২. সহজাতৰারৰণ্ণনা

২৩৪-২৪২. কুসলং ধম্মং সহজাতো, কুসলং একং খন্ধং সহজাতোতিআদীসু সহজাতসদ্দেন সহজাতপচ্চযকরণং সহজাতাযত্তভাৰগমনং ৰা ৰুত্তন্তি তস্স করণস্স গমনস্স ৰা কুসলাদীনং কম্মভাৰতো উপযোগৰচনং কতন্তি দট্ঠব্বং. এস নযো পচ্চযৰারাদীসুপি. তত্রাপি হি পচ্চযসদ্দেন চ নিস্সযপচ্চযকরণং নিস্সযাযত্তভাৰগমনং ৰা ৰুত্তং, সংসট্ঠসদ্দেন চ সম্পযুত্তপচ্চযকরণং সম্পযুত্তাযত্তভাৰগমনং ৰাতি তংকম্মভাৰতো উপযোগৰচনং কুসলাদীসু কতন্তি. সহজাতম্পি চ উপাদারূপং ভূতরূপস্স পচ্চযো ন হোতীতি ‘‘পটিচ্চা’’তি ইমিনা ৰচনেন দীপিতো পচ্চযো ন হোতীতি অত্থো. ‘‘উপাদারূপং ভূতরূপস্সা’’তি চ নিদস্সনৰসেন ৰুত্তং. উপাদারূপস্সপি হি উপাদারূপং যথাৰুত্তো পচ্চযো ন হোতি, ৰত্থুৰজ্জানি রূপানি চ অরূপানন্তি.

সহজাতৰারৰণ্ণনা নিট্ঠিতা.