৫. ঝানসুত্তৰণ্ণনা

৩৬. পঞ্চমে অনিচ্চতোতি ইমিনা নিচ্চপ্পটিক্খেপতো তেসং অনিচ্চতমাহ. ততো এৰ উদযৰযৰন্ততো ৰিপরিণামতো তাৰকালিকতো চ তে অনিচ্চাতি জোতিতং হোতি. যঞ্হি নিচ্চং ন হোতি, তং উদযৰযপরিচ্ছিন্নজরায মরণেন চাতি দ্ৰেধা ৰিপরিণতং ইত্তরক্খণমেৰ চ হোতি. দুক্খতোতি ন সুখতো. ইমিনা সুখপ্পটিক্খেপতো তেসং দুক্খতমাহ. ততো এৰ চ অভিণ্হপ্পটিপীল়নতো দুক্খৰত্থুতো চ তে দুক্খাতি জোতিতং হোতি. উদযৰযৰন্ততায হি তে অভিণ্হপ্পটিপীল়নতো নিরন্তরদুক্খতায দুক্খস্সেৰ চ অধিট্ঠানভূতো. পচ্চযযাপনীযতায রোগমূলতায চ রোগতো. দুক্খতাসূলযোগতো কিলেসাসুচিপগ্ঘরতো উপ্পাদজরাভঙ্গেহি উদ্ধুমাতপক্কভিজ্জনতো চ গণ্ডতো. পীল়াজননতো অন্তোতুদনতো দুন্নীহরণতো চ সল্লতো. অৰড্ঢিআৰহনতো অঘৰত্থুতো চ অঘতো. অসেরিভাৰজননতো আবাধপ্পতিট্ঠানতায চ আবাধতো. অৰসৰত্তনতো অৰিধেয্যতায চ পরতো. ব্যাধিজরামরণেহি পলুজ্জনীযতায পলোকতো. সামিনিৰাসীকারকৰেদকঅধিট্ঠাযকৰিরহতো সুঞ্ঞতো. অত্তপ্পটিক্খেপট্ঠেন অনত্ততো. রূপাদিধম্মাপি যথা ন এত্থ অত্তা অত্থীতি অনত্তা, এৰং সযম্পি অত্তা ন হোন্তীতি অনত্তা. তেন অব্যাপারতো নিরীহতো তুচ্ছতো অনত্তাতি দীপিতং হোতি.

লক্খণত্তযমেৰ সুখাৰবোধনত্থং একাদসহি পদেহি ৰিভজিত্ৰা গহিতন্তি দস্সেতুং ‘‘যস্মা অনিচ্চতো’’তিআদি ৰুত্তং. অন্তোসমাপত্তিযন্তি সমাপত্তীনং সহজাততায সমাপত্তীনং অব্ভন্তরে চিত্তং পটিসংহরতীতি তপ্পটিবদ্ধছন্দরাগাদিকিলেসৰিক্খম্ভনেন ৰিপস্সনাচিত্তং পটিসংহরতি. তেনাহ ‘‘মোচেতি অপনেতী’’তি. সৰনৰসেনাতি ‘‘সব্বসঙ্খারসমথো’’তিআদিনা সৰনৰসেন. থুতিৰসেনাতি তথেৰ থোমনাৰসেন গুণতো সংকিত্তনৰসেন. পরিযত্তিৰসেনাতি তস্স ধম্মস্স পরিযাপুণনৰসেন. পঞ্ঞত্তিৰসেনাতি তদত্থস্স পঞ্ঞাপনৰসেন. আরম্মণকরণৰসেনেৰ উপসংহরতি মগ্গচিত্তং, ‘‘এতং সন্ত’’ন্তিআদি পন অৰধারণনিৰত্তিতত্থদস্সনং. যথা ৰিপস্সনা ‘‘এতং সন্তং এতং পণীত’’ন্তিআদিনা অসঙ্খতায ধাতুযা চিত্তং উপসংহরতি, এৰং মগ্গো নিব্বানং সচ্ছিকিরিযাভিসমযৰসেন অভিসমেন্তো তত্থ লব্ভমানে সব্বেপি ৰিসেসে অসম্মোহতো পটিৰিজ্ঝন্তো তত্থ চিত্তং উপসংহরতি. তেনাহ ‘‘ইমিনা পন আকারেনা’’তিআদি.

সো তত্থ ঠিতোতি সো অদন্ধৰিপস্সকো যোগী তত্থ তায অনিচ্চাদিলক্খণত্তযারম্মণায ৰিপস্সনায ঠিতো. সব্বসোতি সব্বত্থ তস্স তস্স মগ্গস্স অধিগমায নিব্বত্তিতসমথৰিপস্সনাসু. অসক্কোন্তো অনাগামী হোতীতি হেট্ঠিমমগ্গাৰহাসু এৰ সমথৰিপস্সনায ছন্দরাগং পহায অগ্গমগ্গাৰহাসু নিকন্তিং পরিযাদাতুং অসক্কোন্তো অনাগামিতাযমেৰ সণ্ঠাতি.

সমতিক্কন্তত্তাতি সমথৰসেন ৰিপস্সনাৰসেন চাতি সব্বথাপি রূপস্স সমতিক্কন্তত্তা. তেনাহ ‘‘অযং হী’’তিআদি. অনেনাতি যোগিনা. তং অতিক্কম্মাতি ইদং যো পঠমং পঞ্চৰোকারএকৰোকারপরিযাপন্নে ধম্মে সম্মদেৰ সম্মসিত্ৰা তে ৰিস্সজ্জেত্ৰা ততো অরূপসমাপত্তিং সমাপজ্জিত্ৰা অরূপধম্মে সম্মসতি, তং সন্ধায ৰুত্তং. তেনাহ ‘‘ইদানি অরূপং সম্মসতী’’তি.

ঝানসুত্তৰণ্ণনা নিট্ঠিতা.