সঙ্ঘাদিসেসকণ্ডং

১. উস্সযৰাদিকাসিক্খাপদৰণ্ণনা

মানুস্সযৰসেন কোধূস্সযৰসেনাতি বাহুল্লনযেন ৰুত্তং. তেনেৰ ৰক্খতি ‘‘তিচিত্তং তিৰেদন’’ন্তি. অড্ডকরণত্থাযাতি এত্থ অড্ডোতি ৰোহারিকৰিনিচ্ছযো ৰুচ্চতি. যং পব্বজিতা ‘‘অধিকরণ’’ন্তিপি ৰদন্তি, তস্স করণত্থায ৰোহারিকৰিনিচ্ছযত্থাযাতি ৰুত্তং হোতি. ৰীতিক্কমক্খণেযেৰাতি ৰত্থুজ্ঝাচারক্খণেযেৰ, ন ততিযায সমনুভাসনাযাতি অধিপ্পাযো. ভিক্খুনিং সঙ্ঘতো নিস্সারেতীতি আপন্নং ভিক্খুনিং ভিক্খুনিসঙ্ঘম্হা নিস্সারেতি. হেতুম্হি চাযং কত্তুৰোহারো ‘‘নিস্সারণহেতুভূতধম্মো ‘নিস্সারণীযো’তি ৰুত্তো’’তি কত্ৰা.

যত্থ ঠিতাযাতি উপস্সযভিক্খাচারমগ্গাদীসু যস্মিং ঠানে ঠিতায. ততো পট্ঠায গচ্ছন্তিযাতি ততো পট্ঠায ৰোহারিকানং সন্তিকং গচ্ছন্তিযা. দুতিযেতি দুতিযারোচনে. তেনাতি উপাসকেন. এৰং ৰুত্তাযাতি ‘‘মম চ তৰ চ কথং ত্ৰংযেৰ আরোচেহী’’তি ৰুত্তায. অঞ্ঞেন কথাপেতীতি কপ্পিযকারকেন কথাপেতি. যথা ৰা তথা ৰা হি আরোচিযমানেতি কপ্পিযকারকো ৰা ভিক্খুনিযা কথং পঠমং আরোচেতু, ইতরো ৰা অত্তনো কথং (পাচি. অট্ঠ. ৬৭৯). কপ্পিযকারকো ৰা উভিন্নম্পি কথং, ইতরো ৰা উভিন্নম্পি কথং আরোচেতূতি এৰং যথা তথা আরোচিযমানে. উভিন্নম্পি পন কথং সুত্ৰাতি যথা তথা ৰা আরোচিতং পন উভিন্নম্পি কথং সুত্ৰা.

আকড্ঢিযমানা গচ্ছতীতি ৰুচ্চমানা ৰোহারিকানং সন্তিকং গচ্ছতি, ইমস্স ‘‘তস্সা অনাপত্তী’’তি ইমিনা সম্বন্ধো. এৰং সেসেসুপি. রক্খং যাচতীতি ধম্মিকং রক্খং যাচতি. ইদানি যথা যাচিতা রক্খা ধম্মিকা হোতি, তং দস্সেতুং ‘‘উপস্সযে অঞ্ঞেহি কতং অনাচারং অনোদিস্স আচিক্খন্তী’’তি ৰুত্তং. তত্থ অতীতং আরব্ভ অত্থি ওদিস্স আচিক্খনা (পাচি. অট্ঠ. ৬৭৯), অত্থি অনোদিস্স আচিক্খনা, অনাগতং আরব্ভাপি অত্থি ওদিস্স আচিক্খনা, অত্থি অনোদিস্স আচিক্খনা.

