১. পণ্ণত্তিৰারো

উদ্দেসৰারৰণ্ণনা

১-৯. আযতনযমকাদীসু চ পণ্ণত্তিৰারে পদসোধনৰারাদীনং ৰচনে কারণং খন্ধযমকে ৰুত্তনযেনেৰ ৰেদিতব্বং. ‘‘একাদস একাদস কত্ৰা তেত্তিংসসতং যমকানী’’তিআদিনা কেসুচি পোত্থকেসু গণনা লিখিতা, সা তথা ন হোতি. ‘‘দ্ৰত্তিংসসত’’ন্তিআদিনা অঞ্ঞত্থ লিখিতা.

উদ্দেসৰারৰণ্ণনা নিট্ঠিতা.

নিদ্দেসৰারৰণ্ণনা

১০-১৭. ৰাযনট্ঠেনাতি পসারণট্ঠেন, পাকটভাৰট্ঠেন ৰা. ‘‘কাযো ধম্মো’’তি চ ৰুচ্চমানং সব্বং সসভাৰং আযতনমেৰাতি ‘‘কাযো আযতন’’ন্তি, ‘‘ধম্মো আযতন’’ন্তি চ এত্থ ‘‘আমন্তা’’তি ৰুত্তং. কাযৰচনেন পন ধম্মৰচনেন চ অৰুচ্চমানং কঞ্চি সসভাৰং নত্থীতি ‘‘ন কাযো নাযতনং, ন ধম্মো নাযতন’’ন্তি এত্থ ‘‘আমন্তা’’ইচ্চেৰ ৰুত্তং.

নিদ্দেসৰারৰণ্ণনা নিট্ঠিতা.