৪. চতুত্থপারাজিকৰণ্ণনা

অনভিজানন্তি ন অভিজানং. যেন হি যো ধম্মো অধিগতো, সো তস্স পাকটো হোতীতি আহ ‘‘সকসন্তানে’’তিআদি. উত্তরিমনুস্সানন্তি পকতিমনুস্সেহি উত্তরিতরানং মনুস্সানং, উক্কট্ঠমনুস্সানন্তি অত্থো. ধম্মন্তি মহগ্গতলোকুত্তরভূতং অধিগতধম্মং. অথ ৰা উত্তরিমনুস্সধম্মাতি উত্তরিমনুস্সধম্মো. মনুস্সধম্মো নাম ৰিনা ভাৰনামনসিকারেন পকতিযা মনুস্সেহি নিব্বত্তেতব্বো দসকুসলকম্মপথধম্মো. সো হি মনুস্সানং চিত্তাধিট্ঠানমত্তেন ইজ্ঝনতো তেসং সো ভাৰিতধম্মো ৰিয ঠিতোতি তথা ৰুত্তো, মনুস্সগ্গহণঞ্চেত্থ তেসু বহুলং পৰত্তনতো. ঝানাদিকং পন তব্বিধুরন্তি ততুত্তরি, ইতি উত্তরি মনুস্সধম্মাতি উত্তরিমনুস্সধম্মো, তং উত্তরিমনুস্সধম্মন্তি এৰম্পেত্থ অত্থো দট্ঠব্বো. সমুদাচরন্তোতি আরোচেন্তো.

কিঞ্চাপি লোকিযলোকুত্তরা সব্বাৰ পঞ্ঞা ‘‘ঞাণ’’ন্তি ৰুচ্চতি, ইধ পন মহগ্গতলোকুত্তরাৰ ৰেদিতব্বাতি আহ ‘‘মহগ্গতলোকুত্তরপঞ্ঞা জাননট্ঠেন ঞাণ’’ন্তি. কিলেসেহি আরকত্তা পরিসুদ্ধট্ঠেন অরিযন্তি আহ ‘‘অরিযং ৰিসুদ্ধং উত্তম’’ন্তি. অরিযসদ্দো চেত্থ ৰিসুদ্ধপরিযাযো, ন লোকুত্তরপরিযাযো. ঝানাদিভেদেতি আদিসদ্দেন ‘‘ৰিমোক্খো, সমাধি, সমাপত্তি, ঞাণদস্সনং, মগ্গভাৰনা, ফলসচ্ছিকিরিযা, কিলেসপ্পহানং, ৰিনীৰরণতা চিত্তস্স, সুঞ্ঞাগারে অভিরতী’’তি (পারা. ১৯৮) ইমে সঙ্গণ্হাতি. ৰিঞ্ঞুস্স মনুস্সজাতিকস্সাতি আরোচেতব্বপুগ্গলনিদস্সনং. এতস্স হি আরোচিতে আরোচিতং হোতি, ন দেৰব্রহ্মানং, নাপি পেতযক্খতিরচ্ছানগতানন্তি. আরোচেয্যাতি ৰদেয্য, ৰিঞ্ঞাপেয্যাতি ৰুত্তং হোতি. ৰিনা অঞ্ঞাপদেসেনাতি ‘‘যো তে ৰিহারে ৰসতি, সো ভিক্খু পঠমস্স ঝানস্স লাভী’’তিআদিনা (পারা. ২২০) নযেন অঞ্ঞাপদেসং ৰিনাতি অত্থো. ইধেৰাতি ‘‘ইতি জানামি, ইতি পস্সামী’’তি ইমস্মিংযেৰ পদে. ‘‘তেন ৰুত্ত’’ন্তিআদি নিগমনং.

সমনুগ্গাহীযমানোতি চোদিযমানো, যং ৰত্থু আরোচিতং হোতি, তস্মিং ৰত্থুস্মিং ‘‘কিং তে অধিগতং, কিন্তি তে অধিগতং, কদা তে অধিগতং, কত্থ তে অধিগতং, কতমে তে কিলেসা পহীনা, কতমেসং ত্ৰং ধম্মানং লাভী’তি কেনচি ৰুচ্চমানো’’তি ৰুত্তং হোতি. অসমনুগ্গাহীযমানোতি ন কেনচি ৰুচ্চমানো.