কথং অতীতং আরব্ভ ওদিস্স আচিক্খনা হোতি? ভিক্খুনুপস্সযে গামদারকা, ধুত্তাদযো ৰা যে কেচি অনাচারং ৰা আচরন্তি, রুক্খং ৰা ছিন্দন্তি, ফলাফলং ৰা হরন্তি, পরিক্খারে ৰা অচ্ছিন্দন্তি. ভিক্খুনী ৰোহারিকে উপসঙ্কমিত্ৰা ‘‘অম্হাকং উপস্সযে ইদং নাম কত’’ন্তি ৰদতি. ‘‘কেনা’’তি ৰুত্তে ‘‘অসুকেন চ অসুকেন চা’’তি আচিক্খতি. এৰং অতীতং আরব্ভ ওদিস্স আচিক্খনা হোতি, সা ন ৰট্টতি. তঞ্চে সুত্ৰা তে ৰোহারিকা তেসং দণ্ডং করোন্তি, সব্বং ভিক্খুনিযা গীৰা হোতি. ‘‘দণ্ডং গণ্হিস্সন্তী’’তি অধিপ্পাযেপি সতি গীৰাযেৰ হোতি. সচে পন তস্স ‘‘দণ্ডং গণ্হথা’’তি ৰদতি, পঞ্চমাসকমত্তে গহিতে পারাজিকং হোতি.

তেহি ‘‘কেনা’’তি ৰুত্তে পন ‘‘অসুকেনা’তি ৰত্তুং অম্হাকং ন ৰট্টতি, তুম্হেযেৰ জানিস্সথ. কেৰলঞ্হি মযং রক্খং যাচাম, তং নো দেথ, অৰহটভণ্ডম্পি আহরাপেথা’’তি ৰত্তব্বং. এৰং অনোদিস্স আচিক্খনা হোতি, সা ৰট্টতি. এৰং ৰুত্তে সচেপি তে ৰোহারিকা তে কারকে গৰেসিত্ৰা তেসং দণ্ডং করোন্তি, সব্বং সাপতেয্যম্পি গহিতং, ভিক্খুনিযা নেৰ গীৰা, ন আপত্তি.

পরিক্খারং হরন্তে দিস্ৰা তেসং অনত্থকামতায ‘‘চোরো চোরো’’তি ৰত্তুম্পি ন ৰট্টতি. এৰং ৰুত্তেপি হি যং তেসং দণ্ডং করোন্তি, সব্বং ভিক্খুনিযা গীৰা হোতি. অত্তনো ৰচনকরং পন ‘‘ইমিনা মে পরিক্খারো গহিতো, তং আহরাপেহি, মা চস্স দণ্ডং করোথা’’তি ৰত্তুং ৰট্টতি. দাসদাসিৰাপিআদীনং অত্থায অড্ডং করোন্তি, অযং অকপ্পিযঅড্ডো নাম, ন ৰট্টতি.

কথং অনাগতং আরব্ভ ওদিস্স আচিক্খনা হোতি? ৰুত্তনযেনেৰ পরেহি অনাচারাদীসু কতেসু ভিক্খুনী ৰোহারিকে এৰং ৰদতি ‘‘অম্হাকং উপস্সযে ইদঞ্চিদঞ্চ করোন্তি, রক্খং নো দেথ আযতিং অকরণত্থাযা’’তি. ‘‘কেন এৰং কত’’ন্তি ৰুত্তে ‘‘অসুকেন চ অসুকেন চা’’তি আচিক্খতি. এৰং অনাগতং আরব্ভ ওদিস্স আচিক্খনা হোতি, সাপি ন ৰট্টতি. তেসঞ্হি দণ্ডে কতে পুরিমনযেনেৰ সব্বং ভিক্খুনিযা গীৰা. সেসং পুরিমসদিসমেৰ.

সচে পন ৰোহারিকা ভিক্খুনুপস্সযে এৰরূপং অনাচারং করোন্তানং ‘‘ইমং নাম দণ্ডং করোমা’’তি ভেরিং চরাপেত্ৰা আণায অতিট্ঠমানে পরিযেসিত্ৰা দণ্ডং করোন্তি, ভিক্খুনিযা নেৰ গীৰা, ন আপত্তি.

