নমো তস্স ভগৰতো অরহতো সম্মাসম্বুদ্ধস্স

অভিধম্মপিটকে

ৰিভঙ্গ-মূলটীকা

১. খন্ধৰিভঙ্গো

১. সুত্তন্তভাজনীযৰণ্ণনা

চতুসচ্চদসোতি চত্তারি সচ্চানি সমাহটানি চতুসচ্চং, চতুসচ্চং পস্সীতি চতুসচ্চদসো. সতিপি সাৰকানং পচ্চেকবুদ্ধানঞ্চ চতুসচ্চদস্সনভাৰে অনঞ্ঞপুব্বকত্তা ভগৰতো চতুসচ্চদস্সনস্স তত্থ চ সব্বঞ্ঞুতায দসবলেসু চ ৰসীভাৰস্স পত্তিতো পরসন্তানেসু চ পসারিতভাৰেন সুপাকটত্তা ভগৰাৰ ৰিসেসেন ‘‘চতুসচ্চদসো’’তি থোমনং অরহতীতি. নাথতীতি নাথো, ৰেনেয্যানং হিতসুখং আসীসতি পত্থেতি, পরসন্তানগতং ৰা কিলেসব্যসনং উপতাপেতি, ‘‘সাধু, ভিক্খৰে, ভিক্খু কালেন কালং অত্তসম্পত্তিং পচ্চৰেক্খিতা’’তিআদিনা (অ. নি. ৮.৭) ৰা তং তং হিতপটিপত্তিং যাচতীতি অত্থো. পরমেন চিত্তিস্সরিযেন সমন্নাগতো, সব্বসত্তে ৰা গুণেহি ঈসতি অভিভৰতীতি পরমিস্সরো ভগৰা ‘‘নাথো’’তি ৰুচ্চতি. ‘‘সদ্ধম্মে গারৰং কত্ৰা করিস্সামী’’তি সোতব্বভাৰে কারণং ৰত্ৰা পুন সৰনে নিযোজেন্তো আহ ‘‘তং সুণাথ সমাহিতা’’তি. ‘‘পোরাণট্ঠকথানযং ৰিগাহিত্ৰা করিস্সামী’’তি ৰা এতেন সক্কচ্চসৰনে চ কারণং ৰত্ৰা তত্থ নিযোজেন্তো আহ ‘‘সদ্ধম্মে গারৰং কত্ৰা তং সুণাথা’’তি.

এত্থ চ ‘‘চতুসচ্চদসো’’তি ৰচনং থোমনমেৰ চতুপ্পভেদায দেসনায সমানগণনদস্সনগুণেন, ‘‘অট্ঠারসহি বুদ্ধধম্মেহি উপেতো’’তি চ অট্ঠারসপ্পভেদায দেসনায সমানগণনগুণেহীতি দট্ঠব্বং. যথাৰুত্তেন ৰা নিরতিসযেন চতুসচ্চদস্সনেন ভগৰা চতুধা ধম্মসঙ্গণিং দেসেতুং সমত্থো অহোসি, অট্ঠারসবুদ্ধধম্মসমন্নাগমেন অট্ঠারসধা ৰিভঙ্গন্তি যথাৰুত্তদেসনাসমত্থতাসম্পাদকগুণনিদস্সনমেতং ‘‘চতুসচ্চদসো উপেতো বুদ্ধধম্মেহি অট্ঠারসহী’’তি. তেন যথাৰুত্তায দেসনায সব্বঞ্ঞুভাসিতত্তা অৰিপরীততং দস্সেন্তো তত্থ সত্তে উগ্গহাদীসু নিযোজেতি, নিট্ঠানগমনঞ্চ অত্তনো ৰাযামং দস্সেন্তো অট্ঠকথাসৰনে চ আদরং উপ্পাদযতি, যথাৰুত্তগুণরহিতেন অসব্বঞ্ঞুনা দেসেতুং অসক্কুণেয্যতং ধম্মসঙ্গণীৰিভঙ্গপ্পকরণানং দস্সেন্তো তত্থ তদট্ঠকথায চ সাতিসযং গারৰং জনযতি, বুদ্ধাদীনঞ্চ রতনানং সম্মাসম্বুদ্ধতাদিগুণে ৰিভাৰেতি.

তত্থ চত্তারি সচ্চানি পাকটানেৰ, অট্ঠারস পন বুদ্ধধম্মা এৰং ৰেদিতব্বা – ‘‘অতীতংসে বুদ্ধস্স ভগৰতো অপ্পটিহতং ঞাণং, অনাগতংসে…পে… পচ্চুপ্পন্নংসে…পে… ইমেহি তীহি ধম্মেহি সমন্নাগতস্স বুদ্ধস্স ভগৰতো সব্বং কাযকম্মং ঞাণপুব্বঙ্গমং ঞাণানুপরিৰত্তং, সব্বং ৰচীকম্মং…পে. … সব্বং মনোকম্মং…পে… ইমেহি ছহি ধম্মেহি সমন্নাগতস্স বুদ্ধস্স ভগৰতো নত্থি ছন্দস্স হানি, নত্থি ধম্মদেসনায, নত্থি ৰীরিযস্স, নত্থি সমাধিস্স, নত্থি পঞ্ঞায, নত্থি ৰিমুত্তিযা হানি. ইমেহি দ্ৰাদসহি ধম্মেহি সমন্নাগতস্স বুদ্ধস্স ভগৰতো নত্থি দৰা, নত্থি রৰা, নত্থি অফুটং, নত্থি ৰেগাযিতত্তং, নত্থি অব্যাৰটমনো, নত্থি অপ্পটিসঙ্খানুপেক্খা’’তি.

তত্থ নত্থি দৰাতি খিড্ডাধিপ্পাযেন কিরিযা নত্থি. নত্থি রৰাতি সহসা কিরিযা নত্থি. নত্থি অফুটন্তি ঞাণেন অফুসিতং নত্থি. নত্থি ৰেগাযিতত্তন্তি তুরিতকিরিযা নত্থি. নত্থি অব্যাৰটমনোতি নিরত্থকো চিত্তসমুদাচারো নত্থি. নত্থি অপ্পটিসঙ্খানুপেক্খাতি অঞ্ঞাণুপেক্খা নত্থি. কত্থচি পন ‘‘নত্থি ধম্মদেসনায হানী’’তি অলিখিত্ৰা ‘‘নত্থি ছন্দস্স হানি, নত্থি ৰীরিযস্স, নত্থি সত্তিযা’’তি লিখন্তি.

১. ধম্মসঙ্গহে ধম্মে কুসলাদিকে তিকদুকেহি সঙ্গহেত্ৰা তে এৰ ধম্মে সুত্তন্তে খন্ধাদিৰসেন ৰুত্তে ৰিভজিতুং ৰিভঙ্গপ্পকরণং ৰুত্তং. তত্থ সঙ্খেপেন ৰুত্তানং খন্ধাদীনং ৰিভজনং ৰিভঙ্গো. সো সো ৰিভঙ্গো পকতো অধিকতো যস্সা পাল়িযা, সা ‘‘ৰিভঙ্গপ্পকরণ’’ন্তি ৰুচ্চতি. অধিকতোতি চ ৰত্তব্বভাৰেন পরিগ্গহিতোতি অত্থো. তত্থ ৰিভঙ্গপ্পকরণস্স আদিভূতে খন্ধৰিভঙ্গে ‘‘পঞ্চক্খন্ধা রূপক্খন্ধো…পে… ৰিঞ্ঞাণক্খন্ধো’’তি ইদং সুত্তন্তভাজনীযং নাম. ননু ন এত্তকমেৰ সুত্তন্তভাজনীযন্তি? সচ্চং, ইতি-সদ্দেন পন আদি-সদ্দত্থজোতকেন পকারত্থজোতকেন ৰা সব্বং সুত্তন্তভাজনীযং সঙ্গহেত্ৰা ৰিঞ্ঞাণক্খন্ধোতি এৰমাদি এৰংপকারং ৰা ইদং সুত্তন্তভাজনীযন্তি ৰেদিতব্বং. অথ ৰা একদেসেন সমুদাযং নিদস্সেতি পব্বতসমুদ্দাদিনিদস্সকো ৰিয. তত্থ নিব্বানৰজ্জানং সব্বধম্মানং সঙ্গাহকত্তা সব্বসঙ্গাহকেহি চ আযতনাদীহি অপ্পকতরপদত্তা খন্ধানং খন্ধৰিভঙ্গো আদিম্হি ৰুত্তো.

ন ততো হেট্ঠাতি রূপাদীনং ৰেদযিতাদিসভাৰত্তাভাৰা যস্মিং সভাৰে অতীতাদযো রাসী কত্ৰা ৰত্তব্বা, তস্স রুপ্পনাদিতো অঞ্ঞস্সাভাৰা চ হেট্ঠা গণনেসু সঙ্খতধম্মানং অনিট্ঠানং সাৰসেসভাৰং, ন হেট্ঠা গণনমত্তাভাৰং সন্ধায ৰুত্তং. ছট্ঠস্স পন খন্ধস্স অভাৰা ‘‘ন উদ্ধ’’ন্তি আহ. ন হি সৰিভাগধম্মেহি নিস্সটস্স অতীতাদিভাৰরহিতস্স একস্স নিব্বানস্স রাসট্ঠো অত্থীতি. ‘‘রাসিম্হী’’তি সদ্দত্থসহিতং খন্ধ-সদ্দস্স ৰিসযং দস্সেতি. ‘‘গুণে পণ্ণত্তিযং রুল়্হিয’’ন্তি ৰিসযমেৰ খন্ধ-সদ্দস্স দস্সেতি, ন সদ্দত্থং. লোকিযলোকুত্তরভেদঞ্হি সীলাদিগুণং নিপ্পদেসেন গহেত্ৰা পৰত্তমানো খন্ধ-সদ্দো সীলাদিগুণৰিসিট্ঠং রাসট্ঠং দীপেতীতি. কেচি পন ‘‘গুণট্ঠো এত্থ খন্ধট্ঠো’’তি ৰদন্তি. দারুক্খন্ধোতি এত্থ পন ন খন্ধ-সদ্দো পঞ্ঞত্তি-সদ্দস্স অত্থে ৰত্ততি, তাদিসে পন পুথুলাযতে দারুম্হি দারুক্খন্ধোতি পঞ্ঞত্তি হোতীতি পঞ্ঞত্তিযং নিপততীতি ৰুত্তং. তথা একস্মিম্পি ৰিঞ্ঞাণে পৰত্তো ৰিঞ্ঞাণক্খন্ধোতি খন্ধ-সদ্দো ন রুল়্হী-সদ্দস্স অত্থং ৰদতি, সমুদাযে পন নিরুল়্হো খন্ধ-সদ্দো তদেকদেসে পৰত্তমানো তায এৰ রুল়্হিযা পৰত্ততীতি খন্ধ-সদ্দো রুল়্হিযং নিপততীতি ৰুত্তং.

রাসিতো গুণতোতি সব্বত্থ নিস্সক্কৰচনং ৰিসযস্সেৰ খন্ধ-সদ্দপ্পৰত্তিযা কারণভাৰং সন্ধায কতন্তি ৰেদিতব্বং. ‘‘রাসিতো’’তি ইমমত্থং সদ্দত্থৰসেনপি নিযমেত্ৰা দস্সেতুং ‘‘অযঞ্হি খন্ধট্ঠো নাম পিণ্ডট্ঠো’’তিআদিমাহ. কোট্ঠাসট্ঠে খন্ধট্ঠে ছট্ঠেনপি খন্ধেন ভৰিতব্বং. নিব্বানম্পি হি ছট্ঠো কোট্ঠাসোতি. তস্মা ‘‘খন্ধট্ঠো নাম রাসট্ঠো’’তি যুত্তং. যেসং ৰা অতীতাদিৰসেন ভেদো অত্থি, তেসং রুপ্পনাদিলক্খণৰসেন তংতংকোট্ঠাসতা ৰুচ্চতীতি ভেদরহিতস্স নিব্বানস্স কোট্ঠাসট্ঠেন চ খন্ধভাৰো ন ৰুত্তোতি ৰেদিতব্বো.

এত্তাৰতাতি উদ্দেসমত্তেনাতি অত্থো. চত্তারো চ মহাভূতা…পে… রূপন্তি এৰং ৰিভত্তো. কত্থাতি চে? একাদসসু ওকাসেসু. ইতি-সদ্দেন নিদস্সনত্থেন সব্বো ৰিভজননযো দস্সিতো. ইদঞ্চ ৰিভজনং ওল়ারিকাদীসু চক্খাযতনন্তিআদিৰিভজনঞ্চ যথাসম্ভৰং একাদসসু ওকাসেসু যোজেতব্বং, এৰং ৰেদনাক্খন্ধাদীসুপি. ৰিঞ্ঞাণক্খন্ধো পন একাদসোকাসেসু পুরিমে ওকাসপঞ্চকে ‘‘চক্খুৰিঞ্ঞাণং…পে… মনোৰিঞ্ঞাণ’’ন্তি ছৰিঞ্ঞাণকাযৰিসেসেন ৰিভত্তো, ন তত্থ মনোধাতু মনোৰিঞ্ঞাণধাতূতি ৰিভজনং অত্থি. তং পন দ্ৰযং মনোৰিঞ্ঞাণন্তি ৰুত্তন্তি ইমমত্থং দস্সেতুং অট্ঠকথাযং ‘‘মনোধাতু মনোৰিঞ্ঞাণধাতূ’’তি ৰুত্তন্তি দট্ঠব্বং.

এৰং পাল়িনযেন পঞ্চসু খন্ধেসু ধম্মপরিচ্ছেদং দস্সেত্ৰা পুন অঞ্ঞেন পকারেন দস্সেতুং ‘‘অপিচা’’তিআদিমাহ. এত্থাতি এতস্মিং খন্ধনিদ্দেসে.

১. রূপক্খন্ধনিদ্দেসৰণ্ণনা

২. যং কিঞ্চীতি এত্থ যন্তি সামঞ্ঞেন অনিযমনিদস্সনং, কিঞ্চীতি পকারন্তরভেদং আমসিত্ৰা অনিযমনিদস্সনং. উভযেনপি অতীতং ৰা…পে… সন্তিকে ৰা অপ্পং ৰা বহুং ৰা যাদিসং ৰা তাদিসং ৰা যং কিঞ্চীতি নপুংসকনিদ্দেসারহং সব্বং ব্যাপেত্ৰা সঙ্গণ্হাতীতি অঞ্ঞেসুপি নপুংসকনিদ্দেসারহেসু পসঙ্গং দিস্ৰা তস্স অধিপ্পেতত্থং অতিচ্চ পৰত্তিতো অতিপ্পসঙ্গস্স নিযমনত্থং ‘‘রূপ’’ন্তি আহ. যংকিঞ্চীতি সনিপাতং যং-সদ্দং কিং-সদ্দঞ্চ অনিযমেকত্থদীপনৰসেন একং পদন্তি গহেত্ৰা ‘‘পদদ্ৰযেনপী’’তি ৰুত্তং.

কিঞ্চ, ভিক্খৰে, রূপং ৰদেথাতি তুম্হেপি রূপং রূপন্তি ৰদেথ, তং কেন কারণেন ৰদেথাতি অত্থো, অথ ৰা কেন কারণেন রূপং, তং কারণং ৰদেথাতি অত্থো. অথেতেসু ভিক্খূসু তুণ্হীভূতেসু ভগৰা আহ ‘‘রুপ্পতীতি খো’’তিআদি.

ভিজ্জতীতি সীতাদিসন্নিপাতে ৰিসদিসসন্তানুপ্পত্তিদস্সনতো পুরিমসন্তানস্স ভেদং সন্ধাযাহ. ভেদো চ ৰিসদিসতাৰিকারাপত্তীতি ভিজ্জতীতি ৰিকারং আপজ্জতীতি অত্থো. ৰিকারাপত্তি চ সীতাদিসন্নিপাতে ৰিসদিসরূপুপ্পত্তিযেৰ. অরূপক্খন্ধানং পন অতিলহুপরিৰত্তিতো যথা রূপধম্মানং ঠিতিক্খণে সীতাদীহি সমাগমো হোতি, যেন তত্থ উতুনো ঠিতিপ্পত্তস্স পুরিমসদিসসন্তানুপ্পাদনসমত্থতা ন হোতি আহারাদিকস্স ৰা, এৰং অঞ্ঞেহি সমাগমো নত্থি. সঙ্ঘট্টনেন চ ৰিকারাপত্তিযং রুপ্পন-সদ্দো নিরুল়্হো, তস্মা অরূপধম্মানং সঙ্ঘট্টনৰিরহিতত্তা রূপধম্মানং ৰিয পাকটস্স ৰিকারস্স অভাৰতো চ ‘‘রুপ্পন্তী’’তি ‘‘রুপ্পনলক্খণা’’তি চ ন ৰুচ্চন্তি. জিঘচ্ছাপিপাসাহি রুপ্পনঞ্চ উদরগ্গিসন্নিপাতেন হোতীতি দট্ঠব্বং. এত্থ চ কুপ্পতীতি এতেন কত্তুঅত্থে রূপপদসিদ্ধিং দস্সেতি, ঘট্টীযতি পীল়ীযতীতি এতেহি কম্মত্থে. কোপাদিকিরিযাযেৰ হি রুপ্পনকিরিযাতি. সো পন কত্তুভূতো কম্মভূতো চ অত্থো ভিজ্জমানো হোতীতি ইমস্সত্থস্স দস্সনত্থং ‘‘ভিজ্জতীতি অত্থো’’তি ৰুত্তং. অথ ৰা রুপ্পতীতি রূপন্তি কম্মকত্তুত্থে রূপপদসিদ্ধি ৰুত্তা. ৰিকারো হি রুপ্পনন্তি. তেনেৰ ‘‘ভিজ্জতীতি অত্থো’’তি কম্মকত্তুত্থেন ভিজ্জতি-সদ্দেন অত্থং দস্সেতি. যং পন রুপ্পতি ভিজ্জতি, তং যস্মা কুপ্পতি ঘট্টীযতি পীল়ীযতি, তস্মা এতেহি চ পদেহি পদত্থো পাকটো কতোতি. ‘‘কেনট্ঠেনা’’তি পুচ্ছাসভাগৰসেন ‘‘রুপ্পনট্ঠেনা’’তি ৰুত্তং. ন কেৰলং সদ্দত্থোযেৰ রুপ্পনং, তস্স পনত্থস্স লক্খণঞ্চ হোতীতি অত্থলক্খণৰসেন ‘‘রুপ্পনলক্খণেন রূপন্তিপি ৰত্তুং ৰট্টতী’’তি আহ.

ছিজ্জিত্ৰাতি মুচ্ছাপত্তিযা মুচ্চিত্ৰা অঙ্গপচ্চঙ্গানং ছেদনৰসেন ৰা ছিজ্জিত্ৰা. অচ্চন্তখারেন সীতোদকেনাতি অতিসীতভাৰমেৰ সন্ধায অচ্চন্তখারতা ৰুত্তা সিযা. ন হি তং কপ্পসণ্ঠানং উদকং সম্পত্তিকরং পথৰীসন্ধারকং কপ্পৰিনাসউদকং ৰিয খারং ভৰিতুং অরহতি. তথা হি সতি পথৰী ৰিলীযেয্যাতি. অৰীচিমহানিরযেতি সউস্সদং অৰীচিনিরযং ৰুত্তং. তেনেৰ ‘‘তত্থ হী’’তিআদি ৰুত্তং. পেত্তি…পে… ন হোন্তীতি এৰংৰিধাপি সত্তা অত্থীতি অধিপ্পাযো এৰংৰিধাযেৰ হোন্তীতি নিযমাভাৰতো. এৰং কালকঞ্জিকাদীসুপীতি. সরন্তা গচ্ছন্তীতি সরীসপ-সদ্দস্স অত্থং ৰদতি.

অভিসঞ্ঞূহিত্ৰাতি এত্থ সমূহং কত্ৰাতিপি অত্থো. এতেন সব্বং রূপং…পে… দস্সিতং হোতীতি এতেন রূপক্খন্ধ-সদ্দস্স সমানাধিকরণসমাসভাৰং দস্সেতি. তেনেৰাহ ‘‘ন হি রূপতো…পে… অত্থী’’তি.

৩. পক্খিপিত্ৰাতি এত্থ একাদসোকাসেসু রূপং পক্খিপিত্ৰাতি অত্থো. ন হি তত্থ মাতিকংযেৰ পক্খিপিত্ৰা মাতিকা ঠপিতা, অথ খো পকরণপ্পত্তং রূপন্তি.

