১. পণ্ণত্তিৰারো
নিদ্দেসৰারৰণ্ণনা
১০-২৬. ‘‘দুক্খং দুক্খসচ্চন্তি? আমন্তা’’তি এত্থ কিঞ্চাপি দুক্খদুক্খং সঙ্খারদুক্খং ৰিপরিণামদুক্খন্তি তীসুপি দুক্খসদ্দো পৰত্ততি, ‘‘জাতিপি দুক্খা’’তিআদিনা (মহাৰ. ১৪; ৰিভ. ১৯০) জাতিআদীসু চ, সো পন দুক্খদুক্খতো অঞ্ঞত্থ পৰত্তমানো অঞ্ঞনিরপেক্খো নপ্পৰত্ততি. সুদ্ধঞ্চেত্থ দুক্খপদং অঞ্ঞনিরপেক্খং গহেত্ৰা পণ্ণত্তিসোধনং করোতি, তেন নিপ্পরিযাযতো দুক্খসভাৰত্তা এৰ যং দুক্খদুক্খং, তস্মিং দুক্খদুক্খে এস দুক্খসদ্দো, তঞ্চ একন্তেন দুক্খসচ্চমেৰাতি ‘‘আমন্তা’’তি ৰুত্তং. সুদ্ধসচ্চৰারে সচ্চৰিভঙ্গে ৰুত্তেসু সমুদযেসু কোচি ফলধম্মেসু নত্থি, ন চ ফলধম্মেসু কোচি নিরোধোতি ৰুচ্চমানো অত্থি, মগ্গসদ্দো চ ফলফলঙ্গেসু মগ্গফলত্তা পৰত্ততি, ন মগ্গকিচ্চসব্ভাৰা. পরিনিট্ঠিতনিয্যানকিচ্চানি হি তানি. নিয্যানৰাচকো চেত্থ মগ্গসদ্দো, ন নিয্যানফলৰাচকো, তস্মা সমুদযো সচ্চং, নিরোধো সচ্চং, মগ্গো সচ্চন্তি এতেসুপি ‘‘আমন্তা’’ইচ্চেৰ ৰিস্সজ্জনং কতং.
অথ ৰা পদসোধনেন পদেসু সোধিতেসু সচ্চৰিসেসনভূতা এৰ দুক্খাদিসদ্দা ইধ গহিতাতি ৰিঞ্ঞাযন্তি. তেসং পন একন্তেন সচ্চৰিসেসনভাৰং, সচ্চানঞ্চ তব্বিসেসনযোগৰিসেসং দীপেতুং সুদ্ধসচ্চৰারো ৰুত্তোতি সচ্চৰিসেসনানং দুক্খাদীনং একন্তসচ্চত্তা ‘‘দুক্খং সচ্চং…পে… মগ্গো সচ্চন্তি? আমন্তা’’তি ৰুত্তন্তি. যথা চেত্থ, এৰং খন্ধযমকাদীসুপি সুদ্ধখন্ধাদিৰারেসু খন্ধাদিৰিসেসনভূতানমেৰ রূপাদীনং গহণং যুত্তং. অট্ঠকথাযং (যম. অট্ঠ. খন্ধযমক ৩৮) পন ‘‘যস্মা পিযরূপসাতরূপসঙ্খাতং ৰা রূপং হোতু ভূতুপাদারূপং ৰা, সব্বং পঞ্চসু খন্ধেসু সঙ্গহং গচ্ছতেৰ, তস্মা আমন্তাতি পটিজানাতী’’তি ৰচনেন রূপাদিচক্খাদিদুক্খাদিগ্গহণেহি সুদ্ধখন্ধাদিৰারেসুপি খন্ধাদিৰিসেসনতো অঞ্ঞেপি গহিতাতি অযমত্থো দীপিতো হোতি, তেন তদনুরূপতাৰসেন ইতরো অত্থো ৰুত্তো.
নিদ্দেসৰারৰণ্ণনা নিট্ঠিতা.
২. পৰত্তিৰারৰণ্ণনা
২৭-১৬৪. অন্তমসো সুদ্ধাৰাসানম্পীতি ইদং তেসং অরিযত্তা দুক্খসচ্চেন উপপজ্জনে আসঙ্কা সিযাতি কত্ৰা ৰুত্তং. তণ্হাৰিপ্পযুত্তচিত্তস্সাতি ইদং পঞ্চৰোকারৰসেনেৰ গহেতব্বন্তি ৰুত্তং. যস্স দুক্খসচ্চং উপ্পজ্জতীতি এতেন পন সন্নিট্ঠানেন সব্বে উপপজ্জন্তা পৰত্তিযং চতুৰোকারে মগ্গফলতো অঞ্ঞচিত্তানং উপ্পাদক্খণসমঙ্গিনো পঞ্চৰোকারে চ সব্বচিত্তানং উপ্পাদক্খণসমঙ্গিনো সঙ্গহিতাতি তেস্ৰেৰ সন্নিট্ঠানেন নিচ্ছিতেসু কেচি ‘‘পৰত্তে তণ্হাৰিপ্পযুত্তচিত্তস্স উপ্পাদক্খণে’’তি এতেন দুক্খসমুদযেসু এককোট্ঠাসপ্পৰত্তিসমঙ্গিনো দস্সীযন্তি সন্নিট্ঠানেন গহিতস্সেৰ ৰিভাগদস্সনতো, তেন চতুৰোকারানম্পি গহণং উপপন্নমেৰ. ন হি তেসু মগ্গফলুপ্পাদসমঙ্গীসু পসঙ্গতা অত্থি তংসমঙ্গীনং তেসং সন্নিট্ঠানেন অগ্গহিতত্তাতি. ইদং ইধ ন গহেতব্বন্তি ইদং চতুৰোকারে ফলসমাপত্তিচিত্তং ইধ সচ্চানং উপ্পাদৰচনে ন গহেতব্বন্তি ৰুত্তং হোতি.
এত্থ চ সব্বেসং উপপজ্জন্তানন্তি ইদং কম্মজপৰত্তস্স পঠমুপ্পাদদস্সনেন ৰুত্তং, অসঞ্ঞসত্তাপেত্থ সঙ্গহিতা. পৰত্তে তণ্হাৰিপ্পযুত্তচিত্তস্স উপ্পাদক্খণেতি ইদং পন সমুদযসচ্চুপ্পাদৰোমিস্সস্স দুক্খসচ্চুপ্পাদস্স তংরহিতস্স দস্সনৰসেন ৰুত্তং. তণ্হায উপ্পাদক্খণেতি তংসহিতস্স সমুদযসচ্চুপ্পাদৰোমিস্সস্স. তেসং পন অসঞ্ঞসত্তানং পৰত্তিযং দুক্খসচ্চস্স উপ্পাদো সব্বত্থ ন গহিতো, তথা নিরোধো চাতি. মগ্গসচ্চযমকেপি এসেৰ নযো. তেসং তস্মিং উপপত্তিক্খণে চ তণ্হাৰিপ্পযুত্তচিত্তুপ্পত্তিক্খণে চাতি এৰমেত্থ খণৰসেন ওকাসো ৰেদিতব্বোতি ৰুত্তং, এৰঞ্চ সতি ‘‘যস্স যত্থ দুক্খসচ্চং উপ্পজ্জতি, তস্স তত্থ সমুদযসচ্চং উপ্পজ্জিস্সতী’’তি (যম. ১.সচ্চযমক.৭১) এতস্স ৰিস্সজ্জনে পচ্ছিমকোট্ঠাসে ‘‘ইতরেসং চতুৰোকারং পঞ্চৰোকারং উপপজ্জন্তানং, পৰত্তে চিত্তস্স উপ্পাদক্খণে তেসং তত্থ দুক্খসচ্চঞ্চ উপ্পজ্জতি সমুদযসচ্চঞ্চ উপ্পজ্জিস্সতী’’তি ইদং ন যুজ্জেয্য. ন হি উপপত্তিক্খণে চিত্তুপ্পত্তিক্খণে চ সমুদযসচ্চং উপ্পজ্জিস্সতীতি. তস্মা উপপত্তিক্খণতণ্হাৰিপ্পযুত্তচিত্তুপ্পত্তিক্খণসমঙ্গীনং পুগ্গলানং যস্মিং কামাৰচরাদিওকাসে সা উপপত্তি চিত্তুপ্পত্তি চ পৰত্তমানা, তত্থ তেসন্তি ওকাসৰসেনেৰেত্থ তত্থ-সদ্দস্স অত্থো যুজ্জতি. পুগ্গলোকাসৰারো হেস. তত্থ পুগ্গলৰিসেসদস্সনত্থং ‘‘সব্বেসং উপপজ্জন্তান’’ন্তিআদি ৰুত্তং, ওকাসো পন যত্থ তে, সো এৰাতি.
‘‘সব্বেসং চৰন্তানং পৰত্তে চিত্তস্স ভঙ্গক্খণে আরুপ্পে মগ্গস্স চ ফলস্স চ উপ্পাদক্খণে তেসং সমুদযসচ্চঞ্চ নুপ্পজ্জতি দুক্খসচ্চঞ্চ নুপ্পজ্জতী’’তি এত্থ পন ‘‘পৰত্তে চিত্তস্স ভঙ্গক্খণে দুক্খসচ্চং নুপ্পজ্জতী’’তি চিত্তপটিবদ্ধৰুত্তিত্তা চিত্তজরূপমেৰ ইধাধিপ্পেতং, ন কম্মজাদিরূপং চিত্তং অনপেক্খিত্ৰাৰ উপ্পজ্জনতোতি কেচি ৰদন্তি. ‘‘যস্স ৰা পন সমুদযসচ্চং নুপ্পজ্জতী’’তি এতেন পন সন্নিট্ঠানেন গহিতো পুগ্গলো ন চিত্তং অপেক্খিত্ৰাৰ গহিতো, অথ খো যো কোচি এৰংপকারো, তস্মা ‘‘তস্স দুক্খসচ্চং নুপ্পজ্জতী’’তি এতেন চ ন চিত্তাপেক্খমেৰ দুক্খসচ্চং ৰুত্তং, অথ খো যং কিঞ্চীতি চিত্তস্স ভঙ্গক্খণে যং কিঞ্চি দুক্খসচ্চং নুপ্পজ্জতীতি অযমত্থো ৰিঞ্ঞাযতীতি. ন হি যমকে ৰিভজিতব্বে অৰিভত্তা নাম পুচ্ছা অত্থীতি.
