সত্তকৰণ্ণনা

৩৩০. সম্পত্তিপটিলাভট্ঠেনাতি সীলসম্পত্তিআদীনং সম্মাসম্বোধিপরিযোসানানং সম্পত্তীনং পটিলাভাপনট্ঠেন, সম্পত্তীনং ৰা পটিলাভো সম্পত্তিপটিলাভো, তস্স কারণং সম্পত্তিপটিলাভট্ঠো, তেন সম্পত্তিপটিলাভট্ঠেন. তেনেৰাহ ‘‘সম্পত্তীনং পটিলাভকারণতো’’তি. সদ্ধাৰ উভযহিতত্থিকেহি ধনাযিতব্বট্ঠেন ধনং সদ্ধাধনং. এত্থাতি এতেসু ধনেসু. সব্বসেট্ঠং সব্বেসং পটিলাভকারণভাৰতো, তেসঞ্চ সংকিলেসৰিসোধনেন মহাজুতিকমহাৰিপ্ফারভাৰাপাদনতো. তেনাহ ‘‘পঞ্ঞায হী’’তিআদি. তত্থ পঞ্ঞায ঠত্ৰাতি কম্মস্সকতাপঞ্ঞায পতিট্ঠায সুচরিতাদীনি পূরেত্ৰা সগ্গূপগা হোন্তি. তত্থ চেৰ পারমিতা পঞ্ঞায চ ঠত্ৰা সাৰকপারমিঞাণাদীনি পটিৰিজ্ঝন্তি.

সমাধিং পরিক্খরোন্তি অভিসঙ্খরোন্তীতি সমাধিপরিক্খারা, সমাধিস্স সম্ভারভূতা সম্মাদিট্ঠিআদযো. ইধ পন সহকারীকারণভূতা অধিপ্পেতাতি আহ ‘‘সমাধিপরিৰারা’’তি.

অসতং অসাধূনং ধম্মা তেসং অসাধুভাৰসাধনতো. অসন্তাতি অসুন্দরা গারয্হা. তেনাহ ‘‘লামকা’’তি. ‘‘ৰিপস্সকস্সেৰ কথিতা’’তি ৰত্ৰা তস্স ৰিপস্সনানিব্বত্তিং দস্সেতুং ‘‘তেসুপী’’তিআদি ৰুত্তং. চতুন্নম্পি হি সচ্চানং ৰিসেসেন দস্সনতো মগ্গপঞ্ঞা সাতিসযং ‘‘ৰিপস্সনা’’তি ৰত্তব্বা, তংসমঙ্গী চ অরিযো ৰিপস্সনকোতি.

সপ্পুরিসানং ধম্মাতি সপ্পুরিসানংযেৰ ধম্মা, ন অসপ্পুরিসানং. ধম্মানুধম্মপটিপত্তিযা এৰ হি ধম্মঞ্ঞুআদিভাৰো, ন পাল়িধম্মপঠনাদিমত্তেন. ভাসিতস্সাতি সুত্তগেয্যাদিভাসিতস্স চেৰ তদঞ্ঞস্স চ অত্তত্থপরত্থবোধকস্স পদস্স. অত্থকুসলতাৰসেন অত্থং জানাতীতি অত্থঞ্ঞূ. অত্তানং জানাতীতি যাথাৰতো অত্তনো পমাণজাননৰসেন অত্তানং জানাতি. পটিগ্গহণপরিভোগমত্তঞ্ঞুতাহি এৰ পরিযেসনৰিস্সজ্জনমত্তঞ্ঞুতাপি বোধিতা হোন্তীতি ‘‘পটিগ্গহণপরিভোগেসু’’ ইচ্চেৰ ৰুত্তং. এৰঞ্হি তা অনৰজ্জা হোন্তীতি. যোগস্স অধিগমাযাতি ভাৰনায অনুযুঞ্জনস্স. অতিসম্বাধন্তি অতিখুদ্দকং অতিক্খপঞ্ঞস্স তাৰতা কালেন তীরেতুং অসক্কুণেয্যত্তা. অট্ঠৰিধং পরিসন্তি খত্তিযপরিসাদিকং অট্ঠৰিধং পরিসং. ভিক্খুপরিসাদিকং চতুব্বিধং খত্তিযপরিসাদিকং মনুস্সপরিসংযেৰ পুন চতুব্বিধং গহেত্ৰা অট্ঠৰিধং ৰদন্তি অপরে. ‘‘ইমং মে সেৰন্তস্স অকুসলা ধম্মা পরিহাযন্তি, কুসলা ধম্মা অভিৰড্ঢন্তি, তস্মা সেৰিতব্বো, ৰিপরিযাযতো তদঞ্ঞো অসেৰিতব্বো’’তি এৰং সেৰিতব্বাসেৰিতব্বং পুগ্গলং জানাতীতি পুগ্গলঞ্ঞূ. এৰং তেসং পুগ্গলানম্পি বোধনং উক্কট্ঠং, নিহীনং ৰা জানাতি নাম.

