নিস্সগ্গিযকণ্ডং

১. পত্তৰগ্গো

১. পত্তসন্নিচযসিক্খাপদৰণ্ণনা

পঠমং উত্তানত্থমেৰ.

পত্তসন্নিচযসিক্খাপদৰণ্ণনা নিট্ঠিতা.

২. অকালচীৰরসিক্খাপদৰণ্ণনা

যং অত্তনা লদ্ধং, তং নিস্সগ্গিযং হোতীতি যং চীৰরং ভাজাপিতায অত্তনা লদ্ধং, তমেৰ নিস্সগ্গিযং হোতি, তং ৰিনযকম্মং কত্ৰাপি অত্তনা ন লব্ভতি. তেনাহ ‘‘নিস্সট্ঠ’’ন্তিআদি. তত্থ নিস্সট্ঠং পটিলভিত্ৰাপীতি ‘‘অয্যায, দম্মী’’তি এৰং নিস্সট্ঠং পটিলভিত্ৰাপি. যথাদানেযেৰ উপনেতব্বন্তি যথা দাযকেহি দিন্নং, তথেৰ উপনেতব্বং, অকালচীৰরপক্খেযেৰ ঠপেতব্বন্তি ৰুত্তং হোতি.

অকালচীৰরসিক্খাপদৰণ্ণনা নিট্ঠিতা.

৩. চীৰরপরিৰত্তনসিক্খাপদৰণ্ণনা

মেতন্তি মে এতং. সকসঞ্ঞায গহিতত্তা পাচিত্তিযঞ্চেৰ দুক্কটঞ্চ ৰুত্তং, ইতরথা ভণ্ডগ্ঘেন কারেতব্বং.

চীৰরপরিৰত্তনসিক্খাপদৰণ্ণনা নিট্ঠিতা.

৪. অঞ্ঞৰিঞ্ঞাপনসিক্খাপদৰণ্ণনা

পটিলাভেনাতি পঠমৰিঞ্ঞত্তিতো ঊনতরস্সাপি অঞ্ঞস্স পটিলাভেন.

তস্মিং অপ্পহোন্তে পুন তঞ্ঞেৰাতি যং পঠমং ৰিঞ্ঞত্তং, থোকত্তা তস্মিং অপ্পহোন্তে পুন তঞ্ঞেৰ ৰিঞ্ঞাপেন্তিযাতি অত্থো. অঞ্ঞেনপি অত্থে সতী তি পঠমং ৰিঞ্ঞত্তিতো অঞ্ঞেনপি অত্থে সতি. তেন সদ্ধিং অঞ্ঞঞ্চাতি যং পঠমং ৰিঞ্ঞত্তং, তেন সদ্ধিং অঞ্ঞঞ্চ. কিং ৰুত্তং হোতি? সচে পঠমং সপ্পি ৰিঞ্ঞত্তং, ‘‘যমকং পচিতব্ব’’ন্তি চ ৰেজ্জেন ৰুত্তত্তা তেলেনাপি অত্থো হোতি. ততো ‘‘তেলেনাপি মে অত্থো’’তি এৰমাদিনা অঞ্ঞঞ্চ ৰিঞ্ঞাপেন্তিযাতি ৰুত্তং হোতি. আনিসংসং দস্সেত্ৰাতি ‘‘সচে কহাপণস্স সপ্পি আভতং হোতি, ইমিনা মূলেন দ্ৰিগুণং তেলং লব্ভতি, তেলেনাপি চ ইদং কিচ্চং নিপ্পজ্জতি, তস্মা তেলং আহরা’’তি এৰং আনিসংসং দস্সেত্ৰা.

অঞ্ঞৰিঞ্ঞাপনসিক্খাপদৰণ্ণনা নিট্ঠিতা.

৫. অঞ্ঞচেতাপনসিক্খাপদৰণ্ণনা

ততো অঞ্ঞং চেতাপেয্যাতি পঠমং চেতাপিততো যং কিঞ্চি অঞ্ঞং চেতাপেয্য.

অঞ্ঞচেতাপনসিক্খাপদৰণ্ণনা নিট্ঠিতা.