‘‘সুদ্ধাৰাসানং দুতিযে চিত্তেৰত্তমানে’’তি ইদং সব্বন্তিমেন পরিচ্ছেদেন যস্স যত্থ দুক্খসচ্চং উপ্পজ্জিত্থ, নো চ সমুদযসচ্চং, তংদস্সনৰসেন ৰুত্তং. তস্মিং পন দস্সিতে তেন সমানগতিকত্তা দুতিযাকুসলচিত্ততো পুরিমসব্বচিত্তসমঙ্গিনো তেনেৰ দস্সিতা হোন্তি. তেসম্পি হি তত্থ দুক্খসচ্চং উপ্পজ্জিত্থ নো চ তেসং তত্থ সমুদযসচ্চং উপ্পজ্জিত্থাতি. এৰঞ্চ কত্ৰা ‘‘ইতরেসং চতুৰোকারপঞ্চৰোকারান’’ন্তি এত্থ যথাৰুত্তা সুদ্ধাৰাসা অগ্গহিতা হোন্তি. যথা ‘‘যস্স যত্থ দুক্খসচ্চং উপ্পজ্জতি, তস্স তত্থ সমুদযসচ্চং উপ্পজ্জিত্থা’’তি (যম. ১.সচ্চযমক.৬১) এতস্স ৰিস্সজ্জনে ‘‘সুদ্ধাৰাসানং উপপত্তিচিত্তস্স উপ্পাদক্খণে’’তি (যম. ১.সচ্চযমক.৬১) এতেনেৰ উপপত্তিচিত্তুপ্পাদক্খণসমঙ্গিসমানগতিকা দুতিযাকুসলতো পুরিমসব্বচিত্তুপ্পাদক্খণসমঙ্গিনো দস্সিতা হোন্তীতি ন তে ‘‘ইতরেস’’ন্তি এতেন গয্হন্তি, এৰমিধাপি দট্ঠব্বন্তি. ‘‘ইতরেস’’ন্তি ৰচনং পঞ্চৰোকারানং ৰিসেসনত্থং, ন চতুৰোকারানং. ন হি তে পুব্বে ৰুত্তা ৰজ্জেতব্বা সন্তি পঞ্চৰোকারা ৰিয যথাৰুত্তা সুদ্ধাৰাসাতি. ‘‘অভিসমেতাৰীনং তেসং তত্থ দুক্খসচ্চঞ্চ উপ্পজ্জিত্থ মগ্গসচ্চঞ্চ উপ্পজ্জিত্থা’’তি (যম. ১.সচ্চযমক.৪১) এতেন সন্নিট্ঠানেন পুগ্গলোকাসা অঞ্ঞমঞ্ঞপরিচ্ছিন্না গহিতাতি যস্মিং ওকাসে অভিসমেতাৰিনো, তে এৰং ‘‘অভিসমেতাৰীন’’ন্তি এতেন গহিতাতি দট্ঠব্বা. তেন যে কামাৰচরে রূপাৰচরে অরূপাৰচরে ৰা অভিসমেতাৰিনো রূপাৰচরং অরূপাৰচরং ৰা উপপন্না, যাৰ তত্থাভিসমযো উপ্পন্নো ভৰিস্সতি, তাৰ তে এত্থ ন গয্হন্তি, তে পন পুরিমকোট্ঠাসে ‘‘সুদ্ধাৰাসানং দুতিযে চিত্তে ৰত্তমানে’’তি এৰং দস্সিতেহি সুদ্ধাৰাসে অনুপ্পন্নাভিসমযেহি সমানগতিকাতি ৰিসুং ন দস্সিতা. ‘‘অনভিসমেতাৰীন’’ন্তি গহিতা যে সব্বত্থ তত্থ চ অনভিসমেতাৰিনো, তেসু সুদ্ধাৰাসানং গহণকালৰিসেসনত্থং ‘‘সুদ্ধাৰাসানং দুতিযে চিত্তে ৰত্তমানে’’তি (যম. ১.সচ্চযমক.৪২) ৰুত্তন্তি.
যস্স চিত্তস্স অনন্তরা অগ্গমগ্গং পটিলভিস্সন্তীতি এতেন ৰোদানচিত্তসমঙ্গিনা সমানগতিকা ততো পুরিমতরচিত্তসমঙ্গিনোপি যাৰ সব্বন্তিমতণ্হাসম্পযুত্তচিত্তসমঙ্গী, তাৰ দস্সিতাতি ৰেদিতব্বা. এস নযো অঞ্ঞেসু এৰরূপেসূতি.
পৰত্তে চিত্তস্স ভঙ্গক্খণেতি আগতট্ঠানে পটিসন্ধিচিত্তস্সপি ভঙ্গক্খণগ্গহণং দট্ঠব্বং, তথা ‘‘পৰত্তে চিত্তস্স উপ্পাদক্খণে’’তি আগতট্ঠানে চ চুতিচিত্তস্সপি উপ্পাদক্খণস্সাতি. ‘‘যস্স দুক্খসচ্চং ন নিরুজ্ঝতি, তস্স সমুদযসচ্চং ন নিরুজ্ঝিস্সতী’’তি (যম. ১.সচ্চযমক.১১৬) এতস্স ৰিস্সজ্জনে দ্ৰীসুপি কোট্ঠাসেসু ‘‘অরূপে মগ্গস্স চ ফলস্স চ ভঙ্গক্খণে’’ইচ্চেৰ (যম. ১.সচ্চযমক.১১৬) ৰুত্তং, ন ৰিসেসিতং. কস্মা? একস্সপি মগ্গস্স চ ফলস্স চ ভঙ্গক্খণসমঙ্গিনো উভযকোট্ঠাসভজনতো. যস্স দুক্খসচ্চং ন নিরুজ্ঝতীতি এতেন সন্নিট্ঠানেন গহিতেসু হি অরুপে মগ্গফলভঙ্গক্খণসমঙ্গীসু কেসঞ্চি তিণ্ণং ফলানং দ্ৰিন্নঞ্চ মগ্গানং ভঙ্গক্খণসমঙ্গীনং নিরন্তরং অনুপ্পাদেত্ৰা অন্তরন্তরা ৰিপস্সনানিকন্তিং ভৰনিকন্তিং উপ্পাদেত্ৰা যে উপরিমগ্গে উপ্পাদেস্সন্তি, তেসং সমুদযসচ্চং নিরুজ্ঝিস্সতীতি তেসংযেৰ পন কেসঞ্চি অন্তরা তণ্হং অনুপ্পাদেত্ৰা উপরিমগ্গউপ্পাদেন্তানং মগ্গফলভঙ্গক্খণসমঙ্গীনং সমুদযসচ্চং ন নিরুজ্ঝিস্সতীতি. সামঞ্ঞৰচনেনপি চ পুরিমকোট্ঠাসে ৰুচ্চমানেন পচ্ছিমকোট্ঠাসে ৰক্খমানে ৰজ্জেত্ৰাৰ গহণং হোতীতি দস্সিতোযং নযোতি.
পৰত্তিৰারৰণ্ণনা নিট্ঠিতা.
৩. পরিঞ্ঞাৰারৰণ্ণনা
১৬৫-১৭০. পরিঞ্ঞাৰারে …পে… তিস্সোপেত্থ পরিঞ্ঞা লব্ভন্তীতি এত্থেৰ ৰিসেসনং খন্ধযমকাদীসু সব্বখন্ধাদীনং ৰিয সব্বসচ্চানং অপরিঞ্ঞেয্যতাদস্সনত্থং সচ্ছিকরণভাৰনাৰসেন ইমস্স ৰারস্স অপ্পৰত্তিদস্সনত্থঞ্চ. দুক্খস্স পরিঞ্ঞত্থং সমুদযস্স চ পহানত্থং ভগৰতি ব্রহ্মচরিযং ৰুস্সতীতি পরিঞ্ঞাপহানং সচ্চেসু দস্সেতুং দুক্খে তীরণপরিঞ্ঞা ৰুত্তা, ন পহানপরিঞ্ঞা. সমুদযে চ পহানপরিঞ্ঞা, ন তীরণপরিঞ্ঞা. ঞাতপরিঞ্ঞা পন সাধারণাতি উভযত্থ ৰুত্তা. মগ্গঞাণঞ্হি দুক্খসমুদযানি ৰিভাৰেতীতি ঞাতপরিঞ্ঞা চ হোতি, দুক্খতীরণকিচ্চানং নিপ্ফাদনতো তীরণপরিঞ্ঞা চ, সমুদযস্স অপ্পৰত্তিকরণতোৰ পহানপরিঞ্ঞা চাতি তিস্সোপি পরিঞ্ঞা মগ্গক্খণে এৰ যোজেতব্বাতি.
পরিঞ্ঞাৰারৰণ্ণনা নিট্ঠিতা.
সচ্চযমকৰণ্ণনা নিট্ঠিতা.
৬. সঙ্খারযমকং
১. পণ্ণত্তিৰারৰণ্ণনা
১. খন্ধাদযো ৰিয পুব্বে অৰিভত্তা কাযসঙ্খারাদযোতি তেসং অৰিঞ্ঞাতত্তা ‘‘অস্সাসপস্সাসা কাযসঙ্খারো’’তিআদিনা (সং. নি. ৪.৩৪৮) তযো সঙ্খারে ৰিভজতি. কাযস্স সঙ্খারোতি পঠমে অত্থে সামিঅত্থে এৰ সামিৰচনং, দুতিযে অত্থে কত্তুঅত্থে. ৰচিযা সঙ্খারোতি কম্মত্থে সামিৰচনং. চিত্তস্স সঙ্খারোতি চ কত্তুঅত্থেযেৰ. সো পন করণৰচনস্স অত্থোতি কত্ৰা ‘‘করণত্থে সামিৰচনং কত্ৰা’’তি ৰুত্তং.
