৬. আনন্দসুত্তৰণ্ণনা

৩৭. ছট্ঠে ওকাসং অৰসরং অধিগচ্ছতি এতেনাতি ওকাসাধিগমো, মগ্গফলসুখাধিগমায ওকাসভাৰতো ৰা ওকাসো, তস্স অধিগমো ওকাসাধিগমো. এত্থ চ দীঘনিকাযেনেৰ (দী. নি. ২.২৮৮) পন সুত্তন্তদেসনাযং পঠমজ্ঝানং, চতুত্থজ্ঝানং, অরহত্তমগ্গোতি তযো ওকাসাধিগমা আগতা. তত্থ (দী. নি. অট্ঠ. ২.২৮৮) পঠমং ঝানং পঞ্চ নীৰরণানি ৰিক্খম্ভেত্ৰা অত্তনো ওকাসং গহেত্ৰা তিট্ঠতীতি ‘‘পঠমো ওকাসাধিগমো’’তি ৰুত্তং. চতুত্থজ্ঝানং পন সুখদুক্খং ৰিক্খম্ভেত্ৰা অত্তনো ওকাসং গহেত্ৰা তিট্ঠতীতি দুতিযো ওকাসাধিগমো. অরহত্তমগ্গো সব্বকিলেসে ৰিক্খম্ভেত্ৰা অত্তনো ওকাসং গহেত্ৰা তিট্ঠতীতি ‘‘ততিযো ওকাসাধিগমো’’তি ৰুত্তো. ইধ পন ৰক্খমানানি তীণি অরূপজ্ঝানানি সন্ধায ‘‘ওকাসাধিগমো’’তি ৰুত্তং. তেসংযেৰ চ গহণে কারণং সযমেৰ ৰক্খতি.

সত্তানং ৰিসুদ্ধিং পাপনত্থাযাতি রাগাদীহি মলেহি অভিজ্ঝাৰিসমলোভাদীহি চ উপক্কিলেসেহি কিলিট্ঠচিত্তানং সত্তানং ৰিসুদ্ধিপাপনত্থায সমতিক্কমনত্থায. আযতিং অনুপ্পজ্জনঞ্হি ইধ ‘‘সমতিক্কমো’’তি ৰুত্তং. অত্থং গমনত্থাযাতি কাযিকদুক্খস্স চ চেতসিকদোমনস্সস্স চাতি ইমেসং দ্ৰিন্নং অত্থঙ্গমায, নিরোধাযাতি অত্থো. ঞাযতি নিচ্ছযেন কমতি নিব্বানং, তং ৰা ঞাযতি পটিৰিজ্ঝীযতি এতেনাতি ঞাযো, সমুচ্ছেদভাৰো অরিযমগ্গোতি আহ ‘‘সহৰিপস্সনকস্স মগ্গস্সা’’তি. পচ্চক্খকরণত্থাযাতি অত্তপচ্চক্খতায. পরপচ্চযেন ৰিনা পচ্চক্খকরণঞ্হি ‘‘সচ্ছিকিরিযা’’তি ৰুচ্চতি. অসম্ভিন্নন্তি পিত্তসেম্হাদীহি অপলিবুদ্ধং অনুপহতং.

রাগানুগতো সমাধি অভিনতো নাম হোতি আরম্মণে অভিমুখাভাৰেন পৰত্তিযা, দোসানুগতো পন অপনতো অপগমনৰসেন পৰত্তিযা, তদুভযপ্পটিক্খেপেন ‘‘ন চাভিনতো ন চাপনতো’’তি ৰুত্তন্তি আহ ‘‘রাগৰসেনা’’তিআদি. ন সসঙ্খারনিগ্গয্হৰারিতগতোতি লোকিযজ্ঝানচিত্তানি ৰিয ন সসঙ্খারেন সপ্পযোগেন তদঙ্গপ্পহানৰিক্খম্ভনপ্পহানৰসেন চ নিগ্গহেত্ৰা ৰারেত্ৰা ঠিতো. কিঞ্চরহি কিলেসানং ছিন্নন্তে উপ্পন্নো. তথাভূতং ফলসমাধিং সন্ধাযেতং ৰুত্তং. তেনাহ ‘‘ন সসঙ্খারেন…পে… ছিন্নন্তে উপ্পন্নো’’তি.

আনন্দসুত্তৰণ্ণনা নিট্ঠিতা.