৩৩১. ‘‘নিদ্দসৰত্থূনী’’তি. ‘‘আদি-সদ্দলোপেনাযং নিদ্দেসো’’তি আহ ‘‘নিদ্দসাদিৰত্থূনী’’তি. নত্থি দানি ইমস্স দসাতি নিদ্দসো. পঞ্হোতি ঞাতুং ইচ্ছিতো অত্থো. পুন দসৰস্সো ন হোতীতি তেসং মতিমত্তন্তি দস্সেতুং ‘‘সো কিরা’’তি কিরসদ্দগ্গহণং. ‘‘নিদ্দসো’’তি চেতং দেসনামত্তং, তস্স নিব্বীসাদিভাৰস্স ৰিয নিন্নৰাদিভাৰস্স চ ইচ্ছিতত্তাতি দস্সেতুং ‘‘ন কেৰলঞ্চা’’তিআদি ৰুত্তং. গামে ৰিচরন্তোতি গামে পিণ্ডায ৰিচরন্তো.

ন ইদং তিত্থিযানং অধিৰচনং তেসু তন্নিমিত্তস্স অভাৰা. সাসনেপি সেক্খস্সাপি ন ইদং অধিৰচনং, কিমঙ্গং পন পুথুজ্জনস্স. যস্স পনেতং অধিৰচনং, যেন চ কারণেন, তং দস্সেতুং ‘‘খীণাসৰস্সেত’’ন্তিআদি ৰুত্তং. অপ্পটিসন্ধিকভাৰো হিস্স পচ্চক্খতো কারণং. পরম্পরায ইতরানি, যানি পাল়িযং আগতানি.

সিক্খায সম্মদেৰ আদানং সিক্খাসমাদানং, তং পনস্সা পারিপূরিযা ৰেদিতব্বন্তি আহ ‘‘সিক্খত্তযপূরণে’’তি. সিক্খায ৰা সম্মদেৰ আদিতো পট্ঠায রক্খণং সিক্খাসমাদানং, তঞ্চ অত্থতো পূরণে পরিচ্ছিন্নং অরক্খণে সব্বেন সব্বং অভাৰতো, রক্খণে চ পরিপূরণতো. বহলচ্ছন্দোতি দল়্হচ্ছন্দো. আযতিন্তি অনন্তরানাগতদিৰসাদিকালো অধিপ্পেতো, ন অনাগতভৰোতি আহ ‘‘অনাগতে পুনদিৰসাদীসুপী’’তি. সিক্খং পরিপূরেন্তস্স তত্থ নিৰিট্ঠঅত্থিতা অৰিগতপেমতা, তেভূমকধম্মানং অনিচ্চাদিৰসেন সম্মদেৰ নিজ্ঝানং ধম্মনিসামনাতি আহ ‘‘ৰিপস্সনাযেতং অধিৰচন’’ন্তি. তণ্হাৰিনযনেতি ৰিরাগানুপস্সনাদিৰিপস্সনাঞাণানুভাৰসিদ্ধে তণ্হাৰিক্খম্ভনে. একীভাৰেতি গণসঙ্গণিকাকিলেসসঙ্গণিকাৰিগমসিদ্ধে ৰিৰেকভাৰে. ৰীরিযারম্ভেতি সম্মপ্পধানৰীরিযস্স পগ্গণ্হনে, তং পন সব্বসো ৰীরিযস্স পরিব্রূহনং হোতীতি আহ ‘‘কাযিকচেতসিকস্স ৰীরিযস্স পূরণে’’তি. সতিযঞ্চেৰ নেপক্কভাৰে চাতি সতোকারিতায চেৰ সম্পজানকারিতায চ. সতিসম্পজঞ্ঞবলেনেৰ ৰীরিযারম্ভো ইজ্ঝতি. দিট্ঠিপটিৰেধেতি সম্মাদিট্ঠিযা পটিৰিজ্ঝনে. তেনাহ ‘‘মগ্গদস্সনে’’তি. সচ্চসম্পটিৰেধে হি ইজ্ঝমানে মগ্গসম্মাদিট্ঠি সিদ্ধা এৰ হোতি.

অসুভানুপস্সনাঞাণেতি দসৰিধস্স, একাদসৰিধস্সাপি ৰা অসুভস্স অনুপস্সনাৰসেন পৰত্তঞাণে. ইদঞ্হি দুক্খানুপস্সনায পরিচযঞাণং. আদীনৰানুপস্সনাঞাণেতি সঙ্খারানং অনিচ্চদুক্খৰিপরিণামতাসংসূচিতস্স আদীনৰস্স অনুপস্সনাৰসেন পৰত্তঞাণে. অপ্পহীনট্ঠেনাতি মগ্গেন অসমুচ্ছিন্নভাৰেন. অনুসেন্তীতি সন্তানে অনু অনু সযন্তি. কারণলাভে হি সতি উপ্পন্নারহা কিলেসা সন্তানে অনু অনু সযিতা ৰিয হোন্তি, তস্মা তে তদৰত্থা ‘‘অনুসযা’’তি ৰুচ্চন্তি. থামগতোতি থামপ্পত্তো. থামগমনঞ্চ অঞ্ঞেহি অসাধারণো কামরাগাদীনমেৰ আৰেণিকো সভাৰো দট্ঠব্বো. তথা হি ৰুত্তং অভিধম্মে ‘‘থামগতানুসযং পজহতী’’তি. কামরাগো এৰ অনুসযো কামরাগানুসযো. যে পন ‘‘কামরাগস্স অনুসযো কামরাগানুসযো’’তি ৰদন্তি, তং তেসং মতিমত্তং. ন হি কামরাগৰিনিমুত্তো কামরাগানুসযো নাম কোচি অত্থি. যদি ‘‘তস্স বীজ’’ন্তি ৰদেয্যুং, তম্পি তব্বিনিমুত্তং পরমত্থতো ন উপলব্ভতেৰাতি. এসেৰ নযো সেসেসুপি.