পারাজিককণ্ডং

নাথো ভিক্খুনীনং হিতত্থায যং পাতিমোক্খং পকাসযীতি সম্বন্ধো. তত্থ পকাসযীতি দেসযি, পঞ্ঞাপযীতি অত্থো.

সাধারণপারাজিকং

১. মেথুনধম্মসিক্খাপদৰণ্ণনা

অভিলাপমত্তন্তি ৰচনমত্তং, ন অত্থোতি অধিপ্পাযো. লিঙ্গভেদমত্তন্তি পুরিসলিঙ্গং ইত্থিলিঙ্গন্তি ৰিসেসমত্তং. ৰিসেসোতি নানাত্তং. ছন্দেন চেৰাতি পেমেন চেৰ, সিনেহেন চেৰাতি অত্থো. রুচিযা চাতি ইচ্ছায চ. পধংসিতাযাতি দূসিতায. পরিপুণ্ণা উপসম্পদা যস্সা সা পরিপুণ্ণূপসম্পদা, উভতোসঙ্ঘেন উপসম্পন্নাতি অত্থো.

মেথুনধম্মসিক্খাপদৰণ্ণনা নিট্ঠিতা.

অসাধারণপারাজিকং

৫. উব্ভজাণুমণ্ডলসিক্খাপদৰণ্ণনা

উব্ভকপ্পরন্তি দুতিযমহাসন্ধিতো উদ্ধং. ইতো চিতো চ সঞ্চরণন্তি হত্থস্স ৰা কাযস্স ৰা তিরিযং ইতো চিতো চ সঞ্চরণং.

একতোঅৰস্সুতেতি (পাচি. অট্ঠ. ৬৬২) ভিক্খুনিযা অৰস্সৰে, ভিক্খুনিযা কাযসংসগ্গরাগেন অৰস্সুতভাৰে সতীতি অত্থো. ভিক্খুনিযা ৰসেনেৰ চ একতোঅৰস্সুতভাৰো গহেতব্বো. ৰুত্তঞ্হেতং সমন্তপাসাদিকাযং (পাচি. অট্ঠ. ৬৬২) –

‘‘একতোঅৰস্সুতেতি এত্থ কিঞ্চাপি ‘একতো’তি অৰিসেসেন ৰুত্তং, তথাপি ভিক্খুনিযা এৰ অৰস্সুতে সতি অযং আপত্তিভেদো ৰুত্তোতি ৰেদিতব্বো’’তি.

পুরিসস্স কাযন্তি পুরিসস্স যং কঞ্চি কাযং. উভতোঅৰস্সুতেপীতি ভিক্খুনিযা চেৰ পুরিসস্স চ কাযসংসগ্গরাগেন অৰস্সুতভাৰে সতিপি. কাযেনাতি যথাপরিচ্ছিন্নেন অত্তনো কাযেন. কাযপ্পটিবদ্ধন্তি পুরিসস্স কাযপ্পটিবদ্ধং. অৰসেসকাযেন ৰাতি যথাপরিচ্ছিন্নকাযতো অৰসেসেন কাযেন, উব্ভক্খকঅধোজাণুমণ্ডলঅধোকপ্পরসঙ্খাতেন কাযেনাতি ৰুত্তং হোতি. তস্স কাযন্তি অৰস্সুতস্স তস্স পুরিসস্স যং কঞ্চি কাযং. যথা চেত্থ সযং আমসন্তিযা থুল্লচ্চযং, এৰং তস্স আমসনং সাদিযন্তিযাপীতি দট্ঠব্বং. পুরিসস্স কাযসংসগ্গরাগো নত্থীতি পুরিসস্স মেথুনরাগো, গেহসিতপেমং, সুদ্ধচিত্তং ৰা. অৰসেসেতি পারাজিকখেত্ততো অৰসেসে. কাযপ্পটিবদ্ধেন কাযপ্পটিবদ্ধাদিভেদেতি ‘‘কাযপ্পটিবদ্ধেন কাযপ্পটিবদ্ধং আমসতি, আপত্তি দুক্কটস্সা’’তিআদিকে (পাচি. ৬৫৯, ৬৬২) সব্বৰারে. ‘‘অসঞ্চিচ্চা’’তিআদীসু ৰিরজ্ঝিত্ৰা ৰা আমসন্তিযা, অঞ্ঞৰিহিতায ৰা, ‘‘অযং পুরিসো’’তি ৰা ‘‘ইত্থী’’তি ৰা অজানন্তিযা ৰা, তেন ফুট্ঠাযপি তং ফস্সং অস্সাদযন্তিযা ৰা আমসনেপি সতি অনাপত্তি.

উব্ভজাণুমণ্ডলসিক্খাপদৰণ্ণনা নিট্ঠিতা.

৬. ৰজ্জপ্পটিচ্ছাদিকাসিক্খাপদৰণ্ণনা

পারাজিকং ধম্মং অজ্ঝাপন্নন্তি ভিক্খূহি সাধারণানং চতুন্নং, অসাধারণানং চতুন্নঞ্চাতি অট্ঠন্নমঞ্ঞতরং অজ্ঝাপন্নং. ইদঞ্চ পারাজিকং (পাচি. অট্ঠ. ৬৬৬) পচ্ছা পঞ্ঞত্তং, সঙ্গীতিকারকাচরিযেহি পন পুরিমেন সদ্ধিং যুগল়ং কত্ৰা ইমস্মিং ওকাসে ঠপিতন্তি ৰেদিতব্বং. ‘‘অট্ঠন্নং পারাজিকানং অঞ্ঞতর’’ন্তি (পাচি. ৬৬৬) ৰচনতো পন ৰজ্জপ্পটিচ্ছাদিকং যা পটিচ্ছাদেতি, সাপি ৰজ্জপ্পটিচ্ছাদিকা এৰাতি দট্ঠব্বং. কিঞ্চাপি ৰজ্জপ্পটিচ্ছাদনং পেমৰসেন হোতি, তথাপি সিক্খাপদৰীতিক্কমচিত্তং দোমনস্সমেৰ হোতীতি কত্ৰা দুক্খৰেদনং হোতীতি ‘‘তত্র হি পাচিত্তিযং…পে… সেসং তাদিসমেৰা’’তি ৰুত্তং.

ৰজ্জপ্পটিচ্ছাদিকাসিক্খাপদৰণ্ণনা নিট্ঠিতা.

৭. উক্খিত্তানুৰত্তিকাসিক্খাপদৰণ্ণনা

সত্থুসাসনেনাতি ঞত্তিসম্পদায চেৰ অনুস্সাৰনসম্পদায চ. ইধ পন চোদনাসারণাপুব্বকমেৰ ঞত্তিঅনুস্সাৰনং সত্থুসাসনন্তি আহ ‘‘ইধাপী’’তিআদি. করণন্তি ঞত্তিট্ঠপনঞ্চেৰ অনুস্সাৰনাৰচনঞ্চ. অনাদরন্তি পুগ্গলে চেৰ ধম্মে চ আদরৰিরহিতং. তেনাহ ‘‘যেনা’’তিআদি. তত্থ পরিযাপন্নগণে ৰাতি তস্মিং সঙ্ঘে পরিযাপন্নে সম্বহুলপুগ্গলসঙ্খাতে গণে ৰা. ‘‘সম্মাৰত্তনায অৰত্তমানন্তি অত্থো’’তি ইমিনা অধিপ্পাযত্থো ৰুত্তো. এককম্মাদিকেতি এককম্মএকুদ্দেসসমসিক্খাতায. সহ অযনভাৰেনাতি সহ ৰত্তনভাৰেন. সমানো সংৰাসো এতেসন্তি সমানসংৰাসকা.

ইদানি যেন সংৰাসেন তে ‘‘সমানসংৰাসকা’’তি (পাচি. অট্ঠ. ৬৬৯) ৰুত্তা, সো সংৰাসো তস্স উক্খিত্তকস্স তেহি সদ্ধিং নত্থি, যেহি চ সদ্ধিং তস্স সো সংৰাসো নত্থি, ন তেন তে ভিক্খূ অত্তনো সহাযা কতা হোন্তি, তস্মা সো অকতসহাযো নামাতি ইমমত্থং দস্সেতুং ‘‘যস্স পনা’’তিআদি ৰুত্তং. এৰং পদৰণ্ণনং কত্ৰা ইদানি অত্থমত্তং দস্সেতুং ‘‘সমানসংৰাসকভাৰং অনুপগতন্তি অত্থো’’তি ৰুত্তং. কিং তং অনুৰত্তনন্তি কস্সচি আসঙ্কা সিযাতি তং সরূপতো দস্সেন্তো ‘‘যংদিট্ঠিকো সো হোতী’’তিআদিমাহ. তত্থ সোতি যো উক্খিত্তকো, সো.

উক্খিত্তানুৰত্তিকাসিক্খাপদৰণ্ণনা নিট্ঠিতা.

৮. অট্ঠৰত্থুকাসিক্খাপদৰণ্ণনা

লোকস্সাদমিত্তসন্থৰৰসেনাতি (সারত্থ. টী. পাচিত্তিয ৩.৬৭৫) লোকস্সাদসঙ্খাতস্স মিত্তসন্থৰস্স ৰসেন. কিং তন্তি আহ ‘‘কাযসংসগ্গরাগেনা’’তি. কাযসংসগ্গরাগেনেৰ তিন্তা ইধ অৰস্সুতা নাম, ন মেথুনরাগেনাতি. কথমেতং ৰিঞ্ঞাযতীতি আহ ‘‘অযমেৰ হী’’তিআদি. কিং পনেত্থ কারণন্তি আহ ‘‘সমন্তপাসাদিকাযং পনস্স ৰিচারণা কতা’’তি. তত্থাযং ৰিচারণা – এত্থ চ অসদ্ধম্মোতি কাযসংসগ্গোৰ ৰেদিতব্বো, ন মেথুনধম্মো. ন হি মেথুনস্স সামন্তা থুল্লচ্চযং হোতি. ‘‘ৰিঞ্ঞূ পটিবলো কাযসংসগ্গং সমাপজ্জিতু’’ন্তি (পাচি. ৬৭৬) ৰচনম্পি চেত্থ সাধকন্তি. যং যেন কতং, তং তস্সেৰ হোতীতি. পুরিসপুগ্গলস্সাতি সামিৰচনন্তি দস্সেতুং ‘‘যং পুরিসপুগ্গলেনা’’তিআদি ৰুত্তং. তত্থ হত্থোতি অত্তনো হত্থো. ন কেৰলঞ্চেত্থ হত্থগ্গহণন্তি ‘‘হত্থো নাম কপ্পরং উপাদায যাৰ অগ্গনখা’’তি (পাচি. ৬৭৬) ৰুত্তস্স হত্থস্সেৰ গহণং, অথ খো তস্স চ অঞ্ঞস্সপি অপারাজিকখেত্তস্স গহণং একজ্ঝং কত্ৰা ‘‘হত্থগ্গহণ’’ন্তি ৰুত্তং. তথা সঙ্ঘাটিকণ্ণগ্গহণন্তি ন কেৰলং সঙ্ঘাটিকণ্ণস্সেৰ গহণং, অথ খো তস্স চ অঞ্ঞস্সপি যস্স কস্সচি চীৰরপ্পদেসস্স গহণং ৰুত্তন্তি দস্সেতুং ‘‘এত্থ চ যস্স কস্সচী’’তিআদি ৰুত্তং. ইত্থন্নামং ঠানন্তি এৰংনামকং ঠানং. ‘‘পটিপাটিযা ৰা উপ্পটিপাটিযা ৰা পূরেত্ৰা’’তি ইদং নিদস্সনমত্তং. তস্মা পটিপাটিযা ৰা উপ্পটিপাটিযা ৰা একন্তরিকায ৰা যেন তেন নযেন পূরেত্ৰাতি অত্থো.

তা আপত্তিযোতি তা আপন্না আপত্তিযো. যথা চেকেকস্মিং ৰত্থুস্মিং এৰং ৰিসুং ৰিসুং সত্তসু ৰত্থূসু সতক্খত্তুম্পি ৰীতিক্কন্তেসু তা আপত্তিযো দেসেত্ৰা মুচ্চতি. গণনূপিকাতি দেসিতগণনং উপগচ্ছতি. ধুরনিক্খেপং কত্ৰাতি ‘‘অঞ্ঞং ৰত্থুং আপজ্জিস্সামী’’তি উস্সাহং ঠপেত্ৰা.

অট্ঠৰত্থুকাসিক্খাপদৰণ্ণনা নিট্ঠিতা.

ইতি কঙ্খাৰিতরণিযা পাতিমোক্খৰণ্ণনায

ৰিনযত্থমঞ্জূসাযং লীনত্থপ্পকাসনিযং

ভিক্খুনিপাতিমোক্খে পারাজিকৰণ্ণনা নিট্ঠিতা.