৪. সঙ্খারক্খন্ধনিদ্দেসৰণ্ণনা

২০. ‘‘হেট্ঠিমকোটিযাতি এত্থা’’তি ইদং পঠমং ‘‘হেট্ঠিমকোটিযা’’তি ৰচনং সন্ধায ৰুত্তং. তস্স হি ভুম্মৰসেন অত্থো গহেতব্বো. তেনাহ ‘‘তত্থ হি পধানং দস্সিত’’ন্তি. হেট্ঠিমকোটিযাৰ পধানং দস্সিতন্তি ইমমত্থং গহেত্ৰা ‘‘যদি এৰ’’ন্তিআদিনা চোদেতি. ইতরো ‘‘হেট্ঠিমকোটিযা পধানমেৰ দস্সিত’’ন্তি এৰমেত্থ নিযমো গহেতব্বোতি দস্সেন্তো ‘‘উপরিমকোটিগতভাৰেনা’’তিআদিনা তং পরিহরতি. পধানস্সেৰ দস্সনং. পধানে হি দস্সিতে অপ্পধানম্পি অত্থতো দস্সিতমেৰ হোতীতি. তেনাহ অট্ঠকথাযং ‘‘তংসম্পযুত্তসঙ্খারা পন তায গহিতায গহিতাৰ হোন্তী’’তি. যং হেট্ঠিমকোটিযং লব্ভতি, তং উপরিমকোটিযম্পি লব্ভতি এৰাতি আহ ‘‘হেট্ঠিমকোটি হি সব্বব্যাপিকা’’তি. দুতিযে করণনিদ্দেসতং দস্সেতুং ‘‘আগতাতি সম্বন্ধো’’তি আহ. আগমনকিরিযা হি হেট্ঠিমকোটিযা করণভাৰেন তত্থ ৰুত্তাতি. যথা চ আগমনকিরিযায, এৰং ৰচনকিরিযাযপি হেট্ঠিমকোটিযা করণভাৰো সম্ভৰতীতি দস্সেতুং ‘‘পুরিমেপি ৰা’’তিআদিমাহ. ‘‘একূনপঞ্ঞাসপ্পভেদে’’তি ইদং লোকিযচিত্তুপ্পাদে পাল়িআগতানং সঙ্খারক্খন্ধধম্মানং উপরিমকোটিং সন্ধায ৰুত্তং. যেৰাপনকধম্মেহি সদ্ধিং উপরিমকোটিযা গয্হমানায ‘‘তেপঞ্ঞাসা’’তি ৰত্তব্বং সিযা, লোকুত্তরচিত্তুপ্পাদৰসেন পন ‘‘সত্তপঞ্ঞাসা’’তি.

সঙ্খারক্খন্ধনিদ্দেসৰণ্ণনা নিট্ঠিতা.

পকিণ্ণককথাৰণ্ণনা

সমুগ্গম-পদস্স তত্ৰতো পরিযাযতো চ অত্থং দস্সেতি ‘‘সঞ্জাতিযং আদিউপ্পত্তিয’’ন্তি. ভেদতো পন সমাযোগে উগ্গমনন্তি. তত্থ কেন সমাযোগে, কুতো, কথঞ্চ উগ্গমনন্তি ৰিচারণাযং আহ ‘‘তংতংপচ্চযসমাযোগে’’তিআদি. তত্থেৰাতি পঞ্চৰোকারভৰে এৰ. তত্থ হি পঞ্চক্খন্ধা পরিপুণ্ণা সমুগ্গচ্ছন্তি. যথাধিগতানং অধিগতপ্পকারানং, পটিসন্ধিকানন্তি অত্থো. ওপপাতিকসমুগ্গমেনেৰ চেত্থ সংসেদজসমুগ্গমোপি গহিতোতি দট্ঠব্বো পঞ্চক্খন্ধপরিযাপন্নানং তদা উপ্পজ্জনারহানং উপ্পজ্জনতো. তত্থ সংসেদজা উপ্পজ্জিত্ৰা ৰড্ঢন্তি, ইতরে ন ৰড্ঢন্তীতি ইদমেতেসং নানাকরণং. সুখুমজাতিযলোমা এৰ কির কেচি এল়কা হিমৰন্তে ৰিজ্জন্তি, তেসং লোমং সন্ধায ‘‘জাতিমন্তএল়কলোম’’ন্তি ৰুত্তং অতিসুখুমত্তা তেসং লোমানং. কেচি পন ‘‘অজপাকতিকেল়কাদীহি সঙ্কররহিতানং তেসং এল়কৰিসেসানং নিব্বত্তেল়কস্স লোমং জাতিউণ্ণা, তম্পি তঙ্খণনিব্বত্তস্সা’’তি ৰদন্তি. গব্ভং ফালেত্ৰা গহিতস্সাতি অপরে. এৰংসণ্ঠানন্তি জাতিউণ্ণংসুনো পগ্ঘরিত্ৰা অগ্গে ঠিততেলবিন্দুসণ্ঠানং. ৰণ্ণপ্পটিভাগোতি রূপপটিচ্ছন্নো সণ্ঠানপটিচ্ছন্নো চ.

সন্ততিমূলানীতি তস্মিং ভৰে রূপসন্ততিযা মূলভূতানি. অনেকিন্দ্রিযসমাহারভাৰতোতি যথারহং চক্খাদিঅনেকিন্দ্রিযসঙ্ঘাতভাৰতো. পধানঙ্গন্তি উত্তমঙ্গং সিরো.

ন তস্স তস্স খন্ধস্স পরিপুণ্ণতং, তংতংখন্ধেকদেসস্সেৰ ৰুত্তত্তাতি অধিপ্পাযো. কামাৰচরানন্তি কামাৰচরসত্তানং. পরিহীনাযতনস্সাতি পরিহীনস্স চক্খাদিআযতনস্স ৰসেন. তত্থ দুগ্গতিযং অন্ধস্স চক্খুদসকৰসেন, বধিরস্স সোতদসকৰসেন, অন্ধবধিরস্স উভযৰসেন সন্ততিসীসহানি ৰেদিতব্বা. নপুংসকস্স পন ভাৰহানি ৰুত্তা এৰ. তথা অন্ধবধিরাঘানকস্স চক্খুসোতঘানৰসেন. তং পন ধম্মহদযৰিভঙ্গপাল়িযা ৰিরুজ্ঝতি. তং পরতো আৰি ভৰিস্সতি. রূপাৰচরানং পন চক্খুসোতৰত্থুজীৰিতৰসেন চত্তারি সন্ততিসীসানীতি ইতরেসং ৰসেন সন্ততিসীসহানি ৰেদিতব্বা.

