ্ঞমঞ্ঞং আপুচ্ছিতব্বং. সচে অনাপুচ্ছা পরিক্খিত্তস্স পরিক্খেপং, অপরিক্খিত্তস্স উপচারং অতিক্কমন্তি, পঠমপাদে দুক্কটং, দুতিযপাদুদ্ধারে পাচিত্তিযং. আপদাসু অনাপত্তি.

ভোজনে চ পরম্পরাতি পরম্পরভোজনে চ পাচিত্তিযন্তি অত্থো. এত্থ পন পঞ্চসু ভোজনেসু অঞ্ঞতরং নামং গহেত্ৰা ‘‘ওদনেন ৰা সত্তুনা ৰা কুম্মাসেন ৰা মংসেন ৰা মচ্ছেন ৰা নিমন্তেমী’’তিআদিনা নযেন, যেন কেনচি ৰেৰচনেন ৰা অকপ্পিযনিমন্তনায নিমন্তিতস্স যেন যেন পঠমং নিমন্তিতো, তস্স তস্স ভোজনং ঠপেত্ৰা উপ্পটিপাটিযা, অৰিকপ্পেত্ৰা ৰা পঠমনিমন্তনং পরস্স পরস্স কুলস্স পঞ্চন্নং ভোজনানং অঞ্ঞতরং পরিভুঞ্জন্তস্স পরম্পরভোজনে পাচিত্তি হোতি. গিলানচীৰরদানচীৰরকালসমযেসু অনাপত্তি, তথা পঞ্চ ভোজনানি ঠপেত্ৰা সব্বত্থ.

১২৩. অনুদ্ধরিত্ৰা গমনে সেয্যন্তি এত্থ দসৰিধা সেয্যা ভিসি চিমিলিকা উত্তরত্থরণং ভূমত্থরণং তট্টিকা চম্মখণ্ডো নিসীদনং পচ্চত্থরণং তিণসন্থারো পণ্ণসন্থারোতি. এতেসু যং কিঞ্চি সঙ্ঘিকে ৰিহারে গুত্তসেনাসনে অত্তনো ৰস্সগ্গেন গহিতং অত্তনা ৰা সন্থরিত্ৰা, অনুপসম্পন্নেন ৰা সন্থরাপেত্ৰা তং দিৰসং গমিকৰসেন পক্কমন্তো নেৰ সযং উদ্ধরেয্য ন অঞ্ঞং উদ্ধরাপেয্য, যথা উপচিকাদীহি ন খজ্জেয্য, এৰং ন ঠপেয্য, অঞ্ঞেন ৰা ন উদ্ধরাপেয্য, পতিরূপং ভিক্খুং ৰা সামণেরং ৰা আরামিকমেৰ ৰা অনাপুচ্ছা ৰা গচ্ছেয্য, তস্স পরিক্খিত্তস্স ৰিহারস্স পরিক্খেপং, অপরিক্খিত্তস্স দ্ৰে লেড্ডুপাতে অতিক্কমন্তস্স পাচিত্তিযং. মণ্ডপরুক্খমূলাদিঅগুত্তসেনাসনে সন্থরিত্ৰা গচ্ছন্তস্স দুক্কটং, তথা মঞ্চপীঠভিসিকোচ্ছকেসু, গুত্তসেনাসনেপি দুক্কটমেৰ.

সেনাসনানি ৰাতি এত্থ অনুদ্ধরিত্ৰা গমনেতি সম্বন্ধো. এত্থ পন মঞ্চো পীঠং ভিসি কোচ্ছকন্তি চতুব্বিধম্পি সেনাসনং ৰস্সানহেমন্তানং অট্ঠসু মাসেসু অজ্ঝোকাসে ৰা ওৰস্সকমণ্ডপে ৰা রুক্খমূলে ৰা সযং সন্থরিত্ৰা ৰা অনুপসম্পন্নেন সন্থরাপেত্ৰা ৰা তং অনুদ্ধরিত্ৰা ৰা অনুদ্ধরাপেত্ৰা ৰা তস্স সেনাসনস্স দ্ৰিন্নং লেড্ডুপাতানং অতিক্কমনে পাচিত্তিযং. সম্মুঞ্জনীযাদি সেসপরিক্খারেসু দুক্কটং.