যো চাযং ভিক্খুনীনং ৰুত্তো, ভিক্খূনম্পি এসেৰ নযো. ভিক্খুনোপি হি ওদিস্স আচিক্খনা ন ৰট্টতি, যং তথা আচিক্খিতে তেসং দণ্ডং করোন্তি, তং সব্বং গীৰা হোতি. ৰুত্তনযেনেৰ দণ্ডং গণ্হাপেন্তস্স পারাজিকং. যো পন ‘‘দণ্ডং করিস্সন্তী’’তি জানন্তোপি অনোদিস্স কথেতি, তে চ পরিযেসিত্ৰা দণ্ডং করোন্তিযেৰ, ন দোসো. ৰিহারসীমায রুক্খাদীনি ছিন্দন্তানং ৰাসিফরসুআদীনি গহেত্ৰা পাসাণে কোট্টেন্তি, ন ৰট্টতি. সচে ধারা ভিজ্জতি, কারাপেত্ৰা দাতব্বা. উপধাৰিত্ৰা তেসং পরিক্খারে গণ্হন্তি, তম্পি ন কাতব্বং. লহুপরিৰত্তঞ্হি চিত্তং, থেয্যচেতনায উপ্পন্নায মূলচ্ছেজ্জম্পি গচ্ছেয্য.

উস্সযৰাদিকাসিক্খাপদৰণ্ণনা নিট্ঠিতা.

২. চোরিৰুট্ঠাপিকাসিক্খাপদৰণ্ণনা

মল্লগণভটিপুত্তগণাদিকন্তিআদীসু (সারত্থ. টী. পাচিত্তিয ৩.৬৮৩) মল্লগণো নাম নারাযনভত্তিকো তত্থ তত্থ পানীযট্ঠপনপোক্খরণিখণনাদিপুঞ্ঞকম্মকারকো গণো. ভটিপুত্তগণো নাম কুমারভত্তিকগণো. ধম্মগণোতি সাসনভত্তিকো অনেকপ্পকারপুঞ্ঞকম্মকারকো গণো. গন্ধিকসেণীতি অনেকপ্পকারসুগন্ধিৰিকতিকারকো গণো. দুস্সিকসেণীতি দুস্সৰাণিজসমূহো, পেসকারগণোতি অত্থো.

ৰুট্ঠাপেন্তিযাতি উপসম্পাদেন্তিযা. কেনচি করণীযেন পক্কন্তাসু ভিক্খুনীসু অগন্ত্ৰা খণ্ডসীমং যথানিসিন্নট্ঠানেযেৰ অত্তনো নিস্সিতকপরিসায সদ্ধিং ৰুট্ঠাপেন্তিযা ৰাচাচিত্ততো সমুট্ঠাতি (পাচি. অট্ঠ. ৬৮৩), অঞ্ঞং সীমং ৰা নদিং ৰা গন্ত্ৰা ৰুট্ঠাপেন্তিযা কাযৰাচাচিত্ততো সমুট্ঠাতীতি আহ ‘‘চোরিৰুট্ঠাপনসমুট্ঠান’’ন্তি. অনাপুচ্ছা ৰুট্ঠাপনৰসেন কিরিযাকিরিযং. পঞ্ঞত্তিং অজানন্তা অরিযাপি ৰুট্ঠাপেন্তীতি ৰা কম্মৰাচাপরিযোসানে আপত্তিক্খণে ৰিপাকাব্যাকতসমঙ্গিতাৰসেন ৰা তিচিত্তং.

চোরিৰুট্ঠাপিকাসিক্খাপদৰণ্ণনা নিট্ঠিতা.