২-৭. সুদ্ধিকএকেকপদৰসেন অত্থাভাৰতোতি পদসোধনতংমূলকচক্কৰারেহি যোপি অত্থো দস্সিতো দ্ৰীহি পদেহি লব্ভমানো একো অস্সাসপস্সাসাদিকো, তস্স সুদ্ধিকেহি কাযাদিপদেহি সুদ্ধিকেন চ সঙ্খারপদেন অৰচনীযত্তা যথা রূপপদস্স খন্ধেকদেসো খন্ধপদস্স খন্ধসমুদাযো পদসোধনে দস্সিতো যথাধিপ্পেতো অত্থো অত্থি, এৰং একেকপদস্স যথাধিপ্পেতত্থাভাৰতোতি অধিপ্পাযো. কাযো কাযসঙ্খারোতিআদি পন ৰত্তব্বং সিযাতি যদি ৰিসুং অদীপেত্ৰা সমুদিতো কাযসঙ্খারসদ্দো একত্থ দীপেতি, কাযসঙ্খারসদ্দো কাযসঙ্খারত্থে ৰত্তমানো খন্ধসদ্দো ৰিয রূপসদ্দেন কাযসদ্দেন ৰিসেসিতব্বোতি অধিপ্পাযেন ৰদতি. সুদ্ধসঙ্খারৰারো হেসাতি এতেন ইমস্স ৰারস্স পদসোধনেন দস্সিতানং যথাধিপ্পেতানমেৰ গহণতো তেসঞ্চ কাযাদিপদেহি অগ্গহিতত্তা ‘‘কাযো কাযসঙ্খারো’’তিআদিৰচনস্স অযুত্তিং দস্সেতি. ইধ পন সঙ্খারযমকে কাযাদিপদানং সঙ্খারপদস্স চ অসমানাধিকরণত্তা ‘‘কাযো সঙ্খারো, সঙ্খারা কাযো’’তিআদিম্হি ৰুচ্চমানে অধিপ্পেতত্থপরিচ্চাগো অনধিপ্পেতত্থপরিগ্গহো চ কতো সিযাতি সুদ্ধসঙ্খারতংমূলচক্কৰারা ন ৰুত্তা. পদসোধনৰারতংমূলচক্কৰারেহি পন অসমানাধিকরণেহি কাযাদিপদেহি সঙ্খারসদ্দস্স ৰিসেসনীযতায দস্সিতায সংসযো হোতি ‘‘যো অত্থন্তরপ্পৰত্তিনা কাযসদ্দেন ৰিসেসিতো কাযসঙ্খারো, এসো অত্থন্তরপ্পৰত্তীহি ৰচীচিত্তেহি ৰিসেসিতো উদাহু অঞ্ঞো’’তি. এৰং সেসেসুপি. এত্থ তেসং অঞ্ঞত্থ দস্সনত্থং ‘‘কাযসঙ্খারো ৰচীসঙ্খারো’’তিআদিনা অনুলোমপটিলোমৰসেন ছ যমকানি ৰুত্তানীতি দট্ঠব্বং. অট্ঠকথাযং পন সুদ্ধসঙ্খারৰারট্ঠানে ৰুত্তত্তা অযং নযো সুদ্ধসঙ্খারৰারোতি ৰুত্তো.
পণ্ণত্তিৰারৰণ্ণনা নিট্ঠিতা.
২. পৰত্তিৰারৰণ্ণনা
১৯. পৰত্তিৰারে সঙ্খারানং পুগ্গলানঞ্চ ওকাসত্তা ঝানং ভূমি চ ৰিসুং ওকাসভাৰেন গহিতাতি পুগ্গলৰারে চ ওকাসৰসেন পুগ্গলগ্গহণেন তেসং দ্ৰিন্নং ওকাসানং ৰসেন গহণং হোতি, তস্মা ‘‘ৰিনা ৰিতক্কৰিচারেহি অস্সাসপস্সাসানং উপ্পাদক্খণে’’তি দুতিযততিযজ্ঝানোকাসৰসেন গহিতা পুগ্গলা ৰিসেসেত্ৰা দস্সিতাতি দট্ঠব্বা. পুন পঠমজ্ঝানং সমাপন্নানন্তি ঝানোকাসৰসেন পুগ্গলং দস্সেতি, কামাৰচরানন্তি ভূমোকাসৰসেন. দ্ৰিপ্পকারানম্পি পন তেসং ৰিসেসনত্থমাহ ‘‘অস্সাসপস্সাসানং উপ্পাদক্খণে’’তি. তেন রূপারূপাৰচরেসু পঠমজ্ঝানসমাপন্নকে কামাৰচরে গব্ভগতাদিকে চ নিৰত্তেতি. কামাৰচরানম্পি হি গব্ভগতাদীনং ৰিনা অস্সাসপস্সাসেহি ৰিতক্কৰিচারানং উপ্পত্তি অত্থি. অট্ঠকথাযং পন একন্তিকত্তা রূপারূপাৰচরা নিদস্সিতা. ৰিনা অস্সাসপস্সাসেহি ৰিতক্কৰিচারানং উপ্পাদক্খণেতি এতেন পন দস্সিতা পুগ্গলা পঠমজ্ঝানোকাসা কামাৰচরাদিওকাসা চ অস্সাসপস্সাসৰিরহৰিসিট্ঠা দট্ঠব্বা. ইমিনা নযেন সব্বত্থ পুগ্গলৰিভাগো ৰেদিতব্বো.
২১. ‘‘পঠমজ্ঝানে কামাৰচরেতি কামাৰচরভূমিযং উপ্পন্নে পঠমজ্ঝানে’’তি অট্ঠকথাযং ৰুত্তং, এতস্মিং পন অত্থে সতি ‘‘চতুত্থজ্ঝানে রূপাৰচরে অরূপাৰচরে তত্থ চিত্তসঙ্খারো উপ্পজ্জতি, নো চ তত্থ কাযসঙ্খারো উপ্পজ্জতী’’তি এত্থাপি রূপারূপাৰচরভূমীসু উপ্পন্নে চতুত্থজ্ঝানেতি অত্থো ভৰেয্য, সো চ অনিট্ঠো ভূমীনং ওকাসভাৰস্সেৰ অগ্গহিততাপত্তিতো, সব্বচতুত্থজ্ঝানস্স ওকাসৰসেন অগ্গহিততাপত্তিতো চ, তস্মা ঝানভূমোকাসানং সঙ্করং অকত্ৰা ৰিসুং এৰ ওকাসভাৰো যোজেতব্বো. পঠমজ্ঝানোকাসেপি হি কাযসঙ্খারো চ উপ্পজ্জতি ৰচীসঙ্খারো চ উপ্পজ্জতি কামাৰচরোকাসে চ. যদিপি ন সব্বম্হি পঠমজ্ঝানে সব্বম্হি চ কামাৰচরে দ্ৰযং উপ্পজ্জতি, তত্থ পন তংদ্ৰযুপ্পত্তি অত্থীতি কত্ৰা এৰং ৰুত্তন্তি দট্ঠব্বং. ৰিসুং ওকাসত্তা চ ‘‘অঙ্গমত্তৰসেন চেত্থা’’তিআদিৰচনং ন ৰত্তব্বং হোতীতি. ইমম্হি চ যমকে অৰিতক্কৰিচারমত্তং দুতিযজ্ঝানং ৰিচারৰসেন পঠমজ্ঝানে সঙ্গহং গচ্ছতীতি দট্ঠব্বং. মুদ্ধভূতং দুতিযজ্ঝানং গহেত্ৰা ইতরং অসঙ্গহিতন্তি ৰা. যস্সযত্থকে ‘‘নিরোধসমাপন্নান’’ন্তি ন লব্ভতি. ন হি তে অসঞ্ঞসত্তা ৰিয ওকাসে হোন্তীতি.
৩৭. সুদ্ধাৰাসানং দুতিযে চিত্তে ৰত্তমানেতি তেসং পঠমতো অৰিতক্কঅৰিচারতো দুতিযে সৰিতক্কসৰিচারেপি ভৰনিকন্তিআৰজ্জনে ৰত্তমানে উভযং নুপ্পজ্জিত্থাতি দস্সেন্তেন ততো পুরিমচিত্তক্খণেসুপি নুপ্পজ্জিত্থাতি দস্সিতমেৰ হোতি. যথা পন চিত্তসঙ্খারস্স আদিদস্সনত্থং ‘‘সুদ্ধাৰাসং উপপজ্জন্তান’’ন্তি ৰুত্তং, এৰং ৰচীসঙ্খারস্স আদিদস্সনত্থং ‘‘দুতিযে চিত্তে ৰত্তমানে’’তি ৰুত্তন্তি দট্ঠব্বং.
পৰত্তিৰারৰণ্ণনা নিট্ঠিতা.
সঙ্খারযমকৰণ্ণনা নিট্ঠিতা.
৭. অনুসযযমকং
পরিচ্ছেদপরিচ্ছিন্নুদ্দেসৰারৰণ্ণনা
১. পচ্চযপরিগ্গহপরিযোসানা ঞাতপরিঞ্ঞাতি পচ্চযদীপকেন মূলযমকেন ঞাতপরিঞ্ঞং, খন্ধাদীসু তীরণবাহুল্লতো খন্ধাদিযমকেহি তীরণপরিঞ্ঞঞ্চ ৰিভাৰেত্ৰা অনুসযপহানন্তা পহানপরিঞ্ঞাতি পহাতব্বমুদ্ধভূতেহি অনুসযেহি পহানপরিঞ্ঞং ৰিভাৰেতুং অনুসযযমকং আরদ্ধং. লব্ভমানৰসেনাতি অনুসযভাৰেন লব্ভমানানং ৰসেনাতি অত্থো. তীহাকারেহি অনুসযানং গাহাপনং তেসু তথা অগ্গহিতেসু অনুসযৰারাদিপাল়িযা দুরৰবোধত্তা.
