অসেক্খধম্মদসকৰণ্ণনা

ফলঞ্চ তে সম্পযুত্তধম্মা চাতি ফলসম্পযুত্তধম্মা, অরিযফলসভাৰা সম্পযুত্তা ধম্মাতি অত্থো. ফলসম্পযুত্তধম্মাতি ফলধম্মা চেৰ তংসম্পযুত্তধম্মা চাতি এৰমেত্থ অত্থো ৰেদিতব্বো. দ্ৰীসুপি ঠানেসু পঞ্ঞাৰ কথিতা সম্মা দস্সনট্ঠেন সম্মাদিট্ঠি, সম্মা জাননট্ঠেন সম্মাঞাণন্তি চ. অত্থি হি দস্সনজাননানং সৰিসযে পৰত্তিআকারৰিসেসো, স্ৰাযং হেট্ঠা দস্সিতো এৰ. ফলসমাপত্তিধম্মাতি ফলসমাপত্তিযং ধম্মা, ফলসমাপত্তিসহগতধম্মাতি অত্থো. অরিযফলসম্পযুত্তধম্মাপি হি সব্বসো পটিপক্খতো ৰিমুত্ততং উপাদায ‘‘ৰিমুত্তী’’তি ৰত্তব্বতং লভন্তি. কেনচি পন যথা অসেক্খা ফলপঞ্ঞা দস্সনকিচ্চং উপাদায ‘‘সম্মাদিট্ঠী’’তি ৰুত্তা, জাননকিচ্চং উপাদায ‘‘সম্মাঞাণ’’ন্তিপি ৰুত্তা এৰ; এৰং অরিযফলসমাধি সমাদানট্ঠং উপাদায ‘‘সম্মাসমাধী’’তি ৰুত্তো, ৰিমুচ্চনট্ঠং উপাদায ‘‘সম্মাৰিমুত্তী’’ তিপি ৰুত্তো. এৰঞ্চ কত্ৰা ‘‘অনাসৰং চেতোৰিমুত্তি’’ন্তি দুতিযৰিমুত্তিগ্গহণঞ্চ সমত্থিতং হোতীতি.

দসকৰণ্ণনা নিট্ঠিতা.