৩০-৩২. সমতিত্তিকাদিসিক্খাপদৰণ্ণনা

সমতিত্তিকন্তি ভাৰনপুংসকনিদ্দেসো, সমতিত্তিকং কত্ৰাতি অত্থো. এৰমঞ্ঞেসুপি ঈদিসেসু ঠানেসু অত্থো দট্ঠব্বো. সমপুণ্ণন্তি (সারত্থ. টী. পাচিত্তিয ৩.৬০৫) পত্তস্স অন্তোমুখৰট্টিলেখাসমপুণ্ণং. সমভরিতন্তি এত্থাপি এসেৰ নযো. তঞ্চ খো অধিট্ঠানুপগপত্তস্সেৰ, নেতরস্স. তেনাহ ‘‘অধিট্ঠানুপগপত্তস্সা’’তিআদি. রচিতন্তি কতং, পক্খিত্তং পূরিতন্তি অত্থো. যং কিঞ্চি যাৰকালিকন্তি যাগুভত্তফলাফলাদিং যং কিঞ্চি আমিসজাতিকং. যত্থ কত্থচীতি অধিট্ঠানুপগো ৰা হোতু, অনধিট্ঠানুপগো ৰা যত্থ কত্থচি পত্তে. থূপীকতানীতি থূপং ৰিয কতানি, অধিট্ঠানুপগস্স পত্তস্স অন্তোমুখৰট্টিলেখং অতিক্কমিত্ৰা কতানীতি অত্থো. ইদঞ্চ ‘‘যামকালিকাদীনী’’তি ইমস্স ৰসেন ৰুত্তং, ‘‘যাৰকালিক’’ন্তি ইমস্স পন ৰসেন ৰচনব্যত্তযং কত্ৰা ‘‘থূপীকতম্পি ৰট্টতী’’তি যোজেতব্বং. পি-সদ্দেন অথূপীকতানি ৰট্টন্তীতি এত্থ কথাৰ নত্থীতি দস্সেতি. হেট্ঠা ওরোহতীতি সমন্তা ওকাসসব্ভাৰতো চালিযমানং হেট্ঠা ভস্সতি. তক্কোলৰটংসকাদযোতি এত্থ মত্থকে ঠপিততক্কোলমেৰ ৰটংসকসদিসত্তা তক্কোলৰটংসকং. আদিসদ্দেন পুপ্ফৰটংসককটুকফলাদিৰটংসকানং (পাচি. অট্ঠ. ৬০৫) গহণং, ন তং থূপীকতং নাম হোতি পাটেক্কং ভাজনত্তা পণ্ণাদীনং.

সমতিত্তিকাদিসিক্খাপদৰণ্ণনা নিট্ঠিতা.