অপরো নযো…পে… এত্থেৰ গণনং গতন্তি এতেন অতীতংসেনাতি ভুম্মত্থে করণৰচনন্তি দস্সেতি. যেন পকারেন গণনং গতং, তং দস্সেতুং ‘‘চত্তারো চ মহাভূতা’’তিআদি ৰুত্তন্তি ইমস্মিং অত্থে সতি মহাভূতুপাদাযরূপভাৰো অতীতকোট্ঠাসে গণনস্স কারণন্তি আপজ্জতি. ন হি অতীতংসানং ৰেদনাদীনং নিৰত্তনত্থং ইদং ৰচনং ‘‘যং রূপ’’ন্তি এতেনেৰ তেসং নিৰত্তিতত্তা, নাপি রূপস্স অঞ্ঞপ্পকারনিৰত্তনত্থং সব্বপ্পকারস্স তত্থ গণিতত্তা, ন চ অনাগতপচ্চুপ্পন্নাকারনিৰত্তনত্থং অতীতংসৰচনেন তংনিৰত্তনতোতি. অথ পন যং অতীতংসেন গণিতং, তং চত্তারো চ…পে… রূপন্তি এৰং গণিতন্তি অযমত্থো অধিপ্পেতো, এৰং সতি গণনন্তরদস্সনং ইদং সিযা, ন অতীতংসেন গণিতপ্পকারদস্সনং, তংদস্সনে পন সতি ভূতুপাদাযরূপপ্পকারেন অতীতংসে গণিতং তংসভাৰত্তাতি আপন্নমেৰ হোতি, ন চ এৰংসভাৰতা অতীতংসে গণিততায কারণং ভৰিতুং অরহতি এৰংসভাৰস্সেৰ পচ্চুপ্পন্নানাগতেসু গণিতত্তা সুখাদিসভাৰস্স চ অতীতংসে গণিতত্তা, তস্মা পুরিমনযো এৰ যুত্তো. অজ্ঝত্তবহিদ্ধানিদ্দেসেসুপি তাদিসো এৰত্থো লব্ভতীতি.

সুত্তন্তপরিযাযতোতি পরিযাযদেসনত্তা সুত্তস্স ৰুত্তং. অভিধম্মনিদ্দেসতোতি নিপ্পরিযাযদেসনত্তা অভিধম্মস্স নিচ্ছযেন দেসো নিদ্দেসোতি কত্ৰা ৰুত্তং. কিঞ্চাপীতিআদীসু অযমধিপ্পাযো – সুত্তন্তভাজনীযত্তা যথা ‘‘অতীতং নন্ৰাগমেয্যা’’তিআদীসু অদ্ধানৰসেন অতীতাদিভাৰোৰ ৰুত্তো, তথা ইধাপি নিদ্দিসিতব্বো (ম. নি. ৩.২৭২, ২৭৫; অপ. থের ২.৫৫.২৪৪) সিযা. এৰং সন্তেপি সুত্তন্তভাজনীযম্পি অভিধম্মদেসনাযেৰ সুত্তন্তে ৰুত্তধম্মে ৰিচিনিত্ৰা ৰিভজনৰসেন পৰত্তাতি অভিধম্মনিদ্দেসেনেৰ অতীতাদিভাৰো নিদ্দিট্ঠোতি.

অদ্ধাসন্ততিসমযখণৰসেনাতি এত্থ চুতিপটিসন্ধিপরিচ্ছিন্নে কালে অদ্ধা-সদ্দো ৰত্ততীতি ‘‘অহোসিং নু খো অহমতীতমদ্ধান’’ন্তিআদিসুত্তৰসেন (ম. নি. ১.১৮; সং. নি. ২.২০) ৰিঞ্ঞাযতি. ‘‘তযোমে, ভিক্খৰে, অদ্ধা. কতমে তযো? অতীতো অদ্ধা, অনাগতো অদ্ধা, পচ্চুপ্পন্নো অদ্ধা’’তি (ইতিৰু. ৬৩; দী. নি. ৩.৩০৫) এত্থ পন পরমত্থতো পরিচ্ছিজ্জমানো অদ্ধা নিরুত্তিপথসুত্তৰসেন (সং. নি. ৩.৬২) খণপরিচ্ছিন্নো যুত্তো. তত্থ হি ‘‘যং, ভিক্খৰে, রূপং জাতং পাতুভূতং, ‘অত্থী’তি তস্স সঙ্খা’’তি (সং. নি. ৩.৬২) ৰিজ্জমানস্স পচ্চুপ্পন্নতা ততো পুব্বে পচ্ছা চ অতীতানাগততা ৰুত্তাতি. যেভুয্যেন পন চুতিপটিসন্ধিপরিচ্ছিন্নো (দী. নি. ৩.৩০৫; ইতিৰু. ৬৩) সুত্তেসু অতীতাদিকো অদ্ধা ৰুত্তোতি সো এৰ ইধাপি ‘‘অদ্ধাৰসেনা’’তি ৰুত্তো. সীতং সীতস্স সভাগো, তথা উণ্হং উণ্হস্স. যং পন সীতং উণ্হং ৰা সরীরে সন্নিপতিতং সন্তানৰসেন পৰত্তমানং অনূনং অনধিকং একাকারং, তং একো উতূতি ৰুচ্চতি. সভাগউতুনো অনেকন্তসভাৰতো একগহণং কতং, এৰং আহারেপি. একৰীথিএকজৰনসমুট্ঠানন্তি পঞ্চছট্ঠদ্ৰারৰসেন ৰুত্তং. সন্ততিসমযকথা ৰিপস্সকানং উপকারত্থায অট্ঠকথাসু কথিতা.

নিট্ঠিতহেতুপচ্চযকিচ্চং, নিট্ঠিতহেতুকিচ্চমনিট্ঠিতপচ্চযকিচ্চং, উভযকিচ্চমসম্পত্তং, সকিচ্চক্খণে পচ্চুপ্পন্নং. জনকো হেতু, উপত্থম্ভকো পচ্চযো, তেসং উপ্পাদনং উপত্থম্ভনঞ্চ কিচ্চং. যথা বীজস্স অঙ্কুরুপ্পাদনং পথৰীআদীনঞ্চ তদুপত্থম্ভনং কম্মস্স কটত্তারূপৰিপাকুপ্পাদনং আহারাদীনং তদুপত্থম্ভনং, এৰং একেকস্স কলাপস্স চিত্তুপ্পাদস্স চ জনকানং কম্মানন্তরাদিপচ্চযভূতানং উপত্থম্ভকানঞ্চ সহজাতপুরেজাতপচ্ছাজাতানং কিচ্চং যথাসম্ভৰং যোজেতব্বং. তত্থ উপ্পাদক্খণে হেতুকিচ্চং দট্ঠব্বং, তীসুপি খণেসু পচ্চযকিচ্চং. পথৰীআদীনং সন্ধারণাদিকং ফস্সাদীনং ফুসনাদিকঞ্চ অত্তনো অত্তনো কিচ্চং সকিচ্চং, তস্স করণক্খণো সকিচ্চক্খণো. সহ ৰা কিচ্চেন সকিচ্চং, যস্মিং খণে সকিচ্চং রূপং ৰা অরূপং ৰা হোতি, সো সকিচ্চক্খণো, তস্মিং খণে পচ্চুপ্পন্নং.

৬. এত্তকমেৰাতি ‘‘তেসং তেস’’ন্তি ইমিনা আমেডিতৰচনেন অভিব্যাপনত্থেন ৰুত্তত্থমেৰ. ‘‘অপরস্স অপরস্সা’’তি দীপনং অপরদীপনং. পরিযেসতূতি এতেন পরিযেসনায অনিট্ঠনামনিৰত্তনস্স অকারণভাৰং দস্সেতি. কম্মদোসেন হি চিত্তৰিপল্লাসদোসেন চ গূথভক্খপাণাদযো উম্মত্তকাদযো চ পরিযেসেয্যুং দিট্ঠিৰিপল্লাসেন চ যোনকাদযো ন আরম্মণস্স পরিযেসিতব্বসভাৰত্তা, অপরিযেসিতব্বসভাৰত্তা পন এতস্স অনিট্ঠমিচ্চেৰ নামন্তি অত্থো.

সম্পত্তিৰিরহতোতি রূপাদীনং দেৰমনুস্সসম্পত্তিভৰে কুসলকম্মফলতা সমিদ্ধসোভনতা চ সম্পত্তি, তব্বিরহতোতি অত্থো. ততো এৰ তং ন পরিযেসিতব্বন্তি. সোভনানি চ কানিচি হত্থিরূপাদীনি অকুসলকম্মনিব্বত্তানি ন তেসংযেৰ হত্থিআদীনং সুখস্স হেতুভাৰং গচ্ছন্তীতি তেসং সঙ্গণ্হনত্থং ‘‘অকন্ত’’ন্তি ৰুত্তং. তস্স তস্সেৰ হি সত্তস্স অত্তনা কতেন কুসলেন নিব্বত্তং সুখস্স পচ্চযো হোতি, অকুসলেন নিব্বত্তং দুক্খস্স. তস্মা কম্মজানং ইট্ঠানিট্ঠতা কম্মকারকসত্তস্স ৰসেন যোজনারহা সিযা. অট্ঠকথাযং পন ‘‘কুসলকম্মজং অনিট্ঠং নাম নত্থী’’তি ইদমেৰ ৰুত্তং, ন ৰুত্তং ‘‘অকুসলকম্মজং ইট্ঠং নাম নত্থী’’তি. তেন অকুসলকম্মজম্পি সোভনং পরসত্তানং ইট্ঠন্তি অনুঞ্ঞাতং ভৰিস্সতি. কুসলকম্মজং পন সব্বেসং ইট্ঠমেৰাতি ৰদন্তি. তিরচ্ছানগতানং পন কেসঞ্চি মনুস্সরূপং অমনাপং, যতো তে দিস্ৰাৰ পলাযন্তি. মনুস্সা চ দেৰতারূপং দিস্ৰা ভাযন্তি, তেসম্পি ৰিপাকৰিঞ্ঞাণং তং রূপং আরব্ভ কুসলৰিপাকং উপ্পজ্জতি, তাদিসস্স পন পুঞ্ঞস্স অভাৰা ন তেসং তত্থ অভিরতি হোতীতি অধিপ্পাযো. কুসলকম্মজস্স পন অনিট্ঠস্সাভাৰো ৰিয অকুসলকম্মজস্স সোভনস্স ইট্ঠস্স অভাৰো ৰত্তব্বো. হত্থিআদীনম্পি হি অকুসলকম্মজং মনুস্সানং অকুসলৰিপাকস্সেৰ আরম্মণং, কুসলকম্মজং পন পৰত্তে সমুট্ঠিতং কুসলৰিপাকস্স. ইট্ঠারম্মণেন পন ৰোমিস্সকত্তা অপ্পকং অকুসলকম্মজং বহুলং অকুসলৰিপাকুপ্পত্তিযা কারণং ন ভৰিস্সতীতি সক্কা ৰত্তুন্তি. ৰিপাকং পন কত্থচি ন সক্কা ৰঞ্চেতুন্তি ৰিপাকৰসেন ইট্ঠানিট্ঠারম্মণৰৰত্থানং সুট্ঠু ৰুত্তং. তস্মা তং অনুগন্ত্ৰা সব্বত্থ ইট্ঠানিট্ঠতা যোজেতব্বা.

অনিট্ঠা পঞ্চ কামগুণাতি কস্মা ৰুত্তং, ননু ‘‘চক্খুৰিঞ্ঞেয্যানি রূপানি ইট্ঠানী’’তি (ম. নি. ১.১৬৬; ২.১৫৫; ৩.১৯০; সং. নি. ৫.৩০) এৰমাদিনা ইট্ঠানেৰ রূপাদীনি ‘‘কামগুণা’’তি ৰুত্তানীতি? কামগুণসদিসেসু কামগুণৰোহারতো, সদিসতা চ রূপাদিভাৰোযেৰ, ন ইট্ঠতা. ‘‘অনিট্ঠা’’তি ৰা ৰচনেন অকামগুণতা দস্সিতাতি কামগুণৰিসভাগা রূপাদযো ‘‘কামগুণা’’তি ৰুত্তা অসিৰে ‘‘সিৰা’’তি ৰোহারো ৰিয. সব্বানি ৰা ইট্ঠানিট্ঠানি রূপাদীনি তণ্হাৰত্থুভাৰতো কামগুণাযেৰ. ৰুত্তঞ্হি ‘‘রূপা লোকে পিযরূপং সাতরূপ’’ন্তিআদি (দী. নি. ২.৪০০; ম. নি. ১.১৩৩; ৰিভ. ২০৩). অতিসযেন পন কামনীযত্তা সুত্তেসু ‘‘কামগুণা’’তি ইট্ঠানি রূপাদীনি ৰুত্তানীতি.

দ্ৰীসুপি হীনপণীতপদেসু ‘‘অকুসলকম্মজৰসেন কুসলকম্মজৰসেনা’’তি ৰচনং ‘‘তেসং তেসং সত্তান’’ন্তি সত্তৰসেন নিযমেত্ৰা ৰিভজিতত্তা, অযঞ্চত্থো ‘‘তেসং তেস’’ন্তি অৰযৰযোগে সামিৰচনং কত্ৰা ৰুত্তোতি ৰেদিতব্বো. সত্তসন্তানপরিযাপন্নেসু কম্মজং ৰিসিট্ঠন্তি ‘‘কম্মজৰসেনা’’তি ৰুত্তং. যদি পন তেহি তেহীতি এতস্মিং অত্থে তেসং তেসন্তি সামিৰচনং, ৰিসযৰিসযীসম্বন্ধে ৰা, ন কম্মজৰসেনেৰ রূপাদীনি ৰিভত্তানি, সব্বেসং পন ইন্দ্রিযবদ্ধানং ৰসেন ৰিভত্তানীতি ৰিঞ্ঞাযন্তি. এত্থ চ পাকটেহি রূপাদীহি নযো দস্সিতোতি চক্খাদীসুপি হীনপণীততা যোজেতব্বা.

মনাপপরিযন্তন্তি মনাপং পরিযন্তং মরিযাদাভূতং পঞ্চসু কামগুণেসু ৰদামীতি অত্থো. কিং কারণন্তি? যস্মা তে একচ্চস্স মনাপা হোন্তি, একচ্চস্স অমনাপা, যস্স যেৰ মনাপা, তস্স তেৰ পরমা, তস্মা তস্স তস্স অজ্ঝাসযৰসেন কামগুণানং পরমতা হোতি, ন তেসংযেৰ সভাৰতো.

এৰন্তি ইমস্মিং সুত্তে ৰুত্তনযেন. একস্মিংযেৰ অস্সাদনকুজ্ঝনতো আরম্মণসভাৰস্সেৰ ইট্ঠানিট্ঠাভাৰতো অনিট্ঠং ‘‘ইট্ঠ’’ন্তি গহণতো চ, ইট্ঠং ‘‘অনিট্ঠ’’ন্তি গহণতো চ ইট্ঠানিট্ঠং নাম পাটিযেক্কং পটিৰিভত্তং নত্থীতি অত্থো. সঞ্ঞাৰিপল্লাসেন চাতিআদিনা নিব্বানে ৰিয অঞ্ঞেসু আরম্মণেসু সঞ্ঞাৰিপল্লাসেন ইট্ঠানিট্ঠগ্গহণং হোতি. পিত্তুম্মত্তাদীনং খীরসক্করাদীসু দোসুস্সদসমুট্ঠিতসঞ্ঞাৰিপল্লাসৰসেন তিত্তগ্গহণং ৰিযাতি ইমমত্থং সন্ধায মনাপপরিযন্ততা ৰুত্তাতি দস্সেতি.

ৰিভত্তং অত্থীতি চ ৰৰত্থিতং অত্থীতি অত্থো, অট্ঠকথাচরিযেহি ৰিভত্তং পকাসিতন্তি ৰা. তঞ্চ মজ্ঝিমকসত্তস্স ৰসেন ৰৰত্থিতং পকাসিতঞ্চ, অঞ্ঞেসঞ্চ ৰিপল্লাসৰসেন ইদং ইট্ঠং অনিট্ঠঞ্চ হোতীতি অধিপ্পাযো. এৰং ৰৰত্থিতস্স পনিট্ঠানিট্ঠস্স অনিট্ঠং ইট্ঠন্তি চ গহণে ন কেৰলং সঞ্ঞাৰিপল্লাসোৰ কারণং, ধাতুক্খোভৰসেন ইন্দ্রিযৰিকারাপত্তিআদিনা কুসলাকুসলৰিপাকুপ্পত্তিহেতুভাৰোপীতি সক্কা ৰত্তুং. তথা হি সীতুদকং ঘম্মাভিতত্তানং কুসলৰিপাকস্স কাযৰিঞ্ঞাণস্স হেতু হোতি, সীতাভিভূতানং অকুসলৰিপাকস্স. তূলপিচুসম্ফস্সো ৰণে দুক্খো নিৰণে সুখো, মুদুতরুণহত্থসম্বাহনঞ্চ সুখং উপ্পাদেতি, তেনেৰ হত্থেন পহরণং দুক্খং, তস্মা ৰিপাকৰসেন আরম্মণৰৰত্থানং যুত্তং.

কিঞ্চাপীতিআদিনা সতিপি সঞ্ঞাৰিপল্লাসে বুদ্ধরূপদস্সনাদীসু কুসলৰিপাকস্সেৰ গূথদস্সনাদীসু চ অকুসলৰিপাকস্স উপ্পত্তিং দস্সেন্তো তেন ৰিপাকেন আরম্মণস্স ইট্ঠানিট্ঠতং দস্সেতি. ৰিজ্জমানেপি সঞ্ঞাৰিপল্লাসে আরম্মণেন ৰিপাকনিযমদস্সনং আরম্মণনিযমদস্সনত্থমেৰ কতন্তি.

অপিচ দ্ৰারৰসেনপীতিআদিনা দ্ৰারন্তরে দুক্খস্স সুখস্স চ পচ্চযভূতস্স দ্ৰারন্তরে সুখদুক্খৰিপাকুপ্পাদনতো ৰিপাকেন আরম্মণনিযমদস্সনেন একস্মিংযেৰ চ দ্ৰারে সমানস্সেৰ মণিরতনাদিফোট্ঠব্বস্স সণিকং ফুসনে পোথনে চ সুখদুক্খুপ্পাদনতো ৰিপাকৰসেন ইট্ঠানিট্ঠতা দস্সিতাতি ৰিঞ্ঞাযতি.

হেট্ঠিমনযোতি মজ্ঝিমকসত্তস্স ৰিপাকস্স চ ৰসেন ৰৰত্থিতং আরম্মণং গহেত্ৰা ‘‘তেসং তেসং সত্তানং উঞ্ঞাত’’ন্তি (ৰিভ. ৬) চ আদিনা ৰুত্তনযো. সম্মুতিমনাপন্তি মজ্ঝিমকসত্তস্স ৰিপাকস্স চ ৰসেন সম্মতং ৰৰত্থিতং মনাপং, তং পন সভাৰেনেৰ ৰৰত্থিতন্তি অভিন্দিতব্বতোৰ ন ভিন্দতীতি অধিপ্পাযো. সঞ্ঞাৰিপল্লাসেন নেরযিকাদীহিপি পুগ্গলেহি মনাপন্তি গহিতং পুগ্গলমনাপং ‘‘তং তং ৰা পনা’’তিআদিনা ভিন্দতি. ৰেমানিকপেতরূপম্পি অকুসলকম্মজত্তা কম্মকারণাদিদুক্খৰত্থুভাৰতো চ ‘‘মনুস্সরূপতো হীন’’ন্তি ৰুত্তং.

৭. ওল়ারিকরূপানং ৰত্থারম্মণপটিঘাতৰসেন সুপরিগ্গহিততা, সুখুমানং তথা অভাৰতো দুপ্পরিগ্গহিততা চ যোজেতব্বা. দুপ্পরিগ্গহট্ঠেনেৰ লক্খণদুপ্পটিৰিজ্ঝনতা দট্ঠব্বা. দসৰিধন্তি ‘‘দূরে’’তি অৰুত্তস্স দস্সনত্থং ৰুত্তং. ৰুত্তম্পি পন ওকাসতো দূরে হোতিযেৰ.