তেসন্তি পঞ্চন্নং খন্ধানং. ৰত্থুভাৰেনাতি ৰিচারণায অধিট্ঠানভাৰেন. পটিসন্ধিযং উপ্পন্না পৰত্তা পঞ্চক্খন্ধাতি পটিসন্ধিক্খণে পৰত্তিক্খণে চ পঞ্চক্খন্ধে দস্সেতি. ভুম্মনিদ্দেসোতি ‘‘পঞ্চসু খন্ধেসূ’’তি অযং ভুম্মনিদ্দেসো. অঞ্ঞথাতি নিদ্ধারণে অনধিপ্পেতে. ‘‘ভাৰেনভাৰলক্খণত্থে’’তি ইদং ৰিসযাদিঅত্থানং ইধাসম্ভৰতো ৰুত্তং. উভযন্তি রূপারূপং. রূপারূপসন্ততিন্তি রূপসমুট্ঠাপকং রূপসন্ততিং অরূপসন্ততিঞ্চ. ‘‘ৰত্থু উপ্পাদক্খণে দুব্বলং হোতী’’তি ইদং ন পটিসন্ধিক্খণং এৰ, নাপি ৰত্থুরূপং এৰ সন্ধায ৰুত্তন্তি দস্সেন্তো আহ ‘‘সব্বরূপানং উপ্পাদক্খণে দুব্বলতং সন্ধায ৰুত্ত’’ন্তি. ‘‘তদা হী’’তিআদি যথাৰুত্তস্স অত্থস্স কারণৰচনং. তত্থ তন্তি রূপং. ‘‘কম্মক্খিত্তত্তা’’তি ইদং ন কম্মজতামত্তং সন্ধায ৰুত্তং, অথ খো কম্মজস্স পঠমুপ্পত্তিযং অপতিট্ঠিততং সন্ধাযাতি দস্সেন্তো ‘‘সতিপী’’তিআদিমাহ. ততো পরন্তি ততো পটিসন্ধিতো পরং. সদিসসন্তানে যথা পতিট্ঠিতং, ন তথা ৰিসদিসসন্তানেতি আহ ‘‘সমানসন্ততিয’’ন্তি.

অঙ্গভাৰন্তি কারণভাৰং. তেনেৰাহ ‘‘সহাযভাৰ’’ন্তি. তেসং ধম্মানন্তি যেহি সদ্ধিং উপ্পন্নং, তেসং পটিসন্ধিযং চিত্তচেতসিকধম্মানং. তদাতি ঠিতিক্খণে ভঙ্গক্খণে চ রূপুপ্পাদনমেৰ নত্থি. অনন্তরাদিপচ্চযলাভেন উপ্পাদক্খণে এৰ চিত্তস্স বলৰভাৰো, ন ইতরত্র. তেনাহ ‘‘যদা চ রূপুপ্পাদনং, তদা উপ্পাদক্খণে’’তি.

যেহাকারেহীতি আহারিন্দ্রিযপচ্চযাদিআকারেহি. যথাসম্ভৰং পচ্চযা হোন্তীতি ফস্সাদযো আহারাদিৰসেন যথারহং পচ্চযা হোন্তি. ৰুত্তঞ্হেতং পট্ঠানে ‘‘পটিসন্ধিক্খণে ৰিপাকাব্যাকতা আহারা সম্পযুত্তকানং খন্ধানং, কটত্তা চ রূপানং আহারপচ্চযেন পচ্চযো’’তিআদি (পট্ঠা. ১.১.৪২৯).

চুতিচিত্তেন সদ্ধিং উপ্পজ্জমানং, চুতিচিত্তেন ৰা কারণভূতেন উপ্পজ্জমানং. ততো পুরিমতরেহি উপ্পজ্জমানং ৰিযাতি যথা চুতিচিত্ততো আসন্নেহি পুরিমতরেহি উপ্পজ্জমানং রূপং ভৰন্তরে ন উপ্পজ্জতি, এৰং চুতিচিত্তেন উপ্পজ্জমানম্পি অনুপচ্ছিন্নেপি ৰট্টমূলেতি অকারণং ৰট্টমূলাৰূপসমো চুতিচিত্তস্স রূপুপ্পাদনেতি দস্সেতি.

অরূপস্সাতি আরুপ্পস্স.

উতুনাতি পটিসন্ধিচিত্তস্স ঠিতিক্খণে উপ্পন্নেন উতুনা. সমুট্ঠিতে রূপেতি পটিসন্ধিচিত্তস্স ভঙ্গক্খণে রূপে সমুট্ঠিতে পটিসন্ধিঅনন্তরং পঠমভৰঙ্গচিত্তং রূপং সমুট্ঠাপেতি. উপ্পাদনিরোধক্খণাতি যথাৰুত্তেসু সোল়সসু চিত্তেসু আদিচিত্তস্স উপ্পাদক্খণো, সোল়সমচিত্তস্স নিরোধক্খণো চাতি ৰদন্তি, রূপস্সেৰ পন উপ্পাদনিরোধক্খণা ৰেদিতব্বা.

ধরমানক্খণে এৰাতি তস্স উতুনো ৰিজ্জমানক্খণে এৰ যদি গহিতা, ‘‘সোল়সচিত্তক্খণাযুকং রূপ’’ন্তি ৰুত্তং হোতি সোল়সহেৰ চিত্তেহি তস্স ধরমানতায পরিচ্ছিন্নত্তা. উপ্পাদক্খণং অগ্গহেত্ৰাতি উতুনো ধরমানক্খণে উপ্পাদক্খণং অগ্গহেত্ৰা নিরোধক্খণো অথ গহিতো, ‘‘সত্তরসচিত্তক্খণাযুকংরূপ’’ন্তি ৰুত্তং হোতি উপ্পাদক্খণসহিতেন চ একস্স চিত্তক্খণস্স গহিতত্তা. ‘‘অধিকসোল়সচিত্তক্খণাযুক’’ন্তি ৰুত্তং হোতি নিরোধক্খণস্স বহিকতত্তা.

