দসকৰণ্ণনা

৩৪৫. যেহি সীলাদীহি সমন্নাগতো ভিক্খু ধম্মসরণতায ধম্মেনেৰ নাথতি ঈসতি অভিভৰতীতি নাথোতি ৰুচ্চতি, তে তস্স নাথভাৰকরা ধম্মা ‘‘নাথকরণা’’তি ৰুত্তাতি আহ ‘‘সনাথা…পে… পতিট্ঠাকরা ধম্মা’’তি. তত্থ অত্তনো পতিট্ঠাকরাতি যস্স নাথভাৰকরা, তস্স অত্তনো পতিট্ঠাৰিধাযিনো. অপ্পতিট্ঠো অনাথো, সপ্পতিট্ঠো সনাথোতি পতিট্ঠত্থো নাথত্থো.

কল্যাণগুণযোগতো কল্যাণাতি দস্সেন্তো ‘‘সীলাদিগুণসম্পন্না’’তি আহ. মিজ্জনলক্খণা মিত্তা এতস্স অত্থীতি মিত্তো, সো ৰুত্তনযেন কল্যাণো অস্স অত্থীতি তস্স অত্থিতামত্তং কল্যাণমিত্তপদেন ৰুত্তং. অস্স তেন সব্বকালং অৰিজহিতৰাসোতি তং দস্সেতুং ‘‘কল্যাণসহাযো’’তি ৰুত্তন্তি আহ ‘‘তেৰস্সা’’তিআদি. তেৰস্সাতি তে এৰ কল্যাণমিত্তা অস্স ভিক্খুনো. সহ অযনতোতি সহ ৰত্তনতো. অসমোধানে চিত্তেন, সমোধানে পন চিত্তেন চেৰ কাযেন চ সম্পৰঙ্কো.

সুখং ৰচো এতস্মিং অনুকূলগাহিম্হি আদরগারৰৰতি পুগ্গলেতি সুৰচো. তেনাহ ‘‘সুখেন ৰত্তব্বো’’তিআদি. খমোতি খন্তা, তমেৰস্স খমভাৰং দস্সেতুং ‘‘গাল়্হেনা’’তিআদি ৰুত্তং. ৰামতোতি মিচ্ছা, অযোনিসো ৰা গণ্হাতি. পটিপ্ফরতীতি পটাণিকভাৰেন তিট্ঠতি. পদক্খিণং গণ্হাতীতি সম্মা যোনিসো ৰা গণ্হাতি.

উচ্চাৰচানীতি ৰিপুলখুদ্দকানি. তত্রুপগমনীযাতি তত্র তত্র মহন্তে, খুদ্দকে চ কম্মে সাধনৰসেন উপাযেন উপগচ্ছন্তিযা, তস্স তস্স কম্মস্স নিপ্ফাদনেন সমত্থাযাতি অত্থো. তত্রুপাযাযাতি ৰা তত্র তত্র কম্মে সাধেতব্বে উপাযভূতায.

ধম্মে অস্স কামোতি ধম্মকামোতি ব্যধিকরণানংপি বাহিরত্থো সমাসো হোতীতি কত্ৰা ৰুত্তং. কামেতব্বতো ৰা পিযাযিতব্বতো কামো, ধম্মো; ধম্মো কামো অস্সাতি ধম্মকামো. ধম্মোতি পরিযত্তিধম্মো অধিপ্পেতোতি আহ ‘‘তেপিটকং বুদ্ধৰচনং পিযাযতীতি অত্থো’’তি. সমুদাহরণং কথনং সমুদাহারো, পিযো সমুদাহারো এতস্সাতি পিযসমুদাহারো. সযঞ্চাতি এত্থ চ-সদ্দেন ‘‘সক্কচ্চ’’ন্তি পদং অনুকড্ঢতি, তেন সযঞ্চ সক্কচ্চং দেসেতুকামো হোতীতি যোজনা. অভিধম্মো সত্তপ্পকরণানি অধিকো অভিৰিসিট্ঠো চ পরিযত্তিধম্মোতি কত্ৰা. ৰিনযো উভতোৰিভঙ্গা ৰিনযনতো কাযৰাচানং. অভিৰিনযো খন্ধকপরিৰারা ৰিসেসতো আভিসমাচারিকধম্মকিত্তনতো. আভিসমাচারিকধম্মপারিপূরিৰসেনেৰ হি আদিব্রহ্মচরিযকধম্মপারিপূরী. ধম্মো এৰ পিটকদ্ৰযস্সাপি পরিযত্তিধম্মভাৰতো. মগ্গফলানি অভিধম্মো নিব্বানধম্মস্স অভিমুখোতি কত্ৰা. কিলেসৰূপসমকারণং পুব্বভাগিযা তিস্সো সিক্খা সঙ্খেপতো ৰিৰট্টনিস্সিতো সমথো ৰিপস্সনা চ. বহুলপামোজ্জোতি বলৰপামোজ্জো.