হেট্ঠিমনযোতি ‘‘ইত্থিন্দ্রিযং…পে… ইদং ৰুচ্চতি রূপং সন্তিকে’’তি (ৰিভ. ৭) এৰং লক্খণতো দ্ৰাদসহত্থৰসেন ৰৰত্থিতওকাসতো চ দস্সেত্ৰা নিয্যাতিতনযো. সো লক্খণোকাসৰসেন দূরসন্তিকেন সহ গহেত্ৰা নিয্যাতিতত্তা ভিন্দমানো মিস্সকং করোন্তো গতো. অথ ৰা ভিন্দমানোতি সরূপদস্সনেন লক্খণতো যেৰাপনকেন ওকাসতোতি এৰং লক্খণতো ওকাসতো চ ৰিসুং করোন্তো গতোতি অত্থো. অথ ৰা লক্খণতো সন্তিকদূরানং ওকাসতো দূরসন্তিকভাৰকরণেন সন্তিকভাৰং ভিন্দিত্ৰা দূরভাৰং, দূরভাৰঞ্চ ভিন্দিত্ৰা সন্তিকভাৰং করোন্তো পৰত্তোতি ‘‘ভিন্দমানো গতো’’তি ৰুত্তং. ইধ পনাতি ‘‘তং তং ৰা পন রূপং উপাদায উপাদাযা’’তি ইধ পুরিমনযেন লক্খণতো দূরং ওকাসতো সন্তিকভাৰকরণেন ন ভিন্দতি ভগৰা, ন চ ওকাসদূরতো ৰিসুং করণেন, নাপি ওকাসদূরেন ৰোমিস্সককরণেনাতি অত্থো. কিং পন করোতীতি? ওকাসতো দূরমেৰ ভিন্দতি. এত্থ পন ন পুব্বে ৰুত্তনযেন তিধা অত্থো দট্ঠব্বো. ন হি ওকাসতো দূরং লক্খণতো সন্তিকং করোতি, লক্খণতো ৰা ৰিসুং তেন ৰা ৰোমিস্সকন্তি. ওকাসতো দূরস্স পন ওকাসতোৰ সন্তিকভাৰকরণং ইধ ‘‘ভেদন’’ন্তি ৰেদিতব্বং. ইধ পন ন লক্খণতো দূরং ভিন্দতীতি এত্থাপি ৰা ন পুব্বে ৰুত্তনযেন তিধা ভেদস্স অকরণং ৰুত্তং, লক্খণতো সন্তিকদূরানং পন লক্খণতো উপাদাযুপাদায দূরসন্তিকভাৰো নত্থীতি লক্খণতো দূরস্স লক্খণতোৰ সন্তিকভাৰাকরণং লক্খণতো দূরস্স অভেদনন্তি দট্ঠব্বং. পুরিমনযো ৰিয অযং নযো ন হোতীতি এত্তকমেৰ হি এত্থ দস্সেতীতি ভিন্দমানোতি এত্থ চ অঞ্ঞথা ভেদনং ৰুত্তং, ভেদনং ইধ চ অঞ্ঞথা ৰুত্তন্তি.

রূপক্খন্ধনিদ্দেসৰণ্ণনা নিট্ঠিতা.

২. ৰেদনাক্খন্ধনিদ্দেসৰণ্ণনা

৮. চক্খাদযো পসাদা ওল়ারিকমনোমযত্তভাৰপরিযাপন্না কাযৰোহারং অরহন্তীতি তব্বত্থুকা অদুক্খমসুখা ‘‘কাযিকা’’তি পরিযাযেন ৰুত্তা, ন কাযপসাদৰত্থুকত্তা. ন হি চক্খাদযো কাযপসাদা হোন্তীতি. সন্ততিৰসেন খণাদিৰসেন চাতি এত্থ অদ্ধাসমযৰসেন অতীতাদিভাৰস্স অৰচনং সুখাদিৰসেন ভিন্নায অতীতাদিভাৰৰচনতো. ন হি সুখাযেৰ অদ্ধাৰসেন সমযৰসেন চ অতীতাদিকা হোতি, তথা দুক্খা অদুক্খমসুখা চ কাযিকচেতসিকাদিভাৰেন ভিন্না. তেন ৰেদনাসমুদযো অদ্ধাসমযৰসেন অতীতাদিভাৰেন ৰত্তব্বতং অরহতি সমুদাযস্স তেহি পরিচ্ছিন্দিতব্বত্তা, ৰেদনেকদেসা পন এত্থ গহিতাতি তে সন্ততিখণেহি পরিচ্ছেদং অরহন্তি তত্থ তথাপরিচ্ছিন্দিতব্বানং গহিতত্তাতি. একসন্ততিযং পন সুখাদিঅনেকভেদসব্ভাৰেন তেসু যো ভেদো পরিচ্ছিন্দিতব্বভাৰেন গহিতো, তস্স একপ্পকারস্স পাকটস্স পরিচ্ছেদিকা তংসহিতদ্ৰারালম্বনপ্পৰত্তা, অৰিচ্ছেদেন তদুপ্পাদকেকৰিধৰিসযসমাযোগপ্পৰত্তা চ সন্ততি ভৰিতুং অরহতীতি তস্স ভেদন্তরং অনামসিত্ৰা পরিচ্ছেদকভাৰেন গহণং কতং. লহুপরিৰত্তিনো ৰা ধম্মা পরিৰত্তনেনেৰ পরিচ্ছেদং অরহন্তীতি সন্ততিখণৰসেন পরিচ্ছেদো ৰুত্তো. পুব্বন্তাপরন্তমজ্ঝগতাতি এতেন হেতুপচ্চযকিচ্চৰসেন ৰুত্তনযং দস্সেতি.

১১. কিলেসগ্গিসম্পযোগতো সদরথা. এতেন সভাৰতো ওল়ারিকতং দস্সেতি, দুক্খৰিপাকট্ঠেনাতি এতেন ওল়ারিকৰিপাকনিপ্ফাদনেন কিচ্চতো. কম্মৰেগক্খিত্তা কম্মপটিবদ্ধভূতা চ কাযকম্মাদিব্যাপারৰিরহতো নিরুস্সাহা ৰিপাকা, সউস্সাহা চ কিরিযা অৰিপাকা. সৰিপাকা চ সগব্ভা ৰিয ওল়ারিকাতি তব্বিপক্খতো অৰিপাকা সুখুমাতি ৰুত্তা.

অসাতট্ঠেনাতি অমধুরট্ঠেন. তেন সাতপটিপক্খং অনিট্ঠসভাৰং দস্সেতি. দুক্খট্ঠেনাতি দুক্খমট্ঠেন. তেন দুক্খানং সন্তাপনকিচ্চং দস্সেতি. ‘‘যাযং, ভন্তে, অদুক্খমসুখা ৰেদনা, সন্তস্মিং এসা পণীতে সুখে ৰুত্তা ভগৰতা’’তি (ম. নি. ২.৮৮; সং. নি. ৪.২৬৭) ৰচনতো অদুক্খমসুখা ফরণসভাৰৰিরহতো অসন্তানং কামরাগপটিঘানুসযানং অনুসযনস্স অট্ঠানত্তা সন্তা, সুখে নিকন্তিং পরিযাদায অধিগন্তব্বত্তা পধানভাৰং নীতাতি পণীতাতি. তথা অনধিগন্তব্বা চ কামাৰচরজাতিআদিসঙ্করং অকত্ৰা সমানজাতিযং ঞাণসম্পযুত্তৰিপ্পযুত্তাদিকে সমানভেদে সুখতো পণীতাতি যোজেতব্বা. উপব্রূহিতানং ধাতূনং পচ্চযভাৰেন সুখা খোভেতি ৰিবাধিতানং পচ্চযভাৰেন দুক্খা চ. উভযম্পি কাযং ব্যাপেন্তং ৰিয উপ্পজ্জতীতি ফরতি. মদযমানন্তি মদং করোন্তং. ছাদযমানন্তি ইচ্ছং উপ্পাদেন্তং, অৰত্থরমানং ৰা. ঘম্মাভিতত্তস্স সীতোদকঘটেন আসিত্তস্স যথা কাযো উপব্রূহিতো হোতি, এৰং সুখসমঙ্গিনোপীতি কত্ৰা ‘‘আসিঞ্চমানং ৰিযা’’তি ৰুত্তং. একত্তনিমিত্তেযেৰাতি পথৰীকসিণাদিকে একসভাৰে এৰ নিমিত্তে. চরতীতি নানাৰজ্জনে জৰনে ৰেদনা ৰিয ৰিপ্ফন্দনরহিতত্তা সুখুমা.

অধিপ্পাযে অকুসলতায অকোৰিদো. কুসলত্তিকে…পে… আগতত্তাতি ‘‘কুসলাকুসলা ৰেদনা ওল়ারিকা, অব্যাকতা ৰেদনা সুখুমা’’তি এৰং আগতত্তা. ভূমন্তরভেদে দস্সেতুং ‘‘যম্পী’’তিআদি আরদ্ধং. ইমিনা নীহারেনাতি এতেন ‘‘কামাৰচরসুখতো কামাৰচরুপেক্খা সুখুমা’’তিআদিনা সভাৰাদিভেদেন চ ওল়ারিকসুখুমভাৰং তত্র তত্রেৰ কথেন্তো ন ভিন্দতীতি নযং দস্সেতি.

লোকিযলোকুত্তরমিস্সকা কথিতা, তস্মা একন্তপণীতে হীনপণীতানং উদ্ধটত্তা এৰমেৰ একন্তহীনে চ যথাসম্ভৰং হীনপণীততা উদ্ধরিতব্বাতি অনুঞ্ঞাতং হোতীতি উভযত্থ তদুদ্ধরণে ন কুক্কুচ্চাযিতব্বন্তি অত্থো.

অকুসলানং কুসলাদীহি সুখুমত্তাভাৰতো পাল়িযা আগতস্স অপরিৰত্তনীযভাৰেন ‘‘হেট্ঠিমনযো ন ওলোকেতব্বো’’তি ৰুত্তন্তি ৰদন্তি, তংতংৰাপনৰসেন কথনেপি পরিৰত্তনং নত্থীতি ন পরিৰত্তনং সন্ধায ‘‘হেট্ঠিমনযো ন ওলোকেতব্বো’’তি ৰুত্তং, হেট্ঠিমনযস্স পন ৰুত্তত্তা অৰুত্তনযং গহেত্ৰা ‘‘তং তং ৰা পনা’’তি ৰত্তুং যুত্তন্তি ‘‘হেট্ঠিমনযো ন ওলোকেতব্বো’’তি ৰুত্তন্তি ৰেদিতব্বো. বহুৰিপাকা অকুসলা দোসুস্সন্নতায ওল়ারিকা, তথা অপ্পৰিপাকা কুসলা. মন্দদোসত্তা অপ্পৰিপাকা অকুসলা সুখুমা, তথা বহুৰিপাকা কুসলা চ. ওল়ারিকসুখুমনিকন্তিৰত্থুভাৰতো কামাৰচরাদীনং ওল়ারিকসুখুমতা. সাপীতি ভাৰনামযায ভেদনেন দানমযসীলমযানঞ্চ পচ্চেকং ভেদনং নযতো দস্সিতন্তি ৰেদিতব্বং. সাপীতি ৰা তিৰিধাপীতি যোজেতব্বং.

১৩. জাতিআদিৰসেন অসমানকোট্ঠাসতা ৰিসভাগট্ঠো. দুক্খৰিপাকতাদিৰসেন অসদিসকিচ্চতা, অসদিসসভাৰতা ৰা ৰিসংসট্ঠো, ন অসম্পযোগো. যদি সিযা, দূরৰিপরিযাযেন সন্তিকং হোতীতি সংসট্ঠট্ঠেন সন্তিকতা আপজ্জতি, ন চ ৰেদনায ৰেদনাসম্পযোগো অত্থি. সন্তিকপদৰণ্ণনায চ ‘‘সভাগট্ঠেন সরিক্খট্ঠেন চা’’তি ৰক্খতীতি ৰুত্তনযেনেৰ অত্থো ৰেদিতব্বো.

ন দূরতো সন্তিকং উদ্ধরিতব্বন্তি কস্মা ৰুত্তং, কিং যথা সন্তিকতো অকুসলতো অকুসলা দূরেতি উদ্ধরীযতি, তথা ততো দূরতো কুসলতো কুসলা সন্তিকেতি উদ্ধরিতুং ন সক্কাতি? ন সক্কা. তথা হি সতি কুসলা কুসলায সন্তিকেতি কত্ৰা সন্তিকতো সন্তিকতা এৰ উদ্ধরিতা সিযা, তথা চ সতি সন্তিকসন্তিকতরতাৰচনমেৰ আপজ্জতি, উপাদাযুপাদায দূরসন্তিকতাৰ ইধ ৰুচ্চতি, তস্মা দূরতো দূরুদ্ধরণং ৰিয সন্তিকতো সন্তিকুদ্ধরণঞ্চ ন সক্কা কাতুং দূরদূরতরতায ৰিয সন্তিকসন্তিকতরতায চ অনধিপ্পেতত্তা. অথ পন ৰদেয্য ‘‘ন কুসলা কুসলায এৰ সন্তিকেতি উদ্ধরিতব্বা, অথ খো যতো সা দূরে, তস্সা অকুসলাযা’’তি, তঞ্চ নত্থি. ন হি অকুসলায কুসলা কদাচি সন্তিকে অত্থীতি. অথাপি ৰদেয্য ‘‘যা অকুসলা কুসলায সন্তিকে, সা ততো দূরতো কুসলতো উদ্ধরিতব্বা’’তি, তদপি নত্থি. ন হি কুসলে অকুসলা অত্থি, যা ততো সন্তিকেতি উদ্ধরিযেয্য, তস্মা ইধ ৰুত্তস্স দূরস্স দূরতো অচ্চন্তৰিসভাগত্তা দূরে সন্তিকং নত্থীতি ন সক্কা দূরতো সন্তিকং উদ্ধরিতুং, সন্তিকে পনিধ ৰুত্তে ভিন্নে তত্থেৰ দূরং লব্ভতীতি আহ ‘‘সন্তিকতো পন দূরং উদ্ধরিতব্ব’’ন্তি.

উপাদাযুপাদায দূরতো চ সন্তিকং ন সক্কা উদ্ধরিতুং. লোভসহগতায দোসসহগতা দূরে লোভসহগতা সন্তিকেতি হি ৰুচ্চমানে সন্তিকতোৰ সন্তিকং উদ্ধরিতং হোতি. তথা দোসসহগতায লোভসহগতা দূরে দোসসহগতা সন্তিকেতি এত্থাপি সভাগতো সভাগন্তরস্স উদ্ধটত্তা, ন চ সক্কা ‘‘লোভসহগতায দোসসহগতা দূরে সা এৰ চ সন্তিকে’’তি ৰত্তুং দোসসহগতায সন্তিকভাৰস্স অকারণত্তা, তস্মা ৰিসভাগতা ভেদং অগ্গহেত্ৰা ন পৰত্ততীতি সভাগাব্যাপকত্তা দূরতায দূরতো সন্তিকুদ্ধরণং ন সক্কা কাতুং. ন হি দোসসহগতা অকুসলসভাগং সব্বং ব্যাপেত্ৰা পৰত্ততীতি. সভাগতা পন ভেদং অন্তোগধং কত্ৰা পৰত্ততীতি ৰিসভাগব্যাপকত্তা সন্তিকতায সন্তিকতো দূরুদ্ধরণং সক্কা কাতুং. অকুসলতা হি লোভসহগতাদিসব্বৰিসভাগব্যাপিকাতি. তেনাহ ‘‘ন দূরতো সন্তিকং উদ্ধরিতব্ব’’ন্তিআদি.

ৰেদনাক্খন্ধনিদ্দেসৰণ্ণনা নিট্ঠিতা.

৩. সঞ্ঞাক্খন্ধনিদ্দেসৰণ্ণনা

১৭. চক্খুসম্ফস্সজা সঞ্ঞাতি এত্থ যদিপি ৰত্থুতো ফস্সস্স নামং ফস্সতো চ সঞ্ঞায, ৰত্থুৰিসিট্ঠফস্সেন পন ৰিসিট্ঠসঞ্ঞা ৰত্থুনা চ ৰিসিট্ঠা হোতি ফস্সস্স ৰিয তস্সাপি তব্বত্থুকত্তাতি ‘‘ৰত্থুতো নাম’’ন্তি ৰুত্তং. পটিঘসম্ফস্সজা সঞ্ঞাতি এত্থাপি যথা ফস্সো ৰত্থারম্মণপটিঘট্টনেন উপ্পন্নো, তথা ততো জাতসঞ্ঞাপীতি ‘‘ৰত্থারম্মণতো নাম’’ন্তি ৰুত্তং. এত্থ চ পটিঘজো সম্ফস্সো, পটিঘৰিঞ্ঞেয্যো ৰা সম্ফস্সো পটিঘসম্ফস্সোতি উত্তরপদলোপং কত্ৰা ৰুত্তন্তি ৰেদিতব্বং.

ৰিঞ্ঞেয্যভাৰে ৰচনং অধিকিচ্চ পৰত্তা, ৰচনাধীনা ৰা অরূপক্খন্ধা, অধিৰচনং ৰা এতেসং পকাসনং অত্থীতি ‘‘অধিৰচনা’’তি ৰুচ্চন্তি, ততোজো সম্ফস্সো অধিৰচনসম্ফস্সো, সম্ফস্সোযেৰ ৰা যথাৰুত্তেহি অত্থেহি অধিৰচনো চ সম্ফস্সো চাতি অধিৰচনসম্ফস্সো, অধিৰচনৰিঞ্ঞেয্যো ৰা সম্ফস্সো অধিৰচনসম্ফস্সো, ততো তস্মিং ৰা জাতা অধিৰচনসম্ফস্সজা. পঞ্চদ্ৰারিকসম্ফস্সেপি যথাৰুত্তো অত্থো সম্ভৰতীতি তেন পরিযাযেন ততোজাপি সঞ্ঞা ‘‘অধিৰচনসম্ফস্সজা’’তি ৰুত্তা. যথা পন অঞ্ঞপ্পকারাসম্ভৰতো মনোসম্ফস্সজা নিপ্পরিযাযেন ‘‘অধিৰচনসম্ফস্সজা’’তি ৰুচ্চতি, ন এৰং অযং পটিঘসম্ফস্সজা আৰেণিকপ্পকারন্তরসম্ভৰতোতি অধিপ্পাযো.

যদি এৰং চত্তারো খন্ধাপি যথাৰুত্তসম্ফস্সতো জাতত্তা ‘‘অধিৰচনসম্ফস্সজা’’তি ৰত্তুং যুত্তা, সঞ্ঞাৰ কস্মা এৰং ৰুত্তাতি? তিণ্ণং খন্ধানং অত্থৰসেন অত্তনো পত্তম্পি নামং যত্থ পৰত্তমানো অধিৰচনসম্ফস্সজ-সদ্দো নিরুল়্হতায ধম্মাভিলাপো হোতি, তস্সা সঞ্ঞায এৰ আরোপেত্ৰা সযং নিৰত্তনং হোতি. তেনাহ ‘‘তযো হি অরূপিনো খন্ধা’’তিআদি. অথ ৰা সঞ্ঞায পটিঘসম্ফস্সজাতি অঞ্ঞম্পি ৰিসিট্ঠং নামং অত্থীতি অধিৰচনসম্ফস্সজানামং তিণ্ণংযেৰ খন্ধানং ভৰিতুং অরহতি. তে পন অত্তনো নামং সঞ্ঞায দত্ৰা নিৰত্তাতি ইমমত্থং সন্ধাযাহ ‘‘তযো হি অরূপিনো খন্ধা’’তিআদি. পঞ্চদ্ৰারিকসঞ্ঞা ওলোকেত্ৰাপি জানিতুং সক্কাতি ইদং তেন তেনাধিপ্পাযেন হত্থৰিকারাদিকরণে তদধিপ্পাযৰিজানননিমিত্তভূতা ৰিঞ্ঞত্তি ৰিয রজ্জিত্ৰা ওলোকনাদীসু রত্ততাদিৰিজানননিমিত্তং ওলোকনং চক্খুৰিঞ্ঞাণৰিসযসমাগমে পাকটং হোতীতি তংসম্পযুত্তায সঞ্ঞাযপি তথাপাকটভাৰং সন্ধায ৰুত্তং.

রজ্জিত্ৰা ওলোকনাদিৰসেন পাকটা জৰনপ্পৰত্তা ভৰিতুং অরহতীতি এতিস্সা আসঙ্কায নিৰত্তনত্থং ‘‘পসাদৰত্থুকা এৰা’’তি আহ. অঞ্ঞং চিন্তেন্তন্তি যং পুব্বে তেন চিন্তিতং ঞাতং, ততো অঞ্ঞং চিন্তেন্তন্তি অত্থো.

সঞ্ঞাক্খন্ধনিদ্দেসৰণ্ণনা নিট্ঠিতা.