এৰং উপ্পাদনিরোধক্খণেসু গহিতেসু অগ্গহিতেসু চ সোল়সসত্তরসচিত্তক্খণাযুকতা, ততো অধিকচিত্তক্খণাযুকতা চ সিযাতি দস্সেত্ৰা ইদানি তত্থ ঠিতপক্খং দস্সেন্তো ‘‘যস্মা পনা’’তিআদিমাহ. তত্থ তস্স ধরমানক্খণে উপ্পন্নেসূতি তস্স উতুনো ধরমানক্খণে উপ্পন্নেসু সোল়সসু চিত্তেসু পটিসন্ধিপি যস্মা গহিতা, তস্মা উতুনো উপ্পাদক্খণো ধরমানক্খণে গহিতোতি নিরোধক্খণে অগ্গহিতে ‘‘রূপে ধরন্তেযেৰ সোল়স চিত্তানি উপ্পজ্জিত্ৰা নিরুজ্ঝন্তি, তং পন সত্তরসমেন চিত্তেন সদ্ধিং নিরুজ্ঝতী’’তি (ৰিভ. অট্ঠ. ২৬ পকিণ্ণককথা) এৰং অট্ঠকথাযং ৰক্খমানা অধিকসোল়সচিত্তক্খণাযুকতা অধিপ্পেতা. গহিতে ৰা নিরোধক্খণে সোল়সচিত্তক্খণাযুকতা অধিপ্পেতাতি সম্বন্ধো. এত্থ চ ‘‘অধিকসোল়সচিত্তক্খণাযুকতা’’তি ইদং পটিসন্ধিচিত্তস্স উপ্পাদক্খণো গহিতোতি কত্ৰা ৰুত্তং. যস্মা পন পটিচ্চসমুপ্পাদৰিভঙ্গৰণ্ণনাযং ‘‘দ্ৰে ভৰঙ্গানি, আৰজ্জনং, দস্সনং, সম্পটিচ্ছনং, সন্তীরণং, ৰোট্ঠব্বনং, পঞ্চ জৰনানি, দ্ৰে তদারম্মণানি, একং চুতিচিত্তন্তি পঞ্চদস চিত্তক্খণা অতীতা হোন্তি, অথাৰসেসএকচিত্তক্খণাযুকে’’তি (ৰিভ. অট্ঠ. ২২৭), তথা তদারম্মণপরিযোসানানি, ‘‘একং চুতিচিত্তং, তদৰসানে তস্মিঞ্ঞেৰ একচিত্তক্খণট্ঠিতিকে আরম্মণে পটিসন্ধিচিত্তং উপ্পজ্জতী’’তি (ৰিভ. অট্ঠ. ২২৭) চ ৰক্খতি. তস্মা রূপস্স সোল়সচিত্তক্খণাযুকতাযপি অত্থসিদ্ধি হোতিযেৰ. তেনাহ ‘‘সোল়সচিত্তক্খণাযুকতা অধিপ্পেতা’’তি. তথাপি উপ্পজ্জিত্ৰা ভৰঙ্গচলনস্স পচ্চযো হোতি, ন উপ্পজ্জমানমেৰাতি সত্তরসচিত্তক্খণাযুকতা ৰেদিতব্বা.

ওজায সভাৰসুখুমতা উপাদারূপভাৰতো. এত্থ চ মাতরা অজ্ঝোহটা ওজা বাহিরব্ভঞ্জনং ৰিয গব্ভমল্লিনা তস্মিং সন্তানে ওজট্ঠমকরূপুপ্পত্তিযা পচ্চযো হোতি. আহারসমুট্ঠানরূপপৰেণিযা ওজায ৰিয সেসতিসন্ততিওজায রূপুপ্পাদনন্তি উদরিযে ওজা রূপং ন সমুট্ঠাপেতি উতুসমুট্ঠানভাৰতো, উপাদিন্নকট্ঠানে এৰ পন সমুট্ঠাপেতি, রসহরণীহি গন্ত্ৰা কাযানুসটন্তি ৰেদিতব্বং.

চিত্তঞ্চেৰাতি এত্থ চ-সদ্দেন পটিযোগীনং কম্মমেৰ সমুচ্চিনোতি, ন চিত্তেন সম্পযুত্তধম্মেতি কত্ৰা আহ ‘‘চিত্তস্স পুব্বঙ্গমতায ৰুত্ত’’ন্তি. ‘‘চিত্তুপ্পাদং গণ্হাতি ‘চিত্তং উপ্পন্নং হোতী’তিআদীসু (ধ. স. ১) ৰিয, ন কম্মচেতনং ৰিয একধম্মমেৰা’’তি ৰুত্তে ‘‘যথা চিত্তসমুট্ঠানরূপস্স হেতুআদযো চিত্তসম্পযুত্তধম্মাপি সমুট্ঠাপকাৰ, এৰং কম্মসমুট্ঠানরূপস্স কম্মসম্পযুত্তাপী’’তি চোদনং সমুট্ঠাপেত্ৰা তস্স পরিহারং ৰত্তুং ‘‘কম্মসমুট্ঠানঞ্চা’’তিআদিমাহ.

রূপস্সাতি রূপক্খণস্স, রূপস্স ৰা অদ্ধুনো. নযদস্সনমত্তং দট্ঠব্বং পটিসন্ধিক্খণে এৰ রূপারূপধম্মানং একক্খণে পাতুভাৰোতি ইমস্স অত্থস্স অনধিপ্পেতত্তা. তেনেৰাহ ‘‘ততো পরম্পি রূপারূপানং সহুপ্পত্তিসব্ভাৰতো’’তি. যথা চ ‘‘পটিসন্ধিক্খণে এৰা’’তি নিযমো ন গহেতব্বো, এৰং ‘‘একক্খণে এৰ পাতুভাৰো’’তিপি নিযমো ন গহেতব্বোতি দস্সেন্তো ‘‘ন পনেত’’ন্তিআদিমাহ. তংদীপনত্থমেৰাতি অসমানকালতাদীপনত্থমেৰ, ন সহুপ্পাদদীপনত্থং. অদ্ধানপরিচ্ছেদকথা হি অযন্তি.