ইত্থিযাদ্ধানগমনেতি এত্থ মাতুগামেন ‘‘গচ্ছাম ভগিনি, গচ্ছাম অয্যা’’তি এৰং সংৰিদহিত্ৰা ‘‘অজ্জ ৰা স্ৰে ৰা পরসুৰে ৰা’’তি নিযমিতকালং ৰিসঙ্কেতং অকত্ৰা দ্ৰারৰিসঙ্কেতং মগ্গৰিসঙ্কেতং কত্ৰাপি গচ্ছতো গামন্তরে গামন্তরে পাচিত্তিযং. অগামকে অরঞ্ঞে অদ্ধযোজনে অদ্ধযোজনে আপত্তি.

একেকায নিসীদনেতি এত্থ একো একায ইত্থিযা নিসীদনেতি অত্থো.

১২৪. ভিংসাপনেতি এত্থ উপসম্পন্নো উপসম্পন্নং ভিংসাপেতুকামো চোরকন্তারৰাল়কন্তারাদীনি আচিক্খতি, ভযানকং ৰা রূপসদ্দাদিং দস্সেতি, সো ভাযতু ৰা মা ৰা, তস্স পযোগে পযোগে পাচিত্তিযং. অনুপসম্পন্নে দুক্কটং.

আকোটনেতি পহারদানে. উপসম্পন্নো উপসম্পন্নস্স অনত্তমনো হুত্ৰা সচে উপ্পলপত্তেনপি পহারং দেতি, পাচিত্তিযং. অনুপসম্পন্নস্স গহট্ঠস্স ৰা পব্বজিতস্স ৰা ইত্থিযা ৰা পুরিসস্স ৰা অন্তমসো তিরচ্ছানগতস্সাপি পহারং দেতি, দুক্কটমেৰ.

অনাচারং আচরিত্ৰা সঙ্ঘমজ্ঝে আপত্তিযা ৰা ৰত্থুনা ৰা অনুযুঞ্জিযমানো তং অকথেতুকামো ‘‘কো আপন্নো, কিং আপন্নো, কিস্মিং আপন্নো’’তিআদিনা নযেন অঞ্ঞেহি ৰচনেহি তং ৰচনং পটিচ্ছাদেন্তো সো অঞ্ঞং ৰদতি, অযং অঞ্ঞৰাদকো, তস্মিং অঞ্ঞৰাদকে চ কঞ্চি ৰীতিক্কমং দিস্ৰা ‘‘আৰুসো, ইদং নাম তযা কত’’ন্তি ৰুত্তে তং ন কথেতুকামো তুণ্হীভূতোৰ সঙ্ঘং ৰিহেসতীতি সঙ্ঘৰিহেসকো, তস্মিং ৰিহেসকে চ পাচিত্তি হোতীতি অত্থো. ইধ পন ঞত্তিদুতিযেন কম্মেন অঞ্ঞৰাদকে চ ৰিহেসকে চ আরোপিতে পুন অঞ্ঞং ভণন্তস্স, ৰিহেসন্তস্স পাচিত্তি. অনারোপিতে দুক্কটন্তি ৰেদিতব্বং.