৪. সঙ্খারক্খন্ধনিদ্দেসৰণ্ণনা

২০. হেট্ঠিমকোটিযাতি এত্থ ভুম্মনিদ্দেসোৰ. তত্থ হি পধানং দস্সিতন্তি. যদি এৰং উপরিমকোটিযা তং ন দস্সিতন্তি আপজ্জতীতি? নাপজ্জতি, উপরিমকোটিগতভাৰেন ৰিনা হেট্ঠিমকোটিগতভাৰাভাৰতো. হেট্ঠিমকোটি হি সব্বব্যাপিকাতি. দুতিযে করণনিদ্দেসো, হেট্ঠিমকোটিযা আগতাতি সম্বন্ধো. পুরিমেপি ৰা ‘‘হেট্ঠিমকোটিযা’’তি যং ৰুত্তং, তঞ্চ পধানসঙ্খারদস্সনৰসেনাতি সম্বন্ধকরণেন করণনিদ্দেসোৰ. তংসম্পযুত্তা সঙ্খারাতি একূনপঞ্ঞাসপ্পভেদে সঙ্খারে আহ. গহিতাৰ হোন্তি তপ্পটিবদ্ধত্তা.

সঙ্খারক্খন্ধনিদ্দেসৰণ্ণনা নিট্ঠিতা.

পকিণ্ণককথাৰণ্ণনা

সমুগ্গম-সদ্দো সঞ্জাতিযং আদিউপ্পত্তিযং নিরুল়্হো. তংতংপচ্চযসমাযোগে হি পুরিমভৰসঙ্খাতা পুরিমন্ততো উদ্ধঙ্গমনং সমুগ্গমো, সন্ধিযং ৰা পটিসন্ধিযং উগ্গমো সমুগ্গমো. সো পন যত্থ পঞ্চক্খন্ধা পরিপুণ্ণা সমুগ্গচ্ছন্তি, তত্থেৰ দস্সিতো. এতেন নযেন অপরিপুণ্ণখন্ধসমুগ্গমো একৰোকারচতুৰোকারেসু সক্কা ৰিঞ্ঞাতুন্তি. অথ ৰা যথাধিগতানং পঞ্চন্নম্পি খন্ধানং সহ উগ্গমো উপ্পত্তি সমুগ্গমো. এতস্মিং অত্থে ৰিকলুপ্পত্তি অসঙ্গহিতা হোতি. হিমৰন্তপ্পদেসে জাতিমন্তএল়কলোমং জাতিউণ্ণা. সপ্পিমণ্ডবিন্দূতি এৰং এত্থাপি বিন্দু-সদ্দো যোজেতব্বো. এৰংৰণ্ণপ্পটিভাগন্তি এৰংৰণ্ণং এৰংসণ্ঠানঞ্চ. পটিভজনং ৰা পটিভাগো, সদিসতাভজনং সদিসতাপত্তীতি অত্থো. এৰংৰিধো ৰণ্ণপ্পটিভাগো এতস্সাতি এৰংৰণ্ণপ্পটিভাগং.

সন্ততিসীসানীতি সন্ততিমূলানি, সন্ততিকোট্ঠাসা ৰা. অনেকিন্দ্রিযসমাহারভাৰতো হি পধানঙ্গং ‘‘সীস’’ন্তি ৰুচ্চতি, এৰং ৰত্থুদসকাদিকোট্ঠাসা অনেকরূপসমুদাযভূতা ‘‘সীসানী’’তি ৰুত্তানীতি.

পঞ্চক্খন্ধা পরিপুণ্ণা হোন্তীতি গণনাপারিপূরিং সন্ধায ৰুত্তং, ন তস্স তস্স খন্ধস্স পরিপুণ্ণতং. কম্মসমুট্ঠানপৰেণিযা ৰুত্তত্তা ‘‘উতুচিত্তাহারজপৰেণী চ এত্তকং কালং অতিক্কমিত্ৰা হোতী’’তিআদিনা ৰত্তব্বা সিযা, তং পন ‘‘পুব্বাপরতো’’তি এত্থ ৰক্খতীতি অকথেত্ৰা কম্মজপৰেণী চ ন সব্বা ৰুত্তাতি অৰুত্তং দস্সেতুং ওপপাতিকসমুগ্গমো নাম দস্সিতো. এৰং…পে… পঞ্চক্খন্ধা পরিপুণ্ণা হোন্তীতি পরিপুণ্ণাযতনানং ৰসেন নযো দস্সিতো, অপরিপুণ্ণাযতনানং পন কামাৰচরানং রূপাৰচরানং পরিহীনাযতনস্স ৰসেন সন্ততিসীসহানি ৰেদিতব্বা.

পুব্বাপরতোতি অযং ৰিচারণা ন পঞ্চন্নং খন্ধানং উপ্পত্তিযং, অথ খো তেসং রূপসমুট্ঠাপনেতি দট্ঠব্বা. তং দস্সেন্তো আহ ‘‘এৰং পনা’’তিআদি. অপচ্ছাঅপুরে উপ্পন্নেসূতি এতেন সংসযকারণং দস্সেতি. সহুপ্পন্নেসু হি ইদমেৰ পঠমং রূপং সমুট্ঠাপেতি, ইদং পচ্ছাতি অদস্সিতং ন সক্কা ৰিঞ্ঞাতুং. এত্থ চ ‘‘পুব্বাপরতো’’তি এতিস্সা ৰিচারণায ৰত্থুভাৰেন পটিসন্ধিযং উপ্পন্না পৰত্তা পঞ্চক্খন্ধা গহিতা. তত্থ চ নিদ্ধারণে ভুম্মনিদ্দেসোতি ‘‘রূপং পঠমং রূপং সমুট্ঠাপেতী’’তি আহ. অঞ্ঞথা ভাৰেনভাৰলক্খণত্থে ভুম্মনিদ্দেসে সতি রূপস্স রূপসমুট্ঠাপনক্খণে কম্মস্সপি রূপসমুট্ঠানং ৰদন্তীতি উভযন্তি ৰত্তব্বং সিযাতি. রূপারূপসন্ততিঞ্চ গহেত্ৰা অযং ৰিচারণা পৰত্তাতি ‘‘রূপং পঠমং রূপং সমুট্ঠাপেতী’’তি ৰুত্তং. অঞ্ঞথা পটিসন্ধিক্খণে এৰ ৰিজ্জমানে গহেত্ৰা ৰিচারণায করিযমানায অরূপস্স রূপসমুট্ঠাপনমেৰ নত্থীতি পুব্বাপরসমুট্ঠাপনৰিচারণাৰ ইধ ন উপপজ্জতীতি ৰত্তব্বং সিযাতি. ৰত্থু উপ্পাদক্খণে দুব্বলং হোতীতি সব্বরূপানং উপ্পাদক্খণে দুব্বলতং সন্ধায ৰুত্তং. তদা হি তং পচ্ছাজাতপচ্চযরহিতং আহারাদীহি চ অনুপত্থদ্ধন্তি ‘‘দুব্বল’’ন্তি ৰুত্তং. কম্মৰেগক্খিত্তত্তাতি ইদং সতিপি ভৰঙ্গস্স কম্মজভাৰে সাযং ৰিপাকসন্ততি পটিসন্ধিক্খণে পুরিমভৰঙ্গসমুট্ঠাপকতো অঞ্ঞেন কম্মুনা খিত্তা ৰিয অপ্পতিট্ঠিতা, ততো পরঞ্চ সমানসন্ততিযং অনন্তরপচ্চযং পুরেজাতপচ্চযঞ্চ লভিত্ৰা পতিট্ঠিতাতি ইমমত্থং সন্ধায ৰুত্তং.

পৰেণী ঘটিযতীতি চক্খাদিৰত্থুসন্ততি একস্মিং ৰিজ্জমানে এৰ অঞ্ঞস্স নিরোধুপ্পত্তিৰসেন ঘটিযতি, ন চুতিপটিসন্ধিনিস্সযৰত্থূনং ৰিয ৰিচ্ছেদপ্পৰত্তীতি অত্থো. অঙ্গতোতি ঝানঙ্গতো. ঝানঙ্গানি হি চিত্তেন সহ রূপসমুট্ঠাপকানি, তেসং অনুবলদাযকানি মগ্গঙ্গাদীনি তেসু ৰিজ্জমানেসু ৰিসেসরূপপ্পৰত্তিদস্সনতো. অথ ৰা যানি চিত্তঙ্গানি চেতনাদীনি চিত্তস্স রূপসমুট্ঠাপনে অঙ্গভাৰং সহাযভাৰং গচ্ছন্তি, তেসং বলদাযকেহি ঝানঙ্গাদীহি অপরিহীনন্তি অত্থো. ততো পরিহীনত্তা হি চক্খুৰিঞ্ঞাণাদীনি রূপং ন সমুট্ঠাপেন্তীতি. যো পন ৰদেয্য ‘‘পটিসন্ধিচিত্তেন সহজাতৰত্থু তস্স ঠিতিক্খণে চ ভঙ্গক্খণে চ পুরেজাতন্তি কত্ৰা পচ্চযৰেকল্লাভাৰতো তস্মিং খণদ্ৰযে রূপং সমুট্ঠাপেতূ’’তি, তং নিৰারেন্তো আহ ‘‘যদি হি চিত্ত’’ন্তিআদি. তত্থ ঠিতিভঙ্গক্খণেসুপি তেসং ধম্মানং ৰত্থু পুরেজাতং ন হোতীতি ন ৰত্তব্বমেৰেতন্তি অনুজানি, তত্থাপি দোসং দস্সেতি. যদি তদা রূপং সমুট্ঠাপেয্য, তৰ মতেন পটিসন্ধিচিত্তম্পি সমুট্ঠাপেয্য, তদা পন রূপুপ্পাদনমেৰ নত্থি. যদা চ রূপুপ্পাদনং, তদা উপ্পাদক্খণে তৰ মতেনপি পচ্চযৰেকল্লমেৰ পটিসন্ধিক্খণে পুরেজাতনিস্সযাভাৰতো, তস্মা পটিসন্ধিচিত্তং রূপং ন সমুট্ঠাপেতীতি অযমেত্থ অধিপ্পাযো. উপ্পাদক্খণে অট্ঠ রূপানি গহেত্ৰা উট্ঠহতি. কস্মা? অরূপধম্মানং অনন্তরাদিপচ্চযৰসেন সৰেগানং পরিপুণ্ণবলানমেৰ উপ্পত্তিতো.

অৰিসযতাযাতি অগতপুব্বস্স গামস্স আগন্তুকস্স অৰিসযভাৰতো. অপ্পহুততাযাতি তত্থ তস্স অনিস্সরভাৰতো. চিত্তসমুট্ঠান…পে… ঠিতানীতি ইদং যেহাকারেহি চিত্তসমুট্ঠানরূপানং চিত্তচেতসিকা পচ্চযা হোন্তি, তেহি সব্বেহি পটিসন্ধিযং চিত্তচেতসিকা সমতিংসকম্মজরূপানং যথাসম্ভৰং পচ্চযা হোন্তীতি কত্ৰা ৰুত্তং.

ৰট্টমূলন্তি তণ্হা অৰিজ্জা ৰুচ্চতি. চুতিচিত্তেন উপ্পজ্জমানং রূপং ততো পুরিমতরেহি উপ্পজ্জমানং ৰিয ন ভৰন্তরে উপ্পজ্জতীতি ৰট্টমূলস্স ৰূপসন্তত্তা অনুপ্পত্তি ৰিচারেতব্বা.

রূপস্স নত্থিতাযাতি রূপানং নিস্সরণত্তা অরূপস্স, ৰিরাগৰসেন পহীনত্তা উপ্পাদেতব্বস্স অভাৰং সন্ধায ৰুত্তং. রূপোকাসে ৰা রূপং অত্থীতি কত্ৰা রূপপচ্চযানং রূপুপ্পাদনং হোতি, অরূপং পন রূপস্স ওকাসো ন হোতীতি যস্মিং রূপে সতি চিত্তং অঞ্ঞং রূপং উপ্পাদেয্য, তদেৰ তত্থ নত্থীতি অত্থো. পুরিমরূপস্সপি হি পচ্চযভাৰো অত্থি পুত্তস্স পিতিসদিসতাদস্সনতোতি.

উতু পন পঠমং রূপং সমুট্ঠাপেতি পটিসন্ধিচিত্তস্স ঠিতিক্খণে সমুট্ঠাপনতোতি অধিপ্পাযো. উতু নাম চেস দন্ধনিরোধোতিআদি উতুস্স ঠানক্খণে উপ্পাদনে কারণদস্সনত্থং অরূপানং উপ্পাদকালদস্সনত্থঞ্চ ৰুত্তং. দন্ধনিরোধত্তা হি সো ঠিতিক্খণে বলৰাতি তদা রূপং সমুট্ঠাপেতি, তস্মিং ধরন্তে এৰ খিপ্পনিরোধত্তা সোল়সসু চিত্তেসু উপ্পন্নেসু পটিসন্ধিঅনন্তরং চিত্তং উতুনা সমুট্ঠিতে রূপে পুন সমুট্ঠাপেতীতি অধিপ্পাযো. তস্মিং ধরন্তে এৰ সোল়স চিত্তানি উপ্পজ্জিত্ৰা নিরুজ্ঝন্তীতি এতেন পন ৰচনেন যদি উপ্পাদনিরোধক্খণা ধরমানক্খণে এৰ গহিতা, ‘‘সোল়সচিত্তক্খণাযুকং রূপ’’ন্তি ৰুত্তং হোতি, অথুপ্পাদক্খণং অগ্গহেত্ৰা নিরোধক্খণোৰ গহিতো, ‘‘সত্তরসচিত্তক্খণাযুক’’ন্তি, সচে নিরোধক্খণং অগ্গহেত্ৰা উপ্পাদক্খণো গহিতো, ‘‘অধিকসোল়সচিত্তক্খণাযুক’’ন্তি, যদি পন উপ্পাদনিরোধক্খণা ধরমানক্খণে ন গহিতা, ‘‘অধিকসত্তরসচিত্তক্খণাযুক’’ন্তি. যস্মা পন ‘‘তেসু পটিসন্ধিঅনন্তর’’ন্তি পটিসন্ধিপি তস্স ধরমানক্খণে উপ্পন্নেসু গহিতা, তস্মা উপ্পাদক্খণো ধরমানক্খণে গহিতোতি নিরোধক্খণে অগ্গহিতে অধিকসোল়সচিত্তক্খণাযুকতা ৰক্খমানা, গহিতে ৰা সোল়সচিত্তক্খণাযুকতা অধিপ্পেতাতি ৰেদিতব্বা.

ওজা খরাতি সৰত্থুকং ওজং সন্ধাযাহ. সভাৰতো সুখুমায হি ওজায ৰত্থুৰসেন অত্থি ওল়ারিকসুখুমতাতি.

চিত্তঞ্চেৰাতি চিত্তস্স পুব্বঙ্গমতায ৰুত্তং, তংসম্পযুত্তকাপি পন রূপসমুট্ঠাপকা হোন্তীতি. যথাহ ‘‘হেতূ হেতুসম্পযুত্তকানং ধম্মানং তংসমুট্ঠানানঞ্চ রূপানং হেতুপচ্চযেন পচ্চযো’’তিআদি (পট্ঠা. ১.১.১). চিত্তন্তি ৰা চিত্তুপ্পাদং গণ্হাতি, ন কম্মচেতনং ৰিয একধম্মমেৰ অৰিজ্জমানং. কম্মসমুট্ঠানঞ্চ তংসম্পযুত্তেহিপি সমুট্ঠিতং হোতূতি চে? ন, তেহি সমুট্ঠিতভাৰস্স অৰুত্তত্তা, অৰচনঞ্চ তেসং কেনচি পচ্চযেন পচ্চযভাৰাভাৰতো.

অদ্ধানপরিচ্ছেদতোতি কালপরিচ্ছেদতো. তত্থ ‘‘সত্তরস চিত্তক্খণা রূপস্স অদ্ধা, রূপস্স সত্তরসমো ভাগো অরূপস্সা’’তি এসো অদ্ধানপরিচ্ছেদো অধিপ্পেতো. পটিসন্ধিক্খণেতি ইদং নযদস্সনমত্তং দট্ঠব্বং ততো পরম্পি রূপারূপানং সহুপ্পত্তিসব্ভাৰতো, ন পনেতং পটিসন্ধিক্খণে অসহুপ্পত্তিঅভাৰং সন্ধায ৰুত্তন্তি দট্ঠব্বং, পটিসন্ধিচিত্তস্স ঠিতিভঙ্গক্খণেসুপি রূপুপ্পত্তিং সযমেৰ ৰক্খতীতি. ফলপ্পত্তনিদস্সনেন চ রূপারূপানং অসমানকালতং নিদস্সেতি, ন সহুপ্পাদং তদত্থং অনারদ্ধত্তা. সহুপ্পাদেন পন অসমানকালতা সুখদীপনা হোতীতি তংদীপনত্থমেৰ সহুপ্পাদগ্গহণং.

যদি এৰং রূপারূপানং অসমানদ্ধত্তা অরূপং ওহায রূপস্স পৰত্তি আপজ্জতীতি এতস্সা নিৰারণত্থমাহ ‘‘তত্থ কিঞ্চাপী’’তিআদি. একপ্পমাণাৰাতি নিরন্তরং পৰত্তমানেসু রূপারূপধম্মেসু নিচ্ছিদ্দেসু অরূপরহিতং রূপং, রূপরহিতং ৰা অরূপং নত্থীতি কত্ৰা ৰুত্তং. অযঞ্চ কথা পঞ্চৰোকারে কম্মজরূপপ্পৰত্তিং নিব্বানপটিভাগনিরোধসমাপত্তিরহিতং সন্ধায কতাতি দট্ঠব্বা. পদে পদন্তি অত্তনো পদে এৰ পদং নিক্খিপন্তো ৰিয লহুং লহুং অক্কমিত্ৰাতি অত্থো. অনোহাযাতি যাৰ চুতি, তাৰ অৰিজহিত্ৰা, চুতিক্খণে পন সহেৰ নিরুজ্ঝন্তীতি. যস্মিঞ্চদ্ধানে অঞ্ঞমঞ্ঞং অনোহায পৰত্তি, সো চ পটিসন্ধিচুতিপরিচ্ছিন্নো উক্কংসতো এতেসং অদ্ধাতি. এৰন্তি এতেন পুব্বে ৰুত্তং অৰকংসতো অদ্ধাপকারং ইমঞ্চ সঙ্গণ্হাতীতি দট্ঠব্বং.

একুপ্পাদনানানিরোধতোতি এতং দ্ৰযমপি সহ গহেত্ৰা রূপারূপানং ‘‘একুপ্পাদনানানিরোধতো’’তি একো দট্ঠব্বাকারো ৰুত্তোতি দট্ঠব্বো. এৰং ইতো পরেসুপি. পচ্ছিমকম্মজং ঠপেত্ৰাতি তস্স চুতিচিত্তেন সহ নিরুজ্ঝনতো নানানিরোধো নত্থীতি কত্ৰা ৰুত্তন্তি ৰদন্তি. তস্স পন একুপ্পাদোপি নত্থি হেট্ঠা সোল়সকে পচ্ছিমস্স ভঙ্গক্খণে উপ্পত্তিৰচনতো. যদি পন যস্স একুপ্পাদনানানিরোধা দ্ৰেপি ন সন্তি, তং ঠপেতব্বং. সব্বম্পি চিত্তস্স ভঙ্গক্খণে উপ্পন্নং ঠপেতব্বং সিযা, পচ্ছিমকম্মজস্স পন উপ্পত্তিতো পরতো চিত্তেসু পৰত্তমানেসু কম্মজরূপস্স অনুপ্পত্তিতো ৰজ্জেতব্বং গহেতব্বঞ্চ তদা নত্থীতি ‘‘পচ্ছিমকম্মজং ঠপেত্ৰা’’তি ৰুত্তন্তি ৰেদিতব্বং. ততো পুব্বে পন অট্ঠচত্তালীসকম্মজরূপপৰেণী অত্থীতি তত্থ যং চিত্তস্স উপ্পাদক্খণে উপ্পন্নং, তং অঞ্ঞস্স উপ্পাদক্খণে নিরুজ্ঝতীতি ‘‘একুপ্পাদনানানিরোধ’’ন্তি গহেত্ৰা ঠিতিভঙ্গক্খণেসু উপ্পন্নরূপানি ৰজ্জেত্ৰা এৰং একুপ্পাদনানানিরোধতো ৰেদিতব্বাতি যোজনা কতাতি দট্ঠব্বা. তঞ্হি রূপং অরূপেন, অরূপঞ্চ তেন একুপ্পাদনানানিরোধন্তি. তত্থ সঙ্খলিকস্স ৰিয সম্বন্ধো পৰেণীতি কত্ৰা অট্ঠচত্তালীসকম্মজিযৰচনং কতং, অঞ্ঞথা একূনপঞ্ঞাসকম্মজিযৰচনং কত্তব্বং সিযা.