যদি এৰন্তি যথা ফলপত্তানি, এৰং রূপারূপধম্মা যদি দন্ধলহুপরিৰত্তিনো. অসমানদ্ধত্তাতি অতুল্যকালত্তা. নিচ্ছিদ্দেসূতি নিব্বিৰরেসু. তেন নিরন্তরপ্পৰত্তিং এৰ ৰিভাৰেতি. অযন্তি অদ্ধানপরিচ্ছেদকথা. চিত্তজরূপাদীনং ন তথা নিরন্তরভাৰেন পৰত্তি, যথা কম্মজরূপানন্তি আহ ‘‘কম্মজরূপপ্পৰত্তিং সন্ধাযা’’তি. কম্মজরূপানং ৰা ইতরেসং মূলভাৰতো পধানন্তি ‘‘কম্মজরূপপ্পৰত্তিং সন্ধাযা’’তি ৰুত্তং. অচিত্তুপ্পাদকত্তা অব্যাবজ্ঝতায নিরোধসমাপত্তিযা নিব্বানপটিভাগতা ৰেদিতব্বা. পদে পদং অক্কমিত্ৰাতি লকুণ্ডকপাদতায অত্তনো অক্কন্তপদসমীপে পদং নিক্খিপিত্ৰা. যো হি সীঘপদৰিক্কমো লকুণ্ডকপাদো, সো ইধাধিপ্পেতোতি আহ ‘‘লহুং লহুং অক্কমিত্ৰাতি অত্থো’’তি. সহেৰ নিরুজ্ঝন্তীতি রূপং কম্মজমিধাধিপ্পেতন্তি কত্ৰা ৰুত্তং. উতুজং পন চুতিতো উদ্ধম্পি পৰত্ততি এৰ. পুব্বে ৰুত্তন্তি ‘‘রূপস্স সত্তরসচিত্তক্খণা, অরূপস্স ততো একভাগো’’তি (ৰিভ. মূলটী. ২০ পকিণ্ণককথাৰণ্ণনা) এৰং ৰুত্তং অদ্ধানপ্পকারং.

একুপ্পাদতোতি সমানুপ্পাদতো. সমানত্থো হি অযং এক-সদ্দো. একো দট্ঠব্বাকারোতি একো ঞাতপরিঞ্ঞায পস্সিতব্বাকারো. এৰঞ্হি সোল়সাকারা সিযুং, ইতরথা ৰীসতি, ততো অধিকা ৰা এতে আকারা ভৰেয্যুং. তস্সাতি পচ্ছিমকম্মজস্স. হেট্ঠা সোল়সকেতি পরিযোসানসোল়সকস্স অনন্তরাতীতসোল়সকে. পচ্ছিমস্সাতি তত্থ পচ্ছিমচিত্তস্স. নানানিরোধভাৰং ৰিয একুপ্পাদভাৰম্পি পচ্ছিমকম্মজস্স ঠপনে কারণং অনিচ্ছন্তো ‘‘যদি পনা’’তি সাসঙ্কং ৰদতি. ‘‘সব্বম্পী’’তিআদিনা তত্থ অতিপ্পসঙ্গং দস্সেতি. ৰজ্জেতব্বং নানুপ্পাদং একনিরোধং. গহেতব্বং একুপ্পাদনানানিরোধং. উভযম্পি তদা নত্থি অনুপ্পজ্জনতো. তেনেৰাহ ‘‘কম্মজরূপস্স অনুপ্পত্তিতো’’তি. ততো পুব্বেতি পচ্ছিমকম্মজরূপুপ্পজ্জনতো ওরং. অঞ্ঞস্সাতি যস্স চিত্তস্স উপ্পাদক্খণে উপ্পন্নং, ততো অঞ্ঞস্স চিত্তস্স. ঠিতিক্খণে উপ্পন্নস্স একুপ্পাদতা, ভঙ্গক্খণে উপ্পন্নস্স নানানিরোধতা চ নত্থীতি আহ ‘‘ঠিতিভঙ্গক্খণেসু উপ্পন্নরূপানি ৰজ্জেত্ৰা’’তি. তেনাতি রূপেন. ‘‘সঙ্খলিকস্স ৰিয সম্বন্ধো’’তি এতেন অৰিচ্ছিন্নসম্বন্ধো ইধ ‘‘পৰেণী’’তি অধিপ্পেতোতি দস্সেতি. অঞ্ঞথাতি ৰিচ্ছিজ্জমানম্পি গহেত্ৰা ‘‘পৰেণী’’তি ৰুচ্চমানে. ন হি রূপধম্মানং অরূপধম্মানং ৰিয অনন্তরপচ্চযভাৰো অত্থীতি রূপধম্মানং ভঙ্গক্খণে উপ্পন্নরূপধম্মে অগ্গহেত্ৰা ‘‘অট্ঠচত্তালীসা’’তি ৰুত্তং. তেসং পন গহণে একূনপঞ্ঞাসাৰ সিযাতি আহ ‘‘একূনপঞ্ঞাসকম্মজিযৰচনং কত্তব্বং সিযা’’তি.

সুদীপনত্তাতি সুখদীপনত্তা, নযদস্সনভাৰেন ৰা সুট্ঠু দীপনত্তা. তেনেৰাহ ‘‘এতেন হি নযেনা’’তিআদি. তত্থ তন্তি রূপং. তেনাতি রূপেন. উভযত্থাতি পচ্ছিমকম্মজরূপপ্পৰত্তিযং, ততো পুব্বে চ. অঞ্ঞস্সাতি একস্স চিত্তস্স ঠিতিক্খণে উপ্পজ্জিত্ৰা ততো অঞ্ঞস্স চিত্তস্স. তস্সাতি রূপস্স. এত্থ চ পচ্ছিমকম্মজরূপপ্পৰত্তিযং নিরুজ্ঝনকন্তি ৰুত্তং ততো পুরেতরপ্পৰত্তং রূপং ৰেদিতব্বং. চতুসন্ততিকরূপেনাতিআদি যথাৰুত্তসঙ্গহগমনদস্সনং. এত্থাতি এতস্মিং নানুপ্পাদেকনিরোধতাদীপনে. ঠিতিক্খণেতি অরূপস্স রূপস্স চ ঠিতিক্খণে উপ্পন্নস্স রূপস্স চ অরূপস্স চ দস্সিতত্তা. অদস্সিতস্সাতি যথা এৰ এত্থ, এৰং তত্থ ৰিভজিত্ৰা অদস্সিতস্স. কস্মা পনেত্থ পচ্ছিমকম্মজেন দীপনাযং সমতিংসকম্মজরূপগ্গহণং কতন্তি আহ ‘‘সমতিংস…পে… যোজিত’’ন্তি. ততো কম্মতো জাতা তংকম্মজা, তেসু. সঙ্খরোতীতি সঙ্খারো, জীৰিতঞ্চ তং সঙ্খারো চাতি জীৰিতসঙ্খারো, আযু. জীৰিতেন সঙ্খরীযন্তীতি জীৰিতসঙ্খারা, উস্মাদযো.