অযং পনেত্থ পুরিমেসূতি এতেসু সানুসযৰারাদীসু পুরিমেসূতি অত্থো. অত্থৰিসেসাভাৰতো ‘‘কামধাতুং ৰা পন উপপজ্জন্তস্স কামধাতুযা চুতস্স, রূপধাতুং ৰা পন উপপজ্জন্তস্স কামধাতুযা চুতস্সা’’তি এৰমাদীহি অৰুচ্চমানে কথমযং যমকদেসনা সিযাতি? নাযং যমকদেসনা, পুরিমৰারেহি পন যমকৰসেন দেসিতানং অনুসযানং চুতিউপপত্তিৰসেন অনুসযট্ঠানপরিচ্ছেদদস্সনং. যমকদেসনাবাহুল্লতো পন সব্বৰারসমুদাযস্স অনুসযযমকন্তি নামং দট্ঠব্বং. অথ ৰা পটিলোমপুচ্ছাপি অত্থৰসেন লব্ভন্তি, অত্থৰিসেসাভাৰতো পন ন ৰুত্তাতি লব্ভমানতাৰসেন এতিস্সাপি দেসনায যমকদেসনতা ৰেদিতব্বা.
অনুরূপং কারণং লভিত্ৰা উপ্পজ্জন্তীতি এতেন কারণলাভে উপ্পত্তিঅরহতং দস্সেতি. অপ্পহীনা হি অনুসযা কারণলাভে সতি উপ্পজ্জন্তি. যাৰ চ মগ্গেন তেসং অনুপ্পত্তিঅরহতা ন কতা হোতি, তাৰ তে এৰংপকারা এৰাতি ‘‘অনুসযা’’তি ৰুচ্চন্তি. সো এৰংপকারো উপ্পজ্জতি-সদ্দেন গহিতো, ন খন্ধযমকাদীসু ৰিয উপ্পজ্জমানতা. তেনেৰ ‘‘যস্স কামরাগানুসযো উপ্পজ্জতি, তস্স পটিঘানুসযো উপ্পজ্জতীতি? আমন্তা’’তিআদিনা উপ্পজ্জনৰারো অনুসযৰারেন নিন্নানাকরণো ৰিভত্তো. অনুরূপং কারণং পন লভিত্ৰা যে উপ্পজ্জিংসু উপ্পজ্জমানা চ, তেপি অপ্পহীনট্ঠেন থামগতা অহেসুং ভৰন্তি চ. উপ্পত্তিঅরহতায এৰ চ তে উপ্পজ্জিংসু উপ্পজ্জন্তি চ, ন চ অতীতানাগতপচ্চুপ্পন্নতো অঞ্ঞে উপ্পত্তিঅরহা নাম অত্থি, তস্মা সব্বে অতীতানাগতপচ্চুপ্পন্না কামরাগাদযো ‘‘অনুসযা’’তি ৰুচ্চন্তি. অপ্পহীনট্ঠেনেৰ হি অনুসযা, অপ্পহীনা চ অতীতাদযো এৰ, মগ্গস্স পন তাদিসানং অনুপ্পত্তিঅরহতাপাদনেন অনুসযপ্পহানং হোতীতি. অপ্পহীনাকারো নাম ধম্মাকারো, ন ধম্মো, ধম্মো এৰ চ উপ্পজ্জতীতি ইমিনা অধিপ্পাযেনাহ ‘‘অপ্পহীনাকারো চ উপ্পজ্জতীতি ৰত্তুং ন যুজ্জতী’’তি. সত্তানুসযাতি এত্থ যদি অপ্পহীনট্ঠেন সন্তানে অনুসেন্তীতি অনুসযা, অথ কস্মা সত্তেৰ ৰুত্তা, ননু সত্তানুসযতো অঞ্ঞেসম্পি কিলেসানং অপ্পহীনত্তা অনুসযভাৰো আপজ্জতীতি চে? নাপজ্জতি, অপ্পহীনমত্তস্সেৰ অনুসযভাৰস্স অৰুত্তত্তা. ৰুত্তঞ্হি ‘‘অনুসযোতি পন অপ্পহীনট্ঠেন থামগতকিলেসো ৰুচ্চতী’’তি (যম. অট্ঠ. অনুসযযমক ১), তস্মা অপ্পহীনট্ঠেন থামগতো কিলেসোযেৰ অনুসযো নামাতি যুত্তং. থামগতন্তি চ অঞ্ঞেহি অসাধারণো সভাৰো দট্ঠব্বো. তথা হি ধম্মসভাৰবোধিনা তথাগতেন ইমেযেৰ ‘‘অনুসযা’’তি ৰুত্তা. থামগতোতি অনুসযসমঙ্গীতি অত্থো.
অনুসযউপ্পজ্জনৰারানং সমানগতিকত্তা যথা ‘‘অনুসেতী’’তি ৰচনং অপ্পহীনাকারদীপকং, এৰং ‘‘উপ্পজ্জতী’’তি ৰচনং সিযাতি উপ্পজ্জনৰারেন ‘‘উপ্পজ্জতী’’তি ৰচনস্স অৰুত্ততা সক্কা ৰত্তুন্তি চে? তং ন, ৰচনত্থৰিসেসেন তংদ্ৰযস্স ৰুত্তত্তা. ‘‘অনুরূপং কারণং লভিত্ৰা উপ্পজ্জতী’’তি হি এতস্মিং অত্থে অৰিসিট্ঠেপি ‘‘অনুসেতী’’তি ৰচনং সন্তানে অনুসযিততং থামগতভাৰং দীপেতি. যদি তমেৰ ‘‘উপ্পজ্জতী’’তি ৰচনং দীপেয্য, কস্সচি ৰিসেসস্স অভাৰা উপ্পজ্জনৰারো ন ৰত্তব্বো সিযা, ‘‘উপ্পজ্জতী’’তি ৰচনং পন উপ্পত্তিযোগ্গং দীপেতি. কস্মা? উপ্পজ্জনৰারেন উপ্পত্তিযোগ্গস্স দস্সিতত্তা, অনুসযসদ্দস্স সব্বদা ৰিজ্জমানানং অপরিনিপ্ফন্নসযনত্থতায নিৰারণত্থং উপ্পত্তিঅরহতায থামগতভাৰসঙ্খাতস্স যথাধিপ্পেতসযনত্থস্স দস্সনত্থং ‘‘অনুসেন্তীতি অনুরূপং কারণং লভিত্ৰা উপ্পজ্জন্তী’’তি যং উপ্পত্তিযোগ্গৰচনং ৰুত্তং, তং সুৰুত্তমেৰাতি অধিপ্পাযো. তম্পি সুৰুত্তমেৰ ইমিনা তন্তিপ্পমাণেনাতি সম্বন্ধো. তন্তিত্তযেনপি হি চিত্তসম্পযুত্ততা দীপিতা হোতি.
পরিচ্ছেদপরিচ্ছিন্নুদ্দেসৰারৰণ্ণনা নিট্ঠিতা.
উপ্পত্তিট্ঠানৰারৰণ্ণনা
২. কামধাতুযা দ্ৰীসু ৰেদনাসূতি কামাৰচরভূমিযং সুখায চ উপেক্খায চাতি অট্ঠকথাযং কামধাতুগ্গহণং দ্ৰিন্নং ৰেদনানং ৰিসেসনভাৰেন ৰুত্তং, এৰং সতি কামধাতুযা কামরাগানুসযস্স অনুসযট্ঠানতা ন ৰুত্তা হোতি. দ্ৰীসু পন রাগেসু ভৰরাগস্স তীসু ধাতূসু রূপারূপধাতূনং অনুসযট্ঠানতা ৰুত্তাতি কামধাতুযা কামরাগস্স অনুসযট্ঠানতা ৰত্তব্বা. ধাতুৰেদনাসব্বসক্কাযপরিযাপন্নৰসেন হি তিপ্পকারং অনুসযানং অনুসযট্ঠানং ৰুত্তন্তি. তস্মা তীসু ধাতূসু কামধাতুযা তীসু ৰেদনাসু দ্ৰীসু ৰেদনাসু এত্থ কামরাগানুসযো অনুসেতীতি ৰিসুং অনুসযট্ঠানতা ধাতুযা ৰেদনানঞ্চ যোজেতব্বা. দ্ৰীসু ৰেদনাসূতি ইদঞ্চ ৰেদনাসু অনুসযমানো কামরাগানুসযো দ্ৰীস্ৰেৰ অনুসেতি, ন তীসূতি তিণ্ণম্পি ঠানতানিৰারণত্থমেৰ ৰুত্তন্তি ন সব্বাসু দ্ৰীসু অনুসযনপ্পত্তো অত্থি, তেন ৰেদনাৰিসেসনত্থং ন কামধাতুগ্গহণেন কোচি অত্থো. ভৰরাগানুসযনট্ঠানঞ্হি অট্ঠানঞ্চ অনুসযানং অপরিযাপন্নং সক্কাযে কামরাগানুসযস্স অনুসযট্ঠানং ন হোতীতি পাকটমেতং. যথা চ ‘‘দ্ৰীসু ৰেদনাসূ’’তি ৰুত্তে পটিঘানুসযানুসযট্ঠানতো অঞ্ঞা দ্ৰে ৰেদনা গয্হন্তি, এৰং ভৰরাগানুসযানুসযনট্ঠানতো চ অঞ্ঞা তা গয্হন্তীতি.
