৫. পিঙ্গিযানীসুত্তৰণ্ণনা

১৯৫. পঞ্চমে সব্বসঙ্গাহিকন্তি সরীরগতস্স চেৰ ৰত্থালঙ্কারগতস্স চাতি সব্বস্স নীলভাৰস্স সঙ্গাহকৰচনং. তস্সেৰাতি নীলাদিসব্বসঙ্গাহিকৰসেন ৰুত্তঅত্থস্সেৰ. ৰিভাগদস্সনন্তি পভেদদস্সনং. যথা তে লিচ্ছৰিরাজানো অপীতাদিৰণ্ণা এৰ কেচি কেচি ৰিলেপনৰসেন পীতাদিৰণ্ণা খাযিংসু, এৰং অনীলাদিৰণ্ণা এৰ কেচি ৰিলেপনৰসেন নীলাদিৰণ্ণা খাযিংসু. তে কির সুৰণ্ণৰিচিত্তেহি মণিওভাসেহি একনীলা ৰিয খাযন্তি.

কোকনদন্তি ৰা পদুমৰিসেসনং যথা ‘‘কোকাসক’’ন্তি. তং কির বহুপত্তং ৰণ্ণসম্পন্নং অতিৰিয সুগন্ধঞ্চ হোতি. অযঞ্হেত্থ অত্থো – যথা কোকনদসঙ্খাতং পদুমং পাতো সূরিযুগ্গমনৰেলায ফুল্লং ৰিকসিতং অৰীতগন্ধং সিযা ৰিরোচমানং, এৰং সরীরগন্ধেন গুণগন্ধেন চ সুগন্ধং, সরদকালে অন্তলিক্খে আদিচ্চমিৰ অত্তনো তেজসা তপন্তং, অঙ্গেহি নিচ্ছরন্তজুতিতায অঙ্গীরসং সম্বুদ্ধং পস্সাতি.

পিঙ্গিযানীসুত্তৰণ্ণনা নিট্ঠিতা.