নানুপ্পাদ…পে… পচ্ছিমকম্মজেন দীপেতব্বাতি তেন সুদীপনত্তা ৰুত্তং. এতেন হি নযেন সক্কা ততো পুব্বেপি একস্স চিত্তস্স ভঙ্গক্খণে উপ্পন্নরূপং অঞ্ঞস্সপি ভঙ্গক্খণে এৰ নিরুজ্ঝতীতি তং অরূপেন, অরূপঞ্চ তেন নানুপ্পাদং একনিরোধন্তি ৰিঞ্ঞাতুন্তি. উভযত্থাপি পন অঞ্ঞস্স চিত্তস্স ঠিতিক্খণে উপ্পন্নং রূপং অঞ্ঞস্স ঠিতিক্খণে, তস্স ঠিতিক্খণে উপ্পজ্জিত্ৰা ঠিতিক্খণে এৰ নিরুজ্ঝনকং অরূপঞ্চ ন সঙ্গহিতং, তং ‘‘নানুপ্পাদতো নানানিরোধতো’’তি এত্থেৰ সঙ্গহং গচ্ছতীতি ৰেদিতব্বং. চতুসন্ততিকরূপেন হি নানুপ্পাদনানানিরোধতাদীপনা এত্থ ঠিতিক্খণে উপ্পন্নস্স দস্সিতত্তা অদস্সিতস্স ৰসেন নযদস্সনং হোতীতি. সমতিংসকম্মজরূপেসু এৰ ঠিতস্সপি গব্ভে গতস্স মরণং অত্থীতি তেসং এৰ ৰসেন পচ্ছিমকম্পি যোজিতং. অমরা নাম ভৰেয্যুং, কস্মা? যথা ছন্নং ৰত্থূনং পৰত্তি, এৰং তদুপ্পাদককম্মেনেৰ ভৰঙ্গাদীনঞ্চ তব্বত্থুকানং পৰত্তিযা ভৰিতব্বন্তি. ন হি তং কারণং অত্থি, যেন তং কম্মজেসু একচ্চং পৰত্তেয্য, একচ্চং ন পৰত্তেয্যাতি. তস্মা আযুউস্মাৰিঞ্ঞাণাদীনং জীৰিতসঙ্খারানং অনূনত্তা ৰুত্তং ‘‘অমরা নাম ভৰেয্যু’’ন্তি.

‘‘উপ্পাদক্খণে উপ্পন্নং অঞ্ঞস্স উপ্পাদক্খণে নিরুজ্ঝতি, ঠিতিক্খণে উপ্পন্নং অঞ্ঞস্স ঠিতিক্খণে, ভঙ্গক্খণে উপ্পন্নং অঞ্ঞস্স ভঙ্গক্খণে নিরুজ্ঝতী’’তি ইদং অট্ঠকথাযং আগতত্তা ৰুত্তন্তি অধিপ্পাযো. অত্তনো পনাধিপ্পাযং উপ্পাদক্খণে উপ্পন্নং নিরোধক্খণে, ঠিতিক্খণে উপ্পন্নঞ্চ উপ্পাদক্খণে, ভঙ্গক্খণে উপ্পন্নং ঠিতিক্খণে নিরুজ্ঝতীতি দীপেতিযেৰ. এৰঞ্চ কত্ৰা অদ্ধানপরিচ্ছেদে ‘‘তং পন সত্তরসমেন চিত্তেন সদ্ধিং নিরুজ্ঝতী’’তি (ৰিভ. অট্ঠ. ২৬ পকিণ্ণককথা) ৰুত্তং. ইমায পাল়িযা ৰিরুজ্ঝতি, কস্মা? চতুসমুট্ঠানিকরূপস্সপি সমানাযুকতায ভৰিতব্বত্তাতি অধিপ্পাযো. যথা পন এতেহি যোজিতং, তথা রূপস্স একুপ্পাদনানানিরোধতা নানুপ্পাদেকনিরোধতা চ নত্থিযেৰ.

যা পন এতেহি রূপস্স সত্তরসচিত্তক্খণাযুকতা ৰুত্তা, যা চ অট্ঠকথাযং ততিযভাগাধিকসোল়সচিত্তক্খণাযুকতা, সা পটিচ্চসমুপ্পাদৰিভঙ্গট্ঠকথাযং (ৰিভ. অট্ঠ. ২২৭) অতীতারম্মণায চুতিযা অনন্তরা পচ্চুপ্পন্নারম্মণং পটিসন্ধিং দস্সেতুং ‘‘এত্তাৰতা একাদস চিত্তক্খণা অতীতা হোন্তি, তথা পঞ্চদস চিত্তক্খণা অতীতা হোন্তি, অথাৰসেসপঞ্চচিত্তএকচিত্তক্খণাযুকে তস্মিং যেৰারম্মণে পটিসন্ধিচিত্তং উপ্পজ্জতী’’তি দস্সিতেন সোল়সচিত্তক্খণাযুকভাৰেন ৰিরুজ্ঝতি. ন হি সক্কা ‘‘ঠিতিক্খণে এৰ রূপং আপাথমাগচ্ছতী’’তি ৰত্তুং. তথা হি সতি ন রূপস্স একাদস ৰা পঞ্চদসেৰ ৰা চিত্তক্খণা অতীতা, অথ খো অতিরেকএকাদসপঞ্চদসচিত্তক্খণা. তস্মা যদিপি পঞ্চদ্ৰারে ঠিতিপ্পত্তমেৰ রূপং পসাদং ঘট্টেতীতি যুজ্জেয্য, মনোদ্ৰারে পন উপ্পাদক্খণেপি আপাথমাগচ্ছতীতি ইচ্ছিতব্বমেতং. ন হি মনোদ্ৰারে অতীতাদীসু কিঞ্চি আপাথং নাগচ্ছতীতি. মনোদ্ৰারে চ এৰং ৰুত্তং ‘‘একাদস চিত্তক্খণা অতীতা, অথাৰসেসপঞ্চচিত্তক্খণাযুকে’’তি (ৰিভ. অট্ঠ. ২২৭).

যো চেত্থ চিত্তস্স ঠিতিক্খণো ৰুত্তো, সো চ অত্থি নত্থীতি ৰিচারেতব্বো. চিত্তযমকে (যম. ২.চিত্তযমক.১০২) হি ‘‘উপ্পন্নং উপ্পজ্জমানন্তি? ভঙ্গক্খণে উপ্পন্নং, নো চ উপ্পজ্জমান’’ন্তি এত্তকমেৰ ৰুত্তং, ন ৰুত্তং ‘‘ঠিতিক্খণে ভঙ্গক্খণে চা’’তি. তথা ‘‘নুপ্পজ্জমানং নুপ্পন্নন্তি? ভঙ্গক্খণে নুপ্পজ্জমানং, নো চ নুপ্পন্ন’’ন্তি এত্তকমেৰ ৰুত্তং, ন ৰুত্তং ‘‘ঠিতিক্খণে ভঙ্গক্খণে চা’’তি. এৰং ‘‘ন নিরুদ্ধং ন নিরুজ্ঝমানং, ন নিরুজ্ঝমানং ন নিরুদ্ধ’’ন্তি এতেসং পরিপুণ্ণৰিস্সজ্জনে ‘‘উপ্পাদক্খণে অনাগতঞ্চা’’তি ৰত্ৰা ‘‘ঠিতিক্খণে’’তি অৰচনং, অতিক্কন্তকালৰারে চ ‘‘ভঙ্গক্খণে চিত্তং উপ্পাদক্খণং ৰীতিক্কন্ত’’ন্তি ৰত্ৰা ‘‘ঠিতিক্খণে’’তি অৰচনং ঠিতিক্খণাভাৰং চিত্তস্স দীপেতি. সুত্তেসুপি হি ‘‘ঠিতস্স অঞ্ঞথত্তং পঞ্ঞাযতী’’তি তস্সেৰ (সং. নি. ৩.৩৮; অ. নি. ৩.৪৭) একস্স অঞ্ঞথত্তাভাৰতো ‘‘যস্সা অঞ্ঞথত্তং পঞ্ঞাযতি, সা সন্ততিঠিতী’’তি ন ন সক্কা ৰত্তুন্তি, ৰিজ্জমানং ৰা খণদ্ৰযসমঙ্গিং ঠিতন্তি.

যো চেত্থ চিত্তনিরোধক্খণে রূপুপ্পাদো ৰুত্তো, সো চ ৰিচারেতব্বো ‘‘যস্স ৰা পন সমুদযসচ্চং নিরুজ্ঝতি, তস্স দুক্খসচ্চং উপ্পজ্জতীতি? নোতি ৰুত্ত’’ন্তি (যম. ১.সচ্চযমক.১৩৬). যো চ চিত্তস্স উপ্পাদক্খণে রূপনিরোধো ৰুত্তো, সো চ ৰিচারেতব্বো ‘‘যস্স কুসলা ধম্মা উপ্পজ্জন্তি, তস্স অব্যাকতা ধম্মা নিরুজ্ঝন্তীতি? নোতিআদি (যম. ৩.ধম্মযমক.১৬৩) ৰুত্ত’’ন্তি. ন চ চিত্তসমুট্ঠানরূপমেৰ সন্ধায পটিক্খেপো কতোতি সক্কা ৰত্তুং চিত্তসমুট্ঠানরূপাধিকারস্স অভাৰা, অব্যাকতসদ্দস্স চ চিত্তসমুট্ঠানরূপেস্ৰেৰ অপ্পৰত্তিতো. যদি সঙ্খারযমকে কাযসঙ্খারস্স চিত্তসঙ্খারেন সহুপ্পাদেকনিরোধৰচনতো অব্যাকত-সদ্দেন চিত্তসমুট্ঠানমেৰেত্থ গহিতন্তি কারণং ৰদেয্য, তম্পি অকারণং. ন হি তেন ৰচনেন অঞ্ঞরূপানং চিত্তেন সহুপ্পাদসহনিরোধপটিক্খেপো কতো, নাপি নানুপ্পাদনানানিরোধানুজাননং, নেৰ চিত্তসমুট্ঠানতো অঞ্ঞস্স অব্যাকতভাৰনিৰারণঞ্চ কতং, তস্মা তথা অপ্পটিক্খিত্তানানুঞ্ঞাতানিৰারিতাব্যাকতভাৰানং সহুপ্পাদসহনিরোধাদিকানং কম্মজাদীনং এতেন চিত্তস্স উপ্পাদক্খণে নিরোধো পটিক্খিত্তোতি ন সক্কা কম্মজাদীনং চিত্তস্স উপ্পাদক্খণে নিরোধং ৰত্তুং. যমকপাল়িঅনুস্সরণে চ সতি উপ্পাদানন্তরং চিত্তস্স ভিজ্জমানতাতি তস্মিং খণে চিত্তং ন চ রূপং সমুট্ঠাপেতি ৰিনস্সমানত্তা, নাপি চ অঞ্ঞস্স রূপসমুট্ঠাপকস্স সহাযভাৰং গচ্ছতীতি পটিসন্ধিচিত্তেন সহুপ্পন্নো উতু তদনন্তরস্স চিত্তস্স উপ্পাদক্খণে রূপং সমুট্ঠাপেয্য. এৰঞ্চ সতি রূপারূপানং আদিম্হি সহ রূপসমুট্ঠাপনতো পুব্বাপরতোতি ইদম্পি নত্থি, অতিলহুপরিৰত্তঞ্চ চিত্তন্তি যেন সহুপ্পজ্জতি, তং চিত্তক্খণে রূপং উপ্পজ্জমানমেৰাতি সক্কা ৰত্তুং. তেনেৰ হি তং পটিসন্ধিতো উদ্ধং অচিত্তসমুট্ঠানানং অত্তনা সহ উপ্পজ্জমানানং ন কেনচি পচ্চযেন পচ্চযো হোতি, তদনন্তরঞ্চ তং ঠিতিপ্পত্তন্তি তদনন্তরং চিত্তং তস্স পচ্ছাজাতপচ্চযো হোতি, ন সহজাতপচ্চযোতি. যদি এৰং ‘‘যস্স কাযসঙ্খারো উপ্পজ্জতি, তস্স ৰচীসঙ্খারো নিরুজ্ঝতীতি? নো’’তি (যম. ২.সঙ্খারযমক.১২৮), ৰত্তব্বন্তি চে? ন, চিত্তনিরোধক্খণে রূপুপ্পাদারম্ভাভাৰতোতি. নিপ্পরিযাযেন হি চিত্তস্স উপ্পাদক্খণে এৰ রূপং উপ্পজ্জমানং হোতি, চিত্তক্খণে পন অৰীতিৰত্তে তং অত্তনো রূপসমুট্ঠাপনপুরেজাতপচ্চযকিচ্চং ন করোতি, অরূপঞ্চ তস্স পচ্ছাজাতপচ্চযো ন হোতীতি ঠিতিপ্পত্তিৰিসেসালাভং সন্ধায পরিযাযেন ইদং ৰুত্তন্তি.

ততো পরং পনাতি এতস্স ‘‘এত্থ পন যদেত’’ন্তিআদিকাযপি সঙ্গহকথায নিট্ঠিতায পুরিমকথায সন্নিট্ঠানতো ‘‘ততো পট্ঠায কম্মজরূপপৰেণী ন পৰত্ততী’’তি এতেন সহ সম্বন্ধোতি চুতিতো পরন্তি অত্থো.

রূপং পন রূপেন সহাতিআদিনা যথা অট্ঠকথাযং ৰুত্তং, তথা একুপ্পাদেকনিরোধতা রূপানং অরূপেহি, অরূপানং রূপেহি চ নত্থীতি কত্ৰা রূপানং রূপেহেৰ, অরূপানঞ্চ অরূপেহি যোজিতা.

সরীরস্স রূপং অৰযৰভূতন্তি অত্থো, ঘনভূতো পুঞ্জভাৰো ঘনপুঞ্জভাৰো, ন তিলমুগ্গাদিপুঞ্জা ৰিয সিথিলসম্বন্ধনানং পুঞ্জোতি অত্থো. একুপ্পাদাদিতাতি যথাৰুত্তে তযো পকারে আহ.

হেট্ঠাতি রূপকণ্ডৰণ্ণনাযং. পরিনিপ্ফন্নাৰ হোন্তীতি ৰিকাররূপাদীনঞ্চ রূপকণ্ডৰণ্ণনাযং পরিনিপ্ফন্নতাপরিযাযো ৰুত্তোতি কত্ৰা ৰুত্তং. পরিনিপ্ফন্ননিপ্ফন্নানং কো ৰিসেসোতি? পুব্বন্তাপরন্তপরিচ্ছিন্নো পচ্চযেহি নিপ্ফাদিতো তিলক্খণাহতো সভাৰধম্মো পরিনিপ্ফন্নো, নিপ্ফন্নো পন অসভাৰধম্মোপি হোতি নামগ্গহণসমাপজ্জনাদিৰসেন নিপ্ফাদিযমানোতি. নিরোধসমাপত্তি পনাতি এতেন সব্বম্পি উপাদাপঞ্ঞত্তিং তদেকদেসেন দস্সেতীতি ৰেদিতব্বং.

পকিণ্ণককথাৰণ্ণনা নিট্ঠিতা.

কমাদিৰিনিচ্ছযকথাৰণ্ণনা

দস্সনেন পহাতব্বাতিআদিনা পঠমং পহাতব্বা পঠমং ৰুত্তা, দুতিযং পহাতব্বা দুতিযন্তি অযং পহানক্কমো. অনুপুব্বপণীতা ভূমিযো অনুপুব্বেন ৰৰত্থিতাতি তাসং ৰসেন দেসনায ভূমিক্কমো. ‘‘চত্তারো সতিপট্ঠানা’’তিআদিকো (সং. নি. ৫.৩৭২, ৩৮২, ৩৮৩; ৰিভ. ৩৫৫) একক্খণেপি সতিপট্ঠানাদিসম্ভৰতো দেসনাক্কমোৰ. দানকথাদযো অনুপুব্বুক্কংসতো কথিতা, উপ্পত্তিআদিৰৰত্থানাভাৰতো পন দানাদীনং ইধ দেসনাক্কমৰচনং. দেসনাক্কমোতি চ যথাৰুত্তৰৰত্থানাভাৰতো অনেকেসং ৰচনানং সহ পৰত্তিযা অসম্ভৰতো যেন কেনচি পুব্বাপরিযেন দেসেতব্বত্তা তেন তেনাধিপ্পাযেন দেসনামত্তস্সেৰ কমো ৰুচ্চতি. অভেদেন হীতি রূপাদীনং ভেদং অকত্ৰা পিণ্ডগ্গহণেনাতি অত্থো. চক্খুআদীনম্পি ৰিসযভূতন্তি একদেসেন রূপক্খন্ধং সমুদাযভূতং ৰদতি. এৰন্তি এত্থ ৰুত্তনযেনাতি অধিপ্পাযো. ‘‘ছদ্ৰারাধিপতি রাজা’’তি (ধ. প. অট্ঠ. ২.এরকপত্তনাগরাজৰত্থু) ‘‘মনোপুব্বঙ্গমা ধম্মা’’তি (ধ. প. ১-২) চ ৰচনতো ৰিঞ্ঞাণং অধিপতি.

রূপক্খন্ধে ‘‘সাসৰং উপাদানিয’’ন্তি ৰচনং অনাসৰানং ধম্মানং সব্ভাৰতো রূপক্খন্ধস্স তংসভাৰতানিৰত্তনত্থং, ন অনাসৰরূপনিৰত্তনত্থন্তি. অনাসৰাৰ খন্ধেসু ৰুত্তাতি এত্থ অট্ঠানপ্পযুত্তো এৰ-সদ্দো দট্ঠব্বো, অনাসৰা খন্ধেস্ৰেৰ ৰুত্তাতি অত্থো.

সব্বসঙ্খতানং সভাগেন একজ্ঝং সঙ্গহো সব্বসঙ্খতসভাগেকসঙ্গহো. সভাগসভাগেন হি সঙ্গয্হমানা সব্বসঙ্খতা ফস্সাদযো পঞ্চক্খন্ধা হোন্তি. তত্থ রুপ্পনাদিসামঞ্ঞেন সমানকোট্ঠাসা ‘‘সভাগা’’তি ৰেদিতব্বা. তেসু সঙ্খতাভিসঙ্খরণকিচ্চং আযূহনরসায চেতনায বলৰন্তি সা ‘‘সঙ্খারক্খন্ধো’’তি ৰুত্তা, অঞ্ঞে চ রুপ্পনাদিৰিসেসলক্খণরহিতা ফস্সাদযো সঙ্খতাভিসঙ্খরণসামঞ্ঞেনাতি দট্ঠব্বা. ফুসনাদযো পন সভাৰা ৰিসুং খন্ধ-সদ্দৰচনীযা ন হোন্তীতি ধম্মসভাৰৰিঞ্ঞুনা তথাগতেন ফস্সখন্ধাদযো ন ৰুত্তাতি দট্ঠব্বাতি. ‘‘যে কেচি, ভিক্খৰে, সমণা ৰা ব্রাহ্মণা ৰা সস্সতৰাদা সস্সতং লোকঞ্চ পঞ্ঞপেন্তি অত্তানঞ্চ, সব্বে তে ইমেযেৰ পঞ্চুপাদানক্খন্ধে নিস্সায পটিচ্চ, এতেসং ৰা অঞ্ঞতর’’ন্তিআদীনঞ্চ সুত্তানং ৰসেন অত্তত্তনিযগাহৰত্থুস্স এতপরমতা দট্ঠব্বা, এতেন চ ৰক্খমানসুত্তৰসেন চ খন্ধে এৰ নিস্সায পরিত্তারম্মণাদিৰসেন ন ৰত্তব্বা চ দিট্ঠি উপ্পজ্জতি, খন্ধনিব্বানৰজ্জস্স সভাৰধম্মস্স অভাৰতোতি ৰুত্তং হোতি. অঞ্ঞেসঞ্চ খন্ধ-সদ্দৰচনীযানং সীলক্খন্ধাদীনং সব্ভাৰতো ন পঞ্চেৰাতি এতং চোদনং নিৰত্তেতুমাহ ‘‘অঞ্ঞেসঞ্চ তদৰরোধতো’’তি.