অঞ্ঞস্স উপ্পাদক্খণেতি যস্স চিত্তস্স উপ্পাদক্খণে উপ্পন্নং রূপং অঞ্ঞস্স ততো সত্তরসমস্স উপ্পাদক্খণে, ঠিতিক্খণে উপ্পন্নং অঞ্ঞস্স ঠিতিক্খণেতি সম্বন্ধো. ‘‘ৰুত্তন্তি অধিপ্পাযো’’তি ইদং পাল়িযা ৰিরুজ্ঝন্তম্পি অট্ঠকথাযং আগতভাৰদস্সনত্থং ৰুত্তন্তি অযমেত্থ অধিপ্পাযোতি অত্থো. কস্মাতি চিত্তসমুট্ঠানরূপং সন্ধায পাল়ি পৰত্তা, অট্ঠকথাযং পন কম্মজরূপন্তি সা তায কেন কারণেন ৰিরুজ্ঝতীতি আহ ‘‘চতু…পে… ভৰিতব্বত্তা’’তি, নিপ্ফন্নস্সাতি অধিপ্পাযো. তেনাহ অট্ঠকথাযং ‘‘যো চাযং চিত্তসমুট্ঠানস্স…পে… কম্মাদিসমুট্ঠানস্সাপি অযমেৰ খণনিযমো’’তি (ৰিভ. অট্ঠ. ২৬ পকিণ্ণককথা). এতেহীতি যথানীতো যমকপাঠো, ‘‘কাযসঙ্খারো চিত্তসমুট্ঠানো’’তিআদিকো অট্ঠকথাপদেসোতি এতেহি. নত্থিযেৰ একুপ্পাদএকনিরোধদীপনতোতি অধিপ্পাযো. তেন হি ৰুত্তং ‘‘যেন চিত্তেন সদ্ধিং উপ্পজ্জতি, ততো পট্ঠায সত্তরসমেন সদ্ধিং নিরুজ্ঝতী’’তিআদি.

পুন ‘‘এতেহী’’তি ইমিনা একুপ্পাদনানানিরোধনানুপ্পাদএকনিরোধদীপনৰসেন পৰত্তা অট্ঠকথাপদেসা গহিতাতি ৰেদিতব্বং, উভযত্থাপি ৰা এতেহি আচরিযেহীতি অত্থো. ততিযো ভাগো, তেন অধিকা সোল়সচিত্তক্খণাযুকতা ততিয…পে… যুকতা ৰুত্তাতি সম্বন্ধো. ততিয ভাগোতি চ উপ্পাদট্ঠিতিক্খণে উপাদায ভঙ্গক্খণো অধিপ্পেতো. যস্মিং একাদস চিত্তক্খণা অতীতা, অৰসেসপঞ্চচিত্তক্খণাযুকে, যস্মিং পঞ্চদস চিত্তক্খণা অতীতা, অৰসেসএকচিত্তক্খণাযুকে তস্মিংযেৰ আরম্মণেতি যোজেতব্বং. উভযঞ্চেতং যথাক্কমং মনোদ্ৰারে পঞ্চদ্ৰারে চ আপাথগতং ৰেদিতব্বং. ন খো পনেৰং সক্কা ৰিঞ্ঞাতুং একচিত্তক্খণাতীতং আরম্মণং সন্ধায পটিচ্চসমুপ্পাদৰিভঙ্গট্ঠকথাযং (ৰিভ. অট্ঠ. ২২৭) তথা ৰুত্তন্তি দস্সেন্তো ‘‘ন হি সক্কা’’তিআদিমাহ. পঞ্চদসাতি অতিরেকপঞ্চদস চিত্তক্খণা অতীতাতি সম্বন্ধো. ‘‘তস্মা’’তিআদিনা যত্থ খণেকদেসং অগ্গহিতন্তি ন সক্কা ৰত্তুং, তমেৰ দস্সেতি. এৰং তাৰ ন রূপং সত্তরসচিত্তক্খণাযুকং, নাপি ততিযভাগাধিকসোল়সচিত্তক্খণাযুকং, অথ খো সোল়সচিত্তক্খণাযুকমেৰাতি দস্সিতং হোতি.

কস্মা পনেত্থ রূপমেৰ সমানেপি অনিচ্চসঙ্খতাদিভাৰে চিরাযুকং জাতন্তি? দন্ধপরিৰত্তিভাৰতো. অরূপধম্মা হি সারম্মণা চিত্তপুব্বঙ্গমা, তে যথাবলং অত্তনো আরম্মণৰিভাৰনৰসেন পৰত্তন্তীতি তদত্থনিপ্ফত্তিসমনন্তরমেৰ নিরুজ্ঝনতো লহুপরিৰত্তিনো. তেনাহ ভগৰা, ‘‘নাহং, ভিক্খৰে, অঞ্ঞং একধম্মম্পি সমনুপস্সামি এৰং লহুপরিৰত্তং, যদিদং, ভিক্খৰে, চিত্ত’’ন্তি (অ. নি. ১.৪৮). রূপধম্মা পন অনারম্মণা, তে আরম্মণৰসেন অরূপধম্মেহি ৰিভাৰেতব্বা. সা চ নেসং ৰোহারানুগুণা ৰিভাৰেতব্বতা অত্তনো দন্ধপরিৰত্তিতায, তেসঞ্চ লহুপরিৰত্তিতায সোল়সহি সত্তরসহি ৰা চিত্তক্খণেহি নিপ্পজ্জতীতি রূপমেৰেত্থ চিরাযুকং জাতং. কিঞ্চ – লহুৰিঞ্ঞাণৰিসযসন্ততিমত্তাধীনৰুত্তিতায তিণ্ণং খন্ধানং, আরম্মণূপলদ্ধিমত্তভাৰতো ৰিঞ্ঞাণস্স চ লহুপরিৰত্তিতা, দন্ধমহাভূতপ্পচ্চযতায পন রূপস্স দন্ধপরিৰত্তিতা. নানাধাতূসু তথাগতস্সেৰ যথাভূতঞাণং, তেন চ রূপমেৰ পুরেজাতপচ্চযো ৰুত্তো, পচ্ছাজাতপচ্চযো চ তস্সেৰাতি ন এত্থ অনিচ্চসঙ্খতাদিভাৰসামঞ্ঞেন রূপারূপং সমানাযুকং পরিকপ্পেতব্বং. ৰুত্তনযেন রূপমেৰ চিরাযুকন্তি নিট্ঠমেত্থ গন্তব্বং.