কারণত্থেতি নিমিত্তত্থে. কুসলধম্মনিমিত্তং হিস্স ৰীরিযারম্ভো. তেনাহ ‘‘তেসং অধিগমত্থাযা’’তি. কুসলেসু ধম্মেসূতি ৰা নিপ্ফাদেতব্বে ভুম্মং যথা ‘‘চেতসো অৰূপসমে অযোনিসোমনসিকারপদট্ঠান’’ন্তি.

৩৪৬. সকলট্ঠেনাতি নিস্সেসট্ঠেন, অনৰসেসফরণৰসেন চেত্থ সকলট্ঠো ৰেদিতব্বো, অসুভনিমিত্তাদীসু ৰিয একদেসে অট্ঠত্ৰা অনৰসেসতো গহেতব্বট্ঠেনাতি অত্থো. তদারম্মণানং ধম্মানন্তি তং কসিণং আরব্ভ পৰত্তনকধম্মানং. খেত্তট্ঠেনাতি উপ্পত্তিট্ঠানট্ঠেন. অধিট্ঠানট্ঠেনাতি পৰত্তিট্ঠানভাৰেন. যথা খেত্তং সস্সানং উপ্পত্তিট্ঠানং ৰড্ঢিট্ঠানঞ্চ, এৰমেতং ঝানং তংসম্পযুত্তানং ধম্মানন্তি, যোগিনো ৰা সুখৰিসেসানং কারণভাৰেন. ‘‘পরিচ্ছিন্দিত্ৰা’’ তি ইদং উদ্ধং অধোতি এত্থাপি যোজেতব্বং. পরিচ্ছিন্দিত্ৰা এৰ হি সব্বত্থ কসিণং ৰড্ঢেতব্বং. তেন তেন ৰা কারণেনাতি তেন তেন উপরিআদীসু কসিণৰড্ঢনকারণেন. যথা কিন্তি আহ ‘‘আলোকমিৰ রূপদস্সনকামো’’তি. যথা দিব্বচক্খুনা উদ্ধং চে রূপং দট্ঠুকামো, উদ্ধং আলোকং পসারেতি, অধো চে অধো, সমন্ততো চে রূপং দট্ঠুকামো সমন্ততো আলোকং পসারেতি; এৰমযং কসিণন্তি অত্থো.

একস্সাতি পথৰীকসিণাদীসু একেকস্স. অঞ্ঞভাৰানুপগমনত্থন্তি অঞ্ঞকসিণভাৰানুপগমনদীপনত্থং, অঞ্ঞস্স ৰা কসিণভাৰানুপগমনদীপনত্থং, ন হি অঞ্ঞেন পসারিতকসিণং ততো অঞ্ঞেন পসারিতকসিণভাৰং উপগচ্ছতি, এৰম্পি নেসং অঞ্ঞকসিণসম্ভেদাভাৰো ৰেদিতব্বো. ন অঞ্ঞং পথৰীআদি. ন হি উদকে ঠিতট্ঠানে সসম্ভারপথৰী অত্থি. অঞ্ঞো কসিণসম্ভেদোতি আপোকসিণাদিনা সঙ্করো. সব্বত্থাতি সব্বেসু সেসকসিণেসু. একদেসে অট্ঠত্ৰা অনৰসেসফরণং পমাণস্স অগ্গহণতো অপ্পমাণং. তেনেৰ হি নেসং কসিণসমঞ্ঞা. তথা চাহ ‘‘তঞ্হী’’তিআদি. চেতসা ফরন্তোতি ভাৰনাচিত্তেন আরম্মণং করোন্তো. ভাৰনাচিত্তঞ্হি কসিণং পরিত্তং ৰা ৰিপুলং ৰা সকলমেৰ মনসি করোতি, ন একদেসং.

কসিণুগ্ঘাটিমাকাসে পৰত্তৰিঞ্ঞাণং ফরণঅপ্পমাণৰসেন ‘‘ৰিঞ্ঞাণকসিণ’’ন্তি ৰুত্তং. তথা হি তং ‘‘ৰিঞ্ঞাণঞ্চ’’ন্তি ৰুচ্চতি. কসিণৰসেনাতি যথাউগ্ঘাটিতকসিণৰসেন. কসিণুগ্ঘাটিমাকাসে উদ্ধংঅধোতিরিযতা ৰেদিতব্বা. যত্তকঞ্হি ঠানং কসিণং পসারিতং, তত্তকং আকাসভাৰনাৰসেন আকাসো হোতীতি; এৰং যত্তকং ঠানং আকাসং হুত্ৰা উপট্ঠিতং, তত্তকং সকলমেৰ ফরিত্ৰা ৰিঞ্ঞাণস্স পৰত্তনতো আগমনৰসেন ৰিঞ্ঞাণকসিণেপি উদ্ধংঅধোতিরিযতা ৰুত্তাতি আহ ‘‘কসিণুগ্ঘাটিং আকাসৰসেন তত্থ পৰত্তৰিঞ্ঞাণে উদ্ধংঅধোতিরিযতা ৰেদিতব্বা’’তি.