দুক্খদুক্খৰিপরিণামদুক্খসঙ্খারদুক্খতাৰসেন ৰেদনায আবাধকত্তং দট্ঠব্বং. রাগাদিসম্পযুত্তস্স ৰিপরিণামাদিদুক্খস্স ইত্থিপুরিসাদিআকারগ্গাহিকা তংতংসঙ্কপ্পমূলভূতা সঞ্ঞা সমুট্ঠানং. রোগস্স পিত্তাদীনি ৰিয আসন্নকারণং সমুট্ঠানং, উতুভোজনৰেসমাদীনি ৰিয মূলকারণং নিদানং. ‘‘চিত্তস্সঙ্গভূতা চেতসিকা’’তি চিত্তং গিলানূপমং ৰুত্তং, সুখসঞ্ঞাদিৰসেন ৰেদনাকারণায হেতুভাৰতো ৰেদনাভোজনস্স ছাদাপনতো চ সঞ্ঞা অপরাধূপমা ব্যঞ্জনূপমা চ, ‘‘পঞ্চ ৰধকা পচ্চত্থিকাতি খো, ভিক্খৰে, পঞ্চন্নেতং উপাদানক্খন্ধানং অধিৰচন’’ন্তি আসিৰিসূপমে (সং. নি. ৪.২৩৮) ৰধকাতি ৰুত্তা, ‘‘ভারোতি খো, ভিক্খৰে, পঞ্চন্নেতং উপাদানক্খন্ধানং অধিৰচন’’ন্তি ভারসুত্তে (সং. নি. ৩.২২) ভারাতি, ‘‘অতীতংপাহং অদ্ধানং রূপেন খজ্জিং, সেয্যথাপাহং এতরহি পচ্চুপ্পন্নেন রূপেন খজ্জামি, অহঞ্চেৰ খো পন অনাগতং রূপং অভিনন্দেয্যং, অনাগতেনপাহং রূপেন খজ্জেয্যং. সেয্যথাপেতরহি খজ্জামী’’তিআদিনা খজ্জনীযপরিযাযেন (সং. নি. ৩.৭৯) খাদকাতি, ‘‘সো অনিচ্চং রূপং ‘অনিচ্চং রূপ’ন্তি যথাভূতং নপ্পজানাতী’’তিআদিনা যমকসুত্তে (সং. নি. ৩.৮৫) অনিচ্চাদিকাতি. যদিপি ইমস্মিং ৰিভঙ্গে অৰিসেসেন খন্ধা ৰুত্তা, বাহুল্লেন পন উপাদানক্খন্ধানং তদন্তোগধানং দট্ঠব্বতা ৰুত্তাতি ৰেদিতব্বাতি.

দেসিতাদিচ্চবন্ধুনাতি দেসিতং আদিচ্চবন্ধুনা, দেসিতানি ৰা. গাথাসুখত্থং অনুনাসিকলোপো, নিকারলোপো ৰা কতো.

গহেতুং ন সক্কাতি নিচ্চাদিৰসেন গহেতুং ন যুত্তন্তি অত্থো.

রূপেন সণ্ঠানেন ফলকসদিসো দিস্সমানো খরভাৰাভাৰা ফলককিচ্চং ন করোতীতি ‘‘ন সক্কা তং গহেত্ৰা ফলকং ৰা আসনং ৰা কাতু’’ন্তি আহ. ন তথা তিট্ঠতীতি নিচ্চাদিকা ন হোতীতি অত্থো, তণ্হাদিট্ঠীহি ৰা নিচ্চাদিগ্গহণৰসেন উপ্পাদাদিঅনন্তরং ভিজ্জনতো গহিতাকারা হুত্ৰা ন তিট্ঠতীতি অত্থো. কোটিসতসহস্সসঙ্খ্যাতি ইদং ন গণনপরিচ্ছেদদস্সনং, বহুভাৰদস্সনমেৰ পনেতং দট্ঠব্বং. উদকজল্লকন্তি উদকলসিকং. যথা উদকতলে বিন্দুনিপাতজনিতো ৰাতো উদকজল্লকং সঙ্কড্ঢিত্ৰা পুটং কত্ৰা পুপ্ফুল়ং নাম করোতি, এৰং ৰত্থুম্হি আরম্মণাপাথগমনজনিতো ফস্সো অনুপচ্ছিন্নং কিলেসজল্লং সহকারীপচ্চযন্তরভাৰেন সঙ্কড্ঢিত্ৰা ৰেদনং নাম করোতি. ইদঞ্চ কিলেসেহি মূলকারণভূতেহি আরম্মণস্সাদনভূতেহি চ নিব্বত্তং ৰট্টগতৰেদনং সন্ধায ৰুত্তন্তি ৰেদিতব্বং. উক্কট্ঠপরিচ্ছেদেন ৰা চত্তারো পচ্চযা ৰুত্তা, ঊনেহিপি পন উপ্পজ্জতেৰ.

নানালক্খণোতি ৰণ্ণগন্ধরসফস্সাদীহি নানাসভাৰো. মাযায দস্সিতং রূপং ‘‘মাযা’’তি আহ. পঞ্চপি উপাদানক্খন্ধা অসুভাদিসভাৰা এৰ কিলেসাসুচিৰত্থুভাৰাদিতোতি অসুভাদিতো দট্ঠব্বা এৰ. তথাপি কত্থচি কোচি ৰিসেসো সুখগ্গহণীযো হোতীতি আহ ‘‘ৰিসেসতো চা’’তিআদি. তত্থ চত্তারো সতিপট্ঠানা চতুৰিপল্লাসপ্পহানকরাতি তেসং গোচরভাৰেন রূপক্খন্ধাদীসু অসুভাদিৰসেন দট্ঠব্বতা ৰুত্তা.

খন্ধেহি ন ৰিহঞ্ঞতি পরিৰিদিতসভাৰত্তা. ৰিপস্সকোপি হি তেসং ৰিপত্তিযং ন দুক্খমাপজ্জতি, খীণাসৰেসু পন ৰত্তব্বমেৰ নত্থি. তে হি আযতিম্পি খন্ধেহি ন বাধীযন্তীতি. কবল়ীকারাহারং পরিজানাতীতি ‘‘আহারসমুদযা রূপসমুদযো’’তি (সং. নি. ৩.৫৬-৫৭) ৰুত্তত্তা অজ্ঝত্তিকরূপে ছন্দরাগং পজহন্তো তস্স সমুদযভূতে কবল়ীকারাহারেপি ছন্দরাগং পজহতীতি অত্থো, অযং পহানপরিঞ্ঞা. অজ্ঝত্তিকরূপং পন পরিগ্গণ্হন্তো তস্স পচ্চযভূতং কবল়ীকারাহারম্পি পরিগ্গণ্হাতীতি ঞাতপরিঞ্ঞা. তস্স চ উদযৰযানুপস্সী হোতীতি তীরণপরিঞ্ঞা চ যোজেতব্বা. কামরাগভূতং অভিজ্ঝং সন্ধায ‘‘অভিজ্ঝাকাযগন্থ’’ন্তি আহ. অসুভানুপস্সনায হি কামরাগপ্পহানং হোতীতি. কামরাগমুখেন ৰা সব্বলোভপ্পহানং ৰদতি. ‘‘ফস্সপচ্চযা ৰেদনা’’তি ৰুত্তত্তা আহারপরিজাননে ৰুত্তনযেন ফস্সপরিজাননঞ্চ যোজেতব্বং.

সুখত্থমেৰ ভৰপত্থনা হোতীতি ৰেদনায তণ্হং পজহন্তো ভৰোঘং উত্তরতি. সব্বং ৰেদনং দুক্খতো পস্সন্তো অত্তনো পরেন অপুব্বং দুক্খং উপ্পাদিতং, সুখং ৰা ৰিনাসিতং ন পস্সতি, ততো ‘‘অনত্থং মে অচরী’’তিআদিআঘাতৰত্থুপ্পহানতো ব্যাপাদকাযগন্থং ভিন্দতি. ‘‘সুখবহুলে সুগতিভৰে সুদ্ধী’’তি গহেত্ৰা গোসীলগোৰতাদীহি সুদ্ধিং পরামসন্তো সুখপত্থনাৰসেনেৰ পরামসতীতি ৰেদনায তণ্হং পজহন্তো সীলব্বতুপাদানং ন উপাদিযতি. মনোসঞ্চেতনা সঙ্খারক্খন্ধোৰ, সঞ্ঞা পন তংসম্পযুত্তাতি সঞ্ঞাসঙ্খারে অনত্ততো পস্সন্তো মনোসঞ্চেতনায ছন্দরাগং পজহতি এৰ, তঞ্চ পরিগ্গণ্হাতি তীরেতি চাতি ‘‘সঞ্ঞং সঙ্খারে…পে… পরিজানাতী’’তি ৰুত্তং.

অৰিজ্জায ৰিঞ্ঞাণে ঘনগ্গহণং হোতীতি ঘনৰিনিব্ভোগং কত্ৰা তং অনিচ্চতো পস্সন্তো অৰিজ্জোঘং উত্তরতি. মোহবলেনেৰ সীলব্বতপরামাসং হোতীতি তং পজহন্তো সীলব্বতপরামাসকাযগন্থং ভিন্দতি.

‘‘যঞ্চ খো এতং, ভিক্খৰে, ৰুচ্চতি চিত্তং ইতিপি মনো ইতিপি ৰিঞ্ঞাণং ইতিপি, তত্রাস্সুতৰা পুথুজ্জনো নালং নিব্বিন্দিতুং, নালং ৰিরজ্জিতুং, নালং ৰিমুচ্চিতুং. তং কিস্স হেতু? দীঘরত্তংহেতং, ভিক্খৰে, অস্সুতৰতো পুথুজ্জনস্স অজ্ঝোসিতং মমাযিতং পরামট্ঠং ‘এতং মম, এসোহমস্মি, এসো মে অত্তা’’তি (সং. নি. ২.৬১) –

ৰচনতো ৰিঞ্ঞাণং নিচ্চতো পস্সন্তো দিট্ঠুপাদানং উপাদিযতীতি অনিচ্চতো পস্সন্তো তং ন উপাদিযতীতি.

কমাদিৰিনিচ্ছযকথাৰণ্ণনা নিট্ঠিতা.

সুত্তন্তভাজনীযৰণ্ণনা নিট্ঠিতা.

২. অভিধম্মভাজনীযৰণ্ণনা

৩৪. এৰং যা একৰিধাদিনা ৰুত্তৰেদনানং ভূমিৰসেন জানিতব্বতা, তং ৰত্ৰা পুন সম্পযুত্ততো দস্সিততাদিজানিতব্বপ্পকারং ৰত্তুমাহ ‘‘অপিচা’’তিআদি. অট্ঠৰিধেন তত্থাতি তত্থ-সদ্দস্স সত্তৰিধভেদেনেৰ যোজনা ছব্বিধভেদেন যোজনায সতি অট্ঠৰিধত্তাভাৰতো.

পূরণত্থমেৰ ৰুত্তোতি দসৰিধতাপূরণত্থমেৰ ৰুত্তো, ন নৰৰিধভেদে ৰিয নযদানত্থং. কস্মা? তত্থ নযস্স দিন্নত্তা. ভিন্দিতব্বস্স হি ভেদনং নযদানং, তঞ্চ তত্থ কতন্তি. যথা চ কুসলত্তিকো, এৰং ‘‘কাযসম্ফস্সজা ৰেদনা অত্থি সুখা, অত্থি দুক্খা’’তি ইদম্পি পূরণত্থমেৰাতি দীপিতং হোতি অট্ঠৰিধভেদে নযস্স দিন্নত্তা.

পুব্বে গহিততো অঞ্ঞস্স গহণং ৰড্ঢনং গহণৰড্ঢনৰসেন, ন পুরিমগহিতে ঠিতে অঞ্ঞুপচযৰসেন. ৰড্ঢন-সদ্দো ৰা ছেদনত্থো কেসৰড্ঢনাদীসু ৰিযাতি পুব্বে গহিতস্স অগ্গহণং ছিন্দনং ৰড্ঢনং, দুকতিকানং উভযেসং ৰড্ঢনং উভযৰড্ঢনং, উভযতো ৰা পৰত্তং ৰড্ঢনং উভযৰড্ঢনং, তদেৰ উভতোৰড্ঢনকং, তেন নযনীহরণং উভতোৰড্ঢনকনীহারো. ৰড্ঢনকনযো ৰা ৰড্ঢনকনীহারো, উভযতো পৰত্তো ৰড্ঢনকনীহারো উভতোৰড্ঢনকনীহারো. তত্থ দুকমূলকতিকমূলকউভতোৰড্ঢনকেসু দুৰিধতিৰিধভেদানংযেৰ হি ৰিসেসো. অঞ্ঞে ভেদা অৰিসিট্ঠা, তথাপি পঞ্ঞাপ্পভেদজননত্থং ধম্মৰিতক্কেন ঞাতিৰিতক্কাদিনিরত্থকৰিতক্কনিৰারণত্থং ইমঞ্চ পাল়িং ৰিতক্কেন্তস্স ধম্মুপসংহিতপামোজ্জজননত্থং একেকস্স ৰারস্স গহিতস্স নিয্যানমুখভাৰতো চ দুৰিধতিৰিধভেদনানত্তৰসেন ইতরেপি ভেদা ৰুত্তাতি ৰেদিতব্বা অঞ্ঞমঞ্ঞাপেক্খেসু একস্স ৰিসেসেন ইতরেসম্পি ৰিসিট্ঠভাৰতো. ন কেৰলং একৰিধোৰ, অথ খো দুৰিধো চ. ন চ একদুৰিধোৰ, অথ খো তিৰিধোপি. নাপি এক…পে… নৰৰিধোৰ, অথ খো দসৰিধোপীতি হি এৰঞ্চ তে ভেদা অঞ্ঞমঞ্ঞাপেক্খা, তস্মা একো ভেদো ৰিসিট্ঠো অত্তনা অপেক্খিযমানে, অত্তানঞ্চ অপেক্খমানে অঞ্ঞভেদে ৰিসেসেতীতি তস্স ৰসেন তেপি ৰত্তব্বতং অরহন্তীতি ৰুত্তাতি দট্ঠব্বা.

সত্তৰিধেনাতিআদযো অঞ্ঞপ্পভেদনিরপেক্খা কেৰলং বহুপ্পকারতাদস্সনত্থং ৰুত্তাতি সব্বেহি তেহি পকারেহি ‘‘বহুৰিধেন ৰেদনাক্খন্ধং দস্সেসী’’তি ৰুত্তং. মহাৰিসযো রাজা ৰিয সৰিসযে ভগৰাপি মহাৰিসযতায অপ্পটিহতো যথা যথা ইচ্ছতি, তথা তথা দেসেতুং সক্কোতি সব্বঞ্ঞুতানাৰরণঞাণযোগতোতি অত্থো. দুকে ৰত্ৰা তিকা ৰুত্তাতি তিকা দুকেসু পক্খিত্তাতি যুত্তং, দুকা পন কথং তিকেসু পক্খিত্তাতি? পরতো ৰুত্তেপি তস্মিং তস্মিং তিকে অপেক্খকাপেক্খিতব্বৰসেন দুকানং যোজিতত্তা.

কিরিযমনোধাতু আৰজ্জনৰসেন লব্ভতীতি ৰুত্তং, আৰজ্জনা পন চক্খুসম্ফস্সপচ্চযা ন হোতি. ন হি সমানৰীথিযং পচ্ছিমো ধম্মো পুরিমস্স কোচি পচ্চযো হোতি. যে চ ৰদন্তি ‘‘আৰজ্জনৰেদনাৰ চক্খুসঙ্ঘট্টনায উপ্পন্নত্তা এৰং ৰুত্তা’’তি, তঞ্চ ন যুত্তং. ন হি ‘‘চক্খুরূপপটিঘাতো চক্খুসম্ফস্সো’’তি কত্থচি সুত্তে ৰা অট্ঠকথাযং ৰা ৰুত্তং. যদি সো চ চক্খুসম্ফস্সো সিযা, চক্খুৰিঞ্ঞাণসহজাতাপি ৰেদনা চক্খুসম্ফস্সপচ্চযাতি সা ইধ অট্ঠকথাযং ন ৰজ্জেতব্বা সিযা. পাল়িযঞ্চ ‘‘চক্খুসম্ফস্সপচ্চযা ৰেদনা অত্থি অব্যাকতা’’তি এত্থ সঙ্গহিতত্তা পুন ‘‘চক্খুসম্ফস্সজা ৰেদনা’’তি ন ৰত্তব্বং সিযাতি. অযং পনেত্থাধিপ্পাযো – আৰজ্জনৰেদনং ৰিনা চক্খুসম্ফস্সস্স উপ্পত্তি নত্থীতি তদুপ্পাদিকা সা তপ্পযোজনত্তা পরিযাযেন চক্খুসম্ফস্সপচ্চযাতি ৰত্তুং যুত্তাতি, নিপ্পরিযাযেন পন চক্খুসম্ফস্সস্স পরতোৰ ৰেদনা লব্ভন্তি.

চতুত্তিংসচিত্তুপ্পাদৰসেনাতি এত্থ রূপারূপাৰচরানং অগ্গহণং তেসং সযমেৰ মনোদ্ৰারভূতত্তা. সব্বভৰঙ্গমনো হি মনোদ্ৰারং, চুতিপটিসন্ধিযো চ ততো অনঞ্ঞাতি. ইমস্মিং পন চতুৰীসতিৰিধভেদে চক্খুসম্ফস্সপচ্চযাদিকুসলাদীনং সমানৰীথিযং লব্ভমানতা অট্ঠকথাযং ৰুত্তা, পাল়িযং পন একূনৰীসতিচতুৰীসতিকা সঙ্খিপিত্ৰা আগতাতি ‘‘চক্খুসম্ফস্সপচ্চযা ৰেদনাক্খন্ধো অত্থি অনুপাদিন্নঅনুপাদানিযো অসংকিলিট্ঠঅসংকিলেসিকো অৰিতক্কঅৰিচারো’’তিআদিনা নানাৰীথিগতানং লব্ভমানতায ৰুত্তত্তা কুসলত্তিকস্সপি নানাৰীথিযং লব্ভমানতা যোজেতব্বা. অট্ঠকথাযং পন সমানৰীথিযং চক্খুসম্ফস্সপচ্চযাদিকতা একন্তিকাতি কত্ৰা এত্থ লব্ভমানতা দস্সিতা, ন পন অসমানৰীথিযং লব্ভমানতা পটিক্খিত্তা. তেনেৰ ‘‘তানি সত্তৰিধাদীসু যত্থ কত্থচি ঠত্ৰা কথেতুং ৰট্টন্তী’’তি আহ. ন হি সমানৰীথিযংযেৰ উপনিস্সযকোটিসমতিক্কমভাৰনাহি লব্ভমানতা হোতি. তিধাপি চ লব্ভমানতং সন্ধায ‘‘যত্থ কত্থচি ঠত্ৰা কথেতুং ৰট্টন্তী’’তি ৰুচ্চতি.

এতানীতি যথাদস্সিতানি কুসলাদীনি চিত্তানি ৰদতি, ৰেদনানিদ্দেসেপি চ এতস্মিং পুব্বঙ্গমস্স চিত্তস্স ৰসেন কথেতুং সুখন্তি চিত্তসম্বন্ধো কতো. তেনেৰ পন চিত্তানি সত্তৰিধভেদে তিকভূমিৰসেন, চতুৰীসতিৰিধভেদে দ্ৰারতিকৰসেন, তিংসৰিধভেদে দ্ৰারভূমিৰসেন, বহুৰিধভেদে দ্ৰারতিকভূমিৰসেন দীপিতানীতি ‘‘তেসু যত্থ কত্থচি ঠত্ৰা কথেতুং ৰট্টন্তী’’তি ৰুত্তং. কুসলাদীনং দীপনা কামাৰচরাদিভূমিৰসেন কাতব্বা, তা চ ভূমিযো তিংসৰিধভেদে সযমেৰাগতা, ন চ সত্তৰিধভেদে ৰিয দ্ৰারং অনামট্ঠং, অতিব্যত্তা চ এত্থ সমানাসমানৰীথীসু লব্ভমানতাতি তিংসৰিধে…পে… সুখদীপনানি হোন্তী’’তি ৰুত্তং. কস্মা পন তিংসৰিধস্মিংযেৰ ঠত্ৰা দীপযিংসু, ননু দ্ৰারতিকভূমীনং আমট্ঠত্তা বহুৰিধভেদে ঠত্ৰা দীপেতব্বানীতি? ন, দীপেতব্বট্ঠানাতিক্কমতো. সত্তৰিধভেদো হি দ্ৰারস্স অনামট্ঠত্তা দীপনায অট্ঠানং, চতুৰীসতিৰিধভেদে আমট্ঠদ্ৰারতিকা ন ভূমিযো অপেক্খিত্ৰা ঠপিতা, তিংসৰিধভেদে আমট্ঠদ্ৰারভূমিযো ৰুত্তা. যে চ ঠপিতা, তে চেত্থ তিকা অপেক্খিতব্বরহিতা কেৰলং ভূমীহি সহ দীপেতব্বাৰ. তেনেদং দীপনায ঠানং, তদতিক্কমে পন ঠানাতিক্কমো হোতীতি.