এত্থ চ দ্ৰীহি ৰেদনাহি সম্পযুত্তেসু অঞ্ঞেসু চ পিযরূপসাতরূপেসু ইট্ঠরূপাদীসু উপ্পজ্জমানো কামরাগানুসযো সাতসন্তসুখগিদ্ধিযা পৰত্ততীতি দ্ৰীসু ৰেদনাসু তস্স অনুসযনং ৰুত্তং. অঞ্ঞত্থ উপ্পজ্জমানোপি হি সো ইমাসু দ্ৰীসু ৰেদনাসু অনুগতো হুত্ৰা সেতি সুখমিচ্চেৰ অভিলভতীতি. এৰং পটিঘানুসযো চ দুক্খৰেদনাসম্পযুত্তেসু অঞ্ঞেসু চ অপ্পিযরূপাসাতরূপেসু অনিট্ঠরূপাদীসু উপ্পজ্জমানো দুক্খপটিকূলতো দুক্খমিচ্চেৰ পটিহঞ্ঞতীতি দুক্খৰেদনমেৰ অনুগতো হুত্ৰা সেতি, তেন পন তস্মিং অনুসযনং ৰুত্তং. এৰং কামরাগপটিঘানং তীসু ৰেদনাসু অনুসযৰচনেন ইট্ঠইট্ঠমজ্ঝত্তঅনিট্ঠেসু আরম্মণপকতিযা ৰিপরীতসঞ্ঞায চ ৰসেন ইট্ঠাদিভাৰেন গহিতেসু কামরাগপটিঘানং উপ্পত্তি দস্সিতা হোতি. তত্থ উপ্পজ্জমানা হি তে তীসু ৰেদনাসু অনুসেন্তি নাম. ৰেদনাত্তযমুখেন ৰা এত্থ ইট্ঠাদীনং আরম্মণানং গহণং ৰেদিতব্বং, কামধাতুআদিগ্গহণেন কামস্সাদাদিৰত্থুভূতানং কামভৰাদীনং. তত্থ কামরাগানুসযো ভৰস্সাদৰসেন অনুসযমানো কামধাতুযা অনুসেতি, কামসুখস্সাদৰসেন অনুসযমানো সুখোপেক্খাৰেদনাসু. পটিঘো দুক্খপটিঘাতৰসেনেৰ পৰত্ততীতি যত্থ তত্থ পটিহঞ্ঞমানোপি দুক্খৰেদনায এৰ অনুসেতি. রূপারূপভৰেসু পন রূপারূপাৰচরধম্মেসু চ কামস্সাদস্স পৰত্তি নত্থীতি তত্থ অনুসযমানো রাগো ভৰরাগোইচ্চেৰ ৰেদিতব্বো. ধাতুত্তযৰেদনাত্তযগ্গহণেন চ সব্বসক্কাযপরিযাপন্নানং গহিতত্তা ‘‘যত্থ কামরাগানুসযো নানুসেতি, তত্থ দিট্ঠানুসযো নানুসেতী’’তি (যম. ২.অনুসযযমক.৪৬) এৰমাদীনং ৰিস্সজ্জনেসু ধাতুত্তযৰেদনাত্তযৰিনিমুত্তং দিট্ঠানুসযাদীনং অনুসযট্ঠানং ন ৰুত্তন্তি দট্ঠব্বং. ননু চ অনুত্তরেসু ৰিমোক্খেসু পিহং উপট্ঠাপযতো পিহপচ্চযা উপ্পন্নদোমনস্সে পটিঘানুসযো নানুসেতি, তথা নেক্খম্মস্সিতসোমনস্সুপেক্খাসু কামরাগেন নানুসযিতব্বন্তি তদনুসযনট্ঠানতো অঞ্ঞাপি দিট্ঠানুসযানুসযনট্ঠানভূতা কামাৰচরৰেদনা সন্তীতি? হোন্তু, ন পন ধাতুত্তযৰেদনাত্তযতো অঞ্ঞং তদনুসযনট্ঠানং অত্থি, তস্মা তং ন ৰুত্তং. যস্মা পন ‘‘যত্থ কামরাগানুসযো চ পটিঘানুসযো চ মানানুসযো চ নানুসেন্তি, তত্থ দিট্ঠানুসযো ৰিচিকিচ্ছানুসযো নানুসেতীতি? আমন্তা’’তি (যম. ২.অনুসযযমক.৫২) ৰুত্তং, তস্মা অৰিসেসেন দুক্খং পটিঘানুসযস্স অনুসযনট্ঠানন্তি সমুদাযৰসেন গহেত্ৰা ৰুত্তন্তি ৰেদিতব্বং. তথা লোকিযসুখোপেক্খা কামরাগমানানুসযনট্ঠানন্তি.
অপিচ সুত্তে ‘‘ইধাৰুসো ৰিসাখ, ভিক্খু ইতি পটিসঞ্চিক্খতি ‘কুদাস্সু নামাহং দোমনস্সং পজহেয্য’ন্তি, সো ইতি পটিসঞ্চিক্খিত্ৰা পটিঘং তেন পজহতি, ন তত্থ পটিঘানুসযো অনুসেতী’’তি নেক্খম্মস্সিতং দোমনস্সং উপ্পাদেত্ৰা তং ৰিক্খম্ভেত্ৰা ৰীরিযং কত্ৰা অনাগামিমগ্গেন পটিঘস্স সমুগ্ঘাতনং সন্ধায ৰুত্তং. ন হি পটিঘেনেৰ পটিঘপ্পহানং, দোমনস্সেন ৰা দোমনস্সপ্পহানং অত্থীতি. পটিঘুপ্পত্তিরহট্ঠানতায পন ইধ সব্বং দুক্খং ‘‘পটিঘানুসযস্স অনুসযনট্ঠান’’ন্তি ৰুত্তন্তি দট্ঠব্বং. নিপ্পরিযাযদেসনা হেসা, সা পন পরিযাযদেসনা. এৰঞ্চ কত্ৰা পঠমজ্ঝানৰিক্খম্ভিতং কামরাগানুসযং তথা ৰিক্খম্ভিতমেৰ কত্ৰা অনাগামিমগ্গেন সমুগ্ঘাতনং সন্ধায ‘‘ৰিৰিচ্চেৰ…পে… পঠমং ঝানং উপসম্পজ্জ ৰিহরতি, রাগং তেন পজহতি, ন তত্থ রাগানুসযো অনুসেতী’’তি ৰুত্তং. এৰং চতুত্থজ্ঝানৰিক্খম্ভিতং অৰিজ্জানুসযং তথা ৰিক্খম্ভিতমেৰ কত্ৰা অরহত্তমগ্গেন সমুগ্ঘাতনং সন্ধায ‘‘সুখস্স চ পহানা…পে… চতুত্থং ঝানং উপসম্পজ্জ ৰিহরতি, অৰিজ্জং তেন পজহতি, ন তত্থ অৰিজ্জানুসযো অনুসেতী’’তি (ম. নি. ১.৪৬৫) ৰুত্তং. ন হি লোকিযচতুত্থজ্ঝানুপেক্খায অৰিজ্জানুসযো সব্বথা নানুসেতীতি সক্কা ৰত্তুং ‘‘সব্বসক্কাযপরিযাপন্নেসু ধম্মেসু এত্থ অৰিজ্জানুসযো অনুসেতী’’তি (যম. অট্ঠ. অনুসযযমক ২) ৰুত্তত্তা, তস্মা অৰিজ্জানুসযস্সেৰ ৰত্থু চতুত্থজ্ঝানুপেক্খা, নেক্খম্মস্সিতদোমনস্সঞ্চ পটিঘানুসযস্স ৰত্থু ন ন হোতীতি তত্থাপি তস্স অনুসযনং ৰেদিতব্বং. অৰত্থুভাৰতো হি ইধ অনুসযনং ন ৰুচ্চতি, ন সুত্তন্তেসু ৰিয ৰুত্তনযেন তংপটিপক্খভাৰতো তংসমুগ্ঘাতকমগ্গস্স বলৰূপনিস্সযভাৰতো চাতি.
এত্থ চ আরম্মণে অনুসযট্ঠানে সতি ভৰরাগৰজ্জো সব্বো লোভো কামরাগানুসযোতি ন সক্কা ৰত্তুং. দুক্খায হি ৰেদনায রূপারূপধাতূসু চ অনুসযমানেন দিট্ঠানুসযেন সম্পযুত্তোপি লোভো লোভো এৰ, ন কামরাগানুসযো. যদি সিযা, দিট্ঠানুসযস্স ৰিয এতস্সপি ঠানং ৰত্তব্বং সিযাতি. অথ পন অজ্ঝাসযৰসেন তন্নিন্নতায অনুসযনট্ঠানং ৰুত্তং. যথা ইট্ঠানং রূপাদীনং সুখায চ ৰেদনায অপ্পটিলদ্ধং ৰা অপ্পটিলাভতো সমনুপস্সতো, পটিলদ্ধপুব্বং ৰা অতীতং নিরুদ্ধং ৰিগতং পরিণতং সমনুপস্সতো উপ্পজ্জমানো পটিঘো দুক্খে পটিহঞ্ঞনৰসেনেৰ পৰত্ততীতি দুক্খমেৰ তস্স অনুসযনট্ঠানং ৰুত্তং, নালম্বিতং, এৰং দুক্খাদীসু অভিনিৰেসনৰসেন উপ্পজ্জমানেন দিট্ঠানুসযেন সম্পযুত্তোপি লোভো সুখাভিসঙ্গৰসেনেৰ পৰত্ততীতি সাতসন্তসুখদ্ৰযমেৰস্স অনুসযট্ঠানং ৰুত্তন্তি ভৰরাগৰজ্জস্স সব্বলোভস্স কামরাগানুসযতা ন ৰিরুজ্ঝতি, একস্মিংযেৰ চ আরম্মণে রজ্জন্তি দুস্সন্তি চ. তত্থ রাগো সুখজ্ঝাসযো পটিঘো দুক্খজ্ঝাসযোতি তেসং নানানুসযট্ঠানতা হোতি.
