অরিযৰাসদসকৰণ্ণনা

৩৪৮. অরিযানমেৰ ৰাসাতি অরিযৰাসা অনরিযানং তাদিসানং অসম্ভৰতো. অরিযাতি চেত্থ উক্কট্ঠনিদ্দেসেন খীণাসৰা গহিতা, তে চ যস্মা তেহি সব্বকালং অৰিরহিতৰাসা এৰ, তস্মা ৰুত্তং ‘‘অরিযা এৰ ৰসিংসু ৰসন্তি ৰসিস্সন্তী’’তি. তত্থ ৰসিংসূতি নিস্সায ৰসিংসু. পঞ্চঙ্গৰিপ্পহীনত্তাদযো হি অরিযানং অপস্সযা. তেসু পঞ্চঙ্গৰিপ্পহানপচ্চেকসচ্চপনোদনএসনাসমৰযৰিস্সজ্জনানি ‘‘সঙ্খাযেকং পটিসেৰতি, অধিৰাসেতি, পরিৰজ্জেতি, ৰিনোদেতী’’তি ৰুত্তেসু অপস্সেনেসু ৰিনোদনঞ্চ মগ্গকিচ্চানেৰ, ইতরে মগ্গেনেৰ সমিজ্ঝন্তি.

ঞাণাদযোতি ঞাণঞ্চেৰ তংসম্পযুত্তধম্মা চ. তেনাহ ‘‘ঞাণন্তি ৰুত্তে’’তিআদি. তত্থ ৰত্তব্বং হেট্ঠা ৰুত্তমেৰ.

আরক্খকিচ্চং সাধেতি সতিৰেপুল্লপ্পত্তত্তা. ‘‘চরতো’’তিআদিনা নিচ্চসমাদানং দস্সেতি, তং ৰিক্খেপাভাৰেন দট্ঠব্বং.

পব্বজ্জুপগতাতি যং কিঞ্চি পব্বজ্জং উপগতা, ন সমিতপাপা. ভোৰাদিনোতি জাতিমত্তব্রাহ্মণে ৰদতি. পাটেক্কসচ্চানীতি তেহি তেহি দিট্ঠিগতিকেহি পাটিযেক্কং গহিতানি ‘‘ইদমেৰ সচ্চ’’ন্তি (ম. নি. ২.১৮৭, ২০৩, ৪২৭; ৩.২৭; উদা. ৫৫; নেত্তি. ৫৯) অভিনিৰিট্ঠানি দিট্ঠিসচ্চাদীনি. দিট্ঠিগতানিপি হি ‘‘ইদমেৰ সচ্চ’’ন্তি (ম. নি. ২.১৮৭, ২০২, ৪২৭; ৩.২৭, ২৯; নেত্তি. ৫৯) গহণং উপাদায ‘‘সচ্চানী’’তি ৰোহরীযন্তি. তেনাহ ‘‘ইদমেৰা’’তিআদি. নীহটানীতি অত্তনো সন্তানতো নীহরিতানি অপনীতানি. গহিতগ্গহণস্সাতি অরিযমগ্গাধিগমতো পুব্বে গহিতস্স দিট্ঠিগাহস্স. ৰিস্সট্ঠভাৰৰেৰচনানীতি অরিযমগ্গেন সব্বসো পরিচ্চাগভাৰস্স অধিৰচনানি.

নত্থি এতাসং ৰযো ৰেকল্যন্তি অৰযাতি আহ ‘‘অনূনা’’তি, অনৰসেসাতি অত্থো. এসনাতি হেট্ঠা ৰুত্তকামেসনাদযো.

মগ্গস্স কিচ্চনিপ্ফত্তি কথিতা রাগাদীনং পহীনভাৰদীপনতো.

পচ্চৰেক্খণায ফলং কথিতন্তি পচ্চৰেক্খণমুখেন অরিযফলং কথিতং. অধিগতে হি অগ্গফলে সব্বসো রাগাদীনং অনুপ্পাদধম্মতং পজানাতি, তঞ্চ পজাননং পচ্চৰেক্খণঞাণন্তি.