অত্তপঞ্ঞত্তিৰণ্ণনা

১১৭. অনুসন্ধিযতি এতেনাতি অনুসন্ধি, হেট্ঠা আগতদেসনায অনুসন্ধানৰসেন পৰত্তা উপরিদেসনা, সা পঠমপদস্স দস্সিতা, ইদানি দুতিযপদস্স দস্সেতব্বাতি তমত্থং দস্সেন্তো ‘‘ইতি ভগৰা’’তিআদিমাহ. রূপিন্তি রূপৰন্তং. পরিত্তন্তি ন ৰিপুলং, অপ্পকন্তি অত্থো. যস্মা অত্তা নাম কোচি পরমত্থতো নত্থি. কেৰলং পন দিট্ঠিগতিকানং পরিকপ্পিতমত্তং, তস্মা যত্থ নেসং অত্তসঞ্ঞা, যথা চস্স রূপিভাৰাদিপরিকপ্পনা হোতি, তং দস্সেন্তো ‘‘যো’’তিআদিমাহ. রূপিং পরিত্তন্তি অত্তনো উপট্ঠিতকসিণরূপৰসেন রূপিং, তস্স অৰড্ঢিতভাৰেন পরিত্তং. পঞ্ঞপেতি নীলকসিণাদিৰসেন নানাকসিণলাভী. তন্তি অত্তানং. অনন্তন্তি কসিণনিমিত্তস্স অপ্পমাণতায পরিচ্ছেদস্স অনুপট্ঠানতো অন্তরহিতং. উগ্ঘাটেত্ৰাতি ভাৰনায অপনেত্ৰা. নিমিত্তফুট্ঠোকাসন্তি তেন কসিণনিমিত্তেন ফুট্ঠপ্পদেসং. তেসূতি চতূসু অরূপক্খন্ধেসু. ৰিঞ্ঞাণমত্তমেৰাতি ‘‘ৰিঞ্ঞাণমযো অত্তা’’তি এৰংৰাদী.

১১৮. ‘‘এতরহী’’তি সাৰধারণমিদং পদন্তি তদত্থং দস্সেন্তো ‘‘ইদানেৰা’’তি ৰত্ৰা অৰধারণেন নিৰত্তিতমত্থং আহ ‘‘ন ইতো পর’’ন্তি. তত্থ তত্থেৰ সত্তা উচ্ছিজ্জন্তীতি উচ্ছেদৰাদী, তেনাহ ‘‘উচ্ছেদৰসেনেতং ৰুত্ত’’ন্তি. ভাৰিন্তি সব্বং সদা ভাৰিং অৰিনস্সনকং. তেনাহ ‘‘সস্সতৰসেনেতং ৰুত্ত’’ন্তি. অতথাসভাৰন্তি যথা পরৰাদী ৰদন্তি, ন তথা সভাৰং. তথভাৰাযাতি উচ্ছেদভাৰায ৰা সস্সতভাৰায ৰা. অনিযমৰচনঞ্হেতং ৰুত্তং সামঞ্ঞজোতনাৰসেন. সম্পাদেস্সামীতি তথভাৰং অস্স সম্পন্নং কত্ৰা দস্সযিস্সামি, পতিট্ঠাপেস্সামীতি অত্থো. তথা হি ৰক্খতি ‘‘সস্সতৰাদঞ্চ জানাপেত্ৰা’’তিআদি. (দী. নি. অট্ঠ. ২.১১৮) ইমিনাতি ‘‘অতথং ৰা পনা’’তিআদি ৰচনেন, অনুচ্ছেদসভাৰম্পি সমানং সস্সতৰাদিনো মতিৰসেনাতি অধিপ্পাযো. উপকপ্পেস্সামীতি উপেচ্চ সমত্থযিস্সামি.

এৰং সমানন্তি এৰং ভূতং সমানং. রূপকসিণজ্ঝানং রূপং উত্তরপদলোপেন, অধিগমনৰসেন তং এতস্স অত্থীতি রূপীতি আহ ‘‘রূপিন্তি রূপকসিণলাভি’’ন্তি. পরিত্তত্তানুদিট্ঠীতি এত্থ রূপী-সদ্দোপিআৰুত্তিআদিনযেন আনেত্ৰা ৰত্তব্বো, রূপীভাৰম্পি হি সো দিট্ঠিগতিকো পরিত্তভাৰং ৰিয অত্তনো অভিনিৰিস্স ঠিতোতি. অরূপিন্তি এত্থাপি এসেৰ নযো. ‘‘পত্তপলাসবহুলগচ্ছসঙ্খেপেন ঘনগহনজটাৰিতানা নাতিদীঘসন্তানা ৰল্লি, তব্বিপরীতা লতা’’তি ৰদন্তি. অপ্পহীনট্ঠেনাতি মগ্গেন অসমুচ্ছিন্নভাৰেন. কারণলাভে সতি উপ্পজ্জনারহতা অনুসযনট্ঠো.

অরূপকসিণং নাম কসিণুগ্ঘাটিং আকাসং, ন পরিচ্ছিন্নাকাসকসিণং. ‘‘উভযম্পি অরূপকসিণমেৰা’’তি কেচি. অরূপক্খন্ধগোচরং ৰাতি ৰেদনাদযো অরূপক্খন্ধা ‘‘অত্তা’’তি অভিনিৰেসস্স গোচরো এতস্সাতি অরূপক্খন্ধগোচরো, দিট্ঠিগতিকো, তং অরূপক্খন্ধগোচরং. ৰা-সদ্দো ৰুত্তৰিকপ্পত্থো. সদ্দযোজনা পন অরূপং অরূপক্খন্ধা গোচরভূতা এতস্স অত্থীতি অরূপী, তং অরূপিং. লাভিনো চত্তারোতি রূপকসিণাদিলাভৰসেন তং তং দিট্ঠিৰাদং সযমেৰ পরিকপ্পেত্ৰা তং আদায পগ্গয্হ পঞ্ঞাপনকা চত্তারো দিট্ঠিগতিকা. তেসং অন্তেৰাসিকাতি তেসং লাভীনং ৰাদং পচ্চক্খতো, পরম্পরায চ উগ্গহেত্ৰা তথেৰ নং খমিত্ৰা রোচেত্ৰা পঞ্ঞাপনকা চত্তারো. তক্কিকা চত্তারোতি কসিণজ্ঝানস্স অলাভিনো কেৰলং তক্কনৰসেনেৰ যথাৰুত্তে চত্তারো দিট্ঠিৰাদে সযমেৰ অভিনিৰিস্স পগ্গয্হ ঠিতা চত্তারো. তেসং অন্তেৰাসিকা পুব্বে ৰুত্তনযেন ৰেদিতব্বা.