এৰঞ্চ কত্ৰা ‘‘যত্থ কামরাগানুসযো অনুসেতি, তত্থ পটিঘানুসযো অনুসেতীতি? নো’’তি (যম. ২.অনুসযযমক.১৪) ৰুত্তন্তি. অট্ঠকথাযং পন দ্ৰীসু ৰেদনাসু ইট্ঠারম্মণে চ দোমনস্সুপ্পত্তিং ৰত্ৰা ‘‘দোমনস্সমত্তমেৰ পন তং হোতি, ন পটিঘানুসযো’’তি (যম. অট্ঠ. অনুসযযমক ২) ৰুত্তত্তা যথা তত্থ পটিঘো পটিঘানুসযো ন হোতি, এৰং দুক্খাদীসু উপ্পজ্জমানেন দিট্ঠানুসযেন সহজাতো লোভো কামরাগানুসযো ন হোতিচ্চেৰ ৰিঞ্ঞাযতীতি. যং পনেতং ৰুত্তং ‘‘দোমনস্সমত্তমেৰ পন তং হোতি, ন পটিঘানুসযো’’তি, এত্থ ন পটিঘানুসযোতি নত্থি পটিঘানুসযোতি অত্থো দট্ঠব্বো. ন হি দোমনস্সস্স পটিঘানুসযভাৰাসঙ্কা অত্থীতি.
দেসনা সংকিণ্ণা ৰিয ভৰেয্যাতি ভৰরাগস্সপি কামধাতুযা দ্ৰীসু ৰেদনাসু আরম্মণকরণৰসেনেৰ উপ্পত্তি ৰুত্তা ৰিয ভৰেয্য, তস্মা আরম্মণৰিসেসেন ৰিসেসদস্সনত্থং এৰং দেসনা কতা সহজাতৰেদনাৰিসেসাভাৰতোতি অধিপ্পাযো.
উপ্পত্তিট্ঠানৰারৰণ্ণনা নিট্ঠিতা.
মহাৰারো
১. অনুসযৰারৰণ্ণনা
৩. অনুসেতি উপ্পজ্জতীতি পচ্চুপ্পন্নৰোহারা পৰত্তাৰিরামৰসেন ৰেদিতব্বা. মগ্গেনেৰ হি অনুসযানং ৰিরামো ৰিচ্ছেদো হোতি, ন ততো পুব্বেতি.
২০. নাপি একস্মিং ঠানে উপ্পজ্জন্তি, ন একং ধম্মং আরম্মণং করোন্তীতি এত্থ পুরিমেন একস্মিং চিত্তুপ্পাদে উপ্পত্তি নিৰারিতা, পচ্ছিমেন একস্মিং আরম্মণেতি অযং ৰিসেসো. পুগ্গলোকাসৰারস্স পটিলোমে তেসং তেসং পুগ্গলানং তস্স তস্স অনুসযস্স অননুসযনট্ঠানং পকতিযা পহানেন চ ৰেদিতব্বং, ‘‘তিণ্ণং পুগ্গলানং দুক্খায ৰেদনায তেসং তত্থ কামরাগানুসযো নানুসেতি, নো চ তেসং তত্থ পটিঘানুসযো নানুসেতি, তেসঞ্ঞেৰ পুগ্গলানং রূপধাতুযা অরূপধাতুযা অপরিযাপন্নে তেসং তত্থ কামরাগানুসযো চ নানুসেতি, পটিঘানুসযো চ নানুসেতী’’তি পকতিযা দুক্খাদীনং কামরাগাদীনং অননুসযট্ঠানতং সন্ধায ৰুত্তং, ‘‘দ্ৰিন্নং পুগ্গলানং সব্বত্থ কামরাগানুসযো চ নানুসেতি, পটিঘানুসযো চ নানুসেতী’’তি (যম. ২.অনুসযযমক.৫৬) অনুসযপ্পহানেন. এত্থ পুরিমনযেন ওকাসং অৰেক্খিত্ৰা পুগ্গলস্স ৰিজ্জমানানং অনুসযানং অননুসযনং ৰুত্তং, পচ্ছিমনযেন পুগ্গলং অৰেক্খিত্ৰা ওকাসস্স কামধাতুআদিকস্স অনোকাসতাতি.
অনুসযৰারৰণ্ণনা নিট্ঠিতা.
২. সানুসযৰারৰণ্ণনা
৬৬-১৩১. সানুসযপজহনপরিঞ্ঞাৰারেসু ‘‘সানুসযো, পজহতি, পরিজানাতী’’তি পুগ্গলো ৰুত্তো. পুগ্গলস্স চ ইমস্মিং ভৰে সানুসযোতি এৰং ভৰৰিসেসেন ৰা, ইমস্মিং কামরাগানুসযেন সানুসযো ইমস্মিং ইতরেসু কেনচীতি এৰং ভৰানুসযৰিসেসেন ৰা সানুসযতানিরনুসযতাদিকা নত্থি. তথা দ্ৰীসু ৰেদনাসু কামরাগানুসযেন সানুসযো, দুক্খায ৰেদনায নিরনুসযোতি ইদম্পি নত্থি. ন হি পুগ্গলস্স ৰেদনা ওকাসো, অথ খো অনুসযানন্তি. অনুসযস্স পন তস্স তস্স সো সো অনুসযনোকাসো পুগ্গলস্স তেন তেন অনুসযেন সানুসযতায, তস্স তস্স পজহনপরিজাননানঞ্চ নিমিত্তং হোতি, অননুসযনোকাসো চ নিরনুসযতাদীনং, তস্মা ওকাসৰারেসু ভুম্মনিদ্দেসং অকত্ৰা ‘‘যতো ততো’’তি নিমিত্তত্থে নিস্সক্কৰচনং কতং, পজহনপরিঞ্ঞাৰারেসু অপাদানত্থে এৰ ৰা. ততো ততো হি ওকাসতো অপগমকরণং ৰিনাসনং পজহনং পরিজাননঞ্চাতি.
তত্থ যতোতি যতো অনুসযট্ঠানতো অনুলোমে, পটিলোমে অননুসযট্ঠানতোতি অত্থো. অনুসযানানুসযস্সেৰ হি নিমিত্তাপাদানভাৰদস্সনত্থং ‘‘রূপধাতুযা অরূপধাতুযা ততো মানানুসযেন সানুসযোতি (যম.২.অনুসযযমক.৭৭), পজহতী’’তি (যম. ২.অনুসযযমক.১৪৩) চ ‘‘দুক্খায ৰেদনায ততো কামরাগানুসযেন নিরনুসযোতি (যম. ২.অনুসযযমক.১১০), ন পজহতী’’তি (যম. ২.অনুসযযমক.১৭৪-১৭৬) চ এৰমাদীসু রূপধাতুআদযো এৰ ভুম্মনিদ্দেসেনেৰ নিদ্দিট্ঠাতি. অট্ঠকথাযং পন চতুত্থপঞ্হৰিস্সজ্জনেন সরূপতো অনুসযনট্ঠানস্স দস্সিতত্তা তদত্থে আদিপঞ্হেপি ‘‘যতো’’তি অনুসযনট্ঠানং ৰুত্তন্তি ইমমত্থং ৰিভাৰেত্ৰা পুন ‘‘যতো’’তি এতস্স ৰচনত্থং দস্সেতুং ‘‘উপ্পন্নেন কামরাগানুসযেন সানুসযো’’তি ৰুত্তং, তং পমাদলিখিতং ৰিয দিস্সতি. ন হি উপ্পন্নেনেৰ অনুসযেন সানুসযো, উপ্পত্তিরহট্ঠানতঞ্চ সন্ধাযেৰ নিস্সক্কৰচনং ন সক্কা ৰত্তুং. ন হি অপরিযাপন্নানং অনুসযুপ্পত্তিরহট্ঠানতাতি তং তথেৰ দিস্সতি. এৰং পনেত্থ অত্থো দট্ঠব্বো – যতো উপ্পন্নেনাতি যতো উপ্পন্নেন ভৰিতব্বং, তেনাতি উপ্পত্তিরহট্ঠানে নিস্সক্কৰচনং কতন্তি. তথা সব্বধম্মেসু উপ্পজ্জনকেনাতি. উপ্পত্তিপটিসেধে অকতে অনুপ্পত্তিযা অনিচ্ছিতত্তা সব্বধম্মেসু উপ্পজ্জনকভাৰং আপন্নেন অনুপ্পজ্জনভাৰং অপনেতি নাম. সব্বত্থাতি এতস্স পন সব্বট্ঠানতোতি অযমত্থো ন ন সম্ভৰতি. ত্থ-কারঞ্হি ভুম্মতো অঞ্ঞত্থাপি সদ্দৰিদূ ইচ্ছন্তীতি.
সানুসযৰারৰণ্ণনা নিট্ঠিতা.