‘‘ভিক্খুভাৰে ঠত্ৰা অভব্বো ঝানাদীনি অধিগন্তু’’ন্তি সিক্খাপদাতিক্কমস্স অন্তরাযকরত্তা ৰুত্তং. ভিক্খুভাৰো হিস্স সগ্গন্তরাযো চেৰ হোতি মগ্গন্তরাযো চ (পারা. অট্ঠ. ২.১৯৮). ৰুত্তঞ্হেতং ‘‘সামঞ্ঞং দুপ্পরামট্ঠং, নিরযাযুপকড্ঢতী’’তি (সং. নি. ১.৮৯; ধ. প. ৩১১). অপরম্পি ৰুত্তং ‘‘সিথিলো হি পরিব্বাজো, ভিয্যো আকিরতে রজ’’ন্তি (সং. নি. ১.৮৯; ধ. প. ৩১৩). ভিক্খুভাৰোতি পারাজিকং আপজ্জিত্ৰা ‘‘সমণো অহ’’ন্তি পটিজাননতো ৰোহারমত্তসিদ্ধো ভিক্খুভাৰো. দানাদীহীতি দানসরণসীলসংৰরাদীহি.

অজানমেৰাতি এত্থ এৰাতি অৰধারণত্থে নিপাতো. ‘‘অজানমেৰ’’ন্তিপি পঠন্তি. তত্থ পন ‘‘এৰং জানামি, এৰং পস্সামী’’তি অৰচন্তি যোজেতব্বং. ৰচনত্থৰিরহতোতি ‘‘পঠমং ঝানং সমাপজ্জি’’ন্তি আদিৰচনস্স (পারা. ২০৯) অত্থভূতেন ঝানাদিনা ৰজ্জিতত্তা তুচ্ছং উদকাদিসুঞ্ঞং ভাজনং ৰিয. মুসাতি ৰিসংৰাদনপুরেক্খারস্স পরৰিসংৰাদকো ৰচীপযোগো, কাযপযোগো ৰা. তেনাহ ‘‘ৰঞ্চনাধিপ্পাযতো মুসা’’তি. মুসা চ ৰঞ্চনাধিপ্পাযো চ পুব্বভাগক্খণে, তঙ্খণে চ. ৰুত্তঞ্হি ‘‘পুব্বে ৰাস্স হোতি ‘মুসা ভণিস্স’ন্তি, ভণন্তস্স হোতি ‘মুসা ভণামী’’’তি (পারা. ২০০). এতঞ্হি দ্ৰযং অঙ্গভূতং, ইতরং পন হোতু ৰা, মা ৰা, অকারণমেতং. অভণিন্তি ৰিঞ্ঞাপনং অকাসিং.