৬. পঠমসঙ্ঘিকচেতাপনসিক্খাপদৰণ্ণনা

অঞ্ঞস্সত্থায দিন্নেনাতি যং চেতাপেতি, ততো অঞ্ঞস্সত্থায দিন্নেন. অঞ্ঞুদ্দিসিকেনাতি পুরিমস্সেৰত্থদীপনং.

সেসকং উপনেন্তিযাতি যদত্থায দিন্নো, তং চেতাপেত্ৰা অৰসেসং অঞ্ঞস্সত্থায উপনেন্তিযা. সামিকে অপলোকেত্ৰাতি দাযকে আপুচ্ছিত্ৰা. এৰরূপাসূ আপদাসু উপনেন্তীনন্তি এৰরূপেসু উপদ্দৰেসু অঞ্ঞস্স যস্স কস্সচি অত্থায উপনেন্তীনং.

পঠমসঙ্ঘিকচেতাপনসিক্খাপদৰণ্ণনা নিট্ঠিতা.

৭. দুতিযসঙ্ঘিকচেতাপনসিক্খাপদৰণ্ণনা

ন কেৰলং তেনেৰ পরিক্খারেনাতি আহ ‘‘সযং যাচিতকেনাপী’’তি. ৰুত্তঞ্হেতং পাল়িযং ‘‘ভিক্খুনিযো তেন চ পরিক্খারেন সযম্পি যাচিত্ৰা ভেসজ্জং চেতাপেত্ৰা পরিভুঞ্জিংসূ’’তি (পাচি. ৭৬৩). মাতিকাযং পন গম্যমানত্তা পি-সদ্দো নপ্পযুত্তো. গম্যমানত্থস্স হি সদ্দস্স পযোগং পতি কামচারোতি যুত্তি.

দুতিযসঙ্ঘিকচেতাপনসিক্খাপদৰণ্ণনা নিট্ঠিতা.

৮-৯-১০. পঠমগণিকচেতাপনাদিসিক্খাপদৰণ্ণনা

অট্ঠমনৰমদসমানি উত্তানত্থানেৰ.

পঠমগণিকচেতাপনাদিসিক্খাপদৰণ্ণনা নিট্ঠিতা.

পত্তৰগ্গো পঠমো.

২. চীৰরৰগ্গো

১১. গরুপাৰুরণসিক্খাপদৰণ্ণনা

যস্মা পৰারিতট্ঠানে ৰিঞ্ঞত্তি নাম ন পটিসেধেতব্বা, তস্মা ভগৰা ধম্মনিমন্তনৰসেন পৰারিতট্ঠানে ‘‘ৰদেথায্যে, যেনত্থো’’তি (সারত্থ. টী. পাচিত্তিয ৩.৭৮৪) ৰুত্তায চতুক্কংসপরমং ৰিঞ্ঞাপেতব্বন্তি পরিচ্ছেদং দস্সেতীতি ৰেদিতব্বং. তেনেৰ ‘‘চেতাপেতব্বন্তি ঠপেত্ৰা সহধম্মিকে চ ঞাতকপ্পৰারিতে চ অঞ্ঞেন কিস্মিঞ্চিদেৰ গুণে পরিতুট্ঠেন ‘ৰদেথায্যে, যেনত্থো’তি ৰুত্তায ৰিঞ্ঞাপেতব্ব’’ন্তি ৰুত্তং. রাজানন্তি পসেনদিকোসলরাজানং.

গরুপাৰুরণসিক্খাপদৰণ্ণনা নিট্ঠিতা.

১২. লহুপাৰুরণসিক্খাপদৰণ্ণনা

দুতিযং উত্তানত্থমেৰ.

লহুপাৰুরণসিক্খাপদৰণ্ণনা নিট্ঠিতা.

চীৰরৰগ্গো দুতিযো.

ইতি কঙ্খাৰিতরণিযা পাতিমোক্খৰণ্ণনায

ৰিনযত্থমঞ্জূসাযং লীনত্থপ্পকাসনিযং

ভিক্খুনিপাতিমোক্খে নিস্সগ্গিযৰণ্ণনা নিট্ঠিতা.