১১. নিস্সগ্গিযনিদ্দেসৰণ্ণনা

১১৬-৭. ইদানি অচ্চোল়ারিকানং ৰসেন দস্সেতুং ‘‘অরূপিয’’ন্তিআদি আরদ্ধং. অঞ্ঞথাপি যুত্তি পরিযেসিতব্বা. তত্থাযং সঙ্খেপত্থো (পারা. ৫৯১; পারা. অট্ঠ. ২.৫৮৯; কঙ্খা. অট্ঠ. জাতরুপসিক্খাপদৰণ্ণনা) – যো রূপিযেন অরূপিযঞ্চ পরিৰত্তেয্য, যো চ ইতরেন চ অরূপিযেন রূপিযং পরিৰত্তেয্য, তস্স নিস্সগ্গিযং হোতীতি.

ইদানি রূপিযঞ্চ অরূপিযঞ্চ দস্সেতুং ‘‘ইধ রূপিয’’ন্তিআদি আরদ্ধং. এত্থ (পারা. ৫৮৯; কঙ্খা. অট্ঠ. জাতরুপসিক্খাপদৰণ্ণনা) সজ্ঝু সিঙ্গীতি সজ্ঝূতি রজতং. সিঙ্গীতি সুৰণ্ণং. তম্বলোহাদীহি ৰা দারূহি ৰা পণ্ণেহি ৰা লাখায ৰা রূপং সমুট্ঠাপেত্ৰা ৰা অসমুট্ঠাপেত্ৰা ৰা কতং চম্মবীজমযম্পিযং যং দেসে ৰোহারং গচ্ছতি, ইদং ৰোহারূপগমাসকং নাম. ইদমিধ রূপিযন্তি অধিপ্পেতং. ৰত্থাদি চ মুত্তাদি চ ৰত্থমুত্তাদি. ইতরন্তি অরূপিযং কপ্পিযৰত্থুঞ্চ দুক্কটৰত্থুঞ্চ. কিং ৰুত্তং হোতি? ৰত্থং সুত্তং ফালো পটকো কপ্পাসো অনেকপ্পকারং অপরণ্ণং সপ্পি নৰনীতং তেলং মধু ফাণিতাদিভেসজ্জঞ্চাতি ইদং কপ্পিযৰত্থু নাম. মুত্তা মণি ৰেল়ুরিযো সঙ্খোসিলা পৰাল়ং লোহিতঙ্গো মসারগল্লং সত্ত ধঞ্ঞানি দাসী দাসো খেত্তং ৰত্থু পুপ্ফারামফলারামাদযোতি ইদং দুক্কটৰত্থু নাম, তদুভযং অরূপিযং নামাতি ৰুত্তং হোতি.

১১৮. এত্তাৰতা রূপিযসংৰোহারং দস্সেত্ৰা ইদানি কযৰিক্কযং দস্সেতুং ‘‘ইমং গহেত্ৰা’’তিআদিমাহ. তত্থ ইমন্তি তণ্ডুলাদিকং কপ্পিযভণ্ডং গহেত্ৰা ৰা ওদনাদিং ভুত্ৰা ৰা ‘‘ইমং ৰত্থাদিকং কপ্পিযভণ্ডং দেহি, ইমং রজনপচনাদিকং কর, রজনকট্ঠাদিমা নয, ইমং ৰা তৰ দেমি, ত্ৰং পন ইমঞ্চ ইমঞ্চ আহর, কর, দেহী’’তি এৰং কযৰিক্কযে সমাপন্নে নিস্সগ্গীতি সম্বন্ধো.

১১৯. ইদানি পরিণামৰসেন আপত্তিভেদং দস্সেতুং ‘‘অত্তনো’’তিআদি আরদ্ধং. তত্রাযং পিণ্ডত্থো (পারা. ৬৫৯; পারা. অট্ঠ. ২.৬৫৮; কঙ্খা. অট্ঠ. পরিণতসিক্খাপদৰণ্ণনা) – সঙ্ঘস্স ৰা অঞ্ঞস্স ৰা নতং পরিণতং লাভং লভিতব্বং চীৰরাদিপচ্চযং অত্তনো ৰা অঞ্ঞস্স ৰা পরিণামেয্য, নিস্সগ্গিযআদীনি হোন্তীতি. কথং? যো পন মাতুসন্তকম্পি সঙ্ঘস্স পরিণতং অত্তনো পরিণামেতি, নিস্সগ্গিযং. অঞ্ঞস্স পুগ্গলস্স পরিণামেতি, সুদ্ধিকপাচিত্তিযং. অঞ্ঞস্স সঙ্ঘস্স ৰা চেতিযস্স ৰা পরিণামেতি, দুক্কটং. যো পন অঞ্ঞপুগ্গলস্স ৰা চেতিযস্স ৰা পরিণতং অত্তনো ৰা অঞ্ঞপুগ্গলস্স ৰা সঙ্ঘস্স ৰা অঞ্ঞচেতিযস্স ৰা পরিণামেতি, তস্সাপি দুক্কটমেৰাতি.

১২০. যো পন নিস্সগ্গিং নিস্সজ্জিতব্বং অনিস্সজ্জিত্ৰা ৰিনযকম্মং অকত্ৰা পরিভুঞ্জেয্য, তস্স দুক্কটং. যো ৰা পরেন ৰিনযকম্মত্থায নিস্সট্ঠং সকসঞ্ঞায ন দদেয্য, তস্সাপি দুক্কটং. অঞ্ঞথেতরন্তি এত্থ অঞ্ঞথাতি থেয্যসঞ্ঞায সচে ন দদেয্য, ইতরং তস্স অগ্ঘৰসেন পারাজিকঞ্চ থুল্লচ্চযঞ্চ দুক্কটঞ্চ হোতীতি অত্থো. নিস্সগ্গিযৰিনিচ্ছযো.

নিস্সগ্গিযনিদ্দেসৰণ্ণনা নিট্ঠিতা.