যথা চ রূপস্স সত্তরসচিত্তক্খণাযুকতা, ততিযভাগাধিকসোল়সচিত্তক্খণাযুকতা ৰা ন হোতি, তং দস্সেত্ৰা য্ৰাযং অট্ঠকথাযং চিত্তস্স ঠিতিক্খণে রূপুপ্পাদো ৰুত্তো, তত্থ ঠিতিক্খণমেৰ তাৰ চিত্তস্স অননুজানন্তো ‘‘যো চেত্থ…পে… ৰিচারেতব্বো’’তি ৰত্ৰা যমকে উপ্পন্নউপ্পজ্জমানৰারাদিপাল়িং আহরন্তো ‘‘চিত্তযমকে’’তিআদিমাহ. তত্থ পরিপুণ্ণৰিস্সজ্জনেতি উভযম্পি যমকপদং অহাপেত্ৰা কতৰিস্সজ্জনে. উপ্পাদক্খণে অনাগতঞ্চাতি উপ্পাদক্খণে চ চিত্তং, অনাগতঞ্চ চিত্তং ন নিরুদ্ধং, নিরুজ্ঝমানন্তি অত্থো. ঠিতিক্খণাভাৰং চিত্তস্স দীপেতীতি উপ্পন্নউপ্পজ্জমানৰারাদীসু ‘‘ঠিতিক্খণে’’তি অৰচনং চিত্তস্স ঠিতিক্খণং নাম নত্থীতি ইমমত্থং দীপেতি বোধেতি. ন হি যথাধম্মসাসনে অভিধম্মে লব্ভমানস্স অৰচনে কারণং দিস্সতীতি অধিপ্পাযো. ন কেৰলমভিধম্মে অৰচনমেৰ চিত্তস্স ঠিতিক্খণাভাৰজোতকং, অপিচ খো সুত্তন্তপাল়িপীতি দস্সেন্তো ‘‘সুত্তেসুপী’’তিআদিমাহ. তত্থ অঞ্ঞথত্তং নাম পুব্বাপরৰিসেসো. খণদ্ৰযসমঙ্গিং ঠিতন্তি পচ্চুপ্পন্নস্স ঠিতভাৰমাহ. অঞ্ঞথত্তং পন সন্তানেযেৰ ৰেদিতব্বং.

এত্থ চ কেচি ‘‘যথাভূতো ধম্মো উপ্পজ্জতি, কিং তথাভূতোৰ ভিজ্জতি, উদাহু অঞ্ঞথাভূতো? যদি তথাভূতোৰ ভিজ্জতি, ন জরতায সম্ভৰো. অথ অঞ্ঞথাভূতো, অঞ্ঞো এৰ সোতি সব্বথাপি ঠিতিক্খণস্স অভাৰোযেৰা’’তি ৰদন্তি. তত্থ একধম্মাধারভাৰেপি উপ্পাদনিরোধানং অঞ্ঞোৰ উপ্পাদক্খণো, অঞ্ঞো নিরোধক্খণো. উপ্পাদাৰত্থঞ্হি উপাদায উপ্পাদক্খণো, নিরোধাৰত্থং উপাদায নিরোধক্খণো. উপ্পাদাৰত্থায চ ভিন্না নিরোধাৰত্থাতি একস্মিংযেৰ সভাৰধম্মে যথা ইচ্ছিতব্বা, অঞ্ঞথা অঞ্ঞোৰ ধম্মো উপ্পজ্জতি, অঞ্ঞো ধম্মো নিরুজ্ঝতীতি আপজ্জেয্য, এৰং নিরোধাৰত্থায ৰিয নিরোধাভিমুখাৰত্থাযপি ভৰিতব্বং. সা ঠিতি, জরতা চাতি সম্পটিচ্ছিতব্বমেতং. যদি এৰং কস্মা পাল়িযং ঠিতিক্খণো ন ৰুত্তোতি? ৰিনেয্যজ্ঝাসযানুরোধেন নযদস্সনৰসেন পাল়ি গতাতি ৰেদিতব্বা. অভিধম্মদেসনাপি হি কদাচি ৰিনেয্যজ্ঝাসযানুরোধেন পৰত্ততি. তথা হি রূপস্স উপ্পাদো ‘‘উপচযো, সন্ততী’’তি ভিন্দিত্ৰা দেসিতো. হেতুসম্পযুত্তদুকাদিদেসনা চেত্থ নিদস্সিতব্বা.

‘‘যস্স ৰা পনা’’তিআদি পুচ্ছাৰচনং. তস্স ‘‘নো’’তি ৰিস্সজ্জনং. সমুদযসচ্চং নিরুজ্ঝতীতি চিত্তুপ্পাদস্স নিরোধক্খণো ৰুত্তো. অযমেত্থ অধিপ্পাযো – যদি চিত্তস্স ভঙ্গক্খণে রূপং উপ্পজ্জেয্য, তং দুক্খসচ্চন্তি কত্ৰা ‘‘নো’’তি ৰত্তুং ন সক্কা, ৰুত্তঞ্চেতং. তস্মা ৰিঞ্ঞাযতি ‘‘চিত্তস্স নিরোধক্খণে রূপুপ্পাদো নত্থী’’তি. তযিদমকারণং. অরূপলোকঞ্হি সন্ধায, চিত্তসমুট্ঠানরূপং ৰা ‘‘নো’’তি সক্কা ৰত্তুন্তি. অযঞ্হি যমকদেসনায পকতি, যদিদং যথাসম্ভৰযোজনা. এতেন ‘‘ন চ চিত্তসমুট্ঠানরূপমেৰা’’তিআদিৰচনং পটিক্খিত্তং দট্ঠব্বং. অথ ৰা পচ্চাসত্তিঞাযেন যং সমুদযসচ্চং নিরুজ্ঝতি, তেন যং দুক্খসচ্চং উপ্পাদেতব্বং চিত্তচেতসিকতপ্পটিবদ্ধরূপসঙ্খাতং, তস্স তদা উপ্পত্তি নত্থীতি ‘‘নো’’তি ৰিস্সজ্জনং, ন সব্বস্স.