৩. পজহনৰারৰণ্ণনা
১৩২-১৯৭. পজহনৰারে যেন কামরাগানুসযাদযো সাৰসেসা পহীযন্তি, সো তে পজহতীতি সন্নিট্ঠানং কত্ৰা ৰত্তব্বো ন হোতি অপজহনসব্ভাৰা, তস্মা সন্নিট্ঠানে নিরৰসেসপ্পজহনকোযেৰ পজহতীতি ৰুত্তো, তস্মা ‘‘যো ৰা পন মানানুসযং পজহতি, সো কামরাগানুসযং পজহতীতি? নো’’তি (যম. ২.অনুসযযমক.১৩২) ৰুত্তং. যস্মা পন সংসযপদেন পহানকরণমত্তমেৰ পুচ্ছতি, ন সন্নিট্ঠানং করোতি, তস্মা যথাৰিজ্জমানং পহানং সন্ধায ‘‘যো কামরাগানুসযং পজহতি, সো মানানুসযং পজহতীতি? তদেকট্ঠং পজহতী’’তি ৰুত্তং. পটিলোমে পন ‘‘নপ্পজহতী’’তি পজহনাভাৰো এৰ সন্নিট্ঠানপদেন সংসযপদেন চ ৰিনিচ্ছিতো পুচ্ছিতো চ, তস্মা যেসং পজহনং নত্থি নিরৰসেসৰসেন পজহনকানং, তে ঠপেত্ৰা অৰসেসা অপ্পজহনসব্ভাৰেনেৰ নপ্পজহন্তীতি ৰুত্তা, ন চ যথাৰিজ্জমানেন পহানেনেৰ ৰজ্জিতাতি দট্ঠব্বাতি. ‘‘অনাগামিমগ্গসমঙ্গিঞ্চ অট্ঠমকঞ্চ ঠপেত্ৰা অৰসেসা পুগ্গলা কামরাগানুসযঞ্চ নপ্পজহন্তি ৰিচিকিচ্ছানুসযঞ্চ নপ্পজহন্তী’’তি (যম. ২.অনুসযযমক.১৬৫) এত্থ অট্ঠকথাযং ‘‘পুথুজ্জনো পহানপরিঞ্ঞায অভাৰেন নপ্পজহতি, সেসা তেসং অনুসযানং পহীনত্তা’’তি (যম. অট্ঠ. অনুসযযমক ১৩২-১৯৭) ৰুত্তং.
তত্থ কিঞ্চাপি কেসঞ্চি ৰিচিকিচ্ছানুসযো কেসঞ্চি উভযন্তি সেসানং তেসং পহীনতা অত্থি, তথাপি সোতাপন্নাদীনং ৰিচিকিচ্ছানুসযস্স পহীনতা উভযাপজহনস্স কারণং ন হোতীতি তেসং পহীনত্তা ‘‘নপ্পজহন্তী’’তি ন সক্কা ৰত্তুং, অথ পন কামরাগানুসযঞ্চ নপ্পজহন্তীতি ইমং সন্নিট্ঠানেন তেসং পুগ্গলানং সঙ্গহিততাদস্সনত্থং ৰুত্তন্তি ন তত্থ কারণং ৰত্তব্বং, পুচ্ছিতস্স পন সংসযত্থস্স কারণং ৰত্তব্বং. এৰং সতি ‘‘সেসা তস্স অনুসযস্স পহীনত্তা’’তি ৰত্তব্বন্তি? ন ৰত্তব্বং ‘‘যো কামরাগানুসযং নপ্পজহতি, সো দিট্ঠানুসযং ৰিচিকিচ্ছানুসযং নপ্পজহতী’’তি পটিক্খিপিত্ৰা পুচ্ছিতে সদিসৰিস্সজ্জনকে দিট্ঠিৰিচিকিচ্ছানুসযে সন্ধায কারণস্স ৰত্তব্বত্তা, তস্মা তেসং অনুসযানং পহীনত্তাতি তেসং দিট্ঠিৰিচিকিচ্ছানুসযানং পহীনত্তা তে সংসযত্থসঙ্গহিতে অনুসযে নপ্পজহন্তীতি অত্থো দট্ঠব্বো.
পজহনৰারৰণ্ণনা নিট্ঠিতা.
৫. পহীনৰারৰণ্ণনা
২৬৪-২৭৪. পহীনৰারে ফলট্ঠৰসেনেৰ দেসনা আরদ্ধাতি অনুলোমং সন্ধায ৰুত্তং. পটিলোমে হি পুথুজ্জনৰসেনপি দেসনা গহিতাতি. ‘‘ফলট্ঠৰসেনেৰা’’তি চ সাধারণৰচনেন মগ্গসমঙ্গীনং অগ্গহিততং দীপেতি. অনুসযচ্চন্তপটিপক্খেকচিত্তক্খণিকানঞ্হি মগ্গসমঙ্গীনং ন কোচি অনুসযো উপ্পত্তিরহো, নাপি অনুপ্পত্তিরহতং আপাদিতো, তস্মা তে ন অনুসযসানুসযপহীনউপ্পজ্জনৰারেসু গহিতাতি.
২৭৫-২৯৬. ওকাসৰারে সো সো অনুসযো অত্তনো অত্তনো ওকাসে এৰ অনুপ্পত্তিধম্মতং আপাদিতো পহীনো, অনাপাদিতো চ অপ্পহীনোতি পহীনাপ্পহীনৰচনানি তদোকাসমেৰ দীপেন্তি, তস্মা অনোকাসে তদুভযাৰত্তব্বতা ৰুত্তাতি. সাধারণট্ঠানে তেন সদ্ধিং পহীনো নাম হোতীতি তেন সদ্ধিং সমানোকাসে পহীনো নামাতি অত্থো, ন সমানকালে পহীনোতি.
পহীনৰারৰণ্ণনা নিট্ঠিতা.
৭. ধাতুৰারৰণ্ণনা
৩৩২-৩৪০. ধাতুৰারে সন্তানং অনুগতা হুত্ৰা সযন্তীতি যস্মিং সন্তানে অপ্পহীনা, তংসন্তানে অপ্পহীনভাৰেন অনুগন্ত্ৰা উপ্পত্তিঅরহভাৰেন সযন্তীতি অত্থো. উপ্পত্তিরহতা এৰ হি অনুরূপং কারণং লভিত্ৰা উপ্পজ্জন্তীতি ইধাপি যুত্তাতি. এত্থ চ ন কামধাতুআদীনি ছ পটিনিসেধৰচনানি ধাতুৰিসেসনিদ্ধারণানি ন হোন্তীতি ‘‘ন কামধাতুযা চুতস্স ন কামধাতুং উপপজ্জন্তস্সা’’তিআদিম্হি ৰুচ্চমানে ইমং নাম উপপজ্জন্তস্সাতি ন ৰিঞ্ঞাযেয্য, তস্মা তংমূলিকাসু যোজনাসু ‘‘ন কামধাতুযা চুতস্স কামধাতুং রূপধাতুং অরূপধাতুং উপপজ্জন্তস্সা’’তি পঠমং যোজেত্ৰা পুন অনুক্কমেন ‘‘ন কামধাতুং উপপজ্জন্তস্সা’’তিআদিকা যোজনা কতা. এৰঞ্হি ন কামধাতুআদিপদেহি যথাৰুত্তধাতুযোযেৰ গহিতা, ন কঞ্চীতি ৰিঞ্ঞাযতি. যথা অনুসযৰারে ‘‘অনুসেন্তীতি পদস্স উপ্পজ্জন্তীতি অত্থো গহিতো’’তি ৰুত্তং, তত্থাপি উপ্পজ্জমানমেৰ সন্ধায উপ্পজ্জন্তীতি গহেতুং ন সক্কা ‘‘যস্স কামরাগানুসযো অনুসেতি, তস্স পটিঘানুসযো অনুসেতীতি? আমন্তা’’তিআদিৰচনতো. অথাপি অপ্পহীনতং সন্ধায উপ্পজ্জন্তীতি অত্থো তত্থ গহিতো, ইধাপি সো ন ন যুজ্জতীতি. ভঙ্গাতি ভঞ্জিতব্বা, দ্ৰিধা কাতব্বাতি অত্থো. ননু ন কোচি অনুসযো যত্থ উপ্পজ্জন্তস্স অনুসেতি নানুসেতি চাতি দ্ৰিধা কাতব্বা, তত্থেৰ কস্মা ‘‘কতি অনুসযা ভঙ্গা? অনুসযা ভঙ্গা নত্থী’’তি পুচ্ছাৰিস্সজ্জনানি কতানি. ন হি পকারন্তরাভাৰে সংসযো যুত্তোতি? ন ন যুত্তো, ‘‘অনুসযা ভঙ্গা নত্থী’’তি অৰুত্তে ভঙ্গাভাৰস্স অৰিঞ্ঞাতত্তাতি.
ধাতুৰারৰণ্ণনা নিট্ঠিতা.
অনুসযযমকৰণ্ণনা নিট্ঠিতা.
৮. চিত্তযমকং
উদ্দেসৰারৰণ্ণনা
১-৬২. চিত্তযমকৰণ্ণনাযং আদিতোৰ তযো সুদ্ধিকমহাৰারা হোন্তীতি ইমে তযো মহাৰারা সরাগাদিকুসলাদীহি মিস্সকা সুদ্ধিকা চ, তেসু আদিতো সুদ্ধিকা হোন্তীতি অত্থো. মিস্সকেসু চ একেকস্মিং সরাগাদিমিস্সকচিত্তে তযো তযো মহাৰারা, তে তত্থ তত্থ পন ৰুত্তে সম্পিণ্ডেত্ৰা ‘‘সোল়স পুগ্গলৰারা’’তিআদি ৰুত্তং, ন নিরন্তরং ৰুত্তেতি. ‘‘যস্স চিত্তং উপ্পজ্জতি ন নিরুজ্ঝতি, তস্স চিত্তং নিরুজ্ঝিস্সতি নুপ্পজ্জিস্সতী’’তিআদিনা উপ্পাদনিরোধানং পচ্চুপ্পন্নানাগতকালানঞ্চ সংসগ্গৰসেন একেকায পুচ্ছায পৰত্তত্তা ‘‘উপ্পাদনিরোধকালসম্ভেদৰারো’’তি ৰুত্তো. এৰং সেসানম্পি ৰারানং তংতংনামতা পাল়িঅনুসারেন ৰেদিতব্বা.
উদ্দেসৰারৰণ্ণনা নিট্ঠিতা.
নিদ্দেসৰারৰণ্ণনা
৬৩. তথারূপস্সেৰ খীণাসৰস্স চিত্তং সন্ধাযাতি ইদং উপ্পাদক্খণসমঙ্গিপচ্ছিমচিত্তসমঙ্গিম্হি পুগ্গলে অধিপ্পেতে তঞ্চ চিত্তং অধিপ্পেতমেৰ হোতীতি কত্ৰা ৰুত্তন্তি দট্ঠব্বং. অরহতো পচ্ছিমচিত্তম্পীতি নুপ্পজ্জতি নিরুজ্ঝতীতি এৰংপকারং ভঙ্গক্খণসমঙ্গিমেৰ সন্ধায ৰুত্তং.
