নৰকৰণ্ণনা

৩৪০. ৰসতি তত্থ ফলং তন্নিমিত্তকতায পৰত্ততীতি ৰত্থু, কারণন্তি ৰুত্তোৰাযমত্থো. তেনাহ ‘‘আঘাতৰত্থূনীতি আঘাতকারণানী’’তি. কোপো নামাযং যস্মিং ৰত্থুস্মিং উপ্পজ্জতি, ন তত্থ একৰারমেৰ উপ্পজ্জতি, অথ খো পুনপি উপ্পজ্জতেৰাতি ৰুত্তং ‘‘বন্ধতী’’তি. অথ ৰা যো পচ্চযৰিসেসেন উপ্পজ্জমানো আঘাতো সৰিসযে বদ্ধো ৰিয ন ৰিগচ্ছতি, পুনপি উপ্পজ্জেয্যেৰ, তং সন্ধাযাহ ‘‘আঘাতং বন্ধতী’’তি. তং পনস্স পচ্চযৰসেন নিব্বত্তনং উপ্পাদনমেৰাতি ৰুত্তং ‘‘করোতি উপ্পাদেতী’’তি.

তং কুতেত্থ লব্ভাতি এত্থ তন্তি কিরিযাপরামসনং, পদজ্ঝাহারেন চ অত্থো ৰেদিতব্বোতি দস্সেন্তো ‘‘তং অনত্থচরণং মা অহোসী’’তিআদিমাহ. কেন কারণেন লদ্ধব্বং নিরত্থকভাৰতো. কম্মস্সকা হি সত্তা, তে কস্স রুচিযা দুক্খিতা, সুখিতা ৰা ভৰন্তি, তস্মা কেৰলং তস্মিং ময্হং কুজ্ঝনমত্তং এৰাতি অধিপ্পাযো. অথ ৰা তং কোপকরণমেত্থ পুগ্গলে কুতো লব্ভা পরমত্থতো কুজ্ঝিতব্বস্স, কুজ্ঝনকস্স চ অভাৰতো. সঙ্খারমত্তঞ্হেতং, যদিদং খন্ধপঞ্চকং. যং ‘‘সত্তো’’তি ৰুচ্চতি, তে সঙ্খারা ইত্তরকালা খণিকা, কস্স কো কুজ্ঝতীতি অত্থো. লাভা নাম কে সিযুং অঞ্ঞত্র অনুপ্পত্তিতো.

৩৪১. সত্তা আৰসন্তি এতেসূতি সত্তাৰাসা. নানত্তকাযা নানত্তসঞ্ঞী আদিভেদা সত্তনিকাযা. যস্মা তে তে সত্তনিকাযা তপ্পরিযাপন্নানং সত্তানং তায এৰ তপ্পরিযাপন্নতায আধারো ৰিয ৰত্তব্বতং অরহন্তি সমুদাযাধারতায অৰযৰস্স যথা ‘‘রুক্খে সাখা’’তি, তস্মা ‘‘সত্তানং আৰাসা, ৰসনট্ঠানানীতি অত্থো’’তি ৰুত্তং. সুদ্ধাৰাসাপি সত্তাৰাসোৰ ‘‘ন সো, ভিক্খৰে, সত্তাৰাসো সুলভরূপো, যো মযা অনাৰুত্থপুব্বো ইমিনা দীঘেন অদ্ধুনা অঞ্ঞত্র সুদ্ধাৰাসেহি দেৰেহী’’তি ৰচনতো. যদি এৰং কস্মা ইধ ন গহিতাতি তত্থ কারণমাহ ‘‘অসব্বকালিকত্তা’’তিআদি. ৰেহপ্ফলো পন চতুত্থংযেৰ সত্তাৰাসং ভজতীতি দট্ঠব্বং.

৩৪২. ওপসমিকোতি ৰট্টদুক্খস্স উপসমাৰহো, তং পন ৰট্টদুক্খং কিলেসেসু উপসন্তেসু উপসমতি, ন অঞ্ঞথা, তস্মা ‘‘কিলেসূপসমকরো’’তি ৰুত্তং. তক্করং সম্বোধং গমেতীতি সম্বোধগামী.

যস্মিং দেৰনিকাযে ধম্মদেসনা ন ৰিযুজ্জতি সৰনস্সেৰ অভাৰতো, সো পাল়িযং ‘‘দীঘাযুকো দেৰনিকাযো’’তি অধিপ্পেতোতি আহ ‘‘অসঞ্ঞভৰং ৰা অরূপভৰং ৰা’’তি.

৩৪৩. অনুপুব্বতো ৰিহরিতব্বাতি অনুপুব্বৰিহারা. অনুপটিপাটিযাতি অনুক্কমেন. সমাপজ্জিতব্বৰিহারাতি সমাপজ্জিত্ৰা সমঙ্গিনো হুত্ৰা ৰিহরিতব্বৰিহারা.

৩৪৪. অনুপুব্বনিরোধাতি অনুপুব্বেন অনুক্কমেন পৰত্তেতব্বনিরোধা. তেনাহ ‘‘অনুপটিপাটিযা নিরোধা’’তি.

নৰকৰণ্ণনা নিট্ঠিতা.