উপনিস্সযকোটিযাতি এত্থ ‘‘সদ্ধং উপনিস্সায দানং দেতী’’তিআদিনা (পট্ঠা. ১.১.৪২৩) নানাৰীথিযং পকতূপনিস্সযো ৰুত্তোতি একৰীথিযং কুসলাদীনং চক্খুসম্ফস্সাদযো তদভাৰে অভাৰতো জাতি ৰিয জরামরণস্স উপনিস্সযলেসেন পচ্চযোতি ৰত্তুং যুজ্জেয্য, ইধ পন ‘‘কসিণরূপদস্সনহেতুউপ্পন্না পরিকম্মাদিৰেদনা চক্খুসম্ফস্সপচ্চযা’’তি ৰক্খতি, তস্মা নানাৰীথিযং গতানি এতানি চিত্তানি চক্খুসম্ফস্সপচ্চযা লব্ভমানানীতি ন উপনিস্সযলেসো উপনিস্সযকোটি, বলৰবলৰানং পন পরিকম্মাদীনং উপনিস্সযানং সব্বেসং আদিভূতো উপনিস্সযো উপনিস্সযকোটি. ‘‘ৰালকোটি ন পঞ্ঞাযতী’’তিআদীসু ৰিয হি আদি, অৰযৰো ৰা কোটি. কসিণরূপদস্সনতো পভুতি চ কামাৰচরকুসলাদীনং ৰেদনানং উপনিস্সযো পৰত্তোতি তং দস্সনং উপনিস্সযকোটি. পরিকম্মাদীনি ৰিয ৰা ন বলৰউপনিস্সযো দস্সনন্তি তস্স উপনিস্সযন্তভাৰেন উপনিস্সযকোটিতা ৰুত্তা. ঘানাদিদ্ৰারেসু তীসু উপনিস্সযকোটিযা লব্ভমানত্তাভাৰং ৰদন্তো ইধ সমানৰীথি ন গহিতাতি দীপেতি. দস্সনসৰনানি ৰিয হি কসিণপরিকম্মাদীনং ঘাযনাদীনি উপনিস্সযা ন হোন্তীতি তদলাভো দীপিতোতি. যদিপি ৰাযোকসিণং ফুসিত্ৰাপি গহেতব্বং, পুরিমেন পন সৰনেন ৰিনা তং ফুসনং সযমেৰ মূলুপনিস্সযো যেভুয্যেন ন হোতীতি তস্স উপনিস্সযকোটিতা ন ৰুত্তা.

অজ্ঝাসযেন সম্পত্তিগতো অজ্ঝাসযসম্পন্নো, সম্পন্নজ্ঝাসযোতি ৰুত্তং হোতি. ৰত্তপ্পটিৰত্তন্তি খুদ্দকঞ্চেৰ মহন্তঞ্চ ৰত্তং, পুব্বে ৰা কতং ৰত্তং, পচ্ছা কতং পটিৰত্তং. এৰং চক্খুৰিঞ্ঞাণন্তি আদিম্হি উপ্পন্নং আহ, ততো পরং উপ্পন্নানিপি পন কসিণরূপদস্সনকল্যাণমিত্তদস্সনসংৰেগৰত্থুদস্সনাদীনি উপনিস্সযপচ্চযা হোন্তিযেৰাতি. তেন তদুপনিস্সযং চক্খুৰিঞ্ঞাণং দস্সেতীতি ৰেদিতব্বং.

যথাভূতসভাৰাদস্সনং অসমপেক্খনা. ‘‘অস্মী’’তি রূপাদীসু ৰিনিবন্ধস্স. সভাৰন্তরামসনৰসেন পরামট্ঠস্স, পরামট্ঠৰতোতি অত্থো. আরম্মণাধিগহণৰসেন অনু অনু উপ্পজ্জনধম্মতায থিরভাৰকিলেসস্স থামগতস্স, অপ্পহীনকামরাগাদিকস্স ৰা. পরিগ্গহে ঠিতোতি ৰীমংসায ঠিতো. এত্থ চ অসমপেক্খনাযাতিআদিনা মোহাদীনং কিচ্চেন পাকটেন তেসং উপ্পত্তিৰসেন ৰিচারণা দট্ঠব্বা. রূপদস্সনেন উপ্পন্নকিলেসসমতিক্কমৰসেন পৰত্তা রূপদস্সনহেতুকা হোতীতি ‘‘চক্খুসম্ফস্সপচ্চযা নাম জাতা’’তি আহ. এত্থ চ চক্খুসম্ফস্সস্স চতুভূমিকৰেদনায উপনিস্সযভাৰো এৰ পকারন্তরেন কথিতো, তথা ‘‘ভাৰনাৰসেনা’’তি এত্থ চ.

কলাপসম্মসনেন তীণি লক্খণানি আরোপেত্ৰা উদযব্বযানুপস্সনাদিকায ৰিপস্সনাপটিপাটিযা আদিম্হি রূপারম্মণপরিগ্গহেন রূপারম্মণং সম্মসিত্ৰা, তংমূলকং ৰা সব্বং সম্মসনং আদিভূতে রূপারম্মণে পৰত্ততীতি কত্ৰা আহ ‘‘রূপারম্মণং সম্মসিত্ৰা’’তি. এত্থ চ নামরূপপরিগ্গহাদি সব্বং সম্মসনং ভাৰনাতি ৰেদিতব্বা. রূপারম্মণং সম্মসিত্ৰাতি চ যথাৰুত্তচক্খুৰিঞ্ঞাণস্স আরম্মণভূতং রূপারম্মণং ৰুত্তং, ন যং কিঞ্চি. আরম্মণেন হি চক্খুসম্ফস্সং দস্সেতীতি. এৰং ‘‘রূপারম্মণে উপ্পন্নং কিলেস’’ন্তি এত্থাপি ৰেদিতব্বং.

ইদং ফোট্ঠব্বং কিংনিস্সিতন্তি চক্খুদ্ৰারে ৰিয যোজনায যথাসম্ভৰং আপোধাতুযা অঞ্ঞমঞ্ঞস্স চ ৰসেন মহাভূতনিস্সিততা যোজেতব্বা.

জাতি…পে… বলৰপচ্চযো হোতীতি যথাৰুত্তানং ভযতো দিস্সমানানং জাতিআদীনং বলৰপচ্চযভাৰেন তেসং ভযতো দস্সনেন সহজাতস্স মনোসম্ফস্সস্স, তস্স ৰা দস্সনস্স দ্ৰারভূতস্স ভৰঙ্গমনোসম্ফস্সস্স বলৰপচ্চযভাৰং দস্সেতি.

ধম্মারম্মণেতি ন পুব্বে ৰুত্তে জাতিআদিআরম্মণেৰ, অথ খো সব্বস্মিং রাগাদিৰত্থুভূতে ধম্মারম্মণে. ৰত্থুনিস্সিতন্তি এত্থ ৰেদনাদিসঙ্খাতস্স ধম্মারম্মণেকদেসস্স পরিগ্গহমুখেন ধম্মারম্মণপরিগ্গহং দস্সেতি.

মনোসম্ফস্সোতি ৰিঞ্ঞাণং সম্ফস্সস্স কারণভাৰেন গহিতং, তদেৰ অত্তনো ফলস্সেৰ ফলভাৰেন ৰত্তুং ন যুত্তং কারণফলসঙ্করভাৰেন সোতূনং সম্মোহজনকত্তাতি আহ ‘‘ন হি সক্কা ৰিঞ্ঞাণং মনোসম্ফস্সজন্তি নিদ্দিসিতু’’ন্তি, ন পন ৰিঞ্ঞাণস্স মনোসম্ফস্সেন সহজাতভাৰস্স অভাৰা. যস্মা ৰা যথা ‘‘তিণ্ণং সঙ্গতি ফস্সো’’তি (ম. নি. ১.২০৪; ৩.৪২০, ৪২৫-৪২৬; সং. নি. ৪.৬০) ৰচনতো ইন্দ্রিযৰিসযা ৰিয ৰিঞ্ঞাণম্পি ফস্সস্স ৰিসেসপচ্চযো, ন তথা ফস্সো ৰিঞ্ঞাণস্স, তস্মা ইন্দ্রিযৰিসযা ৰিয ৰিঞ্ঞাণম্পি চক্খুসম্ফস্সজাদিৰচনং ন অরহতীতি চক্খুসম্ফস্সজাদিভাৰো ন কতোতি ৰেদিতব্বো.

অভিধম্মভাজনীযৰণ্ণনা নিট্ঠিতা.

৩. পঞ্হপুচ্ছকৰণ্ণনা

১৫০. চিত্তুপ্পাদরূপৰসেন তং তং সমুদাযং একেকং ধম্মং কত্ৰা ‘‘পঞ্চপণ্ণাস কামাৰচরধম্মে’’তি আহ. রজ্জন্তস্সাতিআদীসু রাগাদযো ছসু দ্ৰারেসু সীলাদযো চ পঞ্চ সংৰরা যথাসম্ভৰং যোজেতব্বা, সম্মসনং পন মনোদ্ৰারে এৰ. রূপারূপাৰচরধম্মেসু অভিজ্ঝাদোমনস্সাদিউপ্পত্তি অত্থীতি ততো সতিসংৰরো ঞাণৰীরিযসংৰরা চ যথাযোগং যোজেতব্বা. পরিগ্গহৰচনেন সম্মসনপচ্চৰেক্খণানি সঙ্গণ্হাতি. তেযেৰাতি চত্তারো খন্ধা ৰুত্তা.

সমানে দেসিতব্বে দেসনামত্তস্স পরিৰট্টনং পরিৰট্টো. তীসুপি পরিৰট্টেসু কত্থচি কিঞ্চি ঊনং অধিকং ৰা নত্থীতি কত্ৰা আহ ‘‘একোৰ পরিচ্ছেদো’’তি.

পঞ্হপুচ্ছকৰণ্ণনা নিট্ঠিতা.

খন্ধৰিভঙ্গৰণ্ণনা নিট্ঠিতা.

২. আযতনৰিভঙ্গো

১. সুত্তন্তভাজনীযৰণ্ণনা

১৫২. ৰিসেসতোতি আযতন-সদ্দত্থো ৰিয অসাধারণতো চক্খাদিসদ্দত্থতোতি অত্থো. অস্সাদেতীতি চক্খতি-সদ্দো ‘‘মধুং চক্খতি ব্যঞ্জনং চক্খতী’’তি রসসাযনত্থো অত্থীতি তস্স ৰসেন অত্থং ৰদতি. ‘‘চক্খুং খো, মাগণ্ডিয, রূপারামং রূপরতং রূপসম্মুদিত’’ন্তি (ম. নি. ২.২০৯) ৰচনতো চক্খু রূপং অস্সাদেতি. সতিপি সোতাদীনং সদ্দারম্মণাদিরতিভাৰে নিরুল়্হত্তা চক্খুম্হিযেৰ চক্খু-সদ্দো পৰত্ততি পদুমাদীসু পঙ্কজাদিসদ্দা ৰিযাতি দট্ঠব্বং. ৰিভাৰেতি চাতি সদ্দলক্খণসিদ্ধস্স চক্খতি-সদ্দস্স ৰসেন অত্থং ৰদতি. চক্খতীতি হি আচিক্খতি, অভিব্যত্তং ৰদতীতি অত্থো. নযনস্স চ ৰদন্তস্স ৰিয সমৰিসমৰিভাৰনমেৰ আচিক্খনন্তি কত্ৰা আহ ‘‘ৰিভাৰেতি চাতি অত্থো’’তি. অনেকত্থত্তা ৰা ধাতূনং ৰিভাৰনত্থতা চক্খু-সদ্দস্স দট্ঠব্বা. রত্তদুট্ঠাদিকালেসু ককণ্টকরূপং ৰিয উদ্দরূপং ৰিয চ ৰণ্ণৰিকারং আপজ্জমানং রূপং হদযঙ্গতভাৰং রূপযতি রূপমিৰ পকাসং করোতি, সৰিগ্গহমিৰ কত্ৰা দস্সেতীতি অত্থো. ৰিত্থারণং ৰা রূপ-সদ্দস্স অত্থো, ৰিত্থারণঞ্চ পকাসনমেৰাতি আহ ‘‘পকাসেতী’’তি. অনেকত্থত্তা ৰা ধাতূনং পকাসনত্থোযেৰ রূপ-সদ্দো দট্ঠব্বো, ৰণ্ণৰাচকস্স রূপ-সদ্দস্স রূপযতীতি নিব্বচনং, রূপৰাচকস্স রুপ্পতীতি অযং ৰিসেসো.

উদাহরীযতীতি ৰুচ্চতীতি-অত্থে ৰচনমেৰ গহিতং সিযা, ন চ ৰচন-সদ্দোযেৰ এত্থ সদ্দো, অথ খো সব্বোপি সোতৰিঞ্ঞেয্যোতি সপ্পতীতি সকেহি পচ্চযেহি সপ্পীযতি সোতৰিঞ্ঞেয্যভাৰং গমীযতীতি অত্থো. সূচযতীতি অত্তনো ৰত্থুং গন্ধৰসেন অপাকটং ‘‘ইদং সুগন্ধং দুগ্গন্ধ’’ন্তি পকাসেতি, পটিচ্ছন্নং ৰা পুপ্ফাদিৰত্থুং ‘‘এত্থ পুপ্ফং অত্থি চম্পকাদি, ফলমত্থি অম্বাদী’’তি পেসুঞ্ঞং করোন্তং ৰিয হোতীতি অত্থো. রসগ্গহণমূলকত্তা আহারজ্ঝোহরণস্স জীৰিতহেতুম্হি আহাররসে নিন্নতায জীৰিতং অৰ্হাযতীতি জিৰ্হা ৰুত্তা নিরুত্তিলক্খণেন. কুচ্ছিতানং সাসৰধম্মানং আযোতি ৰিসেসেন কাযো ৰুত্তো অনুত্তরিযহেতুভাৰং অনাগচ্ছন্তেসু কামরাগনিদানকম্মজনিতেসু কামরাগস্স চ ৰিসেসপচ্চযেসু ঘানজিৰ্হাকাযেসু কাযস্স ৰিসেসতরসাসৰপচ্চযত্তা. তেন হি ফোট্ঠব্বং অস্সাদেন্তা সত্তা মেথুনম্পি সেৰন্তি. উপ্পত্তিদেসোতি উপ্পত্তিকারণন্তি অত্থো. কাযিন্দ্রিযৰত্থুকা ৰা চত্তারো খন্ধা বলৰকামাসৰাদিহেতুভাৰতো ৰিসেসেন ‘‘সাসৰা’’তি ৰুত্তা, তেসং উপ্পজ্জনট্ঠানন্তি অত্থো. অত্তনো লক্খণং ধারযন্তীতি যে ৰিসেসলক্খণেন আযতনসদ্দপরা ৰত্তব্বা, তে চক্খাদযো তথা ৰুত্তাতি অঞ্ঞে মনোগোচরভূতা ধম্মা সামঞ্ঞলক্খণেনেৰ একাযতনত্তং উপনেত্ৰা ৰুত্তা. ওল়ারিকৰত্থারম্মণমননসঙ্খাতেহি ৰিসযৰিসযিভাৰেহি পুরিমানি পাকটানীতি তথা অপাকটা চ অঞ্ঞে মনোগোচরা ন অত্তনো সভাৰং ন ধারেন্তীতি ইমস্সত্থস্স দীপনত্থো ধম্ম-সদ্দোতি.

ৰাযমন্তীতি অত্তনো কিচ্চং করোন্তিচ্চেৰ অত্থো. ইমস্মিঞ্চ অত্থে আযতন্তি এত্থাতি আযতনন্তি অধিকরণত্থো আযতন-সদ্দো, দুতিযততিযেসু কত্তুঅত্থো. তে চাতি চিত্তচেতসিকধম্মে. তে হি তংতংদ্ৰারারম্মণেসু আযন্তি আগচ্ছন্তি পৰত্তন্তীতি আযাতি. ৰিত্থারেন্তীতি পুব্বে অনুপ্পন্নত্তা লীনানি অপাকটানি পুব্বন্ততো উদ্ধং পসারেন্তি পাকটানি করোন্তি উপ্পাদেন্তীতি অত্থো.

রুল়্হীৰসেন আযতন-সদ্দস্সত্থং ৰত্তুং ‘‘অপিচা’’তিআদি আরদ্ধং. তং নিস্সিতত্তাতি এত্থ মনো মনোৰিঞ্ঞাণাদীনং চিত্তচেতসিকানং নিস্সযপচ্চযো ন হোতীতি তস্স নেসং দ্ৰারভাৰো নিস্সযভাৰোতি দট্ঠব্বো. অত্থতোতি ৰচনত্থতো, ন ৰচনীযত্থতো. ৰচনত্থো হেত্থ ৰুত্তো ‘‘চক্খতী’’তিআদিনা, ন ৰচনীযত্থো ‘‘যং চক্খু চতুন্নং মহাভূতানং উপাদায পসাদো’’তিআদিনা (ধ. স. ৫৯৭) ৰিযাতি.

তাৰত্ৰতোতি অনূনাধিকভাৰং দস্সেতি. তত্থ দ্ৰাদসাযতনৰিনিমুত্তস্স কস্সচি ধম্মস্স অভাৰা অধিকভাৰতো চোদনা নত্থি, সলক্খণধারণং পন সব্বেসং সামঞ্ঞলক্খণন্তি ঊনচোদনা সম্ভৰতীতি দস্সেন্তো আহ ‘‘চক্খাদযোপি হী’’তিআদি. অসাধারণন্তি চক্খুৰিঞ্ঞাণাদীনং অসাধারণং. সতিপি অসাধারণারম্মণভাৰে চক্খাদীনং দ্ৰারভাৰেন গহিতত্তা ধম্মাযতনে অগ্গহণং দট্ঠব্বং. দ্ৰারারম্মণভাৰেহি ৰা অসাধারণতং সন্ধায ‘‘অসাধারণ’’ন্তি ৰুত্তং.

যেভুয্যসহুপ্পত্তিআদীহি উপ্পত্তিক্কমাদিঅযুত্তি যোজেতব্বা. অজ্ঝত্তিকেসু হীতি এতেন অজ্ঝত্তিকভাৰেন ৰিসযিভাৰেন চ অজ্ঝত্তিকানং পঠমং দেসেতব্বতং দস্সেতি. তেসু হি পঠমং দেসেতব্বেসু পাকটত্তা পঠমতরং চক্খাযতনং দেসিতন্তি. ততো ঘানাযতনাদীনীতি এত্থ বহূপকারত্তাভাৰেন চক্খুসোতেহি পুরিমতরং অদেসেতব্বানি সহ ৰত্তুং অসক্কুণেয্যত্তা একেন কমেন দেসেতব্বানীতি ঘানাদিক্কমেন দেসিতানীতি অধিপ্পাযো. অঞ্ঞথাপি হি দেসিতেসু ন ন সক্কা চোদেতুং, ন চ সক্কা সোধেতব্বানি ন দেসেতুন্তি. গোচরো ৰিসযো এতস্সাতি গোচরৰিসযো, মনো. কস্স পন গোচরো এতস্স ৰিসযোতি? চক্খাদীনং পঞ্চন্নম্পি. ৰিঞ্ঞাণুপ্পত্তিকারণৰৰত্থানতোতি এতেন চ চক্খাদিঅনন্তরং রূপাদিৰচনস্স কারণমাহ.

পচ্চযভেদো কম্মাদিভেদো. নিরযাদিকো অপদাদিগতিনানাকরণঞ্চ গতিভেদো. হত্থিঅস্সাদিকো খত্তিযাদিকো চ নিকাযভেদো. তংতংসত্তসন্তানভেদো পুগ্গলভেদো. যা চ চক্খাদীনং ৰত্থূনং অনন্তভেদতা ৰুত্তা, সোযেৰ হদযৰত্থুস্স চ ভেদো হোতি. ততো মনাযতনস্স অনন্তপ্পভেদতা যোজেতব্বা দুক্খাপটিপদাদিতো আরম্মণাধিপতিআদিভেদতো চ. ইমস্মিং সুত্তন্তভাজনীযে ৰিপস্সনা ৰুত্তাতি ৰিপস্সনুপগমনঞ্চ ৰিঞ্ঞাণং গহেত্ৰা একাসীতিভেদতা মনাযতনস্স ৰুত্তা নিদ্দেসৰসেন. নীলং নীলস্সেৰ সভাগং, অঞ্ঞং ৰিসভাগং, এৰং কুসলসমুট্ঠানাদিভেদেসু যোজেতব্বং. তেভূমকধম্মারম্মণৰসেনাতি পুব্বে ৰুত্তং চক্খাদিৰজ্জং ধম্মারম্মণং সন্ধায ৰুত্তং.