৩. একগামন্তরগমনসিক্খাপদৰণ্ণনা

অঞ্ঞো গামো গামন্তরং. নদিপারন্তি নদিযা পারিমতীরং. ‘‘গামন্তরং গচ্ছেয্যা’’তি (পাচি. ৬৮৭, ৬৯১) ৰুত্তত্তা অঞ্ঞস্মিং গামেযেৰ আপত্তি, ন সকগামেতি আহ ‘‘সকগামতো তাৰা’’তিআদি. পরিক্খেপে ৰা উপচারে ৰা অতিক্কন্তেতি পরিক্খিত্তস্স গামস্স পরিক্খেপে ৰা অপরিক্খিত্তস্স গামস্স পরিক্খেপারহট্ঠানে ৰা অতিক্কন্তে. দুতিযেন অতিক্কন্তমত্তেতি দুতিযেন পাদেন ইতরস্স গামস্স পরিক্খেপে ৰা উপচারে ৰা অতিক্কন্তমত্তে. যেসু পন পোত্থকেসু ‘‘একেন পাদেন ইতরস্স গামস্স পরিক্খেপে ৰা অতিক্কন্তে, উপচারে ৰা ওক্কন্তে থুল্লচ্চযং, দুতিযেন অতিক্কন্তমত্তে, ওক্কন্তমত্তে ৰা সঙ্ঘাদিসেসো’’তি পাঠো দিস্সতি, তত্থ ‘‘ওক্কন্তে, ওক্কন্তমত্তে ৰা’’তি এতানি দ্ৰে পদানি পাল়িযা ৰিরুজ্ঝন্তি. ‘‘অপরিক্খিত্তস্স গামস্স উপচারং অতিক্কামেন্তিযা’’তি (পাচি. ৬৯২) হি পাল়ি. তথা সমন্তপাসাদিকাযপি ৰিরুজ্ঝন্তি. তত্থ হি –

‘‘পরিক্খেপারহট্ঠানং একেন পাদেন অতিক্কমতি, থুল্লচ্চযং. দুতিযেন অতিক্কন্তমত্তে সঙ্ঘাদিসেসো. অপিচেত্থ সকগামতো…পে… একেন পাদেন ইতরস্স গামস্স পরিক্খেপে ৰা উপচারেৰা অতিক্কন্তমত্তে থুল্লচ্চযং, দুতিযেন অতিক্কন্তমত্তে সঙ্ঘাদিসেসো’’তি –

ৰুত্তং. ‘‘পঠমং পাদং অতিক্কামেন্তিযা’’তিআদিৰচনতো (পাচি. ৬৯২) পদসা গমনমেৰ ইধাধিপ্পেতন্তি আহ ‘‘পদসা পৰিসন্তিযা আপত্তী’’তি. ইমিনা সচেপি হত্থিপিট্ঠিআদীহি ৰা ইদ্ধিযা ৰা পৰিসতি, ৰট্টতিযেৰাতি দস্সেতি. অযমেত্থ সঙ্খেপো, ৰিত্থারো পন সমন্তপাসাদিকায (পাচি. অট্ঠ. ৬৯২) ৰুত্তোতি অধিপ্পাযো.

নদিপারগমনে ৰুত্তলক্খণায নদিযাতি ‘‘নদী নাম তিমণ্ডলং পটিচ্ছাদেত্ৰা যত্থ কত্থচি উত্তরন্তিযা অন্তরৰাসকো তেমিযতী’’তি (পাচি. ৬৯২) নদিপারগমনৰিভঙ্গে ৰুত্তলক্খণায নদিযা. নদিপারগমনৰিভঙ্গো হি ইধ নদিপারগমনসদ্দেন ৰুত্তো. পুন ওরিমতীরমেৰ পচ্চুত্তরন্তিযা ৰাতি পরতীরং গন্তুকামতায ওতিণ্ণত্তা ৰুত্তং. ইতরিস্সা পন অযং পক্কন্তট্ঠানে ঠিতা হোতি, তস্মা পরতীরং গচ্ছন্তিযা অনাপত্তি. সচে সজ্ঝাযং ৰা পধানং ৰা অঞ্ঞং ৰা কিঞ্চি কম্মং কুরুমানা ‘‘পুরে অরুণেযেৰ দুতিযিকায সন্তিকং গমিস্সামী’’তি (পাচি. অট্ঠ. ৬৯২) আভোগং করোতি, অজানন্তিযা এৰ তস্সা অরুণো উগ্গচ্ছতি, অনাপত্তীতি আহ ‘‘পুরে অরুণেযেৰা’’তিআদি. অথ পন ‘‘যাৰ অরুণুগ্গমনা ইধেৰ ভৰিস্সামী’’তি ৰা অনাভোগেন ৰা ৰিহারস্স একদেসে অচ্ছতি, দুতিযিকায হত্থপাসং ন ওতরতি, অরুণুগ্গমনে সঙ্ঘাদিসেসো. হত্থপাসোযেৰ হি ইধ পমাণং. হত্থপাসাতিক্কমে একগব্ভোপি ন রক্খতি. তেনাহ ‘‘একগব্ভে…পে… আপত্তী’’তি.

