কুসলকম্মপথদসকৰণ্ণনা

পাণাতিপাতা …পে… ৰেদিতব্বানি লোকিযলোকুত্তরমিস্সকৰসেনেত্থ কুসলকম্মপথানং দেসিতত্তা. ৰেরহেতুতায ৰেরসঞ্ঞিতং পাণাতিপাতাদিপাপধম্মং মণতি ‘‘মযি ইধ ঠিতায কথং আগচ্ছসী’’তি তজ্জন্তী ৰিয নীহরতীতি ৰেরমণী, ৰিরমতি এতাযাতি ৰা ‘‘ৰিরমণী’’তি ৰত্তব্বে নিরুত্তিনযেন ‘‘ৰেরমণী’’তি ৰুত্তং. সমাদানৰসেন উপ্পন্না ৰিরতি সমাদানৰিরতি. অসমাদিন্নসীলস্স সম্পত্ততো যথাউপট্ঠিতৰীতিক্কমিতব্বৰত্থুতো ৰিরতি সম্পত্তৰিরতি. কিলেসানং সমুচ্ছিন্দনৰসেন পৰত্তা মগ্গসম্পযুত্তা ৰিরতি সমুচ্ছেদৰিরতি. কামঞ্চেত্থ পাল়িযং ৰিরতিযেৰ আগতা, সিক্খাপদৰিভঙ্গে (ৰিভ. ৭০৩) পন চেতনাপি আহরিত্ৰা দস্সিতাতি তদুভযম্পি গণ্হন্তো ‘‘চেতনাপি ৰত্তন্তি ৰিরতিযোপী’’তি আহ. অনভিজ্ঝা হি মূলং পত্ৰাতি কম্মপথকোট্ঠাসে ‘‘অনভিজ্ঝা’’তি ৰুত্তধম্মো মূলতো অলোভো কুসলমূলং হোতীতি এৰমেত্থ অত্থো দট্ঠব্বো. সেসপদদ্ৰযেপি এসেৰ নযো.

দুস্সীল্যারম্মণা তদারম্মণজীৰিতিন্দ্রিযাদিআরম্মণা কথং দুস্সীল্যানি পজহন্তীতি তং দস্সেতুং ‘‘যথা পনা’’তিআদি ৰুত্তং. পজহন্তীতি ৰেদিতব্বা পাণাতিপাতাদীহি ৰিরমণৰসেনেৰ পৰত্তনতো. অথ তদারম্মণভাৰে, ন সো তানি পজহতি. ন হি তদেৰ আরব্ভ তং পজহিতুং সক্কা ততো অৰিনিস্সটভাৰতো.

অনভিজ্ঝা…পে… ৰিরমন্তস্সাতি অভিজ্ঝং পজহন্তস্সাতি অত্থো. ন হি মনোদুচ্চরিততো ৰিরতি অত্থি অনভিজ্ঝাদীহেৰ তপ্পহানসিদ্ধিতো.