অঞ্ঞত্র অধিমানাতি অধিগতো মানো, অধিকো ৰা মানো অধিমানো, থদ্ধমানোতি অত্থো, তং ৰিনাতি অত্থো. কস্স পনাযং অধিমানো উপ্পজ্জতি, কস্স নুপ্পজ্জতি? অরিযসাৰকস্স তাৰ নুপ্পজ্জতি (পারা. অট্ঠ. ২.১৯৬). সো হি মগ্গফলনিব্বানপহীনকিলেসাৰসিট্ঠকিলেসপচ্চৰেক্খণেন সঞ্জাতসোমনস্সো অরিযগুণপ্পটিৰেধে নিক্কঙ্খো, তস্মা সোতাপন্নাদীনং ‘‘অহং সকদাগামী’’তিআদিৰসেন মানো নুপ্পজ্জতি. দুস্সীলস্স নুপ্পজ্জতি. সো হি অরিযগুণাধিগমে নিরাসোৰ. সীলৰতোপি পরিচ্চত্তকম্মট্ঠানস্স নিদ্দারামতাদিমনুযুত্তস্স নুপ্পজ্জতি, সুপরিসুদ্ধসীলস্স পন কম্মট্ঠানে অপ্পমত্তস্স নামরূপং ৰৰত্থপেত্ৰা পচ্চযপরিগ্গহেন ৰিতিণ্ণকঙ্খস্স তিলক্খণং আরোপেত্ৰা সঙ্খারে সম্মসন্তস্স আরদ্ধৰিপস্সকস্স উপ্পজ্জতি. তেনাহ ‘‘য্ৰায’’ন্তিআদি. তত্থ তিলক্খণং আরোপেত্ৰাতি (সারত্থ. টী. ২.১৯৬) কলাপসম্মসনৰসেন অনিচ্চাদিলক্খণত্তযং আরোপেত্ৰা. সম্মসন্তস্সাতি ৰিপস্সন্তস্স. আরদ্ধৰিপস্সকস্সাতি উদযব্বযানুপস্সনায আরদ্ধৰিপস্সকস্স. অপত্তেতি অত্তনো সন্তানে উপ্পত্তিৰসেন অপত্তে, অনধিগতেতি ৰুত্তং হোতি. পত্তসঞ্ঞিতাসঙ্খাতোতি ‘‘পত্তো মযা উত্তরিমনুস্সধম্মো’’তি এৰংসঞ্ঞিতাসঙ্খাতো অধিমানো উপ্পজ্জতি. উপ্পন্নো চ সুদ্ধসমথলাভিং ৰা সুদ্ধৰিপস্সনালাভিং ৰা অন্তরা ঠপেতি. সো হি দসপি ৰীসম্পি তিংসম্পি ৰস্সানি কিলেসসমুদাচারং অপস্সন্তো ‘‘অহং সোতাপন্নো’’তি ৰা ‘‘সকদাগামী’’তি ৰা ‘‘অনাগামী’’তি ৰা মঞ্ঞতি. সমথৰিপস্সনালাভিং পন অরহত্তেযেৰ ঠপেতি. তস্স হি সমাধিবলেন কিলেসা ৰিক্খম্ভিতা, ৰিপস্সনাবলেন সঙ্খারা সুপরিগ্গহিতা, তস্মা সট্ঠিম্পি ৰস্সানি, অসীতিম্পি ৰস্সানি, ৰস্সসতম্পি কিলেসা ন সমুদাচরন্তি, খীণাসৰস্সেৰ চিত্তাচারো হোতি. সো এৰং দীঘরত্তং কিলেসসমুদাচারং অপস্সন্তো অন্তরা অট্ঠত্ৰাৰ ‘‘অরহা অহ’’ন্তি মঞ্ঞতীতি. ‘‘তং অধিমানং ঠপেত্ৰা’’তি ইমিনা ‘‘অঞ্ঞত্রা’’তি পদং অপেক্খিত্ৰা ‘‘অধিমানা’’তি উপযোগত্থে নিস্সক্কৰচনন্তি দস্সেতি.

পাপিচ্ছতাযাতি পাপা ইচ্ছা এতস্সাতি পাপিচ্ছো, তস্স ভাৰো পাপিচ্ছতা, তায, পাপিকায ইচ্ছাযাতি অত্থো. যা সা ‘‘ইধেকচ্চো দুস্সীলোৰ সমানো ‘সীলৰা’তি মং জনো জানাতূ’’তিআদিনা (ৰিভ. ৮৫১) নযেন ৰুত্তা, তায অসন্তগুণসম্ভাৰনিচ্ছাযাতি ৰুত্তং হোতি. ইমিনা পন মন্দত্তা মোমূহত্তা সমুদাচরন্তস্স অনাপত্তীতি দস্সেতি. অযম্পীতি পি-সদ্দেন ন কেৰলং পুরিমা তযোৰাতি দস্সেতি.

