২-৪. পঞ্হব্যাকরণসুত্তাদিৰণ্ণনা

৪২-৪৪. দুতিযে এতেসং পঞ্হানন্তি একংসব্যাকরণাদীনং চতুন্নং পঞ্হানং. তস্মিং তস্মিং ঠানে ব্যাকরণং জানাতীতি ‘‘চক্খুং অনিচ্চ’’ন্তি পুট্ঠে ‘‘অনিচ্চ’’ন্তি একংসেনেৰ ব্যাকাতব্বং. ‘‘অনিচ্চা নাম চক্খু’’ন্তি পুট্ঠে পন ‘‘ন কেৰলং চক্খুমেৰ, সোতম্পি অনিচ্চ’’ন্তি এৰং ৰিভজিত্ৰা ব্যাকাতব্বং. ‘‘যথা চক্খুং তথা সোতং, যথা সোতং তথা চক্খু’’ন্তি পুট্ঠে ‘‘কেনট্ঠেন পুচ্ছসী’’তি পটিপুচ্ছিত্ৰা ‘‘দস্সনট্ঠেন পুচ্ছামী’’তি ৰুত্তে ‘‘ন হী’’তি ব্যাকাতব্বং. ‘‘অনিচ্চট্ঠেন পুচ্ছামী’’তি ৰুত্তে ‘‘আমা’’তি ব্যাকাতব্বং. ‘‘তং জীৰং তং সরীর’’ন্তিআদীনি পুট্ঠেন পন ‘‘অব্যাকতমেতং ভগৰতা’’তি ঠপেতব্বো, এস পঞ্হো ন ব্যাকাতব্বোতি এৰং জানাতীতি অত্থো. অত্থসমাগমেনাতি অত্থস্স পটিলাভেন লদ্ধব্বেন. সমিতি সঙ্গতি সমোধানন্তি সমযো, পটিলাভো. সমযো এৰ অভিসমযো, অভিমুখভাৰেন ৰা সমযো অভিসমযোতি এৰমেত্থ পদত্থো ৰেদিতব্বো. সেসং সুৰিঞ্ঞেয্যমেৰ. ততিযচতুত্থানি উত্তানত্থানেৰ.

পঞ্হব্যাকরণসুত্তাদিৰণ্ণনা নিট্ঠিতা.