পাটিদেসনীযকণ্ডং

১. পঠমপাটিদেসনীযসিক্খাপদৰণ্ণনা

অন্তরঘরং পৰিট্ঠাযাতি রথিকং ব্যূহং সিঙ্ঘাটকং ঘরং পৰিট্ঠায. অসপ্পাযন্তি সগ্গমোক্খানং অহিতং অননুকূলং. ভিক্খুনিযা অন্তরঘরে ঠত্ৰা দদমানায ৰসেনেত্থ আপত্তি ৰেদিতব্বা, ভিক্খুস্স ঠিতট্ঠানং পন অপ্পমাণং. তেনাহ ‘‘অন্তরঘরং পৰিট্ঠাযাতি ৰচনতো’’তিআদি. অন্তরারামাদীসূতি অন্তরারামভিক্খুনুপস্সযতিত্থিযসেয্যাপটিক্কমনেসু. রথিযাব্যূহসিঙ্ঘাটকঘরানন্তি এত্থ রথিযাতি রচ্ছা. ব্যূহন্তি অনিব্বিজ্ঝিত্ৰা ঠিতা গতপচ্চাগতরচ্ছা. সিঙ্ঘাটকন্তি চতুক্কোণং ৰা তিকোণং ৰা মগ্গসমোধানট্ঠানং. ঘরন্তি কুলঘরং. যথা চ রথিযাদীসু ঠত্ৰা দদমানায গণ্হতো আপত্তি, এৰং হত্থিসালাদীসুপি দট্ঠব্বং.

‘‘যামকালিকাদীসু পটিগ্গহণেপি অজ্ঝোহরণেপি দুক্কট’’ন্তি ইদং আমিসেন অসম্ভিন্নং সন্ধায ৰুত্তং, সম্ভিন্নে পন একরসে পাটিদেসনীযমেৰ. একতো উপসম্পন্নাযাতি ভিক্খুনীনং সন্তিকে উপসম্পন্নায, ভিক্খূনং সন্তিকে উপসম্পন্নায পন যথাৰত্থুকমেৰ.

ঞাতিকায ৰা দাপেন্তিযাতি সযং অদত্ৰা যায কাযচি ঞাতিকায দাপেন্তিযা, অঞ্ঞাতিকাযাতি অত্থো. উপনিক্খিপিত্ৰা ৰা দদমানাযাতি ভূমিযং ঠপেত্ৰা ‘‘ইদং, অয্য, তুম্হাকং দম্মী’’তি দদমানায. এৰং দিন্নং ‘‘সাধু, ভগিনী’’তি সম্পটিচ্ছিত্ৰা তায এৰ ৰা ভিক্খুনিযা, অঞ্ঞেন ৰা কেনচি পটিগ্গহাপেত্ৰা ইদং ভুঞ্জিতুং ৰট্টতি.

পঠমপাটিদেসনীযসিক্খাপদৰণ্ণনা নিট্ঠিতা.

২. দুতিযপাটিদেসনীযসিক্খাপদৰণ্ণনা

যো চ পটিগ্গহেত্ৰা ভুঞ্জতীতি সম্বন্ধো. অত্তনো ৰা ভত্তং দাপেন্তিযাতি এত্থ সচেপি অত্তনো ভত্তং দেতি, ইমিনা সিক্খাপদেন অনাপত্তিযেৰ, পুরিমসিক্খাপদেন আপত্তি. অঞ্ঞেসং ৰা ভত্তং দেন্তিযাতি এত্থ পন সচে দাপেয্য, ইমিনা সিক্খাপদেন আপত্তি ভৰেয্য, দেন্তিযা পন নেৰ ইমিনা, ন পুরিমেন আপত্তি.

দুতিযপাটিদেসনীযসিক্খাপদৰণ্ণনা নিট্ঠিতা.

৩. ততিযপাটিদেসনীযসিক্খাপদৰণ্ণনা

লদ্ধসেক্খসম্মুতিকানীতি ঞত্তিদুতিযেন কম্মেন লদ্ধসেক্খসম্মুতিকানি. যঞ্হি কুলং সদ্ধায ৰড্ঢতি, ভোগেন হাযতি, এৰরূপস্স কুলস্স ঞত্তিদুতিযেন কম্মেন সেক্খসম্মুতিং দেন্তি, তং সন্ধাযেতং ৰুত্তং.

