অধিকরণসমথসত্তকৰণ্ণনা

অধিকরীযন্তি এত্থাতি অধিকরণানি. কে অধিকরীযন্তি? সমথা. কথং অধিকরীযন্তীতি? সমনৰসেন, তস্মা তে তেসং সমনৰসেন পৰত্তন্তীতি আহ ‘‘অধিকরণানি সমেন্তী’’তিআদি. উপ্পন্নানং উপ্পন্নানন্তি উট্ঠিতানং উট্ঠিতানং. সমথত্থন্তি সমনত্থং.

‘‘অট্ঠারসহি ৰত্থূহী’’তি লক্খণৰচনমেতং যথা ‘‘যদি মে ব্যাধী দাহেয্যুং দাতব্বমিদমোসধ’’ন্তি, তস্মা তেসু অঞ্ঞতরঞ্ঞতরেন ৰিৰদন্তা ‘‘অট্ঠারসহি ৰত্থূহি ৰিৰদন্তী’’তি ৰুচ্চন্তি. উপৰদনাতি অক্কোসো. চোদনাতি অনুযোগো.

অধিকরণস্স সম্মুখাৰ ৰিনযনতো সম্মুখাৰিনযো. সন্নিপতিতপরিসায ধম্মৰাদীনং যেভুয্যতায যেভুয্যসিককম্মস্স করণং যেভুয্যসিকা. অযন্তি অযং যথাৰুত্তা চতুব্বিধা সম্মুখতা সম্মুখাৰিনযো নাম.

সঙ্ঘসামগ্গিৰসেন সম্মুখীভাৰো, ন যথা তথা কারকপুগ্গলানং সম্মুখাতা. ভূততাতি তচ্ছতা. সচ্চপরিযাযো হি ইধ ধম্ম-সদ্দো ‘‘ধম্মৰাদী’’তিআদীসু (দী. নি. ১.৯, ১৯৪) ৰিয. ৰিনেতি এতেনাতি ৰিনযো, তস্স তস্স অধিকরণস্স ৰূপসমনায ভগৰতা ৰুত্তৰিধি, তস্স ৰিনযস্স সম্মুখতা ৰিনযসম্মুখতা. তেনাহ ‘‘যথা তং…পে… সম্মুখতা’’তি. যেনাতি যেন পুগ্গলেন. ৰিৰাদৰত্থুসঙ্খাতে অত্থে পচ্চত্থিকা অত্থপচ্চত্থিকা. সঙ্ঘসম্মুখতা পরিহাযতি সম্মতপুগ্গলেহেৰ ৰূপসমনতো.

নন্তি ৰিৰাদাধিকরণং. ‘‘ন ছন্দাগতিং গচ্ছতী’’তিআদিনা ৰুত্তং পঞ্চঙ্গসমন্নাগতং. গুল়্হকাদীসু অলজ্জুস্সন্নায পরিসায গুল়্হকো সলাকগ্গাহো কাতব্বো লজ্জুস্সন্নায ৰিৰটকো, বালুস্সন্নায সকণ্ণজপ্পকো. যস্সা কিরিযায ধম্মৰাদিনো বহুতরা, সা যেভুয্যসিকাতি আহ ‘‘ধম্মৰাদীনং যেভুয্যতাযা’’তিআদি.

‘‘চতূহি সমথেহি সম্মতী’’তি ইদং সব্বসঙ্গাহিকৰসেন ৰুত্তং. তত্থ পন দ্ৰীহি দ্ৰীহি এৰ ৰূপসমনং দট্ঠব্বং. এৰং ৰিনিচ্ছিতন্তি সচে আপত্তি নত্থি, উভো খমাপেত্ৰা, অথ অত্থি, আপত্তিং দস্সেত্ৰা রোপনৰসেন ৰিনিচ্ছিতং. পটিকম্মং পন আপত্তাধিকরণসমথে পরতো আগমিস্সতি.

ন সমণসারুপ্পং অস্সামণকং, সমণেহি অকত্তব্বং, তস্মিং. অজ্ঝাচারে ৰীতিক্কমে সতি.

পটিচরতোতি পটিচ্ছাদেন্তস্স. পাপুস্সন্নতায পাপিযো, পুগ্গলো, তস্স কত্তব্বকম্মং তস্স পাপিযসিকং. সম্মুখাৰিনযেনেৰ ৰূপসমো নত্থি পটিঞ্ঞায তথারূপায, খন্তিযা ৰা ৰিনা অৰূপসমনতো.

এত্থাতি আপত্তিদেসনায. পটিঞ্ঞাতে আপন্নভাৰাদিকে করণং কিরিযা ‘‘আযতিং সংৰরেয্যাসী’’তি, পরিৰাসদানাদিৰসেন চ পৰত্তং ৰচীকম্মং পটিঞ্ঞাতকরণং.

যথানুরূপন্তি ‘‘দ্ৰীহি সমথেহি চতূহি তীহি একেনা’’তি এৰং ৰুত্তনযেন যথানুরূপং. এত্থাতি ইমস্মিং সুত্তে, ইমস্মিং ৰা সমথৰিচারে. ৰিনিচ্ছযনযোতি ৰিনিচ্ছযে নযমত্তং. তেনাহ ‘‘ৰিত্থারো পনা’’তিআদি. সমন্তপাসাদিকাযং ৰিনযট্ঠকথায (চূল়ৰ. অট্ঠ. ১৮৪-১৮৭) ৰুত্তো, তস্মা ৰুত্তনযেনেৰ ৰেদিতব্বোতি অধিপ্পাযো.

সত্তকৰণ্ণনা নিট্ঠিতা.

নিট্ঠিতা চ দুতিযভাণৰারৰণ্ণনা.