দস্সনূপচারং ৰা সৰনূপচারং ৰাতি এত্থ দস্সনূপচারো নাম যত্থ ঠিতং দুতিযিকা পস্সতি. সৰনূপচারো নাম যত্থ ঠিতা মগ্গমূল়্হসদ্দেন ৰিয, ধম্মস্সৰনারোচনসদ্দেন ৰিয চ ‘‘অয্যে’’তি সদ্দাযন্তিযা সদ্দং সুণাতি. তস্মাতি যস্মা ওহীযনং নাম দস্সনূপচারসৰনূপচারানমঞ্ঞতরস্স ৰিজহনং, তস্মা. অন্তোগামে পন ওহীযনং ৰট্টতীতি আহ ‘‘ইন্দখীলাতিক্কমতো পট্ঠাযা’’তি আদি. তত্থ ইন্দখীলাতিক্কমতোতি উম্মারাতিক্কমতো. বহিগামেতি গামস্স বহিপদেসে. মগ্গমূল়্হা উচ্চাসদ্দং করোন্তীতি আহ ‘‘মগ্গমূল়্হসদ্দেন ৰিযা’’তি. মগ্গমূল়্হং অৰ্হাযন্তস্স সদ্দেন ৰিযাতিপি ৰদন্তি. সদ্দাযন্তিযাতি সদ্দং করোন্তিযা. ‘‘সদ্দস্সৰনাতিক্কমে আপত্তিযেৰা’’তি ইমিনা দস্সনূপচারো এৰরূপে সৰনূপচারে ৰিজহিতে ন রক্খতি, জহিতমত্তেৰ আপত্তি সঙ্ঘাদিসেসস্সাতি দস্সেতি.

মগ্গং গচ্ছন্তীতি একমগ্গং গচ্ছন্তি. সচে পুরিমাযো অঞ্ঞেন মগ্গেন গচ্ছন্তি, পক্কন্তা নাম হোন্তি, অনাপত্তিযেৰ. দ্ৰিন্নং গচ্ছন্তীনং একা অনুবন্ধিতুং অসক্কোন্তী ‘‘গচ্ছতু অয’’ন্তি ওহীযতি, ইতরাপি ‘‘ওহীযতু অয’’ন্তি গচ্ছতি, দ্ৰিন্নম্পি আপত্তি. সচে পন গচ্ছন্তীসু পুরিমাপি অঞ্ঞং মগ্গং গণ্হাতি, পচ্ছিমাপি অঞ্ঞং, একা একিস্সা পক্কন্তট্ঠানে তিট্ঠতি, দ্ৰিন্নম্পি অনাপত্তি.

‘‘সঙ্ঘাদিসেসা চতুরো’’তি (পরি. অট্ঠ. ৪৭৯) অযং পঞ্হো অরুণুগ্গমনে গামন্তরপরিযাপন্নং নদিপারং ওক্কন্তভিক্খুনিং সন্ধায ৰুত্তো. সা হি সকগামতো পচ্চূসসমযে নিক্খমিত্ৰা অরুণুগ্গমনকালে ৰুত্তপ্পকারং নদিপারং ওক্কন্তমত্তাৰ রত্তিৰিপ্পৰাসগামন্তরনদিপারগমনগণম্হাওহীযনলক্খণে একপ্পহারেনেৰ চতুরো সঙ্ঘাদিসেসে আপজ্জতি.

পক্খসঙ্কন্তায ৰাতি তিত্থাযতনং সঙ্কন্তায. অনন্তরাযেনাতি হত্থিমোচনাদিঅন্তরাযং ৰিনা.

একগামন্তরগমনসিক্খাপদৰণ্ণনা নিট্ঠিতা.