দুট্ঠুল্লপকাসছাদেতি এত্থ কিঞ্চাপি ‘‘দুট্ঠুল্লা নাম আপত্তি চত্তারি চ পারাজিকানি তেরস চ সঙ্ঘাদিসেসা’’তি (পাচি. ৩৯৯) ৰুত্তা, তথাপি ইধ সঙ্ঘাদিসেসাৰ অধিপ্পেতা. তস্মা সঙ্ঘসম্মুতিং ৰিনা ভিক্খুস্স দুট্ঠুল্লং আপত্তিং ‘‘অযং অসুচিং মোচেত্ৰা সঙ্ঘাদিসেসং আপন্নো’’তিআদিনা নযেন ৰত্থুনা সদ্ধিং আপত্তিং ঘটেত্ৰা ভিক্খুঞ্চ ভিক্খুনিঞ্চ ঠপেত্ৰা যস্স কস্সচি অনুপসম্পন্নস্স আরোচেন্তস্স পাচিত্তিযং. থুল্লচ্চযাদিঅদুট্ঠুল্লারোচনে দুক্কটং. দুট্ঠুল্লচ্ছাদনেপি সঙ্ঘাদিসেসোৰ অধিপ্পেতো. যো পন ভিক্খু ভিক্খুস্স দুট্ঠুল্লং আপত্তিং সযং ৰা জানিত্ৰা অঞ্ঞেসং ৰা সুত্ৰা ‘‘ইমং জানিত্ৰা চোদেস্সন্তি সারেস্সন্তি মঙ্কুং করিস্সন্তি, নারোচিস্সামী’’তি ধুরং নিক্খিপতি, তস্স পাচিত্তিযং. ধুরং নিক্খিপিত্ৰা পচ্ছা আরোচিতেপি ন রক্খতি এৰ.

হাসোদকেতি অঙ্গুলিপতোদকেন হাসো চ উদকে হাসো চাতি এৰমত্থো ৰেদিতব্বো. উপসম্পন্নো উপসম্পন্নং হসাধিপ্পাযো কাযেন কাযং আমসতি, আপত্তি পাচিত্তিযস্স, কো পন ৰাদো উপকচ্ছকাদীসু ঘট্টনে. অনুপসম্পন্নে দুক্কটং, তথা ভিক্খুস্স কাযপ্পটিবদ্ধামসনে চ নিস্সগ্গিযেন কাযপ্পটিবদ্ধামসনে চ. এত্থ ভিক্খুনীপি অনুপসম্পন্নট্ঠানে ঠিতা. উদকে হসনধম্মো নাম উপরিগোপ্ফকে উদকে কীল়াধিপ্পাযস্স নিম্মুজ্জনউম্মুজ্জনপ্লৰনাদিকং. ইধ হাসো নাম কীল়া ৰুচ্চতি.

নিচ্ছুভনে ৰিহারাতি সঙ্ঘিকা ৰিহারা নিক্কড্ঢনেতি অত্থো. এত্থ পন যো কুদ্ধো হুত্ৰা উপসম্পন্নং হত্থাদীসু গহেত্ৰা ৰা ‘‘নিক্খমা’’তি ৰত্ৰা ৰা যত্তকানি দ্ৰারানি একেন পযোগেন অতিক্কামেতি, তত্থ দ্ৰারগণনায আপত্তিং অগ্গহেত্ৰা পযোগস্স একত্তা একা এৰ গহেতব্বা. সচে নানাপযোগেহি অতিক্কামেতি, তত্থ দ্ৰারগণনায গহেতব্বং. তস্স পরিক্খারনিক্কড্ঢনে দুক্কটং, তথা অনুপসম্পন্নে, তস্স পরিক্খারনিক্কড্ঢনে চ. অলজ্জিআদীসু পন অনাপত্তি.

অনুপখজ্জ সযনেতি সঙ্ঘিকে ৰিহারে ‘‘ৰুড্ঢো’’তি ৰা ‘‘গিলানো’’তি ৰা ‘‘সঙ্ঘেন দিন্নো’’তি ৰা জানিত্ৰা মঞ্চস্স ৰা পীঠস্স ৰা পৰিসন্তস্স ৰা নিক্খমন্তস্স ৰা উপচারে সেয্যং সন্থরিত্ৰা ৰা সন্থরাপেত্ৰা ৰা ‘‘যস্স সম্বাধো ভৰিস্সতি, সো পক্কমিস্সতী’’তি অধিপ্পাযেন অভিনিসীদন্তস্স চ অভিনিপজ্জন্তস্স চ পযোগগণনায পাচিত্তিযং ৰেদিতব্বং. পাচিত্তিযৰিনিচ্ছযো.

পাচিত্তিযনিদ্দেসৰণ্ণনা নিট্ঠিতা.