৬৫-৮২. উপ্পাদৰারস্স দুতিযপুচ্ছাৰিস্সজ্জনে চিত্তস্স ভঙ্গক্খণে, নিরোধসমাপন্নানং, অসঞ্ঞসত্তানং তেসং চিত্তং উপ্পজ্জিত্থ, নো চ তেসং চিত্তং উপ্পজ্জতীতি এত্থ ‘‘চিত্তস্স ভঙ্গক্খণে তেসং চিত্তং উপ্পজ্জিত্থা’’তি এতস্স ‘‘সব্বেসং চিত্তং খণপচ্চুপ্পন্নমেৰ হুত্ৰা উপ্পাদক্খণং অতীতত্তা উপ্পজ্জিত্থ নামা’’তি অত্থো ৰুত্তো. চিত্তস্স উপ্পাদক্খণে তেসং চিত্তং উপ্পজ্জিত্থ চেৰ উপ্পজ্জতি চাতি এতস্সপি উপ্পাদং পত্তত্তা উপ্পজ্জিত্থ, অনতীতত্তা উপ্পজ্জতি নামাতি দ্ৰযমেতং এৰং ন সক্কা ৰত্তুং. ন হি খণপচ্চুপ্পন্নে ‘‘উপ্পজ্জিত্থা’’তি অতীতৰোহারো অত্থি. যদি সিযা, যং ৰা পন চিত্তং উপ্পজ্জিত্থ, তং চিত্তং উপ্পজ্জতীতি এত্থ ‘‘নো’’তি অৰত্ৰা ৰিভজিতব্বং সিযা. তথা ‘‘যং চিত্তং উপ্পজ্জতি, তং চিত্তং উপ্পজ্জিত্থা’’তি এত্থ চ ‘‘নো’’তি অৰত্ৰা ‘‘আমন্তা’’তি ৰত্তব্বং সিযা. ‘‘চিত্তস্স ভঙ্গক্খণে’’তি পন ভিজ্জমানচিত্তসমঙ্গী পুগ্গলো ৰুত্তো, তস্স অতীতং চিত্তং উপ্পজ্জিত্থ, ন চ কিঞ্চি চিত্তং উপ্পজ্জতি. চিত্তস্স উপ্পাদক্খণেতি চ উপ্পজ্জমানচিত্তসমঙ্গী পুগ্গলো ৰুত্তো, তস্সপি অতীতং চিত্তং উপ্পজ্জিত্থ, তং পন চিত্তং উপ্পজ্জতীতি এৰমেত্থ অত্থো দট্ঠব্বো. চিত্তন্তি হি সামঞ্ঞৰচনং একস্মিং অনেকস্মিঞ্চ যথাগহিতৰিসেসে তিট্ঠতীতি. ‘‘যস্স ৰা পন চিত্তং উপ্পজ্জিস্সতি, তস্স চিত্তং উপ্পজ্জতীতি? চিত্তস্স ভঙ্গক্খণে’’তি এত্থ যস্স ৰা পন চিত্তং উপ্পজ্জিস্সতীতি এতেন সন্নিট্ঠানেন গহিতপুগ্গলস্সেৰ চিত্তস্স ভঙ্গক্খণেতি এৰং সব্বত্থ সন্নিট্ঠানৰসেন নিযমো ৰেদিতব্বো. উপ্পন্নুপ্পজ্জমানৰারো নিরুদ্ধনিরুজ্ঝমানৰারো চ পুগ্গলৰারাদীসু তীসুপি নিন্নানাকরণা উদ্দিট্ঠা নিদ্দিট্ঠা চ. তত্থ পুগ্গলৰারে অৰিসেসেন যং কঞ্চি তাদিসং পুগ্গলং সন্ধায ‘‘উপ্পন্নং উপ্পজ্জমান’’ন্তিআদি ৰুত্তং, ধম্মৰারে চিত্তমেৰ, পুগ্গলধম্মৰারে পুগ্গলং চিত্তঞ্চাতি অযমেত্থ ৰিসেসো দট্ঠব্বো.
৮৩. অতিক্কন্তকালৰারে ইমস্স পুগ্গলৰারত্তা পুগ্গলো পুচ্ছিতোতি পুগ্গলস্সেৰ ৰিস্সজ্জনেন ভৰিতব্বং. যথা যস্স চিত্তং উপ্পজ্জিত্থাতি এতেন ন কোচি পুগ্গলো ন গহিতো, এৰং যস্স চিত্তং উপ্পজ্জমানং খণং খণং ৰীতিক্কন্তং অতিক্কন্তকালন্তি এতেন সন্নিট্ঠানেন ন কোচি ন গহিতো. ন হি সো পুগ্গলো অত্থি, যস্স চিত্তং উপ্পাদক্খণং অতীতং নত্থি, তে চ পন নিরুজ্ঝমানক্খণাতীতচিত্তা ন ন হোন্তীতি পঠমো পঞ্হো ‘‘আমন্তা’’তি ৰিস্সজ্জিতব্বো সিযা, তথা দুতিযততিযা. চতুত্থো পন ‘‘পচ্ছিমচিত্তস্স ভঙ্গক্খণে তেসং চিত্তং ভঙ্গক্খণং অৰীতিক্কন্তং, নো চ তেসং চিত্তং উপ্পাদক্খণং অৰীতিক্কন্তং, ইতরেসং চিত্তং ভঙ্গক্খণঞ্চ অৰীতিক্কন্তং উপ্পাদক্খণঞ্চ অৰীতিক্কন্ত’’ন্তি ৰিস্সজ্জিতব্বো ভৰেয্য, তথা অৰিস্সজ্জেত্ৰা কস্মা সব্বত্থ চিত্তমেৰ ৰিভত্তন্তি? চিত্তৰসেন পুগ্গলৰৰত্থানতো. খণস্স হি ৰীতিক্কন্ততায অতিক্কন্তকালতাৰচনেন ৰত্তমানস্স চ চিত্তস্স ৰসেন পুগ্গলো উপ্পাদক্খণাতীতচিত্তো ৰুত্তো অতীতস্স চ, তত্থ পুরিমস্স চিত্তং ন ভঙ্গক্খণং ৰীতিক্কন্তং পচ্ছিমস্স ৰীতিক্কন্তন্তি এৰমাদিকো পুগ্গলৰিভাগো যস্স চিত্তস্স ৰসেন পুগ্গলৰৰত্থানং হোতি, তস্স চিত্তস্স তংতংখণৰীতিক্কমাৰীতিক্কমদস্সনৰসেন দস্সিতো হোতীতি সব্বৰিস্সজ্জনেসু চিত্তমেৰ ৰিভত্তং. অথ ৰা নযিধ ধম্মমত্তৰিসিট্ঠো পুগ্গলো পুচ্ছিতো, অথ খো পুগ্গলৰিসিট্ঠং চিত্তং, তস্মা চিত্তমেৰ ৰিস্সজ্জিতন্তি ৰেদিতব্বং. যদিপি পুগ্গলপ্পধানা পুচ্ছা, অথাপি চিত্তপ্পধানা, উভযথাপি দুতিযপুচ্ছায ‘‘আমন্তা’’তি ৰত্তব্বং সিযা, তথা পন অৰত্ৰা নিরোধক্খণৰীতিক্কমেন অতিক্কন্তকালতা ন উপ্পাদক্খণৰীতিক্কমেন অতিক্কন্তকালতা ৰিয ৰত্তমানস্স অত্থীতি দস্সনত্থং ‘‘অতীতং চিত্ত’’ন্তি ৰুত্তন্তি দট্ঠব্বং. যস্স চিত্তং ন উপ্পজ্জমানন্তি এত্থ উপ্পজ্জমানং খণং খণং ৰীতিক্কন্তং অতিক্কন্তকালং যস্স চিত্তং ন হোতীতি অত্থো. এস নযো ‘‘ন নিরুজ্ঝমান’’ন্তি এত্থাপি.
১১৪-১১৬. মিস্সকৰারেসু যস্স সরাগং চিত্তং উপ্পজ্জতি ন নিরুজ্ঝতি, তস্স চিত্তং নিরুজ্ঝিস্সতি নুপ্পজ্জিস্সতীতি পুচ্ছা, নোতি ৰিস্সজ্জনঞ্চ অট্ঠকথাযং দস্সিতং. পাল়িযং পন ‘‘যস্স সরাগং চিত্তং উপ্পজ্জতি ন নিরুজ্ঝতি, তস্স সরাগং চিত্তং নিরুজ্ঝিস্সতি নুপ্পজ্জিস্সতী’’তি মাতিকাঠপনাযং ৰুত্তত্তা ৰিস্সজ্জনেপি তথেৰ সন্নিট্ঠানসংসযত্থেসু সরাগাদিমিস্সকচিত্তৰসেনেৰ পুচ্ছা উদ্ধরিত্ৰা ‘‘সরাগপচ্ছিমচিত্তস্স উপ্পাদক্খণে তেসং সরাগং চিত্তং উপ্পজ্জতি ন নিরুজ্ঝতি নিরুজ্ঝিস্সতি নুপ্পজ্জিস্সতি, ইতরেসং সরাগচিত্তস্স উপ্পাদক্খণে তেসং সরাগং চিত্তং উপ্পজ্জতি ন নিরুজ্ঝতি নিরুজ্ঝিস্সতি চেৰ উপ্পজ্জিস্সতি চা’’তি এৰমাদিনা নযেন যেভুয্যেন সুদ্ধিকৰারসদিসমেৰ ৰিস্সজ্জনং কাতব্বন্তি কত্ৰা সংখিত্তন্তি ৰিঞ্ঞাযতি.
নিদ্দেসৰারৰণ্ণনা নিট্ঠিতা.
চিত্তযমকৰণ্ণনা নিট্ঠিতা.