পঞ্হসমোধানৰণ্ণনা

সমোধানেতব্বাতি সমাহরিতব্বা.

৩৪৯. ওকপ্পনাতি বলৰসদ্ধা. আযতিং ভিক্খূনং অৰিৰাদহেতুভূতং তত্থ তত্থ ভগৰতা দেসিতানং অত্থানং সঙ্গাযনং সঙ্গীতি, তস্স চ কারণং অযং সুত্তদেসনা তথা পৰত্তত্তাতি ৰুত্তং ‘‘সঙ্গীতিপরিযাযন্তি সামগ্গিযা কারণ’’ন্তি. সমনুঞ্ঞো সত্থা অহোসি ‘‘পটিভাতু ত,ং সারিপুত্ত, ভিক্খূনং ধম্মিং কথা’’তি উস্সাহেত্ৰা আদিতো পট্ঠায যাৰ পরিযোসানা সুণন্তো, সা পনেত্থ ভগৰতো সমনুঞ্ঞতা ‘‘সাধু, সাধূ’’তি অনুমোদনেন পাকটা জাতাতি ৰুত্তং ‘‘অনুমোদনেন সমনুঞ্ঞো অহোসী’’তি. জিনভাসিতো নাম জাতো, ন সাৰকভাসিতো. যথা হি রাজযুত্তেহি লিখিতপণ্ণং যাৰ রাজমুদ্দিকায ন লঞ্জিতং হোতি, ন তাৰ ‘‘রাজপণ্ণ’’ন্তি সঙ্খ্যং গচ্ছতি, লঞ্জিতমত্তং পন রাজপণ্ণং নাম হোতি. এৰমেৰ ‘‘সাধু, সাধু সারিপুত্তা’’তিআদি অনুমোদনৰচনসংসূচিতায সমনুঞ্ঞাসঙ্খাতায জিনৰচনমুদ্দায লঞ্জিতত্তা অযং সুত্তন্তো জিনভাসিতো নাম জাতো আহচ্চৰচনো. যং পনেত্থ অত্থতো ন ৰিভত্তং, তং সুৰিঞ্ঞেয্যমেৰাতি.

সঙ্গীতিসুত্তৰণ্ণনায লীনত্থপ্পকাসনা.