৪. উক্খিত্তকওসারণসিক্খাপদৰণ্ণনা

তস্সেৰ কারকসঙ্ঘস্সাতি যো উক্খেপনীযকম্মকারকো গণো, তস্সেৰ কারকসঙ্ঘস্স. ৰত্তে ৰা ৰত্তন্তিন্তি তেচত্তালীসপ্পভেদে নেত্থারৰত্তে ৰত্তমানং.

উক্খিত্তকওসারণসিক্খাপদৰণ্ণনা নিট্ঠিতা.

৫. ভোজনপ্পটিগ্গহণপঠমসিক্খাপদৰণ্ণনা

একতোঅৰস্সুতেতি পুগ্গলস্স ৰা ভিক্খুনিযা ৰা অৰস্সুতে. মহাপচ্চরিযং পনেত্থ ‘‘ভিক্খুনিযা অৰস্সুতভাৰেতি দট্ঠব্ব’’ন্তি (পাচি. অট্ঠ. ৭০১) ৰুত্তং. তং ‘‘অনৰস্সুতোতি জানন্তী পটিগ্গণ্হাতী’’তি (পাচি. ৭০৩) ইমায পাল়িযা ন সমেতি. যদি হি পুগ্গলস্স অৰস্সুতভাৰো নপ্পমাণং, কিং ‘‘অনৰস্সুতোতি জানন্তী’’তি ইমিনা ৰচনেন, ‘‘অনাপত্তি উভতোঅনৰস্সুতা হোন্তি, অনৰস্সুতা পটিগ্গণ্হাতী’’তি এত্তকমেৰ ৰত্তব্বং সিযা. উভোসু অনৰস্সুতেসূতি পুগ্গলো চেৰ ভিক্খুনী চাতি উভোসু অনৰস্সুতেসু গণ্হন্তিযা সব্বথাপি অনাপত্তি. ‘‘অনৰস্সুতো’’তি ৰা ঞত্ৰা গণ্হন্তিযাতি সযং অনৰস্সুতা সমানা অৰস্সুতেপি ‘‘অনৰস্সুতো অয’’ন্তি সঞ্ঞায তস্স হত্থতো পটিগ্গণ্হন্তিযা. অথ সযং অনৰস্সুতাপি অঞ্ঞং অৰস্সুতং ৰা অনৰস্সুতং ৰা ‘‘অৰস্সুতো’’তি ঞত্ৰা পটিগ্গণ্হাতি, দুক্কটমেৰ. ৰুত্তঞ্হেতং অনন্তরসিক্খাপদে ‘‘কিস্স ত্ৰং, অয্যে, ন পটিগ্গণ্হাসীতি, অৰস্সুতা, অয্যেতি, ত্ৰং পন, অয্যে, অৰস্সুতাতি, নাহং, অয্যে, অৰস্সুতা’’তি.

ভোজনপ্পটিগ্গহণপঠমসিক্খাপদৰণ্ণনা নিট্ঠিতা.

৬. ভোজনপ্পটিগ্গহণদুতিযসিক্খাপদৰণ্ণনা

দুক্কটাদিকা সঙ্ঘাদিসেসপরিযোসানা আপত্তিযো ইমিনা সিক্খাপদেন উয্যোজিকাযেৰ, ইতরিস্সা পন আপত্তিভেদো পঠমসিক্খাপদেনাতি আহ ‘‘সা এৰং উয্যোজনেনা’’তিআদি.

কুলানুদ্দযতাযাতি কুলানুকম্পকতায.

ভোজনপ্পটিগ্গহণদুতিযসিক্খাপদৰণ্ণনা নিট্ঠিতা.

৭-১৩. সঞ্চরিত্তাদিসিক্খাপদৰণ্ণনা

সত্তমাদীনি উত্তানত্থানেৰ.

সঞ্চরিত্তাদিসিক্খাপদৰণ্ণনা নিট্ঠিতা.

১৪-১৭. সঙ্ঘভেদকাদিসিক্খাপদৰণ্ণনা

ভিক্খুনী সঙ্ঘং ন ভিন্দতীতি কম্মং, উদ্দেসো চাতি দ্ৰীহি ভেদো, সো তায সদ্ধিং নত্থীতি ভিক্খুনী সঙ্ঘং ন ভিন্দতি. ন কেৰলং পরিৰাসাভাৰোযেৰাতি আহ ‘‘ছাদনপচ্চযাপী’’তিআদি. এত্থ চ ‘‘ছাদনপচ্চযাপি ন দুক্কটং আপজ্জতী’’তি পাঠো দট্ঠব্বো, ছাদনপচ্চযাপি দুক্কটং ন আপজ্জতীতি অত্থো. এৰঞ্চ কত্ৰা –

‘‘আপজ্জতি গরুকং সাৰসেসং;

ছাদেতি অনাদরিযং পটিচ্চ;

ন ভিক্খুনী নো চ ফুসেয্য ৰজ্জং;

পঞ্হামেসা কুসলেহি চিন্তিতা’’তি. (পরি. ৪৮১) –

এত্থ ভিক্খুনিনিসেধো উপপন্নো হোতি. যেসু পন পোত্থকেসু ‘‘ছাদনপচ্চযা পন দুক্কটং আপজ্জতী’’তি ৰিনা ন-কারং পাঠো দিস্সতি, সো পমাদলেখোতি দট্ঠব্বং. তস্মাতি যস্মা পরিৰাসো নাম নত্থি, তস্মা. অত্তনো সীমং সোধেত্ৰা ৰিহারসীমায ৰাতি ৰিহারে বদ্ধসীমমেৰ সন্ধায ৰুত্তং. সোধেতুং অসক্কোন্তীহীতি ৰিহারসীমং সোধেতুং অসক্কোন্তীহি.

মুখমত্তনিদস্সনন্তি পৰেসোপাযমত্তনিদস্সনং. এত্থাহ – অথ কস্মা যথা ভিক্খুমানত্তকথায ‘‘পরিক্খিত্তস্স ৰিহারস্স পরিক্খেপতো, অপরিক্খিত্তস্স ৰিহারস্স পরিক্খেপারহট্ঠানতো দ্ৰে লেড্ডুপাতে অতিক্কম্মা’’তি (কঙ্খা. অট্ঠ. নিগমনৰণ্ণনা) ৰুত্তং, এৰমৰত্ৰা ‘‘গামূপচারতো চ ভিক্খূনং ৰিহারূপচারতো চ দ্ৰে লেড্ডুপাতে অতিক্কমিত্ৰা’’তি ইধ ৰুত্তন্তি? তত্র চেকে ৰদন্তি ‘‘ভিক্খূনং ৰুত্তপ্পকারং পদেসং অতিক্কমিত্ৰা গামেপি তং কম্মং কাতুং ৰট্টতি, ভিক্খুনীনং পন গামে ন ৰট্টতি, তস্মা এৰং ৰুত্ত’’ন্তি. অপরে পন ভণন্তি ‘‘ভিক্খূনম্পি গামে ন ৰট্টতি, ভিক্খুৰিহারো নাম পুব্বেযেৰ গামূপচারং অতিক্কমিত্ৰা তিট্ঠতি, তস্মা গামং অৰত্ৰা ৰিহারূপচারমেৰ হেট্ঠা ৰুত্তং. ভিক্খুনীনং পন ৰিহারো গামেযেৰ, ন বহি, তস্মা গামূপচারঞ্চ ৰিহারূপচারঞ্চ উভযমেৰেত্থ দস্সিতং. তস্মা উভযত্থাপি অত্থতো নানাত্থং নত্থী’’তি. ৰীমংসিত্ৰা যঞ্চেত্থ যুজ্জতি, তং গহেতব্বং.

ততো পট্ঠাযাতি আরোচিতকালতো পট্ঠায.

সঙ্ঘভেদকাদিসিক্খাপদৰণ্ণনা নিট্ঠিতা.

ইতি কঙ্খাৰিতরণিযা পাতিমোক্খৰণ্ণনায

ৰিনযত্থমঞ্জূসাযং লীনত্থপ্পকাসনিযং

ভিক্খুনিপাতিমোক্খে সঙ্ঘাদিসেসৰণ্ণনা নিট্ঠিতা.