ঘরতো নীহরিত্ৰাতি ঘরতো আসনসালং ৰা ৰিহারং ৰা আনেত্ৰা. তেনাহ ‘‘আসনসালাদীসু ৰা’’তি. ইমস্স ‘‘দেন্তী’’তি ইমিনা সম্বন্ধো. দ্ৰারমূলে ৰা ঠপিতং দেন্তীতি দ্ৰারমূলে ঠপিতং পচ্ছা সম্পত্তস্স দেন্তি. ভিক্খুং পন দিস্ৰা অন্তোগেহতো নীহরিত্ৰা দিয্যমানং ন ৰট্টতি. নিচ্চভত্তকেতি নিচ্চং দাতব্বভত্তকে. সলাকভত্তেতি রুক্খসারমযায সলাকায ৰা ৰেল়ুৰিলীৰতালপণ্ণাদিমযায পট্টিকায ৰা ‘‘অসুকস্স নাম সলাকভত্ত’’ন্তি এৰং অক্খরানি উপনিবন্ধিত্ৰা গাহাপেত্ৰা দাতব্বভত্তে. পক্খিকেতি একস্মিং পক্খে একদিৰসে দাতব্বভত্তে. উপোসথিকেতি উপোসথে দাতব্বভত্তে. পাটিপদিকেতি পাটিপদদিৰসে দাতব্বভত্তে.

ততিযপাটিদেসনীযসিক্খাপদৰণ্ণনা নিট্ঠিতা.

৪. চতুত্থপাটিদেসনীযসিক্খাপদৰণ্ণনা

তস্স পরিৰারং কত্ৰা, অঞ্ঞং ৰা তেন সদ্ধিং বহুকম্পীতি যাগুযা পটিসংৰিদিতং কত্ৰা ‘‘কিং সুদ্ধায যাগুযা দিন্নায, পূৰভত্তাদীনিপি এতিস্সা যাগুযা পরিৰারং কত্ৰা, দস্সামা’’তিআদিনা তস্স খাদনীযস্স ৰা ভোজনীযস্স ৰা পরিৰারং কত্ৰা, অঞ্ঞং ৰা যং কিঞ্চি তেন সদ্ধিং বহুকম্পি আহরীযতু. খাদনীযন্তি নিদস্সনমত্তং ‘‘ভোজনীযং ৰা’’তিপি ইচ্ছিতব্বত্তা. তেন সদ্ধিং আহরন্তূতি তেন সদ্ধিং অত্তনো দেয্যধম্মং আহরন্তু. ‘‘যাগুযা পটিসংৰিদিতং কত্ৰা পূৰং ৰা ভত্তং ৰা আহরন্তি, এতম্পি ৰট্টতী’’তি (পাচি. অট্ঠ. ৫৭৩) কুরুন্দিযং ৰুত্তং.

পটিসংৰিদিতগিলানাৰসেসকং ৰাতি পটিসংৰিদিতঞ্চ গিলানো চ পটিসংৰিদিতগিলানা, তেসং অৰসেসকং, পটিসংৰিদিতস্স চ গিলানস্স চ সেসকন্তি অত্থো. একস্সত্থায পটিসংৰিদিতং কত্ৰা আহটং, তস্স সেসকং অঞ্ঞস্সাপি পরিভুঞ্জিতুং ৰট্টতি. চতুন্নং ৰা পঞ্চন্নং ৰা পটিসংৰিদিতং কত্ৰা বহূনং আহটং হোতি, অঞ্ঞেসম্পি দাতুং ইচ্ছন্তি, এতম্পি পটিসংৰিদিতসেসকমেৰ, সব্বেসম্পি ৰট্টতি. অথ অধিকমেৰ হোতি, সন্নিধিং মোচেত্ৰা ঠপিতং দুতিযদিৰসেপি ৰট্টতি. গিলানস্সাহটাৰসেসেপি এসেৰ নযো. যং পন অপ্পটিসংৰিদিতমেৰ কত্ৰা আভতং, তং বহিআরামং পেসেত্ৰা পটিসংৰিদিতং কারেত্ৰা আহরাপেতব্বং, ভিক্খূহি ৰা গন্ত্ৰা অন্তরামগ্গে গহেতব্বং. যম্পি ৰিহারমজ্ঝেন গচ্ছন্তো ৰা ৰনচরকাদযো ৰা ৰনতো আহরিত্ৰা দেন্তি, পুরিমনযেনেৰ পটিসংৰিদিতং কারেতব্বং. কত্থচি পন পোত্থকেসু ‘‘পটিসংৰিদিতং কত্ৰা আহটং ৰা গিলানাৰসেসকং ৰা’’তি পাঠো দিস্সতি, সো ন গহেতব্বো. তত্থজাতকমেৰ ৰাতি আরামে জাতকমেৰ. মূলফলাদিন্তি মূলফলতচপত্তাদিং অঞ্ঞেন কপ্পিযং কত্ৰা দিন্নং পরিভুঞ্জতো অনাপত্তি. সচে পন তং গামং হরিত্ৰা পচিত্ৰা আহরন্তি, ন ৰট্টতি. পটিসংৰিদিতং কারেতব্বং.

চতুত্থপাটিদেসনীযসিক্খাপদৰণ্ণনা নিট্ঠিতা.

ইতি কঙ্খাৰিতরণিযা পাতিমোক্খৰণ্ণনায

ৰিনযত্থমঞ্জূসাযং লীনত্থপ্পকাসনিযং

পাটিদেসনীযৰণ্ণনা নিট্ঠিতা.