সহুপ্পাদেকনিরোধৰচনতোতি ‘‘যস্স কাযসঙ্খারো নিরুজ্ঝতি, তস্স চিত্তসঙ্খারো নিরুজ্ঝতীতি? আমন্তা’’তি (যম. ২.সঙ্খারযমক.৭৯) এৰং সহুপ্পাদসহনিরোধৰচনতো. তেন ৰচনেনাতি ‘‘যস্স কাযসঙ্খারো’’তিআদিৰচনেন. অঞ্ঞরূপানন্তি কম্মউতুআহারজরূপানং. সহুপ্পাদসহনিরোধাদিকানন্তি এত্থাযং যোজনা – অপ্পটিক্খিত্তসহুপ্পাদসহনিরোধঅননুঞ্ঞাতনানুপ্পাদনানানিরোধঅনিৰারিতঅব্যাকতভাৰানং কম্মজাদীনন্তি. এতেনাতি ‘‘যস্স কুসলা ধম্মা উপ্পজ্জন্তী’’তিআদিকেন (যম. ৩.ধম্মযমক.১৬৩) পাঠেন, ‘‘ন চিত্তসমুট্ঠানরূপমেৰা’’তি যুত্তিৰচনেন চ. যমকপাল়িঅনুস্সরণেতি যথাদস্সিতচিত্তযমকপাল়িযা যথারুতৰসেনেৰ অনুস্সরণে ৰিজ্জমানে. ভিজ্জমানতাতি চিত্তস্স ভিজ্জমানতা নাম নিরুজ্ঝমানতা ঠিতিযা অভাৰতো. সহাযভাৰং নাপি গচ্ছতি নিস্সযত্থিভাৰাদিনা পচ্চযভাৰাভাৰতো. উপ্পাদক্খণে এৰ হি অনন্তরাদিপচ্চযলাভেন চিত্তস্স বলৰতা. এৰঞ্চ সতীতি এৰঞ্চ উতুনাপি ভৰঙ্গচিত্তস্স উপ্পাদক্খণেযেৰ রূপসমুট্ঠাপনে সতি. তংচিত্তক্খণেতি তস্স চিত্তস্স খণে, খণদ্ৰযেপীতি অত্থো. তেনেৰাতি অতিলহুপরিৰত্তিভাৰেনেৰ. অথ ৰা তেনেৰাতি দন্ধপরিৰত্তিকতায রূপস্স সকলং একচিত্তক্খণং উপ্পজ্জমানভাৰেনেৰ. তন্তি চিত্তং. পটিসন্ধিচিত্তং সম্পযুত্তধম্মানং ৰিয সহজাতরূপধম্মানম্পি সহজাতাদিপচ্চযেন পচ্চযো হোতীতি আহ ‘‘পটিসন্ধিতো উদ্ধ’’ন্তি. চিত্তসমুট্ঠানানং চিত্তং সহজাতাদিপচ্চযো হোতিযেৰাতি ৰুত্তং ‘‘অচিত্তসমুট্ঠানান’’ন্তি. তদনন্তরন্তি যেন চিত্তেন সহুপ্পন্নং, তস্স চিত্তস্স অনন্তরং. তন্তি রূপং. তদনন্তরং চিত্তন্তি সহুপ্পন্নচিত্তানন্তরং চিত্তং. যদি এৰন্তি যদি সকলং চিত্তক্খণং রূপং উপ্পজ্জমানমেৰ হোতি, চিত্তস্স উপ্পাদক্খণে এৰ রূপস্স উপ্পাদারম্ভোতি আহ ‘‘ন, চিত্তনিরোধক্খণে রূপুপ্পাদারম্ভাভাৰতো’’তি. চিত্তক্খণেতি অত্তনা সহুপ্পন্নচিত্তস্স খণে. তন্তি রূপং. রূপসমুট্ঠাপনপুরেজাতপচ্চযকিচ্চন্তি রূপসমুট্ঠাপনকিচ্চঞ্চ পুরেজাতপচ্চযকিচ্চঞ্চ. ঠিতিপ্পত্তিৰিসেসালাভন্তি ঠিতিপ্পত্তিযা লদ্ধব্বো যো ৰিসেসো, তস্স অলাভং. ইদং ৰুত্তন্তি ‘‘যেন সহুপ্পজ্জতি, তংচিত্তক্খণে রূপং উপ্পজ্জমানমেৰা’’তি ইদং পরিযাযেন ৰুত্তং.

যং যস্স সম্বন্ধিভাৰেন ৰুত্তং, তং দূরে ঠিতম্পি তেন সম্বন্ধনীযন্তি আহ ‘‘ততো পরং…পে… এতেন সহ সম্বন্ধো’’তি. তস্মা ‘‘ততো’’তি এত্থ তংসদ্দেন চুতিং পচ্চামসতীতি ৰুত্তং ‘‘চুতিতো পরন্তি অত্থো’’তি.

নত্থীতি কত্ৰাতি যদিপি যথা অট্ঠকথাযং ৰুত্তং, তথা একুপ্পাদেকনিরোধতা রূপানং অরূপেহি, অরূপানঞ্চ রূপেহি নত্থি. যথা চ অম্হেহি ৰুত্তং, তথা অত্থেৰাতি অধিপ্পাযো.

চতুত্থস্স পকারস্স ৰুচ্চমানত্তা ‘‘তযো পকারে আহা’’তি ৰুত্তং.

‘‘তেসংযেৰ রূপানং কাযৰিকারো’’তিআদিনা পরিনিপ্ফন্নানং ৰিকারাদিভাৰং দস্সেত্ৰা ‘‘সব্বং পরিনিপ্ফন্নং সঙ্খতমেৰা’’তি ৰদন্তেন পরিনিপ্ফন্নতাপরিযাযো দস্সিতো. পুব্বন্তাপরন্তপরিচ্ছিন্নোতি পাতুভাৰৰিদ্ধংসভাৰপরিচ্ছিন্নো, উদযব্বযপরিচ্ছিন্নো ৰা. ‘‘অযং দত্তো নাম হোতূ’’তিআদিনা নামকরণং নামগ্গহণং. সমাপজ্জনং নিরোধসমাপত্তিযা সমথৰিপস্সনানুক্কমেন নামকাযস্স নিরোধমেৰ. আদি-সদ্দেন সত্তকসিণাদিপঞ্ঞত্তিযা পঞ্ঞাপনং সঙ্গণ্হাতি. নিপ্ফাদিযমানোতি সাধিযমানো.

পকিণ্ণককথাৰণ্ণনা নিট্ঠিতা.

কমাদিৰিনিচ্ছযকথাৰণ্ণনা

উপ্পত্তিক্কমাদীসু দেসনাক্কমোপি লব্ভতেৰাতি ‘‘চত্তারো সতিপট্ঠানাতিআদিকো দেসনাক্কমোৰা’’তি ৰুত্তং. অনুপুব্বুক্কংসতোতি দানসীলকামাদীনৰাদিদস্সননেক্খম্মকথানং অনুক্কমেন উক্কট্ঠভাৰতো কথানং অনুপুব্বুক্কংসতা ৰুত্তা. তেন উক্কংসক্কমো নামাযং ৰিসুং কমোতি দস্সেতি. তথাপি দানাদীনং দেসনাক্কমাৰরোধনে কারণমাহ ‘‘উপ্পত্তিআদিৰৰত্থানাভাৰতো’’তি. তত্থ আদি-সদ্দেন পহানপটিপত্তিভূমিক্কমে সঙ্গণ্হাতি. ‘‘চক্খুআদীনম্পি ৰিসযভূত’’ন্তি ইমিনা পঞ্চরূপিন্দ্রিযগোচরতা অধিপ্পেতাতি আহ ‘‘একদেসেনা’’তিআদি. একদেসেনাতি বাহিরোল়ারিকাযতনেহি. এত্থাতি ‘‘যং ৰেদযতি, তং সঞ্জানাতী’’তি এতস্মিং পদে ৰুত্তনযেন.