সপরিপ্ফন্দকিরিযাৰসেন ঈহনং ঈহা. চিন্তনৰসেন ব্যাপারকরণং ব্যাপারো. তত্থ ব্যাপারং দস্সেন্তো আহ ‘‘ন হি চক্খু রূপাদীনং এৰং হোতী’’তি. ঈহং দস্সেন্তো আহ ‘‘ন চ তানী’’তিআদি. উভযম্পি পন ঈহা চ হোতি ব্যাপারো চাতি উপ্পটিপাটিৰচনং. ধম্মতাৰাতি সভাৰোৰ, কারণসমত্থতা ৰা. ঈহাব্যাপাররহিতানং দ্ৰারাদিভাৰো ধম্মতা. ইমস্মিঞ্চ অত্থে যন্তি এতস্স যস্মাতি অত্থো. পুরিমস্মিং সম্ভৰনৰিসেসনং যং-সদ্দো. ‘‘সুঞ্ঞো গামোতি খো, ভিক্খৰে, ছন্নেতং অজ্ঝত্তিকানং আযতনানং অধিৰচন’’ন্তি (সং. নি. ৪.২৩৮) ৰচনতো সুঞ্ঞগামো ৰিয দট্ঠব্বানি. অন্নপানসমোহিতন্তি গহিতে সুঞ্ঞগামে যঞ্ঞদেৰ ভাজনং পরামসীযতি, তং তং রিত্তকংযেৰ পরামসীযতি, এৰং ধুৰাদিভাৰেন গহিতানি উপপরিক্খিযমানানি রিত্তকানেৰ এতানি দিস্সন্তীতি. চক্খাদিদ্ৰারেসু অভিজ্ঝাদোমনস্সুপ্পাদকভাৰেন রূপাদীনি চক্খাদীনং অভিঘাতকানীতি ৰুত্তানি. অহিসুসুমারপক্খিকুক্কুরসিঙ্গালমক্কটা ছ পাণকা. ৰিসমবিলাকাসগামসুসানৰনানি তেসং গোচরা. তত্থ ৰিসমাদিঅজ্ঝাসযেহি চক্খাদীহি ৰিসমভাৰবিলাকাসগামসুসানসন্নিস্সিতসদিসুপাদিন্নধম্মৰনভাৰেহি অভিরমিতত্তা রূপাদীনম্পি ৰিসমাদিসদিসতা যোজেতব্বা.

হুত্ৰা অভাৰট্ঠেনাতি ইদং ইতরেসং চতুন্নং আকারানং সঙ্গহকত্তা ৰিসুং ৰুত্তং. হুত্ৰা অভাৰাকারো এৰ হি উপ্পাদৰযত্তাকারাদযোতি. তত্থ হুত্ৰাতি এতেন পুরিমন্তৰিৰিত্ততাপুব্বকং মজ্ঝে ৰিজ্জমানতং দস্সেতি, তং ৰত্ৰা অভাৰৰচনেন মজ্ঝে ৰিজ্জমানতাপুব্বকং, অপরন্তে অৰিজ্জমানতং, উভযেনপি সদা অভাৰো অনিচ্চলক্খণন্তি দস্সেতি. সভাৰৰিজহনং ৰিপরিণামো, জরাভঙ্গেহি ৰা পরিৰত্তনং, সন্তানৰিকারাপত্তি ৰা. সদা অভাৰেপি চিরট্ঠানং সিযাতি তংনিৰারণত্থং ‘‘তাৰকালিকতো’’তি আহ. উপ্পাদৰযঞ্ঞথত্তরহিতং নিচ্চং, ন ইতরথাতি নিচ্চপটিক্খেপতো অনিচ্চং, নিচ্চপটিপক্খতোতি অধিপ্পাযো.

জাতিধম্মতাদীহি অনিট্ঠতা পটিপীল়নং. পটিপীল়নট্ঠেনাতি চ যস্স তং পৰত্ততি, তং পুগ্গলং পটিপীল়নতো, সযং ৰা জরাদীহি পটিপীল়নত্তাতি অত্থো. পরিত্তট্ঠিতিকস্সপি অত্তনো ৰিজ্জমানক্খণে উপ্পাদাদীহি অভিণ্হং সম্পটিপীল়নত্তা ‘‘অভিণ্হসম্পটিপীল়নতো’’তি পুরিমং সামঞ্ঞলক্খণং ৰিসেসেত্ৰা ৰদতি, পুগ্গলস্স পীল়নতো দুক্খমং. সুখপটিপক্খভাৰতো দুক্খং সুখং পটিক্খিপতি নিৰারেতি, দুক্খৰচনং ৰা অত্থতো সুখং পটিক্খিপতীতি আহ ‘‘সুখপটিক্খেপতো’’তি.

নত্থি এতস্স ৰসৰত্তনকো, নাপি ইদং ৰসৰত্তনকন্তি অৰসৰত্তনকং, অত্তনো পরস্মিং পরস্স চ অত্তনি ৰসৰত্তনভাৰো ৰা ৰসৰত্তনকং, তং এতস্স নত্থীতি অৰসৰত্তনকং, অৰসৰত্তনকস্স অৰসৰত্তনকো ৰা অত্থো সভাৰো অৰসৰত্তনকট্ঠো, ইদঞ্চ সামঞ্ঞলক্খণং. তেনাতি পরস্স অত্তনি ৰসৰত্তনাকারেন সুঞ্ঞং. ইমস্মিঞ্চ অত্থে সুঞ্ঞতোতি এতস্সেৰ ৰিসেসনং ‘‘অস্সামিকতো’’তি. অথ ৰা ‘‘যস্মা ৰা এতং…পে… মা পাপুণাতূ’’তি এৰং চিন্তযমানস্স কস্সচি তীসু ঠানেসু ৰসৰত্তনভাৰো নত্থি, সুঞ্ঞং তং তেন অত্তনোযেৰ ৰসৰত্তনাকারেনাতি অত্থো. ন ইদং কস্সচি কামকারিযং, নাপি এতস্স কিঞ্চি কামকারিযং অত্থীতি অকামকারিযং. এতেন অৰসৰত্তনত্থং ৰিসেসেত্ৰা দস্সেতি.

ৰিভৰগতি ৰিনাসগমনং. সন্ততিযং ভৰন্তরুপ্পত্তিযেৰ ভৰসঙ্কন্তিগমনং. সন্ততিযা যথাপৰত্তাকারৰিজহনং পকতিভাৰৰিজহনং. ‘‘চক্খু অনিচ্চ’’ন্তি ৰুত্তে চক্খুঅনিচ্চ-সদ্দানং একত্থত্তা অনিচ্চানং সেসধম্মানম্পি চক্খুভাৰো আপজ্জতীতি এতিস্সা চোদনায নিৰারণত্থং ৰিসেসসামঞ্ঞলক্খণৰাচকানঞ্চ সদ্দানং একদেসসমুদাযবোধনৰিসেসং দীপেতুং ‘‘অপিচা’’তিআদিমাহ.

কিং দস্সিতন্তি ৰিপস্সনাচারং কথেন্তেন কিং লক্খণং দস্সিতন্তি অধিপ্পাযো. ‘‘কতমা চানন্দ, অনত্তসঞ্ঞা? ইধানন্দ, ভিক্খু অরঞ্ঞগতো ৰা রুক্খমূলগতো ৰা সুঞ্ঞাগারগতো ৰা ইতি পটিসঞ্চিক্খতি ‘চক্খু অনত্তা’তি…পে… ‘ধম্মা অনত্তা’তি. ইতি ইমেসু ছসু অজ্ঝত্তিকবাহিরেসু আযতনেসু অনত্তানুপস্সী ৰিহরতী’’তি (অ. নি. ১০.৬০) অৰিসেসেসু আযতনেসু অনত্তানুপস্সনা ৰুত্তাতি কারণভূতানং চক্খাদীনং, ফলভূতানঞ্চ চক্খুৰিঞ্ঞাণাদীনং কারণফলমত্ততায অনত্ততায অনত্তলক্খণৰিভাৰনত্থায আযতনদেসনাতি আহ ‘‘দ্ৰাদসন্নং…পে… অনত্তলক্খণ’’ন্তি. যদিপি অনিচ্চদুক্খলক্খণানি এত্থ দস্সিতানি, তেহি চ অনত্তলক্খণমেৰ ৰিসেসেন দস্সিতন্তি অধিপ্পাযো. ৰেতি চাতি এত্থ ইতি-সদ্দো সমাপনত্থো. ইচ্চস্সাতি এত্থ ইতি-সদ্দো যথাসমাপিতস্স আরোপেতব্বদোসস্স নিদস্সনত্থো. এৰন্তি ‘‘চক্খু অত্তা’’তি এৰং ৰাদে সতীতি অত্থো. ইচ্চস্সাতি ৰা ইতি-সদ্দো ‘‘ইতি ৰদন্তস্সা’’তি পরৰাদিস্স দোসলক্খণাকারনিদস্সনত্থো. এৰন্তি দোসগমনপ্পকারনিদস্সনত্থো. রূপে অত্তনি ‘‘এৰং মে রূপং হোতূ’’তি অত্তনিযে ৰিয সামিনিদ্দেসাপত্তীতি চে? ন, ‘‘মম অত্তা’’তি গহিতত্তা. ‘‘মম অত্তা’’তি হি গহিতং রূপং ৰসৰত্তিতায ‘‘এৰং মে হোতূ’’তি ইচ্ছিযমানঞ্চ তথেৰ ভৰেয্য, ইচ্ছতোপি হি তস্স রূপসঙ্খাতো অত্তা অৰসৰত্তি চাতি. আবাধাযাতি এৰং দুক্খেন. পঞ্ঞাপনন্তি পরেসং ঞাপনং. অনত্তলক্খণপঞ্ঞাপনস্স অঞ্ঞেসং অৰিসযত্তা অনত্তলক্খণদীপকানং অনিচ্চদুক্খলক্খণানঞ্চ পঞ্ঞাপনস্স অৰিসযতা দস্সিতা হোতি.

এৰং পন দুপ্পঞ্ঞাপনতা এতেসং দুরূপট্ঠানতায হোতীতি তেসং অনুপট্ঠহনকারণং পুচ্ছন্তো আহ ‘‘ইমানি পনা’’তিআদি. ঠানাদীসু নিরন্তরং পৰত্তমানস্স হেট্ঠা ৰুত্তস্স অভিণ্হসম্পটিপীল়নস্স. ধাতুমত্ততায চক্খাদীনং সমূহতো ৰিনিব্ভুজ্জনং নানাধাতুৰিনিব্ভোগো. ঘনেনাতি চত্তারিপি ঘনানি ঘনভাৰেন একত্তং উপনেত্ৰা ৰদতি. পঞ্ঞাযেৰ সন্ততিৰিকোপনাতি দট্ঠব্বং. যাথাৰসরসতোতি অৰিপরীতসভাৰতো. সভাৰো হি রসিযমানো অৰিরদ্ধপটিৰেধেন অস্সাদিযমানো ‘‘রসো’’তি ৰুচ্চতি. অনিচ্চাদীহি অনিচ্চলক্খণাদীনং অঞ্ঞত্থ ৰচনং রুপ্পনাদিৰসেন পৰত্তরূপাদিগ্গহণতো ৰিসিট্ঠস্স অনিচ্চাদিগ্গহণস্স সব্ভাৰা. ন হি নামরূপপরিচ্ছেদমত্তেন কিচ্চসিদ্ধি হোতি, অনিচ্চাদযো চ রূপাদীনং আকারা দট্ঠব্বা. তে পনাকারা পরমত্থতো অৰিজ্জমানা রূপাদীনং আকারমত্তাযেৰাতি কত্ৰা অট্ঠসালিনিযং (ধ. স. অট্ঠ. ৩৫০) লক্খণারম্মণিকৰিপস্সনায খন্ধারম্মণতা ৰুত্তাতি অধিপ্পাযমত্তে ঠাতুং যুত্তং, নাতিধাৰিতুং. ‘‘অনিচ্চ’’ন্তি চ গণ্হন্তো ‘‘দুক্খং অনত্তা’’তি ন গণ্হাতি, তথা দুক্খাদিগ্গহণে ইতরস্সাগহণং. অনিচ্চাদিগ্গহণানি চ নিচ্চসঞ্ঞাদিনিৰত্তনকানি সদ্ধাসমাধিপঞ্ঞিন্দ্রিযাধিকানি তিৰিধৰিমোক্খমুখভূতানি. তস্মা এতেসং আকারানং পরিগ্গয্হমানানং অঞ্ঞমঞ্ঞং ৰিসেসো চ অত্থীতি তীণি লক্খণানি ৰুত্তানি.

সুত্তন্তভাজনীযৰণ্ণনা নিট্ঠিতা.

২. অভিধম্মভাজনীযৰণ্ণনা

১৬৭. নামরূপপরিচ্ছেদকথা অভিধম্মকথাতি সুত্তন্তে ৰিয পচ্চযযুগল়ৰসেন অকথেত্ৰা অজ্ঝত্তিকবাহিরৰসেন অভিঞ্ঞেয্যানি আযতনানি অব্বোকারতো অভিধম্মভাজনীযে কথিতানি. আগম্মাতি সব্বসঙ্খারেহি নিব্বিন্দস্স ৰিসঙ্খারনিন্নস্স গোত্রভুনা ৰিৰট্টিতমানসস্স মগ্গেন সচ্ছিকরণেনাতি অত্থো. সচ্ছিকিরিযমানঞ্হি তং অধিগন্ত্ৰা আরম্মণপচ্চযভূতঞ্চ পটিচ্চ অধিপতিপচ্চযভূতে চ তম্হি পরমস্সাসভাৰেন ৰিনিমুত্তসঙ্খারস্স চ গতিভাৰেন পতিট্ঠানভূতে পতিট্ঠায খযসঙ্খাতো মগ্গো রাগাদযো খেপেতীতি তংসচ্ছিকরণাভাৰে রাগাদীনং অনুপ্পত্তিনিরোধগমনাভাৰা ‘‘তং আগম্ম রাগাদযো খীযন্তী’’তি ৰুত্তং. সুত্ততো মুঞ্চিত্ৰাতি সুত্তপদানি মুঞ্চিত্ৰা. অঞ্ঞো সুত্তস্স অত্থো ‘‘মাতরং পিতরং হন্ত্ৰা’’তিআদীসু (ধ. প. ২৯৪-২৯৫) ৰিয আহরিতব্বো, নত্থি সুত্তপদেহেৰ নীতো অত্থোতি অত্থো.

একং নানন্তি চুণ্ণিতং খুদ্দকং ৰা করণং, চুণ্ণীকরণন্তি অবহুমানেন ৰদতি. ন ত্ৰং একং নানং জানাসীতি কিং এত্তকং ত্ৰমেৰ ন জানাসীতি অত্থো. ননু ঞাতেতি ‘‘যদিপি পুব্বে ন ঞাতং, অধুনাপি ঞাতে ননু সাধু হোতী’’তি অত্তনো জাননং পটিচ্ছাদেত্ৰা ৰিক্খেপং করোন্তং নিবন্ধতি. ৰিভজিত্ৰাতি অক্খরত্থমত্তে অট্ঠত্ৰা লীনং অত্থং ৰিভজিত্ৰা উদ্ধরিত্ৰা নীহরিত্ৰা কথিতন্তি অত্থো. রাগাদীনং খযো নাম অভাৰমত্তো, ন চ অভাৰস্স বহুভাৰো অত্থি অত্তনো অভাৰত্তাতি ৰদন্তস্স ৰচনপচ্ছিন্দনত্থং পুচ্ছতি ‘‘রাগক্খযো নাম রাগস্সেৰ খযো’’তিআদি. যদি হি রাগক্খযো দোসাদীনং খযো ন হোতি, দোসক্খযাদযো চ রাগাদীনং খযা, অঞ্ঞমঞ্ঞৰিসিট্ঠা ভিন্না আপন্না হোন্তীতি বহুনিব্বানতা আপন্না এৰ হোতি, অঞ্ঞমঞ্ঞৰিসেসো চ নাম নিস্সভাৰস্স নত্থীতি সসভাৰতা চ নিব্বানস্স. নৰ তণ্হামূলকা ‘‘তণ্হং পটিচ্চ পরিযেসনা’’তি (দী. নি. ২.১০৩; ৩.৩৫৯; অ. নি. ৯.২৩; ৰিভ. ৯৬৩) আদযো, তেসু পরিযেসনাদযো চ পরিযেসনাদিকরকিলেসা দট্ঠব্বা. দিযড্ঢকিলেসসহস্সং নিদানকথাযং ৰুত্তং.

ওল়ারিকতায কারেতব্বোতি অতিসুখুমস্স নিব্বানস্স ওল়ারিকভাৰদোসাপত্তিযা বোধেতব্বো, নিগ্গহেতব্বো ৰা. ৰত্থুন্তি উপাদিন্নকফোট্ঠব্বং মেথুনং. অচ্ছাদীনম্পি নিব্বানপ্পত্তি কস্মা ৰুত্তা, ননু ‘‘কিলেসানং অচ্চন্তং অনুপ্পত্তিনিরোধো নিব্বান’’ন্তি ইচ্ছন্তস্স কিলেসানং ৰিনাসো কঞ্চি কালং অপ্পৰত্তি নিব্বানং ন হোতীতি? ন, অভাৰসামঞ্ঞতো. অচ্চন্তাপৰত্তি হি কঞ্চি কালঞ্চ অপ্পৰত্তি অভাৰোযেৰাতি নত্থি ৰিসেসো. সৰিসেসং ৰা ৰদন্তস্স অভাৰতা আপজ্জতীতি. তিরচ্ছানগতেহিপি পাপুণিতব্বত্তা তেসম্পি পাকটং পিল়ন্ধনং ৰিয ওল়ারিকং থূলং. কেৰলং পন কণ্ণে পিল়ন্ধিতুং ন সক্কোতি, পিল়ন্ধনতোপি ৰা থূলত্তা ন সক্কাতি উপ্পণ্ডেন্তো ৰিয নিগ্গণ্হাতি.

নিব্বানারম্মণকরণেন গোত্রভুক্খণে কিলেসক্খযপ্পত্তি পনস্স আপন্নাতি মঞ্ঞমানো আহ ‘‘ত্ৰং অখীণেসুযেৰা’’তিআদি. ননু আরম্মণকরণমত্তেন কিলেসক্খযো অনুপ্পত্তোতি ন সক্কা ৰত্তুং. চিত্তঞ্হি অতীতানাগতাদিসব্বং আলম্বেতি, ন নিপ্ফন্নমেৰাতি গোত্রভুপি মগ্গেন কিলেসানং যা অনুপ্পত্তিধম্মতা কাতব্বা, তং আরব্ভ পৰত্তিস্সতীতি? ন, অপ্পত্তনিব্বানস্স নিব্বানারম্মণঞাণাভাৰতো. ন হি অঞ্ঞধম্মা ৰিয নিব্বানং, তং পন অতিগম্ভীরত্তা অপ্পত্তেন আলম্বিতুং ন সক্কা. তস্মা তেন গোত্রভুনা পত্তব্বেন তিকালিকসভাৰাতিক্কন্তগম্ভীরভাৰেন ভৰিতব্বং, কিলেসক্খযমত্ততং ৰা ইচ্ছতো গোত্রভুতো পুরেতরং নিপ্ফন্নেন কিলেসক্খযেন. তেনাহ ‘‘ত্ৰং অখীণেসুযেৰ কিলেসেসু কিলেসক্খযং নিব্বানং পঞ্ঞপেসী’’তি. অপ্পত্তকিলেসক্খযারম্মণকরণে হি সতি গোত্রভুতো পুরেতরচিত্তানিপি আলম্বেয্যুন্তি.

মগ্গস্স কিলেসক্খযং নিব্বানন্তি মগ্গস্স আরম্মণভূতং নিব্বানং কতমন্তি অত্থো. মগ্গোতিআদিনা পুরিমপুচ্ছাদ্ৰযমেৰ ৰিৰরতি.

ন চ কিঞ্চীতি রূপাদীসু নিব্বানং কিঞ্চি ন হোতি, ন চ কদাচি হোতি, অতীতাদিভাৰেন ন ৰত্তব্বন্তি ৰদন্তি, তং আগম্ম অৰিজ্জাতণ্হানং কিঞ্চি একদেসমত্তম্পি ন হোতি, তদেৰ তং আগম্ম কদাচি ন চ হোতীতি অত্থো যুত্তো.

অভিধম্মভাজনীযৰণ্ণনা নিট্ঠিতা.

৩. পঞ্হপুচ্ছকৰণ্ণনা

১৬৮. ন…পে… নৰত্তব্বধম্মারম্মণত্তাতি যথা সারম্মণা পরিত্তাদিভাৰেন নৰত্তব্বং কিঞ্চি আরম্মণং করোন্তি, এৰং কিঞ্চি আলম্বনতো ন নৰত্তব্বকোট্ঠাসং ভজতীতি অত্থো.

পঞ্হপুচ্ছকৰণ্ণনা নিট্ঠিতা.

আযতনৰিভঙ্গৰণ্ণনা নিট্ঠিতা.