অসন্তন্তি অভূতং. ঝানাদিধম্মন্তি ঝানং, ৰিমোক্খো, সমাধি, সমাপত্তি, ঞাণদস্সনং, মগ্গভাৰনা, ফলসচ্ছিকিরিযা, কিলেসপ্পহানং, ৰিনীৰরণতা চিত্তস্স, সুঞ্ঞাগারে অভিরতী’’তি (পারা. ১৯৮) এৰং ৰুত্তং উত্তরিমনুস্সধম্মং. যস্স আরোচেতীতি (পারা. অট্ঠ. ২.২১৫) ৰাচায ৰা হত্থৰিকারাদীহি ৰা অঙ্গপচ্চঙ্গচোপনেহি ৰিঞ্ঞত্তিপথে ঠিতস্স যস্স পুগ্গলস্স আরোচেতি. ৰিঞ্ঞত্তিপথং পন অতিক্কমিত্ৰা ঠিতো কোচি চে দিব্বেন চক্খুনা (সারত্থ. টী. ২.২১৫), দিব্বায চ সোতধাতুযা দিস্ৰা চ সুত্ৰা চ জানাতি, ন পারাজিকং. যোপি ‘‘কিং অযং ভণতী’’তি সংসযং ৰা আপজ্জতি, চিরং ৰীমংসিত্ৰা ৰা পচ্ছা জানাতি, ‘‘অৰিজানন্তো’’ইচ্চেৰ সঙ্খ্যং গচ্ছতি. যো পন ঝানাদীনি অত্তনো অধিগমৰসেন ৰা উগ্গহপরিপুচ্ছাদিৰসেন ৰা ন জানাতি, কেৰলং ‘‘ঝান’’ন্তি ৰা ‘‘ৰিমোক্খো’’তি ৰা ৰচনমত্তমেৰ সুতং হোতি, সোপি তেন ৰুত্তে ‘‘ঝানং কির সমাপজ্জী’’তি এস ৰদতীতি যদি এত্তকমত্তম্পি জানাতি, ‘‘জানাতি’’চ্চেৰ সঙ্খ্যং গচ্ছতি, তস্স ৰুত্তে পারাজিকমেৰ. সেসো পন একস্স ৰা দ্ৰিন্নং ৰা বহূনং ৰা নিযমিতানিযমিতৰসেন ৰিসেসো সব্বো সিক্খাপচ্চক্খানকথাযং ৰুত্তনযেনেৰ ৰেদিতব্বো. পরিযাযভাসনে পন ‘‘অহ’’ন্তি অৰুত্তত্তা পটিৰিজানন্তস্স ৰুত্তেপি থুল্লচ্চযং. ৰিসংৰাদনাধিপ্পাযেন মুসাৰাদপযোগস্স কতত্তা অপ্পটিৰিজানন্তস্সাপি দুক্কটন্তি আহ ‘‘যো তে ৰিহারে ৰসতি…পে… দুক্কট’’ন্তি. অনুল্লপনাধিপ্পাযস্সাতি উল্লপনাধিপ্পাযৰিরহিতস্স, অভূতারোচনাধিপ্পাযৰিরহিতস্সাতি অত্থো. উম্মত্তকাদযো পুব্বে ৰুত্তনযা এৰ. ইধ পন আদিকম্মিকা ৰগ্গুমুদাতীরিযভিক্খূ, তেসং অনাপত্তি.

চতুত্থপারাজিকৰণ্ণনা নিট্ঠিতা.

পারাজিকনিগমনৰণ্ণনা

ইধাতি ইমস্মিং ভিক্খুপাতিমোক্খে. উদ্দিট্ঠপারাজিকপরিদীপনমেৰাতি উদ্দিট্ঠানং চতুন্নং পারাজিকানং পরিদীপনৰচনমেৰ. অৰধারণং পন ন অঞ্ঞেসম্পীতি দস্সনত্থং. তেনাহ ‘‘সমোধানেত্ৰা পনা’’তিআদি. তত্থ সমোধানেত্ৰাতি তত্থ তত্থ আগতানি এত্থেৰ সমোদহিত্ৰা, পক্খিপিত্ৰা রাসিং কত্ৰাতি অত্থো. পাল়িযং আগতানীতি উদ্দেসপাল়িযং আগতানি. ভিক্খুনীনং অসাধারণানি চত্তারীতি উব্ভজাণুমণ্ডলিকা, ৰজ্জপ্পটিচ্ছাদিকা, উক্খিত্তানুৰত্তিকা, অট্ঠৰত্থুকাতি ইমানি ভিক্খুনীনং ভিক্খূহি অসাধারণানি চত্তারি. পণ্ডকাদীনঞ্হি একাদসন্নং অভব্বভাৰো পারাজিকাপত্তিসদিসত্তা পারাজিকোতি আহ ‘‘একাদসন্ন’’ন্তিআদি. অভব্বভাৰসঙ্খাতেহীতি ৰত্থুৰিপন্নতাদিনা পব্বজ্জূপসম্পদায নঅরহভাৰসঙ্খাতেহি. পণ্ডকতিরচ্ছানগতউভতোব্যঞ্জনকা (পারা. অট্ঠ. ২.২৩৩) হি তযো ৰত্থুৰিপন্না অহেতুকপ্পটিসন্ধিকা, তেসং সগ্গো অৰারিতো, মগ্গো পন ৰারিতো. অভব্বা হি তে মগ্গপ্পটিলাভায ৰত্থুৰিপন্নত্তা. পব্বজ্জাপি নেসং পটিক্খিত্তা, তস্মা তেপি পারাজিকাৰ. থেয্যসংৰাসকো, তিত্থিযপক্কন্তকো, মাতুঘাতকো, পিতুঘাতকো, অরহন্তঘাতকো, ভিক্খুনিদূসকো, লোহিতুপ্পাদকো, সঙ্ঘভেদকোতি ইমে অট্ঠ অত্তনো কিরিযায ৰিপন্নত্তা অভব্বট্ঠানং পত্তাতি পারাজিকাৰ. তেসু থেয্যসংৰাসকো, তিত্থিযপক্কন্তকো, ভিক্খুনিদূসকোতি ইমেসং তিণ্ণং সগ্গো অৰারিতো, মগ্গো পন ৰারিতোৰ. ইতরেসং পঞ্চন্নং উভযম্পি ৰারিতং. তে হি অনন্তরাৰ নরকে নিব্বত্তনকসত্তা. যদা ভিক্খুনী ৰিব্ভমিতুকামা হুত্ৰা কাসাৰমেৰ ৰা গিহিৰত্থং ৰা গিহিনিৰাসনাকারেন নিৰাসেতি, তদা পারাজিকমাপন্না নাম হোতীতি আহ ‘‘গিহিভাৰং পত্থযমানাযা’’তিআদি. সা হি অজ্ঝাচারৰীতিক্কমং অকত্ৰাপি এত্তাৰতা অস্সমণী নাম হোতি.

দীঘতায লম্বমানং অঙ্গজাতমেতস্সাতি লম্বী (সারত্থ. টী. ২.২৩৩). ন সো এত্তাৰতা পারাজিকো, অথ খো যদা অনভিরতিযা পীল়িতো অত্তনো অঙ্গজাতং মুখে ৰা ৰচ্চমগ্গে ৰা পৰেসেতি, তদা পারাজিকো হোতি. মুদুকতা পিট্ঠি এতস্সাতি মুদুপিট্ঠিকো, কতপরিকম্মায মুদুকায পিট্ঠিযা সমন্নাগতো. সোপি যদা অনভিরতিযা পীল়িতো অত্তনো অঙ্গজাতং অত্তনো মুখমগ্গৰচ্চমগ্গেসু অঞ্ঞতরং পৰেসেতি, তদা পারাজিকো হোতি. পরস্স অঙ্গজাতং মুখেন গণ্হাতীতি যো অনভিরতিযা পীল়িতো পরস্স সুত্তস্স ৰা পমত্তস্স ৰা অঙ্গজাতং মুখেন গণ্হাতি. পরস্স অঙ্গজাতে অভিনিসীদতীতি যো অনভিরতিযা পীল়িতো পরস্স অঙ্গজাতং কম্মনিযং দিস্ৰা অত্তনো ৰচ্চমগ্গেন তস্সূপরি নিসীদতি, তং অত্তনো ৰচ্চমগ্গং পৰেসেতীতি অত্থো. এতানি হি চত্তারি যস্মা উভিন্নং রাগৰসেন সদিসভাৰূপগতানং ধম্মো ‘‘মেথুনধম্মো’’তি ৰুচ্চতি, তস্মা একেন পরিযাযেন মেথুনধম্মং অপ্পটিসেৰিত্ৰাযেৰ কেৰলং মগ্গেন মগ্গপ্পৰেসনৰসেন আপজ্জিতব্বত্তা মেথুনধম্মপারাজিকস্স অনুলোমেন্তীতি ‘‘অনুলোমপারাজিকানী’’তি ৰুচ্চন্তি.

এত্থাহ – মাতুঘাতকপিতুঘাতকঅরহন্তঘাতকা ততিযপারাজিকং আপন্না, ভিক্খুনিদূসকো, লম্বিআদযো চত্তারো চ পঠমপারাজিকং আপন্না এৰাতি কত্ৰা কুতো চতুৰীসতীতি (সারত্থ. টী. ২.২৩৩)? ৰুচ্চতে – মাতুঘাতকাদযো হি চত্তারো ইধ অনুপসম্পন্না এৰ অধিপ্পেতা, লম্বিআদযো চত্তারো কিঞ্চাপি পঠমপারাজিকেন সঙ্গহিতা, যস্মা পন একেন পরিযাযেন মেথুনধম্মং অপ্পটিসেৰিনো হোন্তি, তস্মা ৰিসুং ৰুত্তাতি. দুতিযৰিকপ্পে কচ্চিত্থাতি এত্থ কচ্চি অত্থাতি পদচ্ছেদো কাতব্বো.

ইতি কঙ্খাৰিতরণিযা পাতিমোক্খৰণ্ণনায

ৰিনযত্থমঞ্জূসাযং লীনত্থপ্পকাসনিযং

পারাজিকৰণ্ণনা নিট্ঠিতা.