৫. চিত্তাগারৰগ্গো

১. রাজাগারসিক্খাপদৰণ্ণনা

কীল়নচিত্তসালন্তি ন রঞ্ঞোৰ কীল়নচিত্তসালং, অথ খো যেসং কেসঞ্চি মনুস্সানং কীল়নত্থং যত্থ কত্থচি কতসালং. এস নযো ‘‘কীল়নউপৰন’’ন্তিআদীসুপি. যথাহ ‘‘রাজাগারং নাম যত্থ কত্থচি রঞ্ঞো কীল়িতুং রমিতুং কতং হোতী’’তিআদিকো (পাচি. ৯৭৯) ৰিত্থারো. তত্থ কীল়নউপৰনন্তি কীল়নত্থং অন্তোনগরে কতং আরামং. কীল়নুয্যানন্তি তথেৰ বহিনগরে কতং উয্যানং.

রাজাগারসিক্খাপদৰণ্ণনা নিট্ঠিতা.

২. আসন্দিপরিভুঞ্জনসিক্খাপদৰণ্ণনা

অতিক্কন্তপ্পমাণাতি অট্ঠঙ্গুলতো অতিক্কন্তপ্পমাণপাদকা. ৰুত্তোতি পদভাজনিযং ৰুত্তো. ‘‘অকপ্পিযরূপাকুলো অকপ্পিযমঞ্চো পল্লঙ্কো’’তি (সারত্থ. টী. মহাৰগ্গ ৩.২৫৪) সারসমাসাচরিযো.

আসন্দিপরিভুঞ্জনসিক্খাপদৰণ্ণনা নিট্ঠিতা.

৩. সুত্তকন্তনসিক্খাপদৰণ্ণনা

উজ্জৰুজ্জৰেতি উগ্গিরিত্ৰা উগ্গিরিত্ৰা ৰেঠনে. কন্তিতসুত্তং কন্তন্তিযাতি দসিকসুত্তাদিং সঙ্ঘাটেত্ৰা কন্তন্তিযা, দুক্কন্তিতং ৰা পটিকন্তন্তিযা.

সুত্তকন্তনসিক্খাপদৰণ্ণনা নিট্ঠিতা.

৪. গিহিৰেয্যাৰচ্চসিক্খাপদৰণ্ণনা

অত্তনো ৰেয্যাৰচ্চকরস্স চাতি সচেপি মাতাপিতরো আগচ্ছন্তি, যং কিঞ্চি বীজনিং ৰা সম্মুঞ্জনিদণ্ডকং ৰা কারাপেত্ৰা ৰেয্যাৰচ্চকরট্ঠানে ঠপেত্ৰা যং কিঞ্চি ৰা পচিতুং ৰট্টতি.

গিহিৰেয্যাৰচ্চসিক্খাপদৰণ্ণনা নিট্ঠিতা.

৫-৬. অধিকরণাদিসিক্খাপদৰণ্ণনা

অনন্তরাযিকিনীতি দসৰিধেসু অন্তরাযেসু একেনাপি অনন্তরাযিকিনী. ধুরং নিক্খিপিত্ৰা পচ্ছা ৰিনিচ্ছিনন্তী আপত্তিং আপজ্জিত্ৰাৰ ৰিনিচ্ছিনাতি.

ছট্ঠং উত্তানত্থমেৰ.

অধিকরণাদিসিক্খাপদৰণ্ণনা নিট্ঠিতা.

৭. আৰসথচীৰরসিক্খাপদৰণ্ণনা

আপদাসূতি মহগ্ঘচীৰরং সরীরতো মোচেত্ৰা সুপ্পটিসামিতম্পি চোরা হরন্তি, এৰরূপাসু আপদাসু অনিস্সজ্জিত্ৰা নিৰাসেন্তিযা অনাপত্তি.

আৰসথচীৰরসিক্খাপদৰণ্ণনা নিট্ঠিতা.

৮. আৰসথৰিহারসিক্খাপদৰণ্ণনা

কৰাটবদ্ধৰিহারন্তি দ্ৰারবদ্ধৰিহারং. গিলানাযাতি ৰচীভেদং কাতুং অসমত্থায. আপদাসূতি রট্ঠে ভিজ্জন্তে আৰাসে ছড্ডেত্ৰা গচ্ছন্তি, এৰরূপাসু আপদাসু.

আৰসথৰিহারসিক্খাপদৰণ্ণনা নিট্ঠিতা.

৯. তিরচ্ছানৰিজ্জাপরিযাপুণনসিক্খাপদৰণ্ণনা

হত্থিআদীসুপি (সারত্থ. টী. পাচিত্তিয ৩.১০১৫) সিপ্পসদ্দো পচ্চেকং যোজেতব্বো, তথা আথব্বণাদীসু মন্তসদ্দো. তত্থ থরূতি খগ্গমুট্ঠি. আথব্বণমন্তো নাম আথব্বণৰেদৰিহিতো পরূপঘাতকরো মন্তো. খিলনমন্তো নাম দারুসারখিলং মন্তেত্ৰা পথৰিযং পৰেসেত্ৰা মারণমন্তো. অগদপ্পযোগো নাম ৰিসযোজনং.

তিরচ্ছানৰিজ্জাপরিযাপুণনসিক্খাপদৰণ্ণনা নিট্ঠিতা.

১০. তিরচ্ছানৰিজ্জাৰাচনসিক্খাপদৰণ্ণনা

লেখেতি লিখসিপ্পে. ধারণায ৰাতি ধারণসত্থে, যস্মিং ৰুত্তনযেন পটিপজ্জন্তা বহূনিপি গন্থানি ধারেন্তি. নাগমণ্ডলাদিকেতি এত্থ নাগমণ্ডলং নাম সপ্পানং পৰেসনিৰারণত্থং মণ্ডলবদ্ধমন্তো.

তিরচ্ছানৰিজ্জাৰাচনসিক্খাপদৰণ্ণনা নিট্ঠিতা.

চিত্তাগারৰগ্গো পঞ্চমো.