তংসভাৰতানিৰত্তনত্থন্তি অনাসৰধম্মসভাৰতানিৰত্তনত্থং. অনাসৰা খন্ধেস্ৰেৰ ৰুত্তাতি অত্থো সাসৰানম্পি খন্ধেসু ৰুত্তত্তা. ননু চ অনাসৰধম্মো খন্ধেসু অৰুত্তোপি অত্থীতি? সচ্চং অত্থি, খন্ধাধিকারে খন্ধপরিযাপন্না এৰ অনাসৰা গয্হন্তীতি নাযং দোসো.

যথা ফস্সাদযো ৰিসেসতো তদনুগুণৰুত্তিতায সঙ্খতাভিসঙ্খরণসভাৰাতি সঙ্খারক্খন্ধে সমৰরুদ্ধা, ন এৰং ৰেদনাসঞ্ঞাৰিঞ্ঞাণানীতি রূপধম্মা ৰিয তানি ৰিসুং খন্ধভাৰেন ৰুত্তানি. এতেন ফস্সাদীনং ৰিসুং খন্ধসদ্দৰচনীযতাভাৰো ৰুত্তোতি ৰেদিতব্বো. তেন ৰুত্তং ‘‘ফুসনাদযো পনা’’তিআদি. ইতিআদীনঞ্চ সুত্তানন্তি এত্থ আদি-সদ্দেন ‘‘রূপে খো, ভিক্খৰে, সতি রূপং উপাদায রূপং অভিনিৰিস্স উপ্পজ্জন্তি সংযোজনাভিনিৰেসৰিনিবন্ধা. ৰেদনায…পে… সঞ্ঞায… সঙ্খারেসু… ৰিঞ্ঞাণে সতি ৰিঞ্ঞাণং উপাদায ৰিঞ্ঞাণং অভিনিৰিস্স উপ্পজ্জন্তি সংযোজনাভিনিৰেসৰিনিবন্ধা’’তি (সং. নি. ৩.১৫৮), তথা ‘‘অহং রূপং, মম রূপন্তি পরিযুট্ঠট্ঠাযী হোতী’’তি (সং. নি. ৩.১) চ এৰমাদীনং সুত্তপদানং সঙ্গহো দট্ঠব্বো. এতেনাতি অত্তনা দস্সিতসুত্তেন. ৰক্খমানসুত্তৰসেন চাতি ‘‘রূপে খো, ভিক্খৰে, সতী’’তিআদিকস্স অট্ঠকথাযং (ৰিভ. অট্ঠ. ২৬ পকিণ্ণককথা) ৰক্খমানস্স সুত্তস্স ৰসেন. ‘‘পরিত্তারম্মণাদিৰসেন ন ৰত্তব্বা’’তি এতেন নৰত্তব্বারম্মণাপি দিট্ঠি খন্ধে এৰ নিস্সায উপ্পজ্জতি, পগেৰ খন্ধারম্মণাতি দস্সেতি.

ৰেদনাকারণাযাতি ৰেদনাযাতনায. ছাদাপনতোতি রোচাপনতো. বাহুল্লেনাতি বহুলভাৰেন. উপাদানক্খন্ধা হি বাহুল্লপ্পৰত্তিকা, ন ইতরে.

পুটং কত্ৰাতি চ ছত্তসদিসং পুটং বন্ধং কত্ৰা. ৰত্থুম্হীতি চক্খাদিৰত্থুম্হি. ৰট্টগতৰেদনং সন্ধায ৰুত্তং. সা হি ইধ দট্ঠব্বভাৰে ঠিতা. ঊনেহীতি ৰত্থুনা, কিলেসেহি চ ঊনেহি.

মাযাযাতি ইন্দজালাদিমাযায পযোগো মাযাতি অধিপ্পাযেনাহ ‘‘মাযায দস্সিতং রূপং ‘মাযা’তি আহা’’তি. ৰত্থুভাৰাদিতোতি আদি-সদ্দেন আরম্মণসম্পযুত্তাদিকে সঙ্গণ্হাতি. কত্থচীতি রূপক্খন্ধাদিকে. কোচি ৰিসেসোতি অসুভাদিকোৰ.

তস্সাতি অজ্ঝত্তিকরূপস্স. যস্স কামরাগপ্পহানমুখেন সব্বরাগপ্পহানং সম্ভৰতি, তং সন্ধাযাহ ‘‘কামরাগমুখেন ৰা সব্বলোভপ্পহানং ৰদতী’’তি. যোজেতব্বন্তি ৰেদনায ছন্দরাগং পজহন্তো তস্সা সমুদযভূতে ফস্সেপি ছন্দরাগং পজহতীতি যোজেতব্বন্তি. পরিঞ্ঞত্তযস্স যোজনা পাকটা এৰ.

ততোতি দুক্খুপ্পাদনসুখৰিনাসনানং অদস্সনতো. ভিন্দতীতি ৰিনাসেতি. তন্তি মনোসঞ্চেতনাহারং ঞাততীরণপরিঞ্ঞাহি পরিগ্গণ্হাতি তীরেতি.

তং পজহন্তোতি অৰিজ্জং পজহন্তো. পরামট্ঠন্তি পরামাসসঙ্খাতায দিট্ঠিযা নিচ্চাদিৰসেন গহিতং. ৰিঞ্ঞাণং নিচ্চতো পস্সন্তো দিট্ঠুপাদানং উপাদিযতীতি অযমত্থো ‘‘তদেৰিদং ৰিঞ্ঞাণং সন্ধাৰতি সংসরতি, অনঞ্ঞ’’ন্তিআদিসুত্তপদেহি (ম. নি. ১.৩৯৬) দীপেতব্বো.

কমাদিৰিনিচ্ছযকথাৰণ্ণনা নিট্ঠিতা.

সুত্তন্তভাজনীযৰণ্ণনা নিট্ঠিতা.