ভৰপদনিদ্দেসৰণ্ণনা

২৩৪. ফলৰোহারেন কম্মভৰো ভৰোতি ৰুত্তোতি উপপত্তিভৰনিব্বচনমেৰ দ্ৰযস্সপি সাধারণং কত্ৰা ৰদন্তো আহ ‘‘ভৰতীতি ভৰো’’তি. ভৰং গচ্ছতীতি নিপ্ফাদনফলৰসেন অত্তনো পৰত্তিকালে ভৰাভিমুখং হুত্ৰা পৰত্ততীতি অত্থো, নিব্বত্তনমেৰ ৰা এত্থ গমনং অধিপ্পেতং.

সঞ্ঞাৰতং ভৰো সঞ্ঞাভৰোতি এত্থ ৰন্তু-সদ্দস্স লোপো দট্ঠব্বো, তস্স ৰা অত্থে অকারং কত্ৰা ‘‘সঞ্ঞভৰো’’তিপি পাঠো. ৰোকিরীযতি পসারীযতি ৰিত্থারীযতীতি ৰোকারো, ৰোকিরণং ৰা ৰোকারো, সো একস্মিং পৰত্তত্তা একো ৰোকারোতি ৰুত্তো, পদেসপসটুপ্পত্তীতি অত্থো.

চেতনাসম্পযুত্তা ৰা…পে… সঙ্গহিতাতি আচযগামিতায কম্মসঙ্খাততং দস্সেত্ৰা কম্মভৰে সঙ্গহিতভাৰং পরিযাযেন ৰদতি, নিপ্পরিযাযেন পন চেতনাৰ কম্মভৰো. ৰুত্তঞ্হি ‘‘কম্মভৰো তীহি খন্ধেহি একেনাযতনেন একায ধাতুযা সম্পযুত্তো, একেন খন্ধেন একেনাযতনেন একায ধাতুযা কেহিচি সম্পযুত্তো’’তি (ধাতু. ২৪৪). উপপত্তিভৰো তীহিপি তিকেহি ৰুত্তা উপপত্তিক্খন্ধাৰ. যথাহ ‘‘উপপত্তিভৰো কামভৰো সঞ্ঞাভৰো পঞ্চৰোকারভৰো পঞ্চহি খন্ধেহি একাদসহাযতনেহি সত্তরসহি ধাতূহি সঙ্গহিতো’’তিআদি (ধাতু. ৬৭). যদি হি অনুপাদিন্নকানম্পি গহণং সিযা, ‘‘দ্ৰাদসহাযতনেহি অট্ঠারসহি ধাতূহী’’তি ৰত্তব্বং সিযাতি.

সঙ্খারভৰানং ধম্মভেদতো ন সঙ্খারা এৰ পুন ৰুত্তাতি ‘‘সাত্থকমেৰিদং পুনৰচন’’ন্তি এতং ন যুত্তন্তি চে? ন, ভৰেকদেসভাৰেন সঙ্খারানং ভৰোতি পুন ৰুত্তত্তা. পরেন ৰা ধম্মৰিসেসং অগণেত্ৰা পুনৰচনং চোদিতন্তি চোদকাভিলাসৰসেন ‘‘সাত্থকমেৰিদং পুনৰচন’’ন্তি ৰুত্তং.

কামভৰাদিনিব্বত্তনকস্স কম্মস্স কামভৰাদিভাৰো ফলৰোহারেন অট্ঠকথাযং ৰুত্তো. অন্তোগধে ৰিসুং অগণেত্ৰা অব্ভন্তরগতে এৰ কত্ৰা কামভৰাদিকে কম্মুপপত্তিভৰৰসেন দুগুণে কত্ৰা আহ ‘‘ছ ভৰা’’তি.

অৰিসেসেনাতি উপাদানভেদং অকত্ৰাতি অত্থো. উপাদানভেদাকরণেনেৰ চ দ্ৰাদসপ্পভেদস্স সঙ্গহৰসেন সঙ্গহতো ‘‘ছ ভৰা’’তি ৰুত্তং.

গোসীলেন কুক্কুরসীলেন চ সমত্তেন সমাদিন্নেন গুন্নং কুক্কুরানঞ্চ সহব্যতা ৰুত্তাতি সীলব্বতুপাদানৰতো ঝানভাৰনা ন ইজ্ঝতীতি মঞ্ঞমানা তেন রূপারূপভৰা ন হোন্তীতি কেচি ৰদন্তি, ৰক্খমানেন পন পকারেন পচ্চযভাৰতো ‘‘তং ন গহেতব্ব’’ন্তি আহ. অসুদ্ধিমগ্গে চ সুদ্ধিমগ্গপরামসনং সীলব্বতুপাদানন্তি সুদ্ধিমগ্গপরামসনেন রূপারূপাৰচরজ্ঝানানং নিব্বত্তনং ন যুজ্জতীতি. পুরাণভারতসীতাহরণপসুবন্ধৰিধিআদিসৰনং অসদ্ধম্মসৰনং. আদি-সদ্দেন অসপ্পুরিসূপনিস্সযং পুব্বে চ অকতপুঞ্ঞতং অত্তমিচ্ছাপণিধিতঞ্চ সঙ্গণ্হাতি. তদন্তোগধা এৰাতি তস্মিং দুচ্চরিতনিব্বত্তে সুচরিতনিব্বত্তে চ কামভৰে অন্তোগধা এৰাতি অত্থো.

অন্তোগধাতি চ সঞ্ঞাভৰপঞ্চৰোকারভৰানং একদেসেন অন্তোগধত্তা ৰুত্তং. ন হি তে নিরৰসেসা কামভৰে অন্তোগধাতি. সপ্পভেদস্সাতি সুগতিদুগ্গতিমনুস্সাদিপ্পভেদৰতো. কমেন চ অৰত্ৰা সীলব্বতুপাদানস্স অন্তে ভৰপচ্চযভাৰৰচনং অত্তৰাদুপাদানং ৰিয অভিণ্হং অসমুদাচরণতো অত্তৰাদুপাদাননিমিত্তত্তা চ.

হেতুপচ্চযপ্পভেদেহীতি এত্থ মগ্গপচ্চযো চ ৰত্তব্বো. দিট্ঠুপাদানাদীনি হি মগ্গপচ্চযা হোন্তীতি.

ভৰপদনিদ্দেসৰণ্